6–12 nō ’Ātopa : « E fa’anahonaho vau i te mau mea ato’a ’ei maita’i nō ’outou »

Te Ha’api’ira’a Tumu ’e te mau Fafaura’a 111–114

’Ua tupu ānei te tahi ’ohipa pae vārua tei fa’atupu i roto ia ’outou i te ti’aturi ’e te mana’o pāruru i roto i tō ’outou fa’aro’o i te Mesia—terā rā ’ua tāmata te mau ’ati o te orara’a i tō ’outou fa’aro’o, ’e ’ua ’aro ’outou nō te fa’aho’i mai i terā hau nā mua a’e ? ’Ua tupu te tahi ’ohipa mai te reira te huru i ni’a i te feiā mo’a i Kirtland. ’Aita i ma’iri hō’ē matahiti i muri iho i te mani’ira’a pae vārua tei tupu i te ha’amo’ara’ahia te hiero nō Kirtland, ’ua ha’amata te mau fifi. Nō te fifi pae faufa’a, te ’āmahamaha i roto i te Tino ’Ahuru Ma Piti ’e te tahi atu mau tāmatara’a, ’ua fa’atupu te reira i te fea’a i roto i te fa’aro’o o te tahi feiā mo’a, noa atu te mau ’ohipa i tupu i ni’a ia rātou nā mua atu.

E’ita tā tātou e nehenehe e ’ape i te mau tāmatara’a, nō reira, nāhea ïa tātou e ’ore ai te reira ’ia ha’amāta’u i tō tātou fa’aro’o ’e te ’itera’a pāpū ? E ’itehia paha te tahi pāhonora’a i roto i te parau a’o a te Fatu i roto i Te Ha’api’ira’a Tumu ’e te mau Fafaura’a 112, tei hōro’ahia mai ’a ’ū’ana noa ai te ’ati i Kirtland. ’Ua parau te Fatu : « ’A tāmā roa i tō ’outou mau ’ā’au i mua iā’u nei » (’īrava 28), « ’Eiaha e ’ōrurehau » (’īrava 15), « ’A tātua na i tō tau’upu nō te ’ohipa » (’īrava 7), ’e « ’Ia vai ha’eha’a noa ’oe » (’īrava 10). ’Ia pe’e ana’e tātou i teie parau a’o, e riro te Fatu i te « arata’i ia [tātou] nā [tō tātou] rima » (hi’o mau ’īrava 10, 13).

Mana’o nō te ’apo i te ha’api’ira’a i te ’utuāfare ’e i te fare purera’a

Te Ha’api’ira’a Tumu ’e te mau Fafaura’a 111

E nehenehe te Fatu « e fa’anahonaho […] i te mau mea ato’a ’ei maita’i [nō’u] ».

I te matahiti 1836 ra, e tārahu rahi tā te ’Ēkālesia i te ravera’a i te ’ohipa a te Fatu. ’Ua ha’ape’ape’a ’o Iosepha Semita ’e vetahi atu nō ni’a i te mau tārahu ’e ’ua feruri rātou i te mau rāve’a nō te ’aufau i te reira (hi’o i te upo’o tufa’a o Te Ha’api’ira’a Tumu ’e te mau Fafaura’a 111).

’Ia tai’o ’outou i te tufa’a 111, ’a feruri nāhea te mau parau a te Fatu ia Iosepha e tano ai nō ’outou—’e te mau mea tā ’outou e ha’ape’ape’a ra. ’Ei hi’ora’a, ahea tō ’outou ’itera’a i te here o te Atua « noa atu tā ’outou mau hapehape » (’īrava 1) ? Nāhea te Fatu i te tauturu ia ’outou ’ia ’ite mai i te mau « tao’a » tīa’i-’ore-hia (’īrava 10) ? E aha tāna i rave nō te « fa’anahonaho […] i te mau mea ato’a ’ei maita’i nō ’outou » (’īrava 11) ? E aha tā te parau « i te taime e ti’a ai ia ’outou ’ia fāri’i i taua mau mea ra » e ha’api’i nei ia ’outou nō ni’a i te Metua i te ao ra ?

Hi’o ato’a Mataio 6:19–21, 33 ; « More Treasures Than One », i roto Revelations in Context, 229–34.

