Far West, Misiouri, ni Al Rounds

Oktubre 13–19: “Nasagsagradonto ti Sakripisiona Kaniak Ngem iti Matgedanna”

Doktrina ken Katulagan 115–120

Adda gapu tapno mangnamnama dagiti Santo maipanggep iti kabaruan a paguummonganda a lugar, ti Far West, Missouri. Napardas ti panagdur-as ti siudad, kasla nabun-as ti daga, ken adda iti asideg ti Adan-ondi-Ahman, maysa a lugar a naindaklan ti naespirituan a kinapategna iti napalabas ken iti masakbayan (kitaen iti Doktrina ken Katulagan 107:53–56; 116). Ngem, narigat latta para kadagiti Santo a saanda a panunoten maipapan iti no ania ti napukawda. Malaksid iti pannakapapanawda manipud iti Independence, ti sentro a lugar ti Zion, masapul met nga agtalaw dagiti Santo iti Kirtland, a panawanda ti patpatgenda a templo kalpasan laeng ti dua a tawen. Ket iti daytoy a kanito saan laeng a kabusor iti ruar ti Simbaan ti pakaigapuan ti riribuk—adu dagiti mabigbig a miembro a nagbalin a kontra ken ni Joseph Smith, agraman dagiti uppat a miembro ti Sangapulo-ket-dua nga Apostol.

Imbes a panangipokus iti no ania ti napukawda, intultuloy laeng dagiti napudno a nangbangon iti Zion, iti daytoy a gundaway idiay Far West. Nangaramidda kadagti plano para iti maysa a baro a templo. Naawagan ti uppat a baro nga Apostol. Naawatanda a ti panagtrabaho iti aramid ti Dios saanna a kayat a sawen a dikayo pulos madaleb; kayatna a sawen a “bumangonkayo manen.” Ket nupay nasken nga agsakripisiokayonto, sagrado dagita a sakripisio iti Dios, ta “nasagsagradonto … ngem iti matgedan[yo]” (Doktrina ken Katulagan 117:13).

Kitaen iti Saints, 1:296–99.

Dagiti Kapanunotan iti Panagsursuro iti Pagtaengan ken iti Simbaan

Doktrina ken Katulagan 115:3–6

Napateg iti Apo ti nagan ti Simbaan.

Kinuna ni Presidente Russell M. Nelson a ti nagan ti Simbaan ket “maysa a banag a naindaklan ti kinapategna” (“The Correct Name of the Church,” Liahona, Nob. 2018, 87). Panunoten maipapan no apay a pudno daytoy bayat ti panangbasayo iti Doktrina ken Katulagan 115:4–6. Ania ti pakainaigan ti nagan ti Simbaan iti aramid ken misionna?

Kitaen met iti 3 Nephi 27:1–11.

Doktrina ken Katulagan 115:5–6

Idiaya ti Zion ken dagiti istakana ti “pagkamangan no agbagyo.”

Bayat ti panagadalyo iti nabileg nga imahe iti Doktrina ken Katulagan 115:5–6, ibilangyo ti akem a kayat ti Apo nga ipatungpalyo, a kas maysa a miembro ti Simbaanna. Kas pagarigan, ania ti maaramidyo tapno “tumakder ket agrimatkayo” wenno “agbalin a wagayway kadagiti pagilian”? (bersikulo 5). Ania dagiti naespirituan a bagyo a madlawyo iti aglawlawyo? Kasano a makasarakkayo iti “pagkamangan” babaen ti panaguummong? (bersikulo 6).

Kitaen met iti “Brightly Beams Our Father’s Mercy,” Hymns, no. 335.

Mabalin a silaw ken pagkamangan ti Simbaan ti Mangisalakan iti bagyo.

Doktrina ken Katulagan 117

Sagrado dagiti sakripisiok iti Apo.

Panunotenyo a dakayo ni Newel K. Whitney wenno ti asawana a ni Elizabeth, a mangpaspasar iti narang-ay a biag idiay Kirtland ket kalpasanna nakiddaw a pumanaw. Ania ti masarakanyo iti Doktrina ken Katulagan 117:1–11 a mabalin a nakatulong koma kadakayo a nangaramid iti daytoy a sakripisio? Ania dagiti sakripisio nga aramidenyo para iti Dios? Ania ti isuro kadakayo dagitoy a bersikulo maipapan iti no asino ti Dios ken no ania ti ar-aramidenna?

