6–2 ni Okotova: “Au na Solia Vei Kemudou na Veika Kecega e Ganiti Kemudou”

Vunau kei na Veiyalayalati 111–114

Sa bau dua na ka vakayalo o sotava sa vakavuna mo yalodei ka tudei tiko ena nomu vakabauti Karisito—ia sa tu na veika rarawa ni bula sa dau vakatovolea na nomu vakabauta, ka o qai sagasaga dredre mo rawata tale na vakacegu o a vakila e liu? E dua na ka vakaoqo a yaco kivei ira na Yalododonu e Katiladi. Ni se bera ni dua na yabaki ni oti na veisorovaki vakayalo e semati kina vakatabui ni Valetabu e Katiladi, sa tubu na leqa eso. Na leqa vakailavo, duidui ena Kuoramu ni Le Tinikarua, kei na veivakatovolei a vakavuna na luluqa ni nodra vakabauta eso na tamata, dina ga ni tu na veika era sa vakila oti.

Eda na sega ni levea rawa na veivakatovolei, ia eda na tarovi ira vakacava ena vakarerei ni noda vakabauta kei na ivakadinadina? De dua na kune na tiki ni kena isau ena ivakasala ni Turaga ena Vunau kei na Veiyalayalati 112, e soli ena gauna a tubu tu kina na dredre eso e Katiladi. E kaya na Turaga, “Dou vakasavasavataka na lomamudou e mataqu” (tikina 28), “Dou kakua ni veivorati” (tikina 15), “Vakadreta na ivau ni tolomu me baleta na cakacaka oqo” (tikina 7), ka “Mo yalomalumalumu” (tikina 10). Nida muria na ivakasala oqo, na Turaga ena qai “tuberi [keda] ena [ligada]” ena gauna dredre eso ki na veivakabulai kei na vakacegu (raica na tikina 10, 13).

Vakasama eso ni Vuli e Vale kei na Lotu

Vunau kei na Veiyalayalati 111

Sa rawa vua na Turaga me “solia na veika kecega sa ganiti [au].”

Ena 1836, a kumuni dinau bibi kina na Lotu ena vakayacori ni cakacaka ni Turaga. Era a lomaleqataka o Josefa Simici kei na so tale na dinau oqo ka vakasamataka na sala me saumi kina (raica na ulutaga ni iwase ki na Vunau kei na Veiyalayalati 111).

Ni o wilika na wase 111, vakasamataka na sala e rawa ni vakayagataki kina vei iko na vosa ni Turaga vei Josefa—kei na veika o lomaleqataka tiko. Me ivakaraitaki, na gauna cava o sa vakila kina na loloma ni Kalou “e dina ga ni o yalowai” (tikinae 1)? E vukei iko vakacava na Turaga mo kunea na “iyau” e sega ni namaki (tikina e 10? Na cava e cakava o Koya me “solia na veika kecega sa ganiti kemudou” (tikina e 11)? Na cava sa vakavulica vei iko na malanivosa “me vaka na ka dou sa gadreva” me baleta na Tamada Vakalomalagi?

Raica talega na Maciu 6:19–21, 33; “More Treasures Than One,” ena Revelations in Context,229–34.

Vunau kei na Veiyalayalati 112:3–15, 22

Na Turaga ena liutaki au niu vakasaqara ena yalomalumalumu na Lomana.

A cudru vakalevu o Thomas B. Marsh, na Peresitedi ni Kuoramu ni iApositolo Le Tinikarua ni sega ni bau tukuna vua o Josefa Simici na nona kacivi rau e rua na lewe ni nona kuoramu me rau laki vunautaka na kosipeli e Igiladi. A sota vata kei na Parofita, ka ciqoma e dua na ivakatakila a qai vukei Tomasi me biuta vakatikitiki na yalona mosi. Na ivakatakila oqori e volai tu ena Vunau kei na Veiyalayalati 112.

Vakasamataka tiko na itukutuku oqo ni ko vulica na Vunau kei na Veiyalayalati 112. Na cava o raica e rawa ni vakabula na yaloi Tomasi ena mavoa oya? Ena tikina e 3–15 kei na 22, sa rawa mo vakasaqara na isau ni taro vakaoqo: Na cava na yalomalumalumu? Na cava na kena ibalebale me liutaki iko na Turaga “ena ligamu”? Na cava o nanuma kina ni yalomalumalumu ena vukei iko mo ciqoma na veidusimaki ni Turaga? Sa rawa mo raica na ikuri ni isaunitaro ena “iVakarau ni Yalomalumalumu” ena itukutuku nei Elder Joseph W. Sitati “iVakarau ni Bula Vakatisaipeli” (Liaona, Nove. 2022, 87–88).

