Lwetse 22–28: “Thulaganyo ya Morwa Modimo”

Dithuto le Dikgolagano 106–108

Ka ponyo ya ntlha, Dithuto le Dikgolagano 107 e lebega fela e le ka go rulaganya diofisi tsa boperesiti gore e nne thulaganyo ya boeteledipele jwa Kereke ya Morena. Ka nako e tshenolo ena e neng e anamisiwa, boloko jwa Kereke bo ne bo feta bokgoni jwa baeteledipele ba se kae e e neng e na le bone mo maemong a a lolameng. Go soboka ditiro le maikarabelo a Boporesidente jwa Ntlha, Khoramo ya Baaposetole ba ba Lesome le Bobedi, ba ba Masome a Supa, bobishopo, le boporesidente ba dikhoramo go ne go tlhokega go sena pelaelo mme go thusa. Fela go na le mo gontsi mo taelong ya selegodimo mo karolong 107 go feta fela ka fa boeteledipele jwa Kereke bo tshwanetseng go rulaganngwa ka teng. Fano, Morena o re ruta ka thata ya Gagwe le taolo, “Boperesiti jo bo Boitshepo, ka fa Mokgweng wa Morwa Modimo” (temana 3). Boikaelelo jwa boperesiti ke go bula “ditshegofatso tsotlhe tsa semowa tsa kereke” gore bana botlhe ba Modimo ba ka “bulegelwa ke magodimo” le “go itumelela kabelano le boleng teng jwa Modimo Rara, le Jeso motsereganyi wa kgolagano e ntšha” (ditemana 18–19). Ka go re ruta ka boperesiti jwa Gagwe, Mmoloki o re ruta ka Ene le ka fa re ka tlang kwa go Ene.

Bona “Restoring the Ancient Order,” mo Revelations in Context, 208–12.

Megopolo ya go ithuta kwa Gae le kwa Kerekeng

Dithuto le Dikgolagano 106; 108

Morena o a ntshegetsa fa A mpitsa go direla.

Mo Dithuto le Dikgolagano 106 le 108, Morena o neetse kgakololo le ditsholofetso mo malokong a mabedi a a neng a bileditswe go direla mo Kerekeng ya Gagwe. Fa o ntse o ithutuntsha kgakololo ya Gagwe, o ka akanya ka menyetla ya gago go direla Morena—gongwe tiro e o e neetsweng go direla, pitso mo Kerekeng, maikarabelo a gago mo lwapeng la gago, kgotsa ditlhotlheletso tsa semowa go dira molemo.

O ikutlwa gore molaetsa wa Morena mo go wena ke eng mo ditshenolong tsena? Ke dipolelo dife tse di lebegang bogolo bogolo di na le bokao mo go wena? Fano ke tse di seng kae tse o ka di akanyang:

• Morena o go neetse leng “tshegofatso [kgotsa thuso ya selegodimo] le tshepiso” go nonofela go Mo direla? (Dithuto le Dikgolagano 106:8).

• O akanya gore go raya eng go thatafatsa ba bangwe “mo ditirong tsotlhe tsa gago”? (Dithuto le Dikgolagano 108:7).

Fa Mogolwane Carl B. Cook a amogela tiro ya Kereke e e thata, o ne a tsaya maatla go tswa mo maitemogelong a mogologolo. Bala ka yone mo molaetseng wa gagwe “Serve” (Liahona, Ngwanatsele. 2016, 110–12). Akanya ka go kwala lekwalo go kgothatsa dikokomana tsa gago—kgotsa wena mo isagong—go amogela menyetla ya go direla Morena. Akaretsa mo lekwalong la gago boammaaruri jo o bo ithutang go tswa mo molaetseng wa ga Mogolwane Cook, Dithuto le Dikgolagano 106 le 108, le maitemogelo a gago.

Bona gape Henry B. Eyring, “Walk with Me,” Liahona, Motsheganong 2017, 82–85; Topics and Questions, “Serving in Church Callings,” Gospel Library; “Warren Cowdery” le “‘Wrought Upon’ to Seek a Revelation,” mo go Revelations in Context, 219–23, 224–28.