Naiduma ti sakripisio a naidawat ken ni Oliver Granger kadagiti Whitney: tinudingan isuna ti Apo nga agbati iti Kirtland ken mangrisut kadagiti pakaseknan a mainaig ti kuarta iti Simbaan. Bayat ti panangibagina iti Simbaan nga addaan iti integridad, saan unay a naballigi iti kamaudiananna. Ibilangyo no kasano a mayaplikar dagiti balikas ti Apo iti Doktrina ken Katulagan 117:12–15 kadagiti banag nga indawat ti Apo kadakayo.

Kitaen met iti “Far West and Adam-ondi-Ahman,” iti Revelations in Context, 239–40.

Doktrina ken Katulagan 119–20

Makatulong ti apagkapullok a mangbangon iti pagarian ti Dios.

Dagiti instruksion kadagiti benneg 119 ken 120 ket mangilawlawag no ania ti apagkapullo: mangikontribusiontayo iti “maysa nga apagkasangapulo” ti interestayo (wenno matgedan) iti tunggal tawen (kitaen iti Doktrina ken Katulagan 119:4). Ngem dagitoy a paltiing ket saan laeng a mangted iti depinision. Imbaga ti Apo kadagiti Santo a ti apagkapullo ket “mangpasanto iti daga ti Zion.” No awan daytoy a paglintegan, kinunana, “saanto a … Zion kadakayo” (bersikulo 6). Napanunotyo kadin maipapan iti apagkapullo iti kastoy a wagas? Kasano a makatulong ti panagbayad iti apagkapullo tapno ad-adda a mapasantokayo, ad-adda a nakasaganakayo para iti Zion?

Ania ti masursuroyo manipud kadagitoy a paltiing maipapan iti no kasano nga usaren dagiti katulongan ti Apo dagiti pundo ti apagkapullo? Ania ti napateg kadakayo maipapan ti ragup ti balikas “babaen ti bukodko a timek kadakuada” iti Doktrina ken Katulagan 120?

Nangted ni Elder David A. Bednar iti makatulong a panangiladawan no kasano a mausar ti apagkapullo ken dagiti bendision nga aggapu iti panagtulnog iti daytoy a paglintegan iti “The Windows of Heaven” (Liahona, Nob. 2013, 19–20). Mabalin a makatulong dagiti sumaganad a saludsod bayat ti panangadalyo iti mensahena:

The Windows of Heaven

Spiritual and temporal blessings come into our lives as we live the law of tithing.

• Siasino ti mangikeddeng no kasano a mausar ti apagkapullo kalpasan a maibayad iti Simbaan?

• Ania ti pangusaran iti apagkapullo?

• Ania dagiti bendision a sumangbay kas bunga ti panagbayad iti apagkapullo? Kas pagarigan, iti ania a wagwagas a mangpapigsa ti panangbayad iti apagkapullo ti relasionyo iti Nailangitan nga Ama ken ni Jesucristo?

• Ania ti nasursuroyo manipud iti awis ni Elder Bednar?

• Kasano a makatulongkayo iti dadduma a mangpadakkel iti pammatida iti paglintegan ti Apo iti apagkapullo?

Kitaen met iti Malakias 3:8–12; “The Tithing of My People,” iti Revelations in Context, 250–55.

Tulonganyo dagiti dadduma a mangyaplikar iti no ania ti masursuroda. Uray no kayat ti maysa a tao ti agbayad iti apagkapullo, no dadduma dina ammo no kasano. No isursuroyo ti pamiliayo wenno klase, ibilangyo ti panangipaay iti sumagmamano a panawen a mangilawlawag no kasano ti agbayad iti apagkapullo, iti online man wenno iti Tithing and Other Offerings slip. (Kitaen iti Panangisuro iti Wagas ti Mangisalakan, 27.)

Para iti ad-adu pay a kapanunotan, kitaen dagiti isyu ti magasin a Liahona ken Para iti Pigsa dagiti Agtutubo iti daytoy a bulan.

Dagiti Kapanunotan para iti Panangisuro kadagiti Ubbing

Doktrina ken Katulagan 115:4–5

Kamengak iti Ti Simbaan ni Jesucristo dagiti Santo iti Ud-udina nga Aldaw.

• Tapno matulongan dagiti annakyo a mangammo iti nagan ti Simbaan ken maawatan no apay a napateg, ibilangyo ti agsaludsod no adda asino man kadakuada a makaibaga iti naan-anay a nagan ti Simbaan. Kalpasanna mabalinyo nga ipakita kadakuada ti nagan manipud iti Doktrina ken Katulagan 115:4 ket paulit kadakuada daytoy kadakayo. Bayat ti panangaramidyo, ibilangyo ti panangitudo kadagiti napateg a balikas ken no apay a napategda. Mabalinyo pay nga irebyu ti “Kapitulo 43: Naganan ni Jesucristo ti Simbaanna” (iti Dagiti Estoria iti Doktrina ken Katulagan, 164, wenno ti katupagna a video iti Gospel Library) wenno agkanta iti “The Church of Jesus Christ” (Children’s Songbook, 77).

