Septiyembre 22–28: “Ang Kapunongan sa Anak sa Dios”

Doktrina ug mga Pakigsaad 106–108

Sa unang pagtan-aw, ang Doktrina ug mga Pakigsaad 107 daw ingon lamang og mahitungod sa pag-organisar sa mga katungdanan sa pagkapari ngadto sa usa ka estraktura sa pagpangulo alang sa Simbahan sa Ginoo. Niining higayona kini nga pagpadayag namantala, ang mga miyembro sa Simbahan milabaw na sa kapasidad sa diyotay nga mga lider nga anaa sa kasamtangan. Ang paglatid sa mga tahas ug mga responsibilidad sa Unang Kapangulohan, sa Korum sa Napulog Duha ka Apostoles, sa Seventy, mga bishop, ug mga kapangulohan sa korum gikinahanglan gayod ug makatabang. Apan adunay daghan pa kaayo sa balaang panudlo diha sa seksiyon 107 kay sa unsaon lamang sa pag-organisar sa pagpangulo sa Simbahan. Dinhi, ang Ginoo nagtudlo kanato mahitungod sa Iyang gahom ug awtoridad, “sa Balaan nga Pagkapari, subay sa Kapunongan sa Anak sa Dios” (bersikulo 3). Ang katuyoan sa pagkapari mao ang pag-abli sa “tanan nga espirituhanon nga mga panalangin sa simbahan” alang sa tanang mga anak sa Dios “aron maabli ang kalangitan ngadto kanila” ug “makasinati sa pakig-ambit ug sa presensya sa Dios nga Amahan, ug ni Jesus ang tigpatiwala sa bag-o nga pakigsaad” (mga bersikulo 18–19). Sa pagtudlo nato mahitungod sa Iyang pagkapari, ang Manluluwas nagtudlo nato mahitungod sa Iyang Kaugalingon ug unsaon nato sa pagduol ngadto Kaniya.

Tan-awa sa “Restoring the Ancient Order,” sa Revelations in Context, 208–12.

Mga Ideya alang sa Pagkat-on diha sa Panimalay ug sa Simbahan

Doktrina ug mga Pakigsaad 106; 108

Ang Ginoo nagsuporta nako kon Siya motawag nako sa pagserbisyo.

Sa Doktrina ug mga Pakigsaad 106 ug 108, ang Ginoo mihatag ug tambag ug mga saad ngadto sa duha ka miyembro kinsa gitawag sa pagserbisyo diha sa Simbahan. Samtang magtuon ka sa Iyang tambag, tingali maghunahuna ka mahitungod sa imong kaugalingon nga mga oportunidad sa pagserbisyo sa Ginoo—tingali usa ka buluhaton sa pagpangalagad, usa ka calling sa Simbahan, mga responsibilidad sa inyong pamilya, o espirituwal nga mga pag-aghat sa paghimo og maayo.

Unsa ang imong gibati nga mensahe sa Ginoo nganha kanimo niini nga mga pagpadayag? Unsa nga hugpong sa mga pulong ang labing makahuluganon nganha kanimo? Ania ang pipila nga ikonsiderar:

• Kanus-a ang Ginoo mihatag kanimo og “grasya [o balaan nga tabang] ug kaseguroan” nga makahimo sa pagserbisyo Kaniya? (Doktrina ug mga Pakigsaad 106:8).

• Unsa sa imong hunahuna ang gipasabot sa pagpalig-on sa uban “sa inyong tanan nga mga buhat”? (Doktrina ug mga Pakigsaad 108:7).

Sa dihang si Elder Carl B. Cook nakadawat og lisod nga buluhaton sa Simbahan, mikuha siya og kalig-on gikan sa kasinatian sa usa ka katigulangan. Basaha ang mahitungod niini sa iyang mensahe “Pagserbisyo” (Liahona, Nob. 2016, 110–12). Ikonsiderar ang pagsulat og usa ka sulat sa pag-awhag sa imong mga kaliwatan—o sa imong kaugalingon sa umaabot—sa pagdawat og mga oportunidad sa pagserbisyo sa Ginoo. Ilakip sa imong sulat ang mga kamatuoran nga imong nakat-onan gikan sa mensahe ni Elder Cook, Doktrina ug mga Pakigsaad 106 ug 108, ug sa imong kaugalingon nga mga kasinatian.

Tan-awa usab sa Henry B. Eyring, ““Lakaw Uban Kanako”,” Liahona, Mayo 2017, 82–85; Mga Hilisgotan ug mga Pangutana [Topics and Questions], “Pagserbisyo diha sa mga Calling sa Simbahan [Serving in Church Callings],” Librarya sa Ebanghelyo [Gospel Library]; “Warren Cowdery” ug “‘Wrought Upon’ to Seek a Revelation,” sa Revelations in Context, 219–23, 224–28.

Doktrina ug mga Pakigsaad 107:1–4, 18–20

Ang pagkapari “[nag]sunod sa Kapunongan sa Anak sa Dios.”

