Phalane 6–12: “Ke Tlaa Rulaganya Dilo Tsotlhe go le Direla Molemo”

Dithuto le Dikgolagano 111–114

A o kile wa nna le maitemogelo a semowa a a go dirileng gore o ikutlwe o itshepa ebile o sireletsegile mo tumelong ya gago mo go Keresete—mme ke gone dipogiso tsa botshelo di ne tsa leka tumelo ya gago, mme wa iphitlhela o sokola go bona kagiso e o neng o e utlwile pele? Sengwe se se tshwanang se ne sa diragalela Baitshepi kwa Kirtland. Kwa tlase ga ngwaga morago ga tshololelo ya mowa e e amanang le tshwaelo ya Tempele ya Kirtland, mathata a ne a tlhaga. Mathata a madi, kgotlhang mo Khoramong ya ba ba Lesome le Bobedi, le diteko tse dingwe di ne tsa dira gore Baitshepi ba bangwe ba thetheekele mo tumelong ya bone ntswa maitemogelo a bone a pele.

Ga re ka ke ra tila diteko, jalo re ka di thibela jang go goma-gometsa tumelo le bopaki jwa rona? Gongwe karolo ya karabo e ka bonwa mo kgakololong ya Morena mo Dithuto le Dikgolagano 112, e e neetsweng fa pitlagano mo Kirtland e ne e kokomoga. Morena o rile, “intlafatseng dipelo fa pele ga me” (temana 28), “Se tsuologe” (temana 15), “Tlamelang matheka a lona tiro e” (temana 7), le “Nna boikokobetso” (temana 10). Jaaka re sala morago kgakololo ena, Morena o tlaa “[re] goga ka seatla” fa gare ga pitlagano le mo pholong le kagiso (bona ditemana 10, 13).

Megopolo ya go Ithuta kwa Gae le kwa Kerekeng

Dithuto le Dikgolagano 111

Morena o ka “rulaganya dilo tsotlhe go [ntirela] molemo.”

Ka 1836, Kereke e ne e dirile dikoloto tse di bokete mo go direng tiro ya Morena. Joseph Smith le ba bangwe ba ne ba tshwenyegile ka dikoloto tsena mme ba akanya ka ditsela tsa go di duela (bona setlhogo sa tsetlana ya Dithuto le Dikgolagano 111).

Fa o ntse o bala tsetlana 111, o ele tlhoko ka fa mafoko a Morena mo go Joseph a ka dirisiwang mo go wena—le dilo tse o tshwenyegileng ka tsone. Sekai, ke leng mo o neng wa utlwa lorato la Modimo “le ntswa boeleele jwa lona” (temana 1)? Morena o go thusitse jang go bona “matlotlo” a a sa solofelwangtemana 10)? O dirile eng go “rulaganya dilo tsotlhe go le direla molemo” (temana 11)? Seele “ka bonako jo lo ka nonofelang go di amogela” se go ruta eng ka Rara wa Legodimo?

Bona le gone Mathaio 6:19–21, 33; “More Treasures Than One,” mo Revelations in Context, 229–34.

Dithuto le Dikgolagano 112:3–15, 22

Morena o tlaa nkgoga fa ke ntse ke batla ka boikokobetso go dira thato ya Gagwe.

Thomas B. Marsh, Poresidente ya Khoramo ya Baaposetole ba ba Lesome le Bobedi, o ne a kgopisegile gore Joseph Smith, kwantle ga go buisana le ene, o ne a bitsa maloko a le mabedi a khoramo ya gagwe go rera efangele kwa Engelane. O ne a kopana le Moperofeti, yo o neng a amogela tshenolo e e neng ya thusa Thomas go seegela fa thoko maikutlo a gagwe a a botlhoko. Tshenolo eo e kwadilwe mo Dithuto le Dikgolagano 112.

