Malumalu o Katelani,, saunia e Al Rounds

1–7 Setema: ‟Mo le Faaolataga o Siona”

Mataupu Faavae ma Feagaiga 94–97

I aso anamua, na poloaiina e le Alii ia Mose e fau se fale fetafai “e pei o le mamanu sa faaali atu ia te [ia] i le mauga” (Eperu 8:5; tagai foi i le Esoto 25:8–9). O le fale fetafai o le a avea ma totonugalemu o le tolauapiga i le vao a Siona (tagai i le Numera 2:1–2).

I le 1833, sa poloaiina ai e le Alii Iosefa Samita e fausia malumalu “e le tusa ai ma le ala a le lalolagi” ae “e tusa ma le ala o le a ou faaali atu” (Mataupu Faavae ma Feagaiga 95:13–14; tagai foi i le 97:10). E pei o le fale fetafai i le vao, o le malumalu sa faamoemoe e avea o se vaaiga tutotonu i Katelani (tagai i le Mataupu Faavae ma Feagaiga 94:1).

O aso nei, o loo maua malumalu i le salafa o le lalolagi. E tusa lava pe le o i ai i le totonugalemu o o tatou aai, latou te faasino atu i tatou ia Keriso, o lē e tatau ona avea ma totonugalemu o o tatou olaga. E ui ina esesese malumalu taitasi i foliga vaaia, ae e tutusa lava mamanu paia tatou te aoao ai i totonu—o se fuafuaga faalelagi e toe aumai ai i tatou i le afioaga o le Atua. O sauniga ma feagaiga paia e faafesootaia i tatou ia Keriso ma faamalosia ai o tatou aiga “e lē tusa ma le ala a le lalolagi” ae e ala i le mamanu e faaali mai e le Atua ia i tatou.

Tagai i le Au Paia, 1:169–70; “O Se Maota mo lo Tatou Atua,” i le Revelations in Context, 165–73.

Manatu mo le Aoaoina i le Aiga ma i le Lotu

Mataupu Faavae ma Feagaiga 94; 97:10–17

E mafai ona ou “faapaia atoa i le Alii.”

I le Mataupu Faavae ma Feagaiga 94, ua tuuina mai ai e le Alii ia faatonuga e uiga i le fausiaina o fale o le pulega i Katelani—o se ofisa ma se fale lomitusi. O le a se mea ua faagaeetia ai oe e uiga i le fetalaiga a le Alii e uiga i nei fale i le Mataupu Faavae ma Feagaiga 94:2–12? E faapefea ona faatusatusa i mea ua Ia fetalai mai ai e uiga i le malumalu i le 97:10–17?

O le a le uiga ia te oe o le “faapaia atoa i le Alii”?

Mataupu Faavae ma Feagaiga 95

E a’oa’i e le Alii i latou e alofa i ai o Ia.

Ina ua maua mai le faaaliga i le vaega 95 , pe tusa ma le lima masina talu ona poloaiina e le Alii le Au Paia e fausia se fale o le Atua (tagai i le Mataupu Faavae ma Feagaiga 88:117–19)—ma latou te le’i amataina lava. Maitau le ala na faasa’oina ai i latou e le Alii i lenei faaaliga. E mafai foi ona e faia se lisi o mataupu faavae e te maua mo le tuuina atu o faasa’oga musuia. O le a se mea ua e aoaoina e uiga i le Faaola mai le auala sa Ia faasa’oina ai Lana Au Paia?

Tagai foi i le Mataupu Faavae ma Feagaiga 121:43–44; D. Todd Christofferson, “Ou te Aoai Atu ma Sasa i Latou Uma Ou te Alofa I Ai,” Liahona, Me 2011, 97–100.

E Alofa le Atua i Ana Fanau

Ua molimau mai Elder Wakolo e uiga i le alofa o le Atua ma faamatala le auala Na te faaalia ai lena alofa i Ana fanau.

Mataupu Faavae ma Feagaiga 95:8, 11–17; 97:10–17

O le malumalu o le maota o le Alii.

