Templo sa Kirtland, ni Al Rounds

Septiyembre 1–7: “Alang sa Kaluwasan sa Zion”

Doktrina ug mga Pakigsaad 94–97

Sa karaang panahon, gimandoan sa Ginoo si Moises sa pagtukod og tabernakulo “ sumala sa sumbanan nga gipakita [kaniya] didto sa bukid” (Mga Hebreo 8:5; tan-awa usab sa Exodo 25:8–9). Ang tabernakulo mao ang mahimong sentro sa kampo sa Israel sa kamingawan (tan-awa sa Numeros 2:1–2).

Niadtong 1833, ang Ginoo mimando ni Joseph Smith sa pagtukod og mga templo “nga dili sama sa paagi sa kalibotan” kondili “sama sa paagi nga Ako mopakita kaninyo” (Doktrina ug mga Pakigsaad 95:13–14; tan-awa usab sa 97:10). Sama sa tabernakulo diha sa kamingawan, ang templo gituyo nga mahimong labing mahinungdanon nga timaan diha sa Kirtland (tan-awa sa Doktrina ug mga Pakigsaad 94:1).

Karon, ang mga templo makaplagan sa tibuok kalibotan. Bisan kon wala kini diha sa sentro sa atong mga siyudad, nagpunting kini kanato ngadto kang Kristo, kinsa kinahanglan mao ang sentro sa atong mga kinabuhi. Bisan og ang mga templo nagkalahi og dagway, diha niini kita makakat-on sa samang balaan nga sumbanan—usa ka langitnong plano sa pagdala og balik kanato ngadto sa presensya sa Dios. Ang sagrado nga mga ordinansa ug mga pakigsaad mokonektar kanato ug molig-on sa atong mga pamilya nga “dili sama sa paagi sa kalibotan” apan sama sa paagi nga gipakita kanato sa Dios.

Tan-awa sa Mga Santos, 1:193–94; “A House for Our God,” in Revelations in Context, 165–73.

Mga Ideya alang sa Pagkat-on diha sa Panimalay ug sa Simbahan

Doktrina ug mga Pakigsaad 94; 97:10–17

Ako mahimo nga “kinatibuk-an nga ipahinungod ngadto sa Ginoo.”

Diha sa Doktrina ug mga Pakigsaad 94, ang Ginoo naghatag og mga instruksiyon mahitungod sa pagtukod sa pang-administratiba nga mga gambalay didto sa Kirtland—usa ka opisina ug usa ka balay nga imprintahanan. Unsa ang nakapadayeg nimo mahitungod sa unsay gisulti sa Ginoo mahitungod niini nga mga gambalay diha sa Doktrina ug mga Pakigsaad 94:2–12? Sa unsang paagi nga matandi kini ngadto sa unsay Iyang gisulti mahitungod sa templo diha sa 97:10–17?

Unsay ipasabot alang nimo nga “kinatibuk-an nga ipahinungod ngadto sa Ginoo”?

Doktrina ug mga Pakigsaad 95

Ang Ginoo mopanton niadtong Iyang gihigugma.

Sa dihang ang pagpadayag diha sa seksiyon 95 nadawat, mga lima ka tuig na ang milabay sukad nga ang Ginoo mimando sa mga Santos sa pagtukod og usa ka balay sa Dios (tan-awa sa Doktrina ug mga Pakigsaad 88:117–19)—ug wala pa sila makasugod. Himatikdi kon giunsa sila sa pagkorehir sa Ginoo pinaagi niini nga pagpadayag. Gani mahimo ka nga maghimo og lista sa mga baroganan nga imong makit-an alang sa paghatag og dinasig nga koreksiyon. Unsay imong nakat-onan bahin sa Ginoo gikan sa paagi sa Iyang pagkorehir sa Iyang mga Santos?

Tan-awa usab sa Doktrina ug mga Pakigsaad 121:43–44; D. Todd Christofferson, “Ako Nagabadlong ug Nagapanton sa Akong Gihigugma,” Liahona, Mayo 2011, 97–100.

Ang Dios Nahigugma sa Iyang mga Anak

Si Elder Wakolo nagpamatuod sa gugma sa Dios ug mihulagway kon giunsa Niya pagpakita niana nga gugma ngadto sa Iyang mga anak.

Doktrina ug mga Pakigsaad 95:8, 11–17; 97:10–17

Ang templo mao ang balay sa Ginoo.

