« ថ្ងៃទី ២២–២៨ ខែ កញ្ញា ៖ ‹ តាមរបៀបនៃព្រះរាជបុត្រានៃព្រះ › ៖ គោលលទ្ធិ និងសេចក្តីសញ្ញា ១០៦–១០៨ » ចូរមកតាមខ្ញុំ—សម្រាប់គេហដ្ឋាន និងសាសនាចក្រ ៖ គោលលទ្ធិ និងសេចក្តីសញ្ញា ឆ្នាំ ២០២៥ ( ឆ្នាំ ២០២៥ )

« គោលលទ្ធិ និងសេចក្តីសញ្ញា ១០៦–១០៨ » ចូរមកតាមខ្ញុំ—សម្រាប់គេហដ្ឋាន និងសាសនាចក្រ ៖ ឆ្នាំ ២០២៥

ថ្ងៃទី ២២–២៨ ខែ កញ្ញា ៖ « តាមរបៀបនៃព្រះរាជបុត្រានៃព្រះ »

គោលលទ្ធិ និងសេចក្តីសញ្ញា ១០៦–១០៨

បើមើលមួយភ្លែត គោលលទ្ធិ និងសេចក្តីសញ្ញា ១០៧ ហាក់បីដូចជានិយាយតែអំពីការរៀបចំតំណែងបព្វជិតភាព ទៅជារចនាសម្ព័នថ្នាក់ដឹកនាំ សម្រាប់សាសនាចក្ររបស់ព្រះអម្ចាស់ប៉ុណ្ណោះ ។ នៅកាលដែលវិវរណៈត្រូវបានបោះពុម្ព សមាជិកភាពសាសនាចក្រមានការកើនឡើងចំនួនលើសពីសមត្ថភាពថ្នាក់ដឹកនាំ ដែលមានតែពីរបីនាក់ ។ ការបែងចែកតួនាទី និងការទទួលខុសត្រូវនានានៃគណៈប្រធានទីមួយ កូរ៉ុមនៃពួកសាវកដប់ពីរនាក់ ពួកចិតសិបនាក់ ប៊ីស្សព និងគណៈប្រធានកូរ៉ុមគឺពិតជាត្រូវការ និងមានអត្ថប្រយោជន៍យ៉ាងខ្លាំង ។ ប៉ុន្តែមានការណែនាំពីព្រះបន្ថែមទៀតកាន់តែច្រើននៅក្នុង កណ្ឌទី ១០៧ ជាជាងគ្រាន់តែរបៀបដែលថ្នាក់ដឹកនាំសាសនាចក្រគួរតែរៀបចំឡើង ។ នៅទីនេះ ព្រះអម្ចាស់បង្រៀនយើងអំពីព្រះចេស្តា និងសិទ្ធិអំណាចរបស់ទ្រង់ « បព្វជិតភាពដ៏បរិសុទ្ធ តាមរបៀបនៃព្រះរាជបុត្រានៃព្រះ » ( ខទី ៣ ) ។ គោលបំណងនៃបព្វជិតភាពគឺដើម្បីបើក « ព្រះពរខាងវិញ្ញាណនៅក្នុងសាសនាចក្រ » ដើម្បីឲ្យបុត្រាបុត្រីរបស់ព្រះអាច « ឲ្យស្ថានសួគ៌បានបើកចំហចំពោះពួកគេ » ហើយ « ត្រេកអរចំពោះសេចក្ដីរួបរួមគ្នា និងវត្តមាននៃព្រះដ៏ជាព្រះវរបិតា និងព្រះយេស៊ូវដ៏ជាអ្នកកណ្ដាលនៃសេចក្ដីសញ្ញាថ្មី » ( ខទី ១៨–១៩ ) ។ នៅក្នុងការបង្រៀនយើងអំពីបព្វជិតភាពរបស់ទ្រង់ ព្រះអង្គសង្គ្រោះកំពុងបង្រៀនយើងអំពីទ្រង់ផ្ទាល់ និងអំពីរបៀបដែលយើងអាចមករកទ្រង់បាន ។

សូមមើល « Restoring the Ancient Order » នៅក្នុង Revelations in Context ទំព័រ ២០៨–២១២ ។

