C. C. A. Christensen (1831–1912), Kampo sa Zion,, mga 1878, daling mauga nga pintura diha sa panapton nga hilo, 78 × 114 ka pulgada. Brigham Young University Museum of Art, gasa sa mga apo ni C.C.A. Christensen, 1970.

Septiyembre 15–21:“Human sa Dako nga Kalisdanan … Moabot ang Panalangin”

Doktrina ug mga Pakigsaad 102–105

Ang mga Santos sa Kirtland mga magul-anon kaayo nga ang ilang mga kaigsoonan sa Lalawigan sa Jackson, Missouri, giabog gikan sa ilang mga panimalay. Kini tingali kaha makapadasig gayod, kaniadto, sa dihang gipahayag sa Ginoo nga “ang katubsanan sa Zion” mahitabo “pinaagi sa gahom” (Doktrina ug mga Pakigsaad 103:15). Inubanan niana nga saad diha sa ilang mga kasingkasing, sobra sa 200 ka mga lalaki, dugangan og mga 25 ka mga babaye ug mga bata, mipalista sa unsay ilang gitawag nga Kampo sa Israel, sa kadugayan nailhan isip Kampo sa Zion. Ang misyon niini mao ang pag-adto sa Missouri ug pagtubos sa Zion.

Ngadto sa mga miyembro sa kampo, ang pagtubos sa Zion mipasabot sa pagpabalik sa mga Santos ngadto sa ilang yuta. Apan sa wala pa sila moabot sa Lalawigan sa Jackson, misulti ang Ginoo ni Joseph Smith sa paghunong ug pagbungkag sa Kampo sa Zion. Pipila ka mga miyembro sa kampo naglibog ug nagsipok, kini mipasabot nga ang panaw pakyas ug ang mga saad sa Ginoo wala matuman. Ang uban, hinuon, nakakita niini sa lahi nga paagi. Samtang ang gipapahawa nga mga Santos wala gayod makakuha og balik sa ilang mga yuta ug mga panimalay, ang kasinatian midala og pipila ka bahin sa “katubsanan” sa Zion, ug kini “pinaagi sa gahom.” Ang matinud-anon nga mga sakop sa Kampo sa Zion, kadaghanan kinsa sa wala madugay nahimong mga lider sa Simbahan, mipamatuod nga ang kasinatian mipalawom sa ilang pagtuo sa gahom sa Dios, sa balaang tawag ni Joseph Smith, ug sa Zion—dili lamang ang Zion nga lugar apan ang Zion nga katawhan sa Dios. Kay sa magduda sa kaayohan niining ingon og napakyas nga buhat, nakat-onan nila nga ang tinuod nga buhat mao ang pagsunod sa Manluluwas, bisan og kita wala makasabot sa tanan. Mao kini ang paagi nga ang Zion, sa kataposan, matubos.

Tan-awa sa Mga Santos,, 1:222-235; “The Acceptable Offering of Zion’s Camp,” sa Revelations in Context,, 213-18.

Mga Ideya alang sa Pagkat-on diha sa Panimalay ug sa Simbahan

Doktrina ug mga Pakigsaad 102:12–23

Unsa ang katuyoan sa mga konseho sa pagkamiyembro?

Seksiyon 102 naglangkob sa mga gihisgotan sa miting didto sa Kirtland, Ohio, diin ang unang halangdong konseho [high council] sa Simbahan naorganisar. Sa mga bersikulo 12–23, ang Ginoo mihulagway sa mga pamaagi nga gisunod sa halangdong konseho kon magdumala og mga konseho sa pagkamiyembro alang niadtong kinsa nakahimo og seryosong mga kalapasan.

Si Presidente M. Russell Ballard mitudlo, “Ang mga miyembro usahay mangutana nganong ang mga konseho sa Simbahan sa [pagkamiyembro] gihimo. Ang mga katuyoan adunay tulo ka bahin: sa pagluwas sa kalag sa mga malapason, sa pagpanalipod sa inosente, ug sa pagpanalipod sa kalimpyo, kaligdong, ug sa maayong ngalan sa Simbahan” (“A Chance to Start Over: Church Disciplinary Councils and the Restoration of Blessings,” Ensign, Sept. 1990, 15).

