“Mga Tingog sa Pagpahiuli: Kampo sa Zion,” Dali, Sunod Kanako—Alang sa Panimalay ug sa Simbahan: Doktrina ug mga Pakigsaad 2025 (2025)

“Kampo sa Zion,” Dali, Sunod Kanako—Alang sa Panimalay ug sa Simbahan: 2025

Mga Tingog sa Pagpahiuli

Kampo sa Zion

Tungod kay ang Kampo sa Zion wala gayod makapapauli sa mga Santos ngadto sa ilang mga yuta sa Jackson County, daghang mga tawo ang mibati nga ang ilang mga tinguha sa pagtubos sa Zion napakyas. Bisan pa niana, daghang mga miapil sa Kampo sa Zion nahinumdom sa ilang kasinatian ug nakakita giunsa sa Ginoo pagtuman ang usa ka mas taas nga katuyoan sa ilang mga kinabuhi ug sa Iyang gingharian. Ania ang pipila sa ilang mga pagpamatuod.

Joseph Smith

Sobra sa 40 ka tuig human sa Kampo sa Zion, si Joseph Young, kinsa sakop sa kampo, mireport nga si Joseph Smith miingon sa mosunod:

“Mga kaigsoonan, ang uban kaninyo nasuko kanako, tungod kay kamo wala makig-away didto sa Missouri; apan pasultiha ako kaninyo, ang Dios dili buot nga kamo makig-away. Siya dili maka-organisar sa iyang gingharian uban sa napulog duha ka lalaki aron pagbukas sa ganghaan sa mga nasod sa yuta, ug may kapitoan ka mga lalaki nga ubos sa ilang pagdumala nga mosunod sa ilang mga paggiya, gawas kon siya mopili kanila gikan sa pundok sa mga tawo nga mitugyan sa ilang mga kinabuhi, ug kinsa nakahimo og usa ka talagsaong sakripisyo sama sa gibuhat ni Abraham.

“Karon, ang Ginoo nakakuha sa Iyang Napulog Duha ug ang iyang Kapitoan, ug adunay mahimong uban nga mga korum sa mga Seventy nga gitawag, kinsa mao ang mohimo sa sakripisyo, ug kadtong kinsa wala makahimo sa ilang mga sakripisyo ug mga halad karon, mohimo niini sa umaabot.”

Brigham Young

“Sa dihang kami miabot sa Missouri ang Ginoo namulong ngadto sa iyang sulugoon nga si Joseph ug miingon, ‘Akong gidawat ang inyong halad,’ ug kami adunay pribilihiyo sa pagpauli pag-usab. Sa akong pagpauli daghang mga higala nangutana unsay kaayohan sa pagtawag sa mga lalaki sa pagbiya gikan sa ilang trabaho aron sa pag-adto sa Missouri unya mopauli, nga sa dayag walay bisan unsa nga natuman. ‘Kinsa ang nahatagan og kaayohan niini?’ nangutana sila. ‘Kon ang Ginoo tinuod nga nagsugo niini nga pagabuhaton, unsa ang tumong nga iyang napanan-aw sa pagbuhat sa mao?’ … Gisultihan nako kadto nga mga kaigsoonan nga gigantihan ako og dako kaayo—gibayran og sobra nga kantidad—tinuod nga ang akong kaayohan nga nadawat hilabihan sa kadako uban sa kahibalo nga akong nadawat pinaagi sa pagbiyahe kauban sa Propeta.”

Wilford Woodruff

“Didto ako sa Kampo sa Zion uban sa Propeta sa Dios. Nakita nako ang mga pagdumala sa Dios diha kaniya. Nakita nako ang gahom sa Dios diha kaniya. Nakita nako nga siya usa ka Propeta. Unsa ang gipakita kaniya pinaagi sa gahom sa Dios niana nga misyon dako og bili ngari kanako ug sa tanang nakadawat sa iyang mga panudlo.”

“Sa dihang ang mga miyembro sa Kampo sa Zion gitawag, daghan kanamo wala pa gayod sukad magkakita; dili gyod kami kaila ug daghan ang wala makakita sa propeta. Nagkatag gyod mi sa kayutaan, sama sa mais sa ayagan, sa tibuok nasod. Kami mga batan-on nga mga lalaki, ug gitawag kami nianang sayo nga panahon aron moadto ug moluwas sa Zion, ug kon unsa ang among gibuhat amo kining gibuhat pinaagi sa hugot nga pagtuo. Nagpundok kami gikan sa nagkalainlaing mga Estado sa Kirtland ug miadto aron sa pagluwas sa Zion, agig katumanan sa sugo sa Dios kanamo. Ang Dios midawat sa among mga buhat sama sa Iyang gihimo sa mga buhat ni Abraham. Daghan mi og nahimo, bisan kon ang namiya sa kamatuoran [apostates] ug ang mga wala motuo nangutana sa daghang mga higayon, ‘Unsay inyong nahimo?’ Nakabaton mi og kasinatian nga dili gayod namo unta maangkon [diha] sa bisan unsang paagi. Nakabaton mi og kahigayonan sa pagsud-ong sa nawong sa propeta, ug nakahigayon mi pagbiyahe og liboan ka mga milya uban kaniya, ug nakakita sa mga gibuhat sa Espiritu sa Dios diha kaniya, ug ang mga pagpadayag ni Jesukristo nganha kaniya ug sa katumanan niadto nga mga pagpadayag. Ug gipundok niya ang mga duha ka gatos ka mga elder gikan sa tibuok nga nasod nianang sayo nga yugto sa kasaysayan sa Simbahan ug gipadala kami ngadto sa tibuok kalibotan aron sa pagsangyaw sa ebanghelyo ni Jesukristo. Kon ako wala pa mokuyog uban sa Kampo sa Zion wala unta ako dinhi niining adlawa [sa Siyudad sa Salt Lake, nagserbisyo diha sa Korum sa Napulog Duha]. … Pinaagi sa pag-adto didto kami dihadiha nahatagan og oportunidad sa pagsangyaw sa ebanghelyo, ug gidawat sa Ginoo ang among mga kahago. Ug sa among tanan nga mga kahago ug sa mga pagpanggukod, kasagaran nagbutang sa among mga kinabuhi sa kuyaw, kinahanglan kami nga motrabaho ug mopuyo pinaagi sa hugot nga pagtuo.”

“Ang kasinatian nga [among] nakuha sa pagbiyahe sa Kampo sa Zion mas bililhon pa kay sa bulawan.”