គំនិតសម្រាប់ការរៀនសូត្រនៅឯគេហដ្ឋាន និងនៅឯព្រះវិហារ

គោលលទ្ធិ និងសេចក្ដីសញ្ញា ១០៦; ១០៨

ព្រះអម្ចាស់គាំទ្រខ្ញុំ នៅពេលទ្រង់ហៅខ្ញុំឲ្យបម្រើ ។

នៅក្នុង គោលលទ្ធិ និងសេចក្ដីសញ្ញា ១០៦ និង ១០៨ ព្រះអម្ចាស់បានផ្តល់ដំបូន្មាន និងសេចក្តីសន្យាដល់សមាជិកពីរនាក់ ដែលបានហៅឲ្យបម្រើនៅក្នុងសាសនាចក្ររបស់ទ្រង់ ។ នៅពេលបងប្អូនសិក្សាដំបូន្មានរបស់ទ្រង់ បងប្អូនអាចនឹងគិតអំពីឱកាសផ្ទាល់ខ្លួនរបស់បងប្អូនដើម្បីបម្រើព្រះអម្ចាស់—ប្រហែលជាកិច្ចការការងារបម្រើ ការហៅបម្រើក្នុងសាសនាចក្រ ទំនួលខុសត្រូវក្នុងគ្រួសាររបស់បងប្អូន ឬការបំផុសគំនិតខាងវិញ្ញាណឲ្យធ្វើអំពើល្អ ។

តើបងប្អូនមានអារម្មណ៍យ៉ាងណាចំពោះសារលិខិតរបស់ព្រះអម្ចាស់ទៅកាន់បងប្អូននៅក្នុងវិវរណៈទាំងនេះ ? តើឃ្លាមួយណាដែលមានអត្ថន័យជាពិសេសចំពោះបងប្អូន ? នេះជាសំណួរពីរបីដើម្បីពិចារណា ៖

តើនៅពេលណាដែលព្រះអម្ចាស់ប្រទានដល់បងប្អូននូវ « ព្រះគុណ [ ឬជំនួយដ៏ទេវភាព ] និងការបញ្ជាក់ » ដើម្បីអាចបម្រើទ្រង់ ? ( គោលលទ្ធិ និងសេចក្តីសញ្ញា ១០៦:៨ ) ។
តើបងប្អូនគិតថាវាមានន័យយ៉ាងណាដើម្បីពង្រឹងអ្នកដទៃនូវ « គ្រប់ការប្រព្រឹត្តិរបស់អ្នក » ? ( គោលលទ្ធិ និងសេចក្តីសញ្ញា ១០៨:៧ ) ។

នៅពេលអែលឌើរ ខាល ប៊ី ឃុក បានទទួលការចាត់តាំងសាសនាចក្រដ៏លំបាកមួយ លោកបានទាញកម្លាំងចេញពីបទពិសោធន៍នៃបុព្វការីជនម្នាក់ ។ សូមអានអំពីដំណើររឿងនេះនៅក្នុងសារលិខិតរបស់លោកក្រោមចំណណជើង « Serve » ( Liahona ខែ វិច្ឆិកា ឆ្នាំ ២០១៦ ទំព័រ ១១០–១១២ ) ។ សូមពិចារណាសរសេរសំបុត្រមួយច្បាប់ដើម្បីលើកទឹកចិត្តកូនចៅរបស់បងប្អូន—ឬខ្លួនឯងនៅពេលអនាគត—ដើម្បីទទួលយកឱកាសបម្រើព្រះអម្ចាស់ ។ នៅក្នុងសំបុត្ររបស់បងប្អូន សូមបញ្ចូលនូវសេចក្តីពិតដែលបងប្អូនបានរៀនពីសារលិខិតរបស់ អែលឌើរ ឃុក គោលលទ្ធិ និងសេចក្តីសញ្ញា ១០៦ និង ១០៨ និងបទពិសោធន៍របស់បងប្អូនផ្ទាល់ ។

សូមមើលផងដែរ ហែនរី ប៊ី អាវរិង « Walk with Me » Liahona ខែ ឧសភា ឆ្នាំ ២០១៧ ទំព័រ ៨២–៨៥; Topics and Questions « Serving in Church Callings » នៅលើបណ្ណាល័យដំណឹងល្អ; « Warren Cowdery » និង « ‘Wrought Upon’ to Seek a Revelation » នៅក្នុង Revelations in Context ទំព័រ ២១៩–២២៣, ២២៤–២២៨ ។