Te Ha’api’ira’a Tumu ’e te mau Fafaura’a 112:3–15, 22

E arata’i te Fatu iā’u ’ia ’imi ana’e au i tōna hina’aro ma te ha’eha’a.

’Ua ’ino’ino roa ’o Thomas B. Marsh, peresideni nō te Pupu nō te Tino ’Ahuru Ma Piti ’āpōsetolo, i te mea ē, ’ua pi’i Iosepha Semita, ma te fārerei ’ore iāna, e piti melo nō tāna pupu nō te poro i te ’evanelia i te fenua Peretane. ’Ua fārerei ’oia i te peropheta, tei fāri’i i te hō’ē heheura’a tei tauturu ia Toma ’ia tu’u i te hiti i tōna mau mana’o ’ino’ino. ’Ua pāpa’ihia taua heheura’a ra i roto i Te Ha’api’ira’a Tumu ’e te mau Fafaura’a 112.

A tāpe’a i teie parau i roto i te ferurira’a ’ia tuatāpapa ana’e ’outou i Te Ha’api’ira’a Tumu ’e te mau Fafaura’a 112. I tō ’outou mana’o, e aha te mea i tāmarū i te mau mana’o ’ino’ino ’o Thomas ? I roto i te mau ’īrava 3–15 ’e te 22, e nehenehe tā ’outou e ’imi i te mau pāhonora’a i te mau uira’a mai teie : E aha te ha’eha’a ? E aha te aura’a nō te Fatu ’ia arata’i ia ’outou « nā tō ’oe rima ra » ? I tō ’outou mana’o, nō te aha te vai-ha’eha’a-ra’a e tauturu ai ia ’outou ’ia fāri’i i te arata’ira’a a te Fatu ? E ’itehia ia ’outou te tahi atu mau pāhonora’a i roto i te « Hōho’a nō te ha’eha’a » i roto i te parau poro’i a Elder Joseph W. Sitati « Te mau huru o te ti’ara’a pipi » (Liahona, Novema 2022, 87–88).

’A feruri na i te tahi ta’ata tā ’outou i mātau e mea ha’eha’a ’oia. E aha tā teie ta’ata e rave nō te fa’a’ite i te ha’eha’a ? E aha tā ’outou i ha’api’i mai nā roto mai i te Fa’aora nō ni’a i te fa’aha’eha’ara’a ? Pēnei a’e e nehenehe ’outou e ’ite mai i te mau hōho’a o te mau taime i roto i tōna orara’a ’a fa’a’ite ai ’oia i te ha’eha’a.

E aha te taime ’a ’ite ai ’outou ē, tē arata’ihia ra ’outou e te Fatu ’a fa’aha’eha’a ai ’outou ia ’outou iho ?

Hi’o ato’a Ulisses Soares, « ’O te ha’eha’a ’e te marū te ’ā’au », Liahona, Novema 2013, 9–11 ; « The Faith and Fall of Thomas Marsh », i roto Revelations in Context, 54–60 ; Topics and Questions, « Ha’eha’a », Vaira’a buka ’evanelia ; « ’Ia ha’eha’a noa ’oe », Te mau hīmene, N°64.

Fa’a’ohipa i te mau pīahi. ’A feruri nāhea ’outou i te tauturu i te ta’ata tā ’outou e ha’api’i ra ’ia ’āmui itoito mai i roto i te ’apora’a mai i te mau parau mau i roto i te mau pāpa’ira’a mo’a. ’Ei hi’ora’a, nō te tauturu ia rātou ’ia māramarama i te mea tā te Fatu i parau i roto i Te Ha’api’ira’a Tumu ’e te mau Fafaura’a 112:10, e nehenehe ’outou e tā’amu i te mata o te hō’ē ta’ata ’a arata’i maita’i ai iāna nā te rima ma te fa’a’ati i te hō’ē ’āpapara’a pārahira’a ’aore rā te tahi atu mau tauha’a. E aha tā tātou e nehenehe e ’apo mai nō ni’a i te ha’eha’a nā roto mai i teie faiteraa ?

Te Ha’api’ira’a Tumu ’e te mau Fafaura’a 112:12–26, 28, 33–34

Te feiā tei fa’afāriu-pāpū-hia, e ’ite mau rātou ia Iesu Mesia.