Human napanton sa wala pagtukod og usa ka balay sa Ginoo sa Kirtland, ang mga lider sa Simbahan mipili og usa ka luna sa umahan sa trigo diin sila magtukod. Si Hyrum Smith, ang igsoong lalaki sa Propeta, dihadiha midagan aron pagkuha og sanggot aron mosugod sa pagpanghawan sa umahan. “Nangandam kami sa pagtukod og usa ka balay sa Ginoo,” miingon siya, “ug ako determinado nga maoy makauna sa pagtrabaho” (diha sa Mga Pagtulun-an sa mga Presidente sa Simbahan: Joseph Smith [2007], 329). Sa imong hunahuna ngano nga si Hyrum matinguhaon kaayo sa pagtukod sa templo? Pamalandongi kini samtang magbasa ka sa Doktrina ug mga Pakigsaad 95:8, 11–17; 97:10–17.

Sa atong panahon karon, “gipaspasan [sa Ginoo] ang gikusgon sa atong pagtukod og mga templo” (Russell M. Nelson, “Magpunting sa Templo,” Liahona, Nob. 2022, 121). Kon adunay tawo nga mangutana nimo kon ngano nga ang Simbahan ni Jesukristo nagtukod og daghan kaayong mga templo, unsay imong isullti? Pangitaa ang posible nga mga tubag diha sa:

• Mga mensahe ni Presidente Russell M. Nelson nga nagpahibalo sa bag-ong mga templo (sama sa “Karon Mao ang Panahon,” Liahona, Mayo 2022, 126).

• “Why Latter-day Saints Build Temples” (temples.ChurchofJesusChrist.org).

• Mga bidyo nga “Temples” (Gospel Library).

What Is a Temple?

The difference between chapels, where Latter-day Saints meet for regular Sunday worship, and temples is also explained.

Mahimo nimong itandi ang mga paningkamot sa mga Santos sa pagtukod sa Kirtland Temple nganha sa imong mga paningkamot sa pagpangandam alang sa makahuloganon nga mga kasinatian uban sa Ginoo diha sa templo. Sa unsang paagi nga imong mapakita ang susama nga pagbati og kadinalian nga gibati ni Hyrum Smith ngadto sa balaang balay sa Ginoo? Pananglitan, unsa ang imong mahimong buhaton nga susama sa pagpanghawan sa umahan sama sa gihimo ni Hyrum? Sa imong pamati unsa nga mga sakripisyo ang gusto sa Ginoo nga imong himoon? (tan-awa sa Doktrina ug mga Pakigsaad 97:12).

Tan-awa usab sa “Holy Temples on Mount Zion,” Hymns, no. 289; Mga Hilisgotan ug mga Pangutana [Topics and Questions], “Mga Templo [Temples],” Librarya sa Ebanghelyo [Gospel Library].

Hyrum Smith nga nanghawan sa yuta alang sa Kirtland Temple.

Doktrina ug mga Pakigsaad 97:8–9

“Sila pagadawaton ngari kanako.”

Paghunahuna og usa ka higayon sa dihang ikaw gidawat—o wala dawata—sa usa ka grupo o team. Sa unsang paagi nga kana susama o lahi sa unsay gitudlo diha sa Doktrina ug mga Pakigsaad 97:8–9 mahitungod sa unsay ipasabot nga pagadawaton sa Dios? Sa imong hunahuna unsa ang gusto nga itudlo sa Ginoo nganha nimo gamit ang pasumbingay diha sa bersikulo 9?

Tan-awa usab sa Erich W. Kopischke, “Madawat sa Ginoo,” Liahona, Mayo 2013, 104–6.

Pagmugna og espirituwal nga kahimtang alang sa pagkat-on ug sa pagtudlo. “Ang Espiritu Santo,” si Jesus misaad, “magtudlo kaninyo sa tanang butang” (Juan 14:26). Mao nga bisan kon ikaw nagkat-on man sa imong kaugalingon o uban sa lain pa, himoa kini nga prayoridad ang pagdapit sa Espiritu. Ang sagrado nga musika, pag-ampo, ug mahigugmaon nga mga pakighinabi makatabang tanan sa pagmugna og malinawon, espirituwal nga kahimtang diin ang Espiritu Santo makatudlo nimo sa kamatuoran.

Doktrina ug mga Pakigsaad 97:18–28

Ang Zion mao “ang putli og kasingkasing.”

Alang sa mga Santos sa mga 1830, ang Zion usa ka dapit. Sa pagpadayag diha sa seksiyon 97, ang Ginoo mipalapad sa kahulogan sa paghulagway sa usa ka katawhan—“ang putli og kasingkasing” (bersikulo 21). Samtang magbasa ka sa mga bersikulo 18–28, mahimo nimong pulihan kini nga kahulogan sa higayon nga imong mabasa ang pulong nga Zion. Unsa ang kahulogan niini alang nimo nga mahimong putli og kasingkasing?

Tan-awa usab sa Moises 7:18.