គោលលទ្ធិ និងសេចក្តីសញ្ញា ១០៧:១–៤, ១៨–២០

បព្វជិតភាពគឺ « តាមរបៀបនៃព្រះរាជបុត្រានៃព្រះ » ។

ព្រះអម្ចាស់បានចាប់ផ្ដើម « វិវរណៈអំពីបព្វជិតភាព » ( គោលលទ្ធិ និងសេចក្តីសញ្ញា ១០៧ ក្បាលកណ្ឌ ) ដោយបង្រៀនយើងអំពីឈ្មោះដើមនៃបព្វជិតភាពម៉ិលគីស្សាដែក ( សូមមើល ខទី ១–៤ ) ។ ហេតុអ្វីបានជាបងប្អូនគិតថាវាសំខាន់ដើម្បីដឹងពីរឿងនោះ ? តើឈ្មោះនេះមានឥទ្ធិពលលើរបៀបដែលបងប្អូនគិតអំពីបព្វជិតភាពយ៉ាងដូចម្ដេច ?

សូមរក្សាគំនិតទាំងនេះនៅក្នុងចិត្តនៅពេលបងប្អូនអានអំពីបព្វជិតភាព ជាពិសេសនៅក្នុង ខទី ១៨–២០ ។ តើវាមានន័យយ៉ាងដើម្បី « ឲ្យស្ថានសួគ៌បានបើកចំហ » ? តើវាមានន័យយ៉ាងណាដើម្បី « ត្រេកអរចំពោះសេចក្ដីរួបរួមគ្នា និងវត្តមាននៃព្រះដ៏ជាព្រះវរបិតា និងព្រះយេស៊ូវ » ? តើអំណាចបព្វជិតភាព និងសិទ្ធិអំណាចរបស់ព្រះអង្គសង្រ្គោះអាចធ្វើឲ្យអ្វីៗទាំងអស់នេះមានចំពោះបងប្អូនដោយរបៀបណា ?

សូមមើលផងដែរ អាលម៉ា ១៣:២, ១៦; គោលលទ្ធិ និងសេចក្តីសញ្ញា ៨៤:១៩–២៧ ។

សូមផ្តោតទៅលើព្រះយេស៊ូវគ្រីស្ទ ។ « មានអ្វីៗជាច្រើនដើម្បីបង្រៀននៅក្នុងដំណឹងល្អដែលបានស្ដារឡើងវិញរបស់ព្រះយេស៊ូវគ្រីស្ទ—គោលការណ៍ បទបញ្ញត្តិ ការព្យាករណ៍ និងដំណើររឿងនានាមកពីព្រះគម្ពីរ ។ ប៉ុន្តែអ្វីៗទាំងនេះគឺជាមែកធាងទាំងឡាយនៃដើមឈើតែមួយ ដ្បិតវាមានគោលបំណងតែមួយ ៖ ដើម្បីជួយមនុស្សទាំងអស់ឲ្យមកកាន់ព្រះគ្រីស្ទ ហើយឲ្យល្អឥតខ្ចោះក្នុងទ្រង់ ( សូមមើល យ៉ារ៉ុម ១:១១; មរ៉ូណៃ ១០:៣២ ) ។ « មិនថាអ្នកកំពុងបង្រៀនអ្វីនោះទេ សូមចាំថាអ្នកកំពុងតែបង្រៀនអំពីព្រះយេស៊ូវគ្រីស្ទ និងរបៀបកាន់តែប្រែក្លាយដូចជាទ្រង់យ៉ាងពិតប្រាកដ » ( ការបង្រៀនតាមរបៀបរបស់ព្រះអង្គសង្គ្រោះ ទំព័រ ៦ ) ។ ឧទាហរណ៍ នៅពេលបងប្អូនបង្រៀន—និងរៀន—អំពីបព្វជិតភាពនៅក្នុង គោលលទ្ធិ និងសេចក្តីសញ្ញា ១០៧ សូមសួរជាញឹកញាប់ថា « តើយើងកំពុងរៀនអ្វីខ្លះអំពីព្រះអង្គសង្រ្គោះ ? »