Te ’arora’a te tahi mau ’āpōsetolo i te peropheta i te matahiti 1837, ’ua riro ïa ’ei fa’aha’amana’ora’a ia tātou ē, noa atu tō tātou ti’ara’a i roto i te ’Ēkālesia, ’aore rā, noa atu tō tātou ’ite i te ’evanelia, tītauhia ia tātou tāta’itahi ’ia ha’apāpū ē, tē fa’a’amu nei tātou i tō tātou fa’afāriura’a ia Iesu Mesia ra. Pēnei a’e e nehenehe ’outou e tai’o i Te Ha’api’ira’a Tumu ’e te mau Fafaura’a 112:12–26, 28, 33–34 ’e ’ia ’imi i te mau parau mau ’o tē nehenehe e tauturu ia ’outou ’ia upo’oti’a i ni’a i te hō’ē tāmatara’a o te fa’aro’o ’aore rā ’ia fa’afāriu hope hau atu i te Fatu. E fa’auruhia paha ’outou ’ia fa’a’ite i te mea tā ’outou i ’ite mai nō te tauturu i te tahi ta’ata ’ē atu ’ia ha’apūai i tō rātou fa’afāriura’a i te Mesia.

Te Ha’api’ira’a Tumu ’e te mau Fafaura’a 113

’Ua riro Iosepha Semita ’ei « tāvini i roto i nā rima o te Mesia ».

’Ua fa’ahiti Isaia i te parau nō te hō’ē o te hua’ai o Iese ’ei « ohi » ’e ’ei « a’a » (Isaia 11:1, 10). I roto i te tufa’a 113, tē fa’ata’a nei te Fatu ē, e riro mai terā hua’ai, hō’ē tāvini o te Mesia, ’ei mauha’a nō te ha’aputuputura’a i te mau ta’ata o te Fatu i te mau mahana hope’a nei (hi’o Te Ha’api’ira’a Tumu ’e te mau Fafaura’a 113:4, 6). Tē fa’ata’a maita’i nei teie parau tohu i te peropheta Iosepha Semita. Nāhea teie mau parau mau ’e te tahi atu i roto i te tufa’a 113 i te fa’aitoitora’a i te feiā mo’a i roto i te ’ārepurepura’a tā rātou i ora i Kirtland ? E aha te mea tā ’outou e ’ite ra i roto i teie heheura’a ’o tē fa’auru ia ’outou ’ia vai itoito noa ’e ’ia tāmau noa i te ’āmui i roto i te ’ohipa a te Fatu i teie mahana ?

Hi’o ato’a i te Arata’i nō te mau pāpa’ira’a mo’a, « Iese », Vaira’a buka ’evanelia ; 2 Nephi 21:10–12 ; Iosepha Semita—’A’amu 1:40.

’Ua pāpa’i o Isaia nō ni’a i te hō’ē « ’āuri » ’e te mau « a’a » nō roto mai i te « toe’a a Iese » (Isaia 11:1).

Nō te tahi atu ā mau mana’o, ’a hi’o i te mau ve’a Liahona ’e Nō te pūai o te feiā ’āpī nō teie ’āva’e.

Mana’o nō te ha’api’i i te tamari’i

Te Ha’api’ira’a Tumu ’e te mau Fafaura’a 111:2, 10–11

E nehenehe te mau mea a te Atua e riro ’ei tao’a rahi nā’u.

• E nehenehe ’outou ’e tā ’outou mau tamari’i e pāpa’i hōho’a i te mau mea e tae mai i te ferurira’a ’ia fa’aro’o ana’e ’outou i te ta’o tao’a rahi. I muri iho e nehenehe ’outou e tai’o ’āmui i Te Ha’api’ira’a Tumu ’e te mau Fafaura’a 111:2, 10–11 ’e ’ia fa’aau i te mau tao’a o te fenua nei i te mau mea tā te Fatu e poihere nei. (Hi’o i te ’api fa’a’ana’anataera’a nō teie hepetoma.) Nāhea tātou e poihere rahi a’e ai i te mau mea a te Atua ?

Te Ha’api’ira’a Tumu ’e te mau Fafaura’a 112:10

E arata’i te Fatu iā’u nā te rima ’e e pāhono i tā’u mau pure.

