“Mantswe a Tsosoloso: Diponatshegelo tsa Semowa le Tempele ya Kirtland,” Tlayang, Ntshalang Morago—Ya Legae le Kereke: Dithuto le Dikgolagano 2025 (2025)

“Diponatshegelo tsa Semowa le Tempele ya Kirtland” Tlayang, Ntshalang Morago—Ya Legae le Kereke: 2025

Mantswe a Tsosoloso

Diponatshegelo tsa Semowa le Tempele ya Kirtland

Fa tlase ke mafoko a Baitshepi ba Malatsi a Bofelo ba ba neng ba le mo Tempeleng ya Kirtland ka nako ya tshwaelo le diphuthego tse di neng tsa latela. Bontsi bo ne jwa tshwantshanya maitemogelo a bone le seo Baitshepi ba se itemogetseng fa ba ne ba “apesiwa ka thata go tswa kwa godimo mo letsatsing” la Pentekosete (Luke 24:49; bona le gone Ditiro 2:1–4; Dithuto le Dikgolagano 109:36–37).

Eliza R. Snow

“Meletlo ya tshwaelo eo e ka buiwa, mme ga gona puo ya mo lefatsheng e e ka tlhalosang diponatshegelo tsa legodimo tsa letsatsi leo la segopotso. Baengele ba ne ba iponatsa go ba bangwe, fa gone go utlwa selegodimo gone ga lemogiwa ke mongwe le mongwe yo a neng a le teng, e bile pelo nngwe le nngwe e ne e tletse ka ‘boipelo jo bo sa tlhalosegeng le go tlala ka kgalalelo.’”

Sylvia Cutler Webb

“Nngwe ya dilo tsa ntlha tse ke neng ke di gakologelwa ke tshwaelo ya Tempele. Rre o ne a re baya mo diropeng mme a re bolelela gore ke eng re ne re tsamaya le gore go raya eng go tshwaela ntlo ya Modimo. Le ntswa ke ne ke le monyennyane ka nako eo, ke e gakologelwa sentle tiragalo. Ke ka leba dingwaga tse di fitileng mme ke bone jaaka ke bone Moperofeti Joseph, a eme ka matsogo a tsoleleditswe kwa legodimong, a thuntse sefatlhogo, ka dikeledi di elela mo marameng a gagwe jaaka a ne a bua mo letsatsing leo la segopotso. Mongwe le mongwe o ka ne a tsholola dikeledi. Ntlo e ne e tletse mo bana ba ne bontsi bo ntse mo diropeng tsa bagolo; kgaitsadiake o ne a ntse mo go rre, nna mo diropeng tsa ga mmệ. Le gone ke gakologelwa mesese e re neng re apere. Tlhaloganyo ya me e ne e le nnye go tshwara bokao ka botlalo jwa sengwe le sengwe, mme fa nako e ntse e tsamaya ga simolola go tla mo go nna, mme ke itumelela thata gore ke ne ka nna le tshono ya go nna teng.”

Oliver Cowdery

“Maitseboa ka kopana le badiredi ba kereke mo ntlong ya Morena. Mowa o ne o goromeleditswe kwa ntle—ka bona kgalalelo ya Modimo, jaaka leru le legolo, le tla tlase mme la ema mo ntlong, mme la e tlatsa jaaka sefefo se se maatla se se tsubutlang. Le gone ka bona diteme tse di patologaneng, jaaka tsa molelo di le mo go ba bantsi, … Jaaka ba ne ba bua ka diteme tse dingwe le go perofesa.”

Benjamin Brown

“Diponatshegelo tse dintsi [di ne] tsa bonwa. Mongwe o bone mosepuri kgotsa leru le eme mo ntlong, le phatsima jaaka fa letsatsi le phatsima mo marung jaaka gauta. Bangwe ba babedi ba bone batho ba bararo ba tsamaya tsamaya mo kamoreng ka dilotlele tse di phatsimang mo diatleng tsa bone, mme le gone keetane e e phatsimang mo diatleng tsa bone.”

Orson Pratt

“Modimo o ne a le teng, baengele ba gagwe ba ne ba le teng, Mowa o o Boitshepo o ne o le mo gare ga batho … mme ba ne ba tladitswe go tswa mo phogwaneng ya ditlhogo tsa bone go ya go dikgato tsa dinao tsa bone ka thata le tlhotlheletso ya Mowa o o Boitshepo.”

Nancy Naomi Alexander Tracy

“[Fa] Tempele e fediwa le go tshwaelwa … e ne e le malatsi a mabedi a boitumelo jwa botshelo jwa me. Sefela se se neng se le matshwanedi se se neng sa tlhamelwa tiragalo e e ne e le ‘Mowa wa Modimo jaaka Molelo o a Tuka.’ Go ne go le boammaaruri tota gore Tlhotlheletso ya Legodimo e ne ele mo ntlong eo. … Ke ne ke ikutlwa gore ke legodimo mo lefatsheng.”