គោលលទ្ធិ និងសេចក្ដីសញ្ញា ១០៧:២២

ពួកអ្នកបម្រើរបស់ព្រះអម្ចាស់ត្រូវបាន « គាំទ្រដោយសេចក្ដីទុកចិត្ត សេចក្ដីជំនឿ និង សេចក្តីអធិស្ឋាននៃសាសនាចក្រ » ។

តើបងប្អូនគិតថាវាមានន័យយ៉ាងណាក្នុងការគាំទ្រដល់ពួកអ្នកបម្រើរបស់ព្រះអម្ចាស់ដោយទំនុកចិត្តរបស់បងប្អូន ? ដោយសេចក្តីជំនឿរបស់បងប្អូន ? ដោយការអធិស្ឋានរបស់បងប្អូន ?

សូមមើលផងដែរ « សូមព្យាការីបានពរ » ទំនុកតម្កើង ទំព័រ ១៤ ។

គោលលទ្ធិ និងសេចក្តីសញ្ញា ១០៧:២៣–២៤, ៣៣–៣៥, ៣៨, ៩១–៩២

ពួកព្យាការី និងសាវកថ្លែងទីបន្ទាល់អំពីព្រះយេស៊ូវគ្រីស្ទ ។

យ៉ូសែប ស្ម៊ីធ បានចែកចាយ កណ្ឌទី ១០៧ នៅក្នុងឆ្នាំ ១៨៣៥ ជាមួយនឹងកូរ៉ុមនៃពួកសាវកដប់ពីរនាក់ដែលទើបបានហៅថ្មី ( សូមមើលក្បាលកណ្ឌ ) ។ តើព្រះអម្ចាស់បានបង្រៀនអ្វីខ្លះដល់ពួកលោកអំពីការហៅរបស់ពួកលោក ខទី ២៣–២៤, ៣៣–៣៥, ៣៨ ? តើសាក្សីរបស់បងប្អូនអំពីព្រះយេស៊ូវគ្រីស្ទត្រូវបានពង្រឹងដោយការបង្រៀន និងការបម្រើរបស់សាវកដែលនៅរស់របស់ទ្រង់ដោយរបៀបណា ?

នៅក្នុង ខទី ៩១–៩២ ព្រះអម្ចាស់បង្រៀនអំពីសាវករៀមច្បងរបស់ទ្រង់ ដែលជាប្រធានសាសនាចក្រ ។ តើលោក « ដូចលោកម៉ូសេ » ដោយរបៀបណា ? ( សូមមើលសេចក្តីណែនាំដល់បទគម្ពីរទាំងឡាយ « ម៉ូសេ » នៅលើបណ្ណាល័យដំណឹងល្អ ) ។

សូមមើលផងដែរ ដេវីឌ អេ បែដណា « Chosen to Bear Testimony of My Name » Liahona ខែ វិច្ឆិកា ឆ្នាំ ២០១៥ ទំព័រ ១២៨–១៣១ ។

គោលលទ្ធិ និងសេចក្តីសញ្ញា ១០៧:២៧–៣១, ៨៥–៨៩

ព្រះអម្ចាស់សម្រេចបានកិច្ចការរបស់ទ្រង់តាមរយៈក្រុមប្រឹក្សា ។

សូមកត់ចំណាំនូវអ្វីដែលព្រះអម្ចាស់បានបង្រៀនអំពីក្រុមប្រឹក្សានៅក្នុង គោលលទ្ធិ និង សេចក្ដីសញ្ញា ១០៧:២៧–៣១, ៨៥–៨៩ ។ តើអ្វីដែលធ្វើឲ្យក្រុមប្រឹក្សាមានប្រសិទ្ធភាព ? តើបងប្អូនអាចអនុវត្តគោលការណ៍ទាំងនេះនៅក្នុងការហៅនៅក្នុងសាសនាចក្ររបស់បងប្អូន គេហដ្ឋានរបស់បងប្អូន ឬទំនួលខុសត្រូវផ្សេងទៀតរបស់បងប្អូនដោយរបៀបណា ?