Baya ntlha ena mo tlhaloganyong fa o ntse o ithuta Dithuto le Dikgolagano 112. Ke eng ​​se o se bonang se se ka tswang se ne sa fodisa maikutlo a ga Thomas a a botlhoko? Mo ditemaneng 3–15 le 22, o ka batla dikarabo tsa dipotso tse di tshwanang le tsena: Boikokobetso ke eng? Go raya eng gore Morena o go goga “ka seatla“? Ke eng o akanya gore go nna le boikokobetso go go thusa go amogela kaelo ya Morena? O ka bona dikarabo tse dingwe mo “Pattern of Humility” mo molaetseng wa ga Mogolwane Joseph W. Sitati “Patterns of Discipleship” (Liahona, Nov. 2022, 87–88).

Akanya ka mongwe yo o mo itseng yo o boikokobetso. Motho yo o dira eng go supa boikokobetso? O ithuta eng mo go Mmoloki ka go nna le boikokobetso? Gongwe o ka bona ditshwantsho tsa dinako mo botshelong jwa Gagwe fa A ne A supa boikokobetso.

O utlwile leng o kaelwa ke Morena fa o ntse o ikokobetsa?

Bona gape Ulisses Soares, “Be Meek and Lowly of Heart,” Liahona, Nov. 2013, 9–11; “The Faith and Fall of Thomas Marsh,” in Revelations in Context, 54–60; Topics and Questions, “Humility,” Motlobo wa Efangele; “Be Thou Humble,” Hymns, no. 130.

Tsenya baithuti mo puisanong. Akanya ka fa o ka thusang batho ba o ba rutang gore ba tseye karolo ka matlhagatlhaga mo go ithuteng boammaaruri jo bo mo dikwalong tse di boitshepo. Sekai, go ba thusa go tlhaloganya se Morena a se buileng mo Dithuto le Dikgolagano 112:10, o ka bipa motho matlho mme wa mo kaela ka kelotlhoko ka seatla go dikologa tsela ya dikgoreletsi e nnye ya ditilo kgotsa dilo tse dingwe. Re ka ithuta eng ka boikokobetso mo tshupegetsong ena?

Dithuto le Dikgolagano 112:12–26, 28, 33–34

Bao ba ba sokologileng ka boammaaruri ba nna le kitso ya ga Jeso Keresete.

Kgang ya gore Baaposetole ba bangwe ka 1837 ba ne ba fetogela Moperofeti ke kgakololo e ntle ya gore go sa re sepe pitso ya rona ya Kereke kgotsa gore re itse go le kae ka efangele, ka bongwe re tshwanetse go netefatsa gore re nonotsha tshokologo ya rona mo go Jeso Keresete. Gongwe o ka bala Dithuto le Dikgolagano 112:12–26, 28, 33–34 mme o batle boammaaruri jo bo ka go thusang go fenya teko ya tumelo kgotsa go sokologela mo Moreneng ka botlalo. O ka ikutlwa o tlhotlheletsegile go abelana se o se bonang go thusa motho yo mongwe go thathafatsa tshokologo ya gagwe mo go Keresete.

Dithuto le Dikgolagano 113

Joseph Smith e ne e le “motlhanka mo diatleng tsa ga Keresete.”

Moperofeti Isaia o ne a umaka mongwe wa dikokomane tsa ga Jesse jaaka “thobane” le “modi” (Isaia 11:1, 10). Mo tsetlana 113, Morena o tlhalositse gore kokomane ena, motlhanka wa ga Keresete, o tlaa nna sedirisiwa mo go phutheng batho ba Morena mo malatsing a bofelo (bona Dithuto le Dikgolagano 113:4, 6). Porefeso ena e tlhalosa Moperofeti Joseph Smith sentle thata. Sena le boammaaruri jo bongwe mo tsetlana 113 di ka tswa di ne tsa kgothatsa Baitshepi jang ka nako ya pheretlhego e ba neng ba e itemogela mo Kirtland? Ke eng se o se bonang mo tshenolong ena se se go tlhotlheletsang gore o nne o nonofile le go tswelela pele go tsaya karolo mo tirong ya Morena gompieno?