Chapter 43: Jesus Christ Names His Church: April 1838

Doktrina ken Katulagan 115:4–6

Makatulong ti pagwadak iti dadduma nga umasideg ken ni Cristo ken mangsapul iti kinatalged.

• Mabalin nga am-ammo dagiti annakyo dagiti tao a marigrigatan ken agkasapulan iti “pagkamangan” manipud kadagiti “bagyo ti biag”.(bersikulo 6). Kasano a matulonganda dagitoy a tao? Ibilang ti panangawis kadagiti annakyo nga agtakder no mabasayo ti balikas a tumakderkayo iti Doktrina ken Katulagan 115:5. Awisen ida a mangunnat kadagiti ramay ti imada a kas kadagiti rayos ti raniag ti init no basaenyo ti agrimatkayo. Ipalagip kadagiti annakyo nga aggapu dagiti silawtayo ken ni Jesucristo, ket tulonganyo ida a mangpanunot kadagiti wagas a mabalinda ti “agrimat” kas iti ar-aramidenna.

• Mabalin a mangidrowing dagiti annakyo iti maysa a ladawan a mangiladawan iti Doktrina ken Katulagan 115:6. Kas pagarigan, mabalinda ti mangidrowing iti bagyo nga adda dagiti tao nga agkamkamang iti maysa a pasdek ti Simbaan. Ania ti mabalin nga ibagi ti bagyo? Kasano a mangipaay iti tulong ti Simbaan ti Mangisalakan? Tulonganyo dagiti annakyo a mangpanunot iti maysa a gayyem, miembro ti pamilia, wenno kaarruba nga agkasapulan. Kasano a maawistayo ida a mangsarak iti tulong iti Simbaan ni Jesucristo?

Doktrina ken Katulagan 117

Sagrado dagiti sakripisiok iti Apo.

• Awisenyo dagiti annakyo nga agpammarang nga isuda ni.Newel K. Whitney. Kasano koma ti riknada no kiddawen ti Apo ida a mangpanaw iti naballigian a trabahoda ket umakarda iti maysa a kabarbaro a lugar? (Makatulong a mangrebyu iti “Kapitulo 41: Riribuk iti Kirtland,” iti Dagiti Estoria iti Doktrina ken Katulagan, 158–60, wenno ti katupagna a video iti Gospel Library.) Bayat ti aggigiddan a panangbasayo iti Doktrina ken Katulagan 117:1–11, kiddawenyo kadagiti annakyo a mangpasardeng kadakayo no mangngeganda ti maysa a banag a makatulong kadakuada a maaddaan iti pammati nga agtungpal iti Apo. Ania dagiti sakripisio nga aramidentayo nga agtungpal iti Apo? Kasano a bendisionannatayo?

Chapter 41: Trouble in Kirtland: 1837–1838

Doktrina ken Katulagan 119–20

Usaren ti Nailangitan nga Ama ti apagkapullo a mangbendision kadagiti annakna.

• Mabalin nga adu kadagiti ubbing a sursuruanyo ti naubing pay unay a mangged iti kuarta ken agbayad iti apagkapullo, ngem nasayaat a maawatanda no kasano a makatulong ti apagkapullo iti aramid ti Apo iti intero a lubong. Ibilang ti panangusar kadagiti ladawan ken ti panid ti aktibidad iti ungto daytoy a balabala a mangtulong kadakuada a makaawat no ania ti apagkapullo. (Kitaen met iti “Kapitulo 44: Apagkapullo,” iti Dagiti Estoria iti Doktrina ken Katulagan, 165–66, wenno ti katupagna a video iti Gospel Library.) Kasano nga usaren ti Nailangitan nga Ama ti apagkapullo a mangbendision kadagiti annakna? Ibinglayyo dagiti riknayo maipapan iti paglintegan ti apagkapullo ken no kasano a binendisionannakayo daytoy.

Chapter 44: Tithing: July 1838

No agbayadtayo iti apagkapullo, ipakitatayo ti pammatitayo ken ni Jesucristo.

Para iti ad-adu pay a kapanunotan, kitaen iti isyu ti magasin a Friend iti daytoy a bulan.