សូមមើលផងដែរ អិម. រ័សុល បាឡឺត « Family Councils » Liahona ខែ ឧសភា ឆ្នាំ ២០១៦ ទំព័រ ៦៣–៦៥; ក្បួនខ្នាត, ៤.៣–៤.៤ នៅលើបណ្ណាល័យដំណឹងល្អ ។

គ្រួសារកំពុងដាក់ផែនការជាមួយគ្នា — ព្រះអម្ចាស់អញ្ជើញក្រុមគ្រួសារឲ្យប្រឹក្សាជាមួយគ្នា ។

សម្រាប់គំនិតបន្ថែម សូមមើលទស្សនាវដ្តី លីអាហូណា និង ដើម្បីកម្លាំងនៃយុវជន ប្រចាំខែនេះ ។

គំនិតសម្រាប់បង្រៀនកុមារ

គោលលទ្ធិ និងសេចក្តីសញ្ញា ១០៧:១៨–២០

ព្រះយេស៊ូវគ្រីស្ទ ប្រទានពរដល់ខ្ញុំតាមរយៈអំណាចបព្វជិតភាពរបស់ទ្រង់ ។

ពេលបងប្អូន និងកូនៗរបស់បងប្អូនអាន គោលលទ្ធិ និងសេចក្តីសញ្ញា ១០៧:១៨–១៩ ជាមួយគ្នា សូមបញ្ជាក់ឃ្លា « អស់ទាំងព្រះពរខាងវិញ្ញាណ » ។ ប្រហែលជាបងប្អូន និងកូនៗរបស់បងប្អូនអាចរាយបញ្ជីពរជ័យដែលបានមកពីបព្វជិតភាព ។ បងប្អូនអាចបង្កើតល្បែងមួយ—មើលថាតើនរណាអាចបង្កើតបញ្ជីវែងជាងគេ ។ កូនៗរបស់បងប្អូនក៏អាចគូរ ឬស្វែងរករូបភាពដើម្បីតំណាងឲ្យពរជ័យទាំងនេះផងដែរ ( សូមមើលសប្តាហ៍នេះ ទំព័រសកម្មភាព ) ។ បន្ទាប់មក បងប្អូនអាចនិយាយអំពីរបៀបដែលពិធីបរិសុទ្ធបព្វជិតភាព ( ដូចជាពិធីបុណ្យជ្រមុជទឹក ឬ សាក្រាម៉ង់ ) ជួយយើងទទួលបានពរជ័យពីព្រះ ។

គោលលទ្ធិ និងសេចក្តីសញ្ញា ១០៧:២១–២៦, ៣៣–៣៥, ៩១–៩២

ពួកអ្នកបម្រើដែលបានជ្រើសរសើរបស់ព្រះអម្ចាស់ដឹកនាំសាសនាចក្ររបស់ទ្រង់ ។

រាល់ច្បាប់ទស្សនាវដ្តី លីអាហូណា ពីសន្និសីទមានរួមបញ្ចូលទំព័ររូបភាពនៃពួកអ្នកមានសិទ្ធិអំណាចទូទៅ ។ សូមពិចារណាមើលរូបភាពទាំងនេះជាមួយកូនៗរបស់បងប្អូន នៅពេលបងប្អូនអានអំពីទំនួលខុសត្រូវរបស់ពួកលោកនៅក្នុង គោលលទ្ធិ និងសេចក្តីសញ្ញា ១០៧:២១–២៦, ៣៣–៣៥, ៩១–៩២ ។ បងប្អូន និងកូនៗរបស់បងប្អូនអាចនិយាយអំពីមូលហេតុ ដែលបងប្អូនដឹងគុណដែលព្រះអម្ចាស់បានប្រទានឲ្យពួកគេនូវទំនួលខុសត្រូវទាំងនេះ ។
កូនៗរបស់បងប្អូនអាចស្វែងយល់បន្ថែមអំពីពួកអ្នកបម្រើរបស់ព្រះអម្ចាស់នៅ « General Church Leadership » នៅលើគេហទំព័រ ChurchofJesusChrist.org ។ ប្រហែលជាកូនរបស់បងប្អូនម្នាក់ៗអាចរៀនអំពីអ្នកដឹកនាំម្នាក់ក្នុងចំណោមថ្នាក់ដឹកនាំទាំងនេះ ហើយបង្រៀនគ្នាទៅវិញទៅមកអំពីលោក ។ សូមចែកចាយគ្នាទៅវិញទៅមកអំពីរបៀបដែលបងប្អូនដឹងថា ថ្នាក់ដឹកនាំទាំងនេះគឺជាអ្នកបម្រើពិតរបស់ព្រះយេស៊ូវគ្រីស្ទ ។
បន្ទាប់ពីអាន គោលលទ្ធិ និងសេចក្តីសញ្ញា ១០៧:២២ ជាមួយគ្នារួចហើយ បងប្អូន និងកូនៗរបស់បងប្អូនអាចលើករូបភាពនៃគណៈប្រធានទីមួយឡើងម្នាក់ម្តងៗ ហើយចែកចាយអំពីរបៀបដែលបងប្អូនអាចគាំទ្រពួកលោកក្នុងនាមជាអ្នកបម្រើរបស់ព្រះអម្ចាស់ ។