Ang Ginoo misugod sa Iyang “pagpadayag sa pagkapari” (Doktrina ug mga Pakigsaad 107, ulohan seksiyon) pinaagi sa pagtudlo kanato sa orihinal nga ngalan sa Melchizedek nga Pagkapari (tan-awa sa mga bersikulo 1–4). Ngano sa imong hunahuna nga importante man nga makahibalo niana? Sa unsang paagi kini nga ngalan makaimpluwensya sa paagi sa imong paghunahuna mahitungod sa pagkapari?

Ibutang kini sa hunahuna samtang magbasa ka mahitungod sa pagkapari, ilabi na sa mga bersikulo 18–20. Unsa ang gipasabot sa “aron maabli ang kalangitan”? Unsa ang gipasabot sa “makasinati sa pakig-ambit ug sa presensya sa Dios nga Amahan, ug ni Jesus”? Sa unsang paagi nga ang gahom ug awtoridad sa pagkapari makahimo niini nga imong magamit?

Tan-awa usab sa Alma 13:2, 16; Doktrina ug mga Pakigsaad 84:19–27.

Tutok ngadto ni Jesukristo. “Adunay daghang butang nga itudlo mahitungod sa gipahiuli nga ebanghelyo ni Jesukristo—mga baroganan, mga sugo, mga panagna, ug mga istorya sa kasulatan. “Apan tanan kini mga sanga sa samang kahoy, tungod kay sila adunay usa ka katuyoan: sa pagtabang sa tanang tawo sa pagduol ngadto ni Kristo ug sa paghingpit diha Kaniya (tan-awa sa Jarom 1:11; Moroni 10:32). Mao nga bisan unsa pa ang inyong itudlo, hinumdomi nga kamo sa tinuod nagtudlo mahitungod ni Jesukristo ug unsaon nga mahimong sama Kaniya” (Pagtudlo sumala sa Pamaagi sa Manluluwas, 6). Pananglitan, samtang magtudlo ka—ug magkat-on—mahitunod sa pagkapari diha sa Doktrina ug mga Pakigsaad 107, ang kanunay nga gipangutana, “Unsay atong nakat-onan mahitungod sa Manluluwas?”

Doktrina ug mga Pakigsaad 107:22

Ang mga sulugoon sa Ginoo “gituboy pinaagi sa pagsalig, hugot nga pagtuo, ug pag-ampo sa Simbahan.”

Unsa kaha ang gipasabot sa pagtuboy sa mga sulugoon sa Ginoo pinaagi sa imong pagsalig? pinaagi sa imong hugot nga pagtuo? pinaagi sa imong pag-ampo?

Tan-awa usab sa “Dios Panalangini ang Among Propeta,” Mga Himno, nu. 18.

Doktrina ug mga Pakigsaad 107:23–24, 33–35, 38, 91–92

Ang mga Propeta ug Apostoles nagpamatuod ni Jesukristo.

Si Joseph Smith mipakigbahin sa seksiyon 107 niadtong 1835 ngadto sa bag-ong gitawag nga Korum sa Napulog Duha ka Apostoles (tan-awa ang ulohan sa seksiyon). Unsa ang gitudlo sa Ginoo kanila mahitungod sa ilang calling diha sa mga bersikulo 23–24, 33–35, 38? Sa unsa nga paagi nga imong pagsaksi ni Jesukristo napalig-on pinaagi sa pagtudlo ug pagpangalagad sa Iyang buhi nga Apostoles?

Sa mga bersikulo 91–92, ang Ginoo mitudlo mahitungod sa Iyang senior nga Apostol, ang Presidente sa Simbahan. Sa unsa nga paagi siya “sama ni Moises”? (tan-awa sa Ang Giya ngadto sa mga Kasulatan, “Moises,” Librarya sa Ebanghelyo).

Tan-awa usab sa David A. Bednar, “Gipili nga Magpamatuod sa Akong Ngalan,” Liahona, Nob. 2015, 128–31.

Doktrina ug mga Pakigsaad 107:27–31, 85–89

Ang Ginoo mohimo sa Iyang buhat pinaagi sa mga konseho.

Obserbahi unsa ang gitudlo sa Ginoo mahitungod sa mga konseho sa Doktrina ug mga Pakigsaad 107:27–31, 85–89. Unsa ang nakapahimo sa usa ka konseho nga epektibo? Sa unsa nga paagi nga imong magamit kini nga mga baroganan sa imong calling sa Simbahan, sa imong panimalay, o sa imong ubang mga responsibilidad?

Tan-awa usab sa M. Russell Ballard, “Mga Konseho sa Pamilya,” Liahona, Mayo 2016, 63–65; Kinatibuk-ang Tamdanan nga Basahon, 4.3–4.4, Librarya sa Ebanghelyo.

Ang Ginoo nagdapit sa pamilya sa pagtinambagay.

Alang sa dugang nga mga ideya, tan-awa ang mga isyu karong bulana sa Liahona ug sa Alang sa Kalig-on sa mga Kabatan-onan nga mga magasin.

