Domo ni Veivakalesuimai

Valeniveivesu e Liberty

Ni sa vesu tiko ena Valeniveivesu e Liberty, Missouri, a ciqoma o Josefa Simici na ivola eso ka tukuna tiko na nodra veigauna dredre na Yalododonu Edaidai era a vakasavi tani ena lewa vakamatanitu nei kovana. A yaco mai e dua na ivola vakaciriloloma mai vei watina o Emma. Na vosa nei Emma, kei na nona sauma o Josefa, rau a vakaraitaka kina na nodrau rarawa kei na vakabauta ena gauna dredre o ya ena itukutuku ni Lotu.

Era a vesu tu ena valeniveivesu oqo o Josefa Simici kei na so tale ena vulaibatabata ni 1838–39.

Na ivola mai vei Ema Smici kivei Josefa Simici, 7 ni Maji, 1839

Kivei Watiqu

“Ena madigi me kauta yani e dua na itokani, au saga meu volavola, ia au na sega ni vola kina na ituvaki taucoko ni lomaqu, baleta na ituvaki o tiko kina oqori, na lalaga, na ilati kaukamea, kei na ivako lelevu, na uciwai taletale, na wai drodro, veidelana cere, na buca qiqo kei na vanua veico levu e tawasei kedaru tu, kei na veivakacacani butobuto o a biu kina e valeniveivesu ko se tiko ga kina oqo, kei na veika tale eso, sa sega ni tukuni rawa kina na ituvaki ni lomaqu.

“Ke sega beka na vakasama tawacala, kei na veivukei vakadodonu ni loloma vakalou, au vakadeitaka niu sega ni rawata meu vosota na veika rarawa au bula curuma mai … ; ia au se bula tiko au sa rawa tiko ga sotava na rarawa ke lewa mai o Lomalagi dauloloma meu sotava ena vukumu.

“Keitou bulabula vinaka kece tiko, vakavo ga o Fredrick ni tauvimate tiko.

“O Alexander lailai kau roqota tiko oqo sa dua vei ira na gonelailai vinaka o sa bau raica ena nomu bula. E gone kaukauwa sara ke vukei ena dua na idabedabe ena cici wavoki ena loma kece ni rumu. …

“E sega ni dua e kila na Kalou duadua ga e kila na noqu vakanananu kei na ituvaki ni lomaqu niu sa biuta mai na nodatou vale kei na itikotiko, ka voleka ni veika kece tou taukena vakavo ga o iratou na Luvedaru, au biubiu mai na Yasana o Missouri, biuti iko mo sogolaki tu ena valeniveivesu galili oqori. Ia na kena daunanumi tu sa uasivia na ivakarau ni tamata me vosota rawa. …

… Au nuitaka ni na yaco mai na veisiga vinaka vei kedatou. … [Au] sa nomu daulomani me tawamudu.

Ema Simici

Oqo na ivola nei Josefa Simici vei Ema Simici, 4 ni Epereli, 1839

“Kivei—kei daulomani—na Watiqu.

“Au dabe sobu toka ena yakavi ni Lotulevu ni sa vakarau dromu toka na siga, ni keitou rai toka yani ena bai kaukamea ni valeniveivesu galili oqo, meu vola yani vei iko, na veika au sotava. Au vakabauta tiko ni sa rauta ni lima na vula ka ono na siga mai na gauna au sa tekivu yadravi tiko kina ena siga kei na bogi, ena loma ni lalaga, bai kaukamea, kei na katuba kaukamea rogolevu ni valeniveivesu galili, butobuto, ka duka. Ena yalo luluvu e kila duadua ga na Kalou au sa vola kina na ivola oqo. Na veivakanananu ni vakasama ena ituvaki vakaoqo sa vakadruka na peni, se yame, se Agilosi, mera vakamacalataka, se droinitaka, ki vua na tamata se bera ni sotava na veika e sotavi tiko oqo. … Keitou sa vakararavi ena liga i Jiova, ka sega ni dua tale, me baleta na neitou sereki, ia kevaka sa sega ni cakava o koya, ena sega ni caka, mo sa vakadeitaki kina, ni sa levu sara e gadreva me keitou mate ena yasana oqo; sega ni baleta ni keitou sa cala ena dua na ka. … Noqu Daulomani Ema au sa dau nanumi iko tikoga kei iratou na gone. … Au sa via raici Frederick lailai, o Josefa, Julia, Alexander, Joana, kei kavetani qase [na koli ni vuvale]. … Au na yalomarau meu taubale wale yani mai ke kivei iko, sega ni vakaisala, ena isulu kadresu, meu raici iko ni sa marau cecere oqo, ka sega ni okata me cakacaka levu. … Au wasea ena yaloqaqa na noqu veivakararawataki kecega, ia sa vakakina o ira era tiko vata kei au; sega ni dua vei keitou sa bau vakila me rere. Au vinakata [mo] kakua ni laivi [iratou na luvedaru] me guilecavi au. Tukuna ni lomani iratou o Ta ena loloma uasivi sara, ka sa cakava na ka kece sara e rawata rawa me lako tani kina mai na ilawalawa dauvakacaca me rawa ni lako yani vei iratou. … Tukuna vei iratou ni kaya o Ta me ratou gone vinaka tiko, ka rokovi nodratou na. …

Nomuni,

Josefa Simici Lailai.

iDusidusi

1. “iVola kivei Ema Simici, 7 Maji. 1839,” Letterbook 2, 37, josephsmithpapers.org; vakavoutaki ni sipeli, pagitueti, kei na qarama.

2. “iVola kivei Ema Simici, 4 April 1839,” 1–3, josephsmithpapers.org; vakavoutaki ni sipeli, pagitueti, kei na qarama.

3. E ratou a kau vakavesu o Josefa kei iratou na nona itokani ena 31 ni Okotova, 1838, ka ratou a yadravi sara vakaukauwa ena siga kei na bogi. Ni oti e dua na veilewai taumada mai Richmond, e Missouri, eratou a tokitaki ki na Valeniveivesu e Liberty, ena 1 ni Tiseba.