Tan-awa usab sa Mga Hilisgotan ug mga Pangutana [Topics and Questions], “Mga Konseho sa Pagkamiyembro [Membership Councils],” Librarya sa Ebanghelyo [Gospel Library].

Doktrina ug mga Pakigsaad 103:1–12, 36; 105:1–19

Ang Zion mahimong matukod lamang pinaagi sa mga baroganan sa pagkamatarong.

Ngano nga ang mga Santos nawad-an sa ilang gisaad nga yuta sa Missouri? Adunay daghan nga mga rason—labing minos, usa, ang Ginoo miingon, tungod “sa mga kalapasan sa akong katawhan.” Kon dili pa tungod niana, ang Zion “unta matubos” (Doktrina ug mga Pakigsaad 105:2). Samtang ikaw magbasa sa Doktrina ug mga Pakigsaad 103:1–12, 36; 105:1–19, makamatikod ka og mga butang nga nagpugong sa pagkatukod sa Zion sa Missouri ug sa uban nga makatabang pa unta. Unsa ang imong nakat-onan nga makatabang kanimo sa pagtukod sa Zion diha sa imong kasingkasing, ug sa panimalay, ug sa komunidad?

Doktrina ug mga Pakigsaad 103:12–13, 36; 105: 1–6, 9–19

Ang mga panalangin moabot human sa mga pagsulay sa hugot nga pagtuo.

Sa daghang mga paagi, ang pag-apil sa Kampo sa Zion maoy usa ka pagsulay sa hugot nga pagtuo. Ang panaw dugay, ang panahon init, ug ang pagkaon ug ang tubig usahay nihit. Ug human sa tanan nilang gilahutay, ang Kampo sa Zion sa gihapon wala magmalamposon sa pagpabalik sa mga Santos ngadto sa ilang yuta. Hunahunaa nga ikaw adunay oportunidad sa pagsulat og sulat ngadto sa usa ka sakop sa Kampo sa Zion kansang hugot nga pagtuo diha sa Ginoo nauyog tungod sa iyang kasinatian. Unsa man kaha ang imong isulti aron maawhag kini nga higala? Unsa nga mga kamatuoran ang imong makita diha sa Doktrina ug mga Pakigsaad 103:5–7, 12–13, 36; 105:1–6, 9–19 nga makatabang?

Dayon mahimong maghunahuna ka mahitungod sa usa ka mas moderno nga ehemplo sa usa ka pagsulay sama sa Kampo sa Zion—sama sa usa ka misyonaryo nga nagtrabaho pag-ayo, apan walay usa nga miapil sa Simbahan tungod sa iyang mga paningkamot. Base sa unsay imong natun-an, unsaon nimo sa pagtabang kana nga misyonaryo nga makakita nga ang iyang misyon malamposon gihapon?

Giunsa sa Ginoo sa pagpanalangin kanimo “human sa dako nga kalisdanan”? (Doktrina ug mga Pakigsaad 103:12).

Tan-awa usab sa 1 Nephi 11:16–17; Alma 7:11–12; Doktrina ug mga Pakigsaad 6:33–36; 84:88; 101:35–36; David A. Bednar, “Dapig sa Ginoo: Mga Leksyon gikan sa Kampo sa Zion,” Liahona, Hulyo 2017, 14–23; Mga Hilisgotan ug mga Pangutana [Topics and Questions], “Molahutay hangtod sa Kataposan [Endure to the End],” Librarya sa Ebanghelyo [Gospel Library]; “Unsa Kalig-on ang Tukuranan,” Mga Himno, nu. 44.