Mga Tawo, Mga Dapit, Mga Panghitabo

• Mga Kapanguhaan sa Kasaysayan sa Doktrina ug mga Pakigsaad: Lyman Sherman

• Mga Kapanguhaan sa Kasaysayan sa Doktrina ug mga Pakigsaad: Warren A. Cowdery

• Mga Korum sa Seventy

• Korum sa Napulog Duha

Iklik dinhi aron makakita pa og dugang

Mga Ideya sa Pagtudlo sa mga Bata

Doktrina ug mga Pakigsaad 107:18–20

Si Jesus nagpanalangin kanako pinaagi sa Iyang gahom sa pagkapari.

• Samtang ikaw ug ang imong mga anak magbasa og dungan sa Doktrina ug mga Pakigsaad 107:18–19, hatagi og gibug-aton ang hugpong sa mga pulong nga “tanang espirituhanon nga mga panalangin.” Tingali ikaw ug ang imong mga anak makalista sa mga panalangin nga moabot gikan sa pagkapari. Tingali makahimo ka og dula niini—tan-awa kinsa ang makahimo og labing taas nga lista. Ang imong mga anak mahimo usab nga magdrowing o mangita og mga litrato nga morepresentar niini nga mga panalangin (tan-awa sa pahina sa kalihokan niining semanaha). Dayon mahimo kang mohisgot mahitungod kon sa unsa nga paagi nga ang mga ordinansa sa pagkapari (sama sa bunyag o sa sakramento) motabang nato nga makadawat sa mga panalangin sa Dios.

Doktrina ug mga Pakigsaad 107:21–26, 33–35, 91–92

Ang pinili nga mga sulugoon sa Ginoo naggiya sa Iyang Simbahan.

• Ang matag isyu sa komperensiya sa Liahona naglakip sa usa ka pahina sa mga litrato sa Kinatibuk-ang mga Awtoridad. Ikonsiderar ang pagtan-aw niini nga mga litrato uban sa imong mga anak samtang magbasa kamo mahitungod sa ilang mga responsibilidad diha sa Doktrina ug mga Pakigsaad 107:21–26, 33–35, 91–92. Ikaw ug ang imong mga anak mahimong maghisgot mahitungod kon ngano nga ikaw mapasalamaton nga ang Ginoo mihatag kanila niini nga mga responsibilidad.

• Ang imong mga anak makakat-on og dugang mahitungod sa mga sulugoon sa Ginoo sa “General Church Leadership” sa ChurchofJesusChrist.org. Tingali ang matag usa sa imong mga anak makakat-on mahitungod sa usa niini nga mga lider ug motudlo sa usag usa mahitungod kaniya. Pagpakigbahin sa usag usa giunsa ninyo sa pagkahibalo nga kini nga mga lider tinuod nga mga sulugoon ni Jesukristo.

• Human mobasa og dungan sa Doktrina ug ma Pakigsaad 107:22, ikaw ug ang imong mga anak mahimong magpuli-puli sa paggunit og usa ka litrato sa Unang Kapangulohan ug mopakigbahin og mga paagi nga kamo makapaluyo kanila isip mga sulugoon sa Ginoo.

Ang Unang Kapangulohan

Doktrina ug mga Pakigsaad 108:3

Ako magmabinantayon sa pagtuman sa akong mga pakigsaad.

• Sa pasugod og usa ka panagsultihanay mahitungod niini nga bersikulo, mahimo nimong dapiton ang imong mga anak sa pagbuhat og butang nga nagkinahanglan og mabinantayong pagtagad, sama sa pagpuno sa usa ka kopa nga walay mausik. Unsa ang mahitabo kon kita dili magmabinantayon? Dayon mahimo nimong basahon ang Doktrina ug mga Pakigsaad 108:3 sa pagsusi unsa ang gusto sa Ginoo nga atong buhaton sa mabinantayong paagi. Unsa ang “mga panumpa” (mga saad o mga pakigsaad) nga atong himoon uban sa Dios? Sa unsa nga paagi nga kita mas mabinantayon sa pagtuman niini? Mahimo nga imong ipakigbahin ang mga bahin sa mensahe ni Sister Becky Craven “Mabinantayon batok Dili Kaayo Magtagad” (Liahona, Mayo 2019, 9–11) nga imong gibati nga makapadasig sa imong mga anak sa pagtuman sa ilang mga pakigsaad. Mahimo kamong mokanta sa usa ka kanta mahitungod sa pagtuman sa mga pakigsaad sama sa “Magmaisugon Ko” (Songbook sa mga Bata, 85).

Ang mabinantayong pag-ipis og tubig mahimong ikatandi sa pagtuman sa atong mga pakigsaad.

Alang sa dugang nga mga ideya, tan-awa ang isyu karong bulana sa Higala nga magasin.

Melchizedek Blesses Abram [Si Melchizedek Nagpanalangin ni Abram], ni Walter Rane