Dithuto le Dikgolagano 107:1–4, 18–20

Boperesiti “ka fa Mokgweng wa Morwa Modimo.”

Morena o simolola “tshenolo ya Gagwe ya boperesiti” (Dithuto le Dikgolagano 107, setlhogo sa tsetlana) ka go re ruta leina la ntlha la Boperesiti jwa ga Melekiseteke (bona ditemana 1–4). Ke eng o akanya gore go botlhokwa go itse seo? Leina le le tlhotlheletsa tsela e o akanyang ka yone ka boperesiti jang?

Baya dikakanyo tsena mo tlhaloganyong fa o ntse o bala ka boperesiti, bogolo thata mo ditemaneng 18–20. Go raya eng gore “magodimo a tlaa bulega”? Go raya eng go itumelela kabelano le boleng teng jwa Modimo Rara, le Jeso”? Thata le taolo ya boperesiti jwa Mmoloki di dira jang gore tse tsotlhe di nne teng mo go wena?

Bona gape Alema 13:2, 16; Dithuto le Dikgolagano 84:19–27.

Tsepama mo go Jeso Keresete. “Go na le dilo tse di dintsi tse re tshwanetseng go di ruta ka efangele e e tsosilositsweng ya ga Jeso Keresete—melawana, ditaelo, diperofeso, le dipolelo tsa lekwalo le le boitshepo. Mme tse tsotlhe ke dikala tsa setlhare sone seo, gonne tsotlhe di na le boikaelelo: go thusa batho botlhe go tla mo go Keresete le go itekanesiwa mo go Ene (bona Jaromo 1:11; Moroni 10:32). Jalo go sa re sepe go re o ruta eng, gakologelwa gore o ruta tota ka Jeso Keresete le ka fa re ka tshwanang le Ene” (Teaching in the Savior’s Way, 6). Sekai, fa o ruta—le go ithuta—ka boperoseti mo Dithuto le Dikgolagano 107, botsa gangwe le gape gore, “Re ithuta eng ka Mmoloki?”

Dithuto le Dikgolagano 107:22

Batlhanka ba Morena ba “kokotlelwa ka boikanyego, tumelo, le thapelo ya kereke.”

O akanya gore go raya eng go kokotlela batlhanka ba Morena ka boikanyego? ka tumelo ya gago? ka thapelo ya gago?

Bona gape “God Bless Our Prophet Dear,” Hymns, no. 24.

Dithuto le Dikgolagano 107:23–24, 33–35, 38, 91–92

Baporofeti le Baaposetole ba paka ka Jeso Keresete.

Joseph Smith o abelane tsetlana 107 ka 1835 le khoramo e e sa tswang go bidiwa ya Baaposetole ba ba Lesome le Bobedi (bona setlhogo sa tsetlana). Morena o ba rutile eng ka pitso ya bone mo ditemaneng 23–24, 33–35, 38? Bosupi jwa gago jwa ga Jeso Keresete bo thatafaditswe jang ke thuto le tirelo ya Baaposetole ba ba tshelang ba Gagwe?

Mo ditemaneng 91–92, Morena o ruta ka Moaposetole wa Gagwe yo mogolwane, Poresidente ya Kereke. O “tshwana le Moshe jang”? (Bona Kaelo ya Dikwalo tse di Boitshepo, “Moshe,” Motlobo wa Efangele).

Bona gape David A. Bednar, “Chosen to Bear Testimony of My Name,” Liahona, Ngwanatsele. 2015, 128–31.

Dithuto le Dikgolagano 107:27–31, 85–89

Morena o diragatsa tiro ya Gagwe ka makgotla.

Elatlhoko se Morena a se rutileng ka makgotla mo Dithuto le Dikgolagano 107:27–31, 85–89. Ke eng se se dirang lekgotla go dira ka natla? O ka dirisa melawana ena jang mo pitsong ya gago ya Kereke, mo lwapeng la gago, kgotsa mo maikarabelong a gago a mangwe?