Alang sa dugang nga mga ideya, tan-awa ang mga isyu karong bulana sa Liahona ug sa Alang sa Kalig-on sa mga Kabatan-onan nga mga magasin.

Mga Tawo, Mga Dapit, Mga Panghitabo

• Hyrum Smith

• N. K. Whitney & Co. Tindahan

• Templo sa Kirtland

Iklik dinhi aron makakita pa og dugang

Mga Ideya sa Pagtudlo sa mga Bata

Doktrina ug mga Pakigsaad 95:8; 97:10–17

Ang templo mao ang balay sa Ginoo.

• Alang sa pipila ka background diha sa seksiyon 95 ug 97, mahimo nimong ipakigbahin ngadto sa imong mga anak “Ang Templo sa Kirtland” diha sa Mga Istorya sa Doktrina ug mga Pakigsaad alang sa mga Batan-ong Magbabasa (Gospel Library; tan-awa usab sa Mga Santos, 1:240). Ang imong mga anak tingali malingaw nga magpakaaron-ingnon nga mitabang sila sa Kirtland Temple (pagpamutol sa mga kahoy, pagpanukdok sa mga lansang, pagpamintal sa mga bungbong, ug uban pa). Mahimo usab nimong ipakita ang litrato sa Kirtland Temple, sama niadtong anaa niini nga latid, samtang magbasa sa Doktrina ug mga Pakigsaad 95:8 aron sa pagtudlo sa imong mga anak kon ngano nga ang Ginoo gusto nga magtukod kita og mga templo.

The Kirtland Temple

• Human sa pagbasa og dungan sa Doktrina ug mga Pakigsaad 97:15–16, ikaw ug ang imong mga anak mahimong mopakigbahin sa usag usa kon ngano nga ang templo espesyal kaninyo. Mahimo usab kamo nga manganta og dungan sa usa ka awit aron matabangan ang imong mga anak nga mobati og balaang pagtahod alang sa balay sa Ginoo, sama sa “Gusto Ko nga Makita ang Templo” (Songbook sa mga Bata, 99). Ngano nga ang templo sagrado man?

Doktrina ug mga Pakigsaad 97:1–2, 8–9, 21

Ang Zion mao “ang putli og kasingkasing.”

• Aron matabangan ang imong mga anak nga makasabot sa unsay ipasabot sa pulong nga putli diha sa Doktrina ug mga Pakigsaad 97:21, mahimo kamo nga magdungan sa pagtan-aw sa usa ka baso sa limpyo nga tubig ug modugang og usa ka butang ngadto sa tubig nga makapahimo niini nga dili limpyo (sama sa yuta o sili). Ngano nga importante nga ang tubig limpyo? Dayon ang imong mga anak mahimong mobasa sa bersikulo 21 ug ibutang ang ilang tudlo diha sa pulong nga putli. Unsa ang buot ipasabot sa atong mga kasingkasing nga mamahimong putli? Ang mga bersikulo 1–2 ug 8–9 makahatag og pipila ka ideya. Sa unsang paagi nga ang Manluluwas makatabang nga mahimong putli ang atong mga kasingkasing?

Ang Langitnong Amahan gusto nga ako putli og kasingkasing.

Doktrina ug mga Pakigsaad 97:8–9

Ang Ginoo mopanalangin sa mga tawo nga nagtuman sa mga pakigsaad ngadto Kaniya.

• Nasayod ba ang imong mga anak kon unsa ang mga pakigsaad nga atong gihimo ngadto sa Ginoo sa dihang kita nabunyagan o anaa sa templo? Ikonsiderar ang pagrebyo niadto nga mga pakigsaad uban nila pinaagi sa pagbasa sa Mosiah 18:9–10, 13 o Kinatibuk-ang Tamdanan nga Basahon, 27.2. Pagpakigbahin sa usag usa kon giunsa ninyo sa pagpaningkamot nga “motuman sa [inyong] mga pakigsaad pinaagi sa pagsakripisyo” (Doktrina ug mga Pakigsaad 97:8).

• Mahimo nimong dapiton ang imong mga anak sa pagdrowing sa mga hulagway nga gihulagway diha sa Doktrina ug mga Pakigsaad 97:9. Samtang magpakigbahin sila sa ilang mga hulagway, hisgoti kon giunsa ka sa pagpanalangin sa Ginoo tungod sa pagtuman sa imong mga pakigsaad. Sa unsang paagi nga kadto nga mga panalangin nahisama sa usa ka “mabungahon nga kahoy nga natanom … sa daplin sa usa ka mapulti nga sapa”?

Alang sa dugang nga mga ideya, tan-awa ang isyu karong bulana sa Higala nga magasin.

Building the Kirtland Temple [Pagtukod sa Templo sa Kirtland], ni Walter Rane