Ina ua uma ona aoa’iina mo le le fausiaina o se maota o le Alii i Katelani, sa filifilia loa e taitai o le Ekalesia se tulaga i totonu o se togā saito o le a latou fausia ai. Sa momo’e loa lava Ailama Samita, le uso o le Perofeta, e aumai se taivai e amata ai le faamamaina o le fanua. “O loo tatou sauniuni e fausia se maota mo le Alii, na ia saunoa ai, “ma ua ou naunau ia avea ma tagata e muamua i le galuega” (i le Aoaoga a Peresitene o le Ekalesia: Iosefa Samita [2007], 271, 273). Aisea e te manatu ai sa matuai naunau ai lava Ailama e fausia le malumalu? Mafaufau loloto i le mea lenei ao e faitau i le Mataupu Faavae ma Feagaiga 95:8, 11–17; 97:10–17.

I o tatou aso, o loo ‟faatelevaveina e le Alii le saoasaoa lea o loo tatou fausia ai malumalu” (Russell M. Nelson, “Taulai Atu i le Malumalu,” Liahona, Nov. 2022, 121). Afai e fesili atu se tasi ia te oe pe aisea ua fausia ai e le Ekalesia a Iesu Keriso le tele o malumalu, o le a sau tala e fai atu? Vaavaai mo ni tali talafeagai i le:

• O le sāvali a Peresitene Russell M. Nelson i le faasilasilaina atu o malumalu fou (e pei o le “O Le Taimi Lenei,” Liahona, Me 2022, 126).

• “Aisea e Fausia ai e le Au Paia o Aso e Gata Ai ia Malumalu” (temples.ChurchofJesusChrist.org).

• O le vitiō ‟Temples” (Gospel Library).

O le a le Malumalu?

O le eseesega o falesa, lea e feiloai ai le Au Paia o Aso e Gata Ai mo tapuaiga i Aso Sa, ma malumalu o loo faamatalaina foi.

E mafai ona e faatusatusaina taumafaiga a le Au Paia e fausia le Malumalu o Katelani i au taumafaiga e saunia mo aafiaga anoa ma le Alii i totonu o le malumalu. E mafai faapefea ona e faaalia le lagona lava lea e tasi o le faanatinati na lagonaina e Ailama Samita agai i le maota paia o le Alii? Mo se faataitaiga, o le a se mea e mafai ona e faia e pei o le faamamaina o le fanua, e pei ona faia e Ailama? O a osigataulaga e te lagona e finagalo le Alii e te faia? (tagai i le Mataupu Faavae ma Feagaiga 97:12).

Tagai foi i le “Holy Temples on Mount Zion,” Hymns, nu. 289; Autu ma Fesili, “Malumalu,” Gospel Library.

Ua faamamaina e Ailama Samita le fanua mo le Malumalu o Katelani.

Mataupu Faavae ma Feagaiga 97:8–9

‟Ua taliaina i latou e a’u.”

Mafaufau i se taimi na taliaina ai oe—pe le taliaina—i se vaega po o se au. E faapefea ona tutusa pe ese lena mea mai le mea o loo aoao mai i le Mataupu Faavae ma Feagaiga 97:8–9 e uiga i le taliaina e le Alii? O le a sou manatu o le a le mea o loo taumafai le Alii e aoao atu ia te oe i le upu faafaatusa i le fuaiupu 9?

Tagai foi i le sāvali a Erich W. Kopischke, “O Le Taliaina e le Alii,” Liahona, Me 2013, 104–6.

Fatu se siosiomaga faaleagaga mo le aoao mai ma le aoao atu. “O le Agaga Paia,” na folafola mai e Iesu, “na te a’oa’o ia te outou i mea uma lava” (Ioane 14:26). O lea la, pe o e aoaoina na o oe pe faatasi ma isi, ia avea o se faamuamua le valaaulia o le Agaga. O musika paia, tatalo, ma fegalegaleaiga alofa e mafai ona fesoasoani uma e fausia ai se nofoaga filemu, faaleagaga lea e mafai ai e le Agaga Paia ona aoao atu ia te oe le upumoni.

Mataupu Faavae ma Feagaiga 97:18–28

O Siona o “e loto mamā.”

I le Au Paia i le vaitau o le 1830, o Siona o se nofoaga. I le faaaliga i le vaega 97, na faalautele ai e le Alii le faauigaga e faamatala ai se nuu—‟o e loto mama” (fuaiupu21). A e faitau i fuaiupu 18–28, e mafai ona e suitulagaina le faauigaga lenei pe a e faitau i le upu Siona. O le a le uiga ia te oe o le ia loto mama?