Bona le gone Kaelo ya Dikwalo tse di Boitshepo, “Jesse,” Motlobo wa Efangele; 2 Nefi 21:10–12; Joseph Smith—Ditso 1:40.

Isaia o kwadile ka “thobane” le “medi” di tswa mo “thitong ya ga Jese” (Isaia 11:1).

Ka ga megopolo e mentsi, bona dikgatiso tsa kgwedi e tsa Liahona le Go Nonofo ya Banana dimakasine.

Megopolo ya Go Ruta Bana

Dithuto le Dikgologano 111:2, 10–11

Dilo tsa Modimo e ka nna letlotlo mo go nna.

• Wena le bana ba gago le ka tshwantsha se se tlang mo tlhaloganyong fa le utlwa lefoko letlotlo. Ke gone le ka bala mmogo Dithuto le Dikgolagano 111:2, 10–11 mme le farologanye matlotlo a lefatshe le dilo tse Morena a di ratang. (Bona ya beke e tsebe ya tiragatso.) Re ka rata thata jang dilo tsa Modimo?

Dithuto le Dikgolagano 112:10

Morena o tlaa nkgoga ka seatla mme a arabe dithapelo tsa me.

• Fa le sena go bala Dithuto le Dikgolagano 112:10 mmogo, wena le bana ba gago le ka opela mmogo “Be Thou Humble” (Hymns, no. 130). Le ka tshameka gape motshemeko o o akaretsang go gogana “ka seatla” (jaaka tsela ya dikgoreletsi). Morena o re goga jang “ka seatla,” le fa a se na le rona ka nama? Ke eng re tlhoka gore Morena a re goge? Ke leng mo re utlwileng Morena a re goga?

• Wena kgotsa bana ba gago lo ka kwala mafoko a Dithuto le Dikgolagano 112:10 mme la kgwarela ditshegofatso tse Morena a di re neelang fa re sokologela kwa go Ene ka boikokobetso. Kgothaletsa bana ba gago go abelana dinako tseo ka boikokobetso ba neng ba kopa thuso ya Morena mme ba amogela dikarabo tsa dithapelo tsa bone kgotsa ba ne ba gogelwa go dira sengwe se se molemo (bona Moroni 7:13, 16).

Ntlha go tswa Arise and Walk [Emelela mme o Tsamaye], ka Simon Dewey

Dithuto le Dikgolagano 112:11

Jeso o batla ke rata mongwe le mongwe.

• Wena le bana ba gago le ka fapaanela go bala mo “Chapter 41: Trouble in Kirtland” (mo Doctrine and Covenants Stories, 158–60). Ke mang mo polelong yo o dirileng gore mathata a Kirtland a maswefale. Ke mang yo o neng a leka go a dira botoka? Ke gone le ka bala Dithuto le Dikgolagano 112:11 mme le bue ka gore ke eng Mmoloki a batla re rata mongwe le mongwe. O ne a supa lorato leng mo bathong ba ba neng ba le pelomaswe mo go Ene? (sekai, bona Luke 23:34). Le gone o ka opela pina ka go rata ba bangwe, jaaka “I’ll Walk with You” (Children’s Songbook, 140–41).

Chapter 41: Trouble in Kirtland: 1837–1838

Dithuto le Dikgologano 112:11–14, 24–26

Bao ba ba sokologileng ka boammaaruri ba nna le kitso ya ga Jeso Keresete.

• Fa le sena go bala Dithuto le Dikgolagano 112:24–26, wena le bana ba gago le ka bua ka pharologanyo fa gare ga go itse leina la mongwe le go ba itse. Ke dithuto dife mo ditemaneng 11–14 tse di re thusang go tlhaloganya gore go raya eng go itse Modimo?

Ka ga megopolo e mentsi, bona kgatiso ya kgwedi e ya Friend makasine.

Be Thou Humble [Nna Boikokobetso], ka Julie Rogers