Pag-andam pinaagi sa pagtuon sa makasaysayanong konteksto sa mga pagpadayag. Ang pagsabot sa sitwasyon sa mga pagpadayag diha sa Doktrina ug mga Pakigsaad tingali makatabang nimo nga makasabot ug makagamit sa mga baroganan nga gitudlo niini. Ang Dali, Sunod Kanako naghatag og mga link sa daghan niini nga mga kapanguhaan. Alang sa Doktrina ug mga Pakigsaad 102–5, tan-awa sa Mga Santos, 1:222–235; “The Acceptable Offering of Zion’s Camp,” sa Revelations in Context, 213–18; ug sa “Voices of the Restoration: Zion’s Camp.”

Ang Kampo sa Israel nagkampo sa daplin sa Little Fishing River.

Unsa ang katuyoan sa mga pagsulay?

Hunahunaa ang tambag ni Elder Orson F. Whitney mahitungod sa katuyoan sa mga pagsulay: “Walay kasakit nga atong giantos, walay pagsulay nga atong nasinati ang makawang. Modugang kini sa atong edukasyon, sa pagpalambo niana nga mga kalidad sama sa pasensya, hugot nga pagtuo, kalig-on ug pagkamapainubsanon. Ang tanan natong giantos ug gilahutay, ilabi na kon kini atong giantos nga may pasensya, makapalig-on sa atong mga kinaiya, molimpyo sa atong mga kasingkasing, mopadako sa atong mga kalag, ug mohimo kanatong mas malumo ug mahigugmaon, mas angayan nga pagatawgong mga anak sa Dios … ug kini pinaagi sa kasub-anan ug pag-antos, paghago ug kalisdanan, nga kita makaangkon sa edukasyon nga maoy usa sa atong gianhi dinhi ug diin kita mahimong mas mahisama sa atong Amahan ug Inahan sa langit” (sa Spencer W. Kimball, Faith Precedes the Miracle [1972], 98).

Doktrina ug mga Pakigsaad 104:11–18; 78–83

Ang Ginoo mihimo kanako nga usa ka “tinugyanan ibabaw sa yutan-on nga mga panalangin.”

Agi og dugang sa mga pagsulay didto sa Missouri, niadtong 1834 ang Simbahan miatubang og pinansyal nga mga kalisod, lakip ang dakong mga utang ug mga galastohan. Diha sa seksiyon 104 mihatag ang Ginoo og tambag sa pinansyal nga sitwasyon sa Simbahan. Unsaon nimo paggamit ang mga baroganan diha sa mga bersikulo 11–18 ug 78–83 nganha sa imong kaugalingong pinansyal nga mga desisyon?

Tan-awa usab sa “Treasure in Heaven: The John Tanner Story” ug ang “The Labor of His Hands” (mga bidyo), Gospel Library.

Treasure in Heaven: The John Tanner Story

John Tanner freely gave all he had, giving us an example of generosity and consecration in serving the Lord.

The Labor of His Hands

Church members around the world volunteer both time and money to serve others-- members and nonmembers alike--as Christ would serve.

Alang sa dugang nga mga ideya, tan-awa ang mga isyu karong bulana sa Liahona ug sa Alang sa Kalig-on sa mga Kabatan-onan nga mga magasin.

Mga Tawo, Mga Dapit, Mga Panghitabo

• Mga Kapanguhaan sa Kasaysayan sa Doktrina ug mga Pakigsaad: Lyman Wight

• Kampo sa Zion (Kampo sa Israel)

• Disiplina sa Simbahan

Iklik dinhi aron makakita pa og dugang

Mga Ideya sa Pagtudlo sa mga Bata

Doktrina ug mga Pakigsaad 103:9

Mahimo ko nga “usa ka kahayag ngadto sa kalibotan” pinaagi sa pagsunod ni Jesus.

• Mahimo nimong imbitaron ang imong mga anak sa paggunit og litrato sa usa ka bombilya, usa ka kandila, o laing tinubdan sa kahayag samtang imong basahon ang Doktrina ug mga Pakigsaad 103:9. Sa unsa nga paagi kita mahisama sa usa ka kahayag ngadto sa uban kon kita mosunod ni Jesukristo? Tan-awa usab sa “Si Jesus Buot nga Ako Mahimong Bidlisiw” (Songbook sa mga Bata, 38).