Tagai foi i le Mose 7:18.

Mo nisi manatu, tagai i lomiga o lenei masina o mekasini o le Liahona ma le Mo le Malosi o le Autalavou .

Tagata, Nofoaga, Mea e Tutupu

• Ailama Samita

• N. K. Whitney & Co. Faleoloa

• Malumalu o Katelani

Kiliki e vaai i isi mea

Manatu mo le Aoaoina o Tamaiti

Mataupu Faavae ma Feagaiga 95:8; 97:10–17

O le malumalu o le maota o le Alii.

• Mo sina talaaga i vaega 95 ma le 97, e mafai ona e faasoa atu i lau fanau “O Le Malumalu o Katelani” i le Tala o le Mataupu Faavae ma Feagaiga mo le Au Faitau Laiti (Gospel Library; tagai foi i le Au Paia, 1:210). E ono fiafia lau fanau e faafoliga o loo latou fesoasoani i le fausiaina o se malumalu (tipiina laupapa, tu’itu’i fao, vali puipui, ma isi). E mafai foi ona e faaali atu ia i latou se ata o le Malumalu o Katelani, e pei o nā o loo i lenei otootoga, a o e faitauina le Mataupu Faavae ma Feagaiga 95:8 e aoao ai lau fanau pe aisea e finagalo ai le Alii ia tatou fausia malumalu.

The Kirtland Temple

• A uma ona faitau faatasi le Mataupu Faavae ma Feagaiga 97:15–16, e mafai e oe ma lau fanau ona fefaasoaai le tasi ma le isi pe aisea e taua ai le malumalu ia te outou. E mafai fo’i ona outou usu faatasi se pese e fesoasoani i lau fanau ia lagona le faaaloalo mo le maota o le Alii, e pei o le “Ou Te Fia Vaai i le Malumalu” (Tusipese a Tamaiti, 99). Aisea e paia ai le malumalu?

Mataupu Faavae ma Feagaiga 97:1–2, 8–9, 21

O Siona o “e loto mama.”

• Ina ia fesoasoani i lau fanau ia malamalama po o le a le uiga o le upu mama o loo i le Mataupu Faavae ma Feagaiga 97:21, e mafai ona tou vaai faatasi i se ipu vai mamā ma faaopoopo se mea i le vai ia lē mamā ai (e pei o le palapala po o le pepa fai meaai). Aisea e taua ai le mamā o le vai? Ona mafai lea e lau fanau ona faitau le fuaiupu 21 ma tuu o latou tamailima i luga o le upu mamā. O le a le uiga o le, ia mamā o tatou loto? Ofuaiupu 1–2 ma le 8–9 e mafai ona maua ai ni nai manatu. E faapefea ona fesoasoani le Faaola ia mamā o tatou loto?

E finagalo le Tama Faalelagi ia ou loto mamā.

Mataupu Faavae ma Feagaiga 97:8–9

E faamanuiaina e le Alii tagata o e tausia feagaiga ma Ia.

• Pe o iloa e lau fanau po o a feagaiga tatou te osia ma le Alii pe a tatou papatiso po o i totonu o le malumalu? Mafaufau e iloilo na feagaiga ma i latou e ala i le faitauina o le Mosaea 18:9–10, 13 po o le Tusitaulima Aoao, 27.2. Faasoa atu i le tasi ma le isi pe o faapefea ona e taumafai e ‟tausi [au] feagaiga e ala i le taulaga” (Mataupu Faavae ma Feagaiga 97:8).

• E mafai ona e valaaulia lau fanau e tusi ni ata o mea o loo faamatala mai i le Mataupu Faavae ma Feagaiga 97:9 . A o latou faasoa mai a latou ata, talanoa e uiga i le ala ua faamanuiaina ai oe e le Alii mo le tausiaina o au feagaiga. E faapefea ona pei na faamanuiaga o se ‟laau fua ua totoina … i se vaitafe mama”?

Mo nisi manatu, tagai i le lomiga o lenei masina o le mekasini o le Uo .

Fausiaina o le Malumalu o Katelani, saunia e Walter Rane