“Mantswe a Tsosoloso: Kampa ya Sione,” Tlayang, Ntshaleng Morago—Ya Gae le Kereke: Dithuto le Dikgolagano 2025 (2025)

“Kampa ya Tsosoloso,” Tlayang, Ntshaleng Morago—Ya Gae le Kereke: 2025

Mantswe a Tsosoloso

Kampa ya Sione

Gonne Kampa ya Sione ga e ise e ko e busetse Baitshepi kwa mafatsheng a bone mo Jackson County, batho ba le bantsi ba ne ba ikutlwa gore maiteko a bone a iteile se fololetse. Le fa gontse jalo ba tsaya karolo ba le bantsi ba Kampa ya Sione ba leba morago mo maitemogelong a bone mme ba bona ka fa Morena a diragaditseng boikaelelo jo bo kwa godimo mo matshelong a bone le mo bogosing jwa Gagwe. Fano ke bongwe jwa bopaki jwa bone.

Joseph Smith

Go feta dingwaga di le 40 morago ga Kampa ya Sione, Joseph Young, yo e neng e ntse e le leloko la kampa, o ne a bega gore Joseph Smith o ne a bua se se latelang:

“Bakaulengwe, bangwe ba lona ba nkgalefetse, gonne ga le a lwa mo Missouri; mme mmang ke lo bolelele, Modimo o ne a sa batle le lwa. O ne a sa kake a rulaganya bogosi jwa gagwe ka banna ba le lesome le bobedi go bula lebati la efangele go ya ditšhabeng tsa lefatshe, le ka banna ba ba masome a supa fa tlase ga kaelo ya bone go sala morago metlhala ya bone, fa e se fela a ba tsaya mo setlhopeng sa banna ba ba neng ba neetse matshelo a bone, mme ke mang yo o neng a dirile setlhabelo se segolo jaaka go dirile Aberahame.

“Jaanong, Morena o bone ba ba Lesome le Bobedi ba gagwe le ba le Masome a Supa ba gagwe, ba ba tlaa dirang setlhabelo, le bao ba ba neng ba sa dira ditlhabelo tsa bone le dikabelo tsa bone jaanong, o tla ba dira morago ga fa.”

Brigham Young

“Fa re goroga mo Missouri Morena a bua le motlhanka wa gagwe Joseph, mme a re. ‘Ke amogetse ditshupelo tsa lona mme ra nna le tshiamelo ya go boa gape. Fa ke boa ditsala tse dintsi di ne tsa mpotsa gore go na le thuso efe go bitsa banna go tswa mo tirong ya bone go tlhatlogela kwa Missouri mme ba tloga ba boa, kwantle ga go wetsa sepe. ‘Go thusitse mang?’ ba ne ba botsa. ‘Fa Morena a ne a laetse gore e dirwe, o ne a na le boikaelelo bofe ka go dira jalo?’ … Ke ne ka bolelela bakaulengwe bao gore ke duetswe sentle—ke duelwa ka morokotso o o kwa godimo—ee gore selekanyo sa me se ne se penologa ka kitso e ke neng ke e amogetse ka go tsamaya le moporofeti.”

Wilford Woodruff

“Ke ne ke le mo Kampeng ya Sione le Moporofeti wa Modimo. Ke bone ditirisano tsa Modimo le ene. Ke bone thata ya Modimo mo go ene. Ka bona gore ke Moporofeti. Se se neng sa bonatshiwa mo go ene ka thata ya Modimo mo thomong eo e ne e le sa botlhokwa jo bogolo mo go nna le mo go botlhe ba ba amogetseng ditaelo tsa gagwe.”

“Fa maloko a Kampa ya Sione a bidiwa bontsi jwa rona re ne re ise re bonane difatlhogo; re ne re sa itsane mme ba bantsi ba ne ba ise ba bone moporofeti. Re ne re phatlaletse go sele, jaaka mabele a a feferilweng ka leselo, go ralala setšhaba. Re ne re le makawana, mme re ne ra bidiwa mo letsatsing leo la pele go tlhatloga le go rekolola Sione, mme se re neng re tshwanetse go se dira re ne re tshwanetse go se dira ka tumelo. Re ne ra phuthega mmogo go tswa kwa Mafelong a a farologaneng a Kirtland mme ra tlhatloga go rekolola Sione, go diragatsa taelo ya Modimo mo go rona. Modimo o ne a amogela ditiro tsa rona jaaka A dirile ditiro tsa ga Aberehame. Re fitlheletse go le gontsi, le ntswa bakgelogi le batho ba ba sa dumeleng makgetlho a le mantsi ba ne ba re botsa potso ‘le dirileng?’ Re ne ra amogela maitamogelo a re neng re ka bo re sa a amogela [ka] tsela epe e nngwe. Re nnile le tshiamelo ya go bona sefatlhogo sa moporofeti, mme ra nna le tshiamelo ya go tsamaya le ene dimaele di le sekete, le go bona ditiro tsa mowa wa Modimo le ene, le ditshenolo tsa ga Jeso Keresete mo go ene le tiragatso ya ditshenolo tseo. Mme a phutha bagolwane ba le makgolo a mabedi bangwe go tswa go ralala setšhaba mo letsatsing leo la pele mme a re romela go gasagasama mo lefatsheng go rera efangele ya ga Jeso Keresete. Fa ke ne ke sa tlhatloga le Kampa ya Sione ke ka bo ke seo fa gompieno [mo Salt Lake City, ke direla mo Khoramong ya ba ba Lesome le Bobedi]. … Ka go ya koo re ne re latlhetswe mo tshimong ya mofine go rera efangele, mme Morena a amogela ditiro tsa rona. Mme mo ditirong tsotlhe tsa rona le dipogiso, ka matshelo a rona gantsi a le mo diphatseng, re ne ra tshwanela go dira le go tshela ka Tumelo.”

“Maitemogelo a [re] a amogetseng fa re tsamaya le Kampa ya Sione e ne e le a a botlhokwa thata go feta gauta.”