គោលលទ្ធិ និងសេចក្ដីសញ្ញា ១០៨:៣

ខ្ញុំអាចយកចិត្តទុកដាក់ក្នុងការរស់នៅតាមសេចក្ដីសញ្ញារបស់ខ្ញុំ ។

ដើម្បីចាប់ផ្តើមការសន្ទនាអំពីខគម្ពីរនេះ បងប្អូនអាចអញ្ជើញកូនៗរបស់បងប្អូនឲ្យធ្វើអ្វីមួយដែលទាមទារឲ្យមានការយកចិត្តទុកដាក់ ដូចជាចាក់ទឹកចូលកែវកុំឲ្យហៀរ ។ តើអ្វីខ្លះកើតឡើងពេលយើងខ្វះការប្រុងប្រយ័ត្ន ? បន្ទាប់មក បងប្អូនអាចអាន គោលលទ្ធិ និងសេចក្តីសញ្ញា ១០៨:៣ ដើម្បីស្វែងរកអ្វីដែលព្រះអម្ចាស់ចង់ឲ្យយើងធ្វើដោយយកចិត្តទុកដាក់ ។ តើ « សម្បថ » ( ការសន្យា ឬសេចក្តីសញ្ញា ) អ្វីខ្លះដែលយើងធ្វើជាមួយព្រះ ? តើយើងអាចមានការយកចិត្តទុកដាក់បន្ថែមទៀតក្នុងការរក្សាវាដោយរបៀបណា ? បងប្អូនអាចចែកចាយផ្នែកដែលជាសារលិខិតរបស់ស៊ីស្ទើរ បែកឃី ក្រាវីន « Careful versus Casual » ( Liahona ខែ ឧសភា ឆ្នាំ ២០១៩ ទំព័រ ៩–១១ ) ដែលបងប្អូនមានអារម្មណ៍ថាអាចបំផុសគំនិតកូនរបស់បងប្អូនឲ្យគោរពតាមសេចក្ដីសញ្ញារបស់ពួកគេ ។ បងប្អូនក៏អាចច្រៀងបទចម្រៀងអំពីការគោរពតាមសេចក្តីសញ្ញា ដូចជាបទ « ខ្ញុំនឹងធ្វើជាអ្នកក្លាហាន » ( សៀវភៅចម្រៀងកុមារ ទំព័រ ៨៥ ) ។

ក្មេងស្រីកំពុងចាក់ទឹក — ការចាក់ទឹកដោយយកចិត្តទុកដាក់ អាចប្រៀបធៀបទៅនឹងការគោរពតាមសេចក្ដីសញ្ញារបស់យើងដោយប្រុងប្រយ័ត្ន ។

សម្រាប់គំនិតបន្ថែម សូមមើលទស្សនាវដ្តី ប្រិយមិត្ត ប្រចាំខែនេះ ។

គំនូររបស់ម៉ិលគីស្សាដែក និងអ័ប្រាហាំ — Melchizedek Blesses Abram [ ម៉ិលគីស្សាដែកប្រសិទ្ធពរដល់អាប់រ៉ាម ] ដោយ វ៉លធើរ រ៉េន ។