• I muri a’e i te tai’o-’āmui-ra’a i Te Ha’api’ira’a Tumu ’e te mau Fafaura’a 112:10 e nehenehe ’outou ’e tā ’outou mau tamari’i e hīmene ’āmui « ’Ia ha’eha’a noa ’oe » (Te mau hīmene, N°64). E nehenehe ato’a ’outou e ha’uti i te hō’ē ha’uti ’o tē arata’i i te tahi e te tahi « nā te rima » (mai te hō’ē haere’a fifi). Nāhea te Fatu i te arata’i ia tātou « nā te rima », noa atu ē, ’aita ’oia i pīha’i iho tino roa ia tātou ? Nō te aha tātou e hina’aro ai i te Fatu ’ia arata’i ia tātou ? I nāhea tō tātou ’itera’a i te Fatu i te arata’ira’a ia tātou ?

• E nehenehe ’outou ’aore rā tā ’outou mau tamari’i e pāpa’i i te mau parau o Te Ha’api’ira’a Tumu ’e te mau Fafaura’a 112:10 ’e ’ia rēni i te mau ha’amaita’ira’a tā te Fatu e hōro’a mai ia tātou ’ia fāriu ana’e tātou i ni’a iāna ma te ha’eha’a. E fa’aitoito i tā ’outou mau tamari’i ’ia fa’a’ite mai i te mau taime a ani ai rātou ma te ha’eha’a i te tauturu a te Fatu ’e ’ua fāri’i rātou i te mau pāhonora’a i tā rātou mau pure e ’aore rā, ’ua arata’ihia rātou ’ia rave i te hō’ē ’ohipa maita’i (hi’o Moroni 7:13, 16).

Tuha’a nō te Arise and Walk [’A ti’a ’e ’a haere], nā Simon Dewey

Te Ha’api’ira’a Tumu ’e te mau Fafaura’a 112:11

Tē hina’aro nei Iesu iā’u ’ia here i te mau ta’ata ato’a.

• E nehenehe ’outou ’e tā ’outou mau tamari’i e tai’o te tahi i muri i te tahi i te ani i te « Pene 41 : Te pe’ape’a i Ketelani » i roto i Te mau ’ā’amu nō roto mai i te Parau Ha’api’ira’a ’e te mau Parau Fafau, 158–60). ’O vai i roto i te ’ā’amu tei fa’arahi atu i te mau fifi i Kirtland ? ’O vai tei tāmata i te ha’amaita’i mai i te reira ? I muri iho e nehenehe ’outou e tai’o i Te Ha’api’ira’a Tumu ’e te mau Fafaura’a 112:11 ’e ’ia paraparau nō te aha te Fa’aora e hina’aro ai ’ia here tātou i te mau ta’ata ato’a. I nāfea tōna fa’a’itera’a i te here i te mau ta’ata tei hāmani ino iāna ? (’ei hi’ora’a, ’a hi’o i te Luka 23:34). E nehenehe ato’a ’outou e hīmene i te hō’ē hīmene nō ni’a i te herera’a ia vetahi ’ē, mai te « Je viens vers toi » (Chants pour les enfants, 78).

Chapter 41: Trouble in Kirtland: 1837–1838

Te Ha’api’ira’a Tumu ’e te mau Fafaura’a 112:11–14, 24–26

Te feiā tei fa’afāriu-pāpū-hia, ’ua mātau ia Iesu Mesia.

• I muri a’e i te tai’ora’a i Te Ha’api’ira’a Tumu ’e te mau Fafaura’a 112:24–26, e nehenehe ’outou ’e tā ’outou mau tamari’i e paraparau nō ni’a i te ta’a-’ē-ra’a i roto i te itera’a i te i’oa o te hō’ē ta’ata ’e te itera’a ia rātou. E aha te mau ha’api’ira’a i roto i te mau mau ’īrava 11–14 e tauturu ia tātou ’ia hāro’aro’a e aha te aura’a ’ia ’ite i te Fatu ?

Nō te tahi atu ā mau mana’o, ’a hi’o i te ve’a Hoa nō teie ’āva’e.

Be Thou Humble [Ia ha’eha’a noa ’oe], nā Julie Rogers