Mahimo akong kahayag ngadto sa uban kon ako mosunod ni Jesukristo.

Doktrina ug mga Pakigsaad 104:13–18

Ang Ginoo gusto nga ako mopakigbahin unsay ania nako ngadto sa mga tawo nga nanginahanglan.

• Hatagi ang imong mga anak og pipila ka minuto aron sa paghimo og lista sa mga panalangin nga gihatag sa Dios kanila (sama sa pagkaon, sinina, mga talento, hugot nga pagtuo, ug usa ka panimalay). Awhaga sila sa paglista og daghan kutob sa ilang mahimo. Dayon mahimong basahon ninyo pagdungan ang Doktrina ug mga Pakigsaad 104:13–18, nga mangita sa mga tubag sa mga pangutana sama niini: Kinsa ang tinuod nga tag-iya sa tanang butang? Unsay Iyang gustong ipabuhat kanato niining mga butanga? Ikaw ug ang imong mga anak mahimong mopakigbahin og mga kasinatian diin ang usa ka tawo mihatag kanimo og butang nga imong gikinahanglan (tan-awa usab sa “The Coat” [bidyo], Gospel Library).

  The Coat

  The Coat is a children’s story that depicts a young boy giving selflessly to another child in need.

Doktrina ug mga Pakigsaad 104:42

Ang Ginoo mopanalangin kanako kon ako motuman sa Iyang mga sugo.

• Pipila ka higayon diha sa seksiyon 104 ang Ginoo misaad og “pinilo-pilo nga mga panalangin” ngadto sa mga tawo kinsa matinud-anong motuman sa Iyang mga sugo. Aron matabangan ang imong mga anak nga makasabot unsa ang gipasabot sa “pinilo-pilo”, mahimo kang magdrowing og lingin ug hangyoa ang imong mga anak sa pagtabang kanimo nga pagpilo-pilo sa gidaghanon sa mga lingin—pagdrowing og duha, dayon upat, dayon walo, dayon disesais, ug uban pa. Matag higayon nga magdugang ka og mga lingin, tabangi ang imong mga anak sa paghunahuna og usa ka panalangin nga gihatag sa Langitnong Amahan ngadto kanila.

Doktrina ug mga Pakigsaad 105:38–40

Mamahimo ko nga tigpasiugda og kalinaw.

• Aron matabangan ang imong mga anak nga makat-on sa istorya sa Kampo sa Zion, mahimo nimong ipakigbahin ang “Kapitulo 36:Kampo sa Zion” (sa Doktrina uga mga Pakigsaad, 135–39, o sa tugbang nga bidyo diha sa Gospel Library). Hunong matag karon ug unya aron hisgotan ang mga leksiyon nga atong makat-onan gikan sa Kampo sa Zion—pananglitan, nga ang Ginoo gusto nga magmalinawon kita ug magtambayayong imbis nga maglalis ug mag-away (tan-awa usab sa Russell M. Nelson, “Gikinahanglan ang mga Tigpasiugda og Kalinaw,” Liahona, Mayo 2023, 98–101).

  Chapter 36: Zion’s Camp: February–June 1834

• Basaha ang Doktrina ug mga Pakigsaad 105:38–40 ug hangyoa ang mga bata sa pagbarog matag higayon nga sila makadungog sa pulong nga “kalinaw.” Ipasabot nga ang Ginoo gusto nga ang mga Santos makighigala sa mga tawo kinsa dili mabination. Tabangi ang imong mga anak sa paghunahuna og mga butang nga ilang mabuhat aron mahimo silang mga tigpasiugda sa kalinaw, ug dapita sila sa pagdrama-drama sa pipila niini nga mga sitwasyon.

Alang sa dugang nga mga ideya, tan-awa ang isyu karong bulana sa Higala nga magasin.

Kampo sa Zion (Kampo sa Zion sa Fishing River),, ni Judith A. Mehr