Bona gape M. Russell Ballard, “Family Councils,” Liahona, Motsheganong 2016, 63–65; General Handbook, 4.3–4.4, motlobo wa Efangele.

Morena o laletsa malwapa go gakololana mmogo.

Ka megopolo thata, bona dikgatiso tsa kgwedi ena tsa Liahona le Ya Nonofo ya Banana dimakasine.

Megopolo ya go Ruta Bana

Dithuto le Dikgolagano 107:18–20

Jeso Keresete o a ntshegofatsa ka thata ya boperesiti jwa Gagwe.

• Fa wena le bana ba gago le bala mmogo Dithuto le Dikgologano 107:18–19, gatelela polelwana “ditshegofatso tsotlhe tsa semowa.” Gongwe wena le bana ba gago lo ka nankola ditshegofatso tse di tswang mo boperesiting. Lo ka dira motshameko wa one—bonang yo o ka dirang nakolo e telele thata. Bana ba gago gape ba ka tshwantsha kgotsa ba bona ditshwantsho go kaya ditshegofatso tsena (bona tsebe ya tiragatsoya beke ena). Ke gone lo ka bua mabapi le ka fa ditao tsa boperoseti (jaaka kolobetso kgotsa sakaramente) di re thusang ka teng go amogela ditshegofatso tsa Modimo.

Dithuto le Dikgolagano 107:21–26, 33–35, 91–92

Batlhanka ba ba itshenketsweng ba Morena ba etelelapele Kereke ya Gagwe.

• Kgatiso nngwe le nngwe ya khonferense ya Liahona e akaretsa tsebe ya ditshwantsho tsa Balaodi ba Kakaretso. Akanya go leba ditshwantsho tsena le bana ba gago fa lo ntse le bala ka maikarabelo a bone mo Dithuto le Dikgolagano 107:21–26, 33–35, 91–92. Wena le bana ba gago le ka buisana ka gore ke eng le lebogela gore Morena o ba neetse maikarabelo ana.

• Bana ba gago ba ka ithuta thata ka batlhanka ba Morena kwa “General Church Leadership” mo ChurchofJesusChrist.org. Gongwe mongwe le mongwe wa bana ba gago o ka ithuta ka yo mongwe wa baeteledipele ba mme ba rutana ka ene. Abelanang ka fa lo itseng ka teng gore baeteledipele ba ke batlhanka ba boammaaruri ba ga Jeso Keresete.

• Morago ga go bala Dithuto le Dikgologano 107:22 mmogo, wena le bana ba gago le ka fapaanela go tshwara setshwantsho sa Boporesidente ba Ntlha le go abelana ditsela tse le ka ba tshegetsang e le batlhanka ba Morena.

Boporesidente jwa Ntlha

Dithuto le Dikgolagano 108:3

Ke ka nna kelotlhoko mo go tsheleng ka dikgolagano tsa me.

• Go simolola puisano ka temana e, o ka laletsa bana ba gago go dira sengwe se se tlhokang kelotlhoko, jaaka go tlatsa kopi ntle le go tshologa. Go diragalang fa re se tlhoko? Ke gone bala Dithuto le Dikgolagano 108:3 go bona se Morena a batlang re se dira ka kelotlhoko. Ke “maikano” afe (ditsholofetso kgotsa dikgolagano) tse re dirang le Modimo? Re ka nna kelotlhoko jang mabapi le go di tshegetsa? O ka abelana dikarolo tsa molaetsa wa ga Kgaitsadi Becky Craven “Careful versus Casual” (Liahona, Motsheganong 2019, 9–11) o o ikutlwang o ka tlhotlheletsa bana ba gago go tshegetsa di kgolagano tsa bone. Le ka opela gape pina mabapi le go tshegetsa dikgolagano, jaaka “I Will Be Valiant” (Children’s Songbook, 162).

Go tshela metsi ka kelotlhoko go ka tshwantshanngwa le go tshegetsa dikgolagano tsa rona ka kelotlhoko.

Ka megopolo thata, bona kgatiso ya kgwedi e ya Friend makasine.

Melchizedek Blesses Abram [Melekiseteke o segofatsa Aboramo], ka Walter Rane