Vakasamataka e dua e yalomalumalu. Na cava e cakava na tamata oqo me vakaraitaka kina na yalomalumalumu? Na cava o vulica mai vua na iVakabula me baleta na yalomalumalumu? E rawa beka ni o kunea na iyaloyalo ni veigauna eso ena Nona bula a vakaraitaka kina o Koya na yalomalumalumu.

Na gauna cava o a vakila kina na veidusimaki ni Turaga ena nomu vakayalomalumalumutaki iko?

Raica talega na Ulisses Soares, “Dou Yalo Malua ka Yalomalumalumu,” Liaona, Nove. 2013, 9–11; “The Faith and Fall of Thomas Marsh,” ena Revelations in Context, 54–60; Ulutaga kei na Taro, “Yalomalumalumu,” Valenivola Vakosipeli; “Mo Yalomalumalumu,” Sere ni Lotu, no. 73.

Vakaitavitaki ira na vuli tiko. Vakasamataka na sala o rawa ni vukei ira kina na tamata o vakavulica mera vakaitavi vagumatua ena vulici ni dina ena ivolanikalou. Me ivakaraitaki, me vukei ira me ra kila na veika e tukuna na Turaga ena Vunau kei na Veiyalayalati 112:10, e rawa ni o vesuka na matana e dua ka tuberi koya vakamalua ena ligana wavokita eso na idabedabe se so tale na iyaya. Na cava e rawa ni da vulica baleta na yalomalumalumu mai na ivakaraitaki oqo?

Vunau kei na Veiyalayalati 112:12–26, 28, 33–34

O ira era sa saumaki vakaidina e yaco me ra sa kilai Jisu Karisito.

Na nodra saqata na Parofita eso na iApositolo ena 1837 sa ivakananumi vinaka se cava ga na noda veikacivi ena Lotu se na levu ni ka eda kila ena kosipeli, sa dodonu me da dui vakadeitaka yadua ni da vakamareqeta na noda saumaki vei Jisu Karisito. Sa rawa mo wilika na Vunau kei na Veiyalayalati 112:12–26, 28, 33–34 ka vakaraica na dina ena rawa ni vukei iko mo vorata rawa na vakatovolei ni vakabauta se yaco mo saumaki vakataucoko sara vua na Turaga. O na rairai vakauqeti mo wasea na veika o kunea mo vukea kina e dua tale me vaqaqacotaka na nona saumaki mai vei Karisito.

Vunau kei na Veiyalayalati 113

O Josefa Simici a “dua na dauveiqaravi ena ligai Karisito.”

A vakatoka o Aisea e dua vei ira na kawa i Jese me vaka e dua na “coke” ka dua na “wakana” (Aisea 11:1, 10). Ena wase 113, e vakamacalataka na Turaga ni kawa oqo, e dua na italai i Karisito, ena vakaitavi vakabibi ena nodra vakasokomuni na tamata ni Turaga ena iotioti ni gauna (raica na Vunau kei na Veiyalayalati 113:4, 6). Na parofisai oqo e vakamacalataki Parofita Josefa Simici vakavinaka. E rawa vakacava na ka oqo kei na dina tale eso ena wase 113 me vakayaloqaqataki ira na Yalododonu ena loma ni dredre era sotava voli e Katiladi? Na cava o raica ena ivakatakila oqo sa vakauqeti iko mo vakaitavi ena cakacaka ni Turaga nikua?

Raica talega na iDusidusi ki na iVolanikalou, “Jese,” Valenivola Vakosipeli; 2 Nifai 21:10–12; Josefa Simici—Ai Tukutuku 1:40.

E vola o Aisea e dua na “coke” kei na “wakana” e lako tani mai na “toloi Jese” (Aisea 11:1).

Me baleta na vakasama tale eso, raica na ilavelave ni vula oqo ni Liaona kei na mekasini Me iSakisaki ni iTabagone.

Vakasama eso ni Nodra Vakatavulici na Gonelalai

Vunau kei na Veiyalayalati 111:2, 10–11

E rawa ni iyau vei au na veika va Kalou.

• E rawa vei iko kei na nomu gone mo ni droinitaka na veika e lako mai nomuni vakanananu ni ko ni rogoca na vosa iyau. Mo ni qai wilika vata na Vunau kei na Veiyalayalati 111:2, 10–11 ka veidutaitaka na iyau vakavuravura kei na veika e dau vakamareqeta na Turaga. (Raica talega na tabana ni itaviqaraviena macawa oqo.) E rawa vakacava ni da vakamareqeta vakalevu cake na veika ni Kalou?

Vunau kei na Veiyalayalati 112:10

Na Turaga ena tuberi au e ligaqu ka sauma na noqu masu.

• Ni oti nomuni willika vata na Vunau kei na Veiyalayalati 112:10 , sa rawa mo ni lagata vata kei ira na luvemuni “Mo Yalo Malumalumu” (Sere ni Lotu, naba 72). E rawa talega ni o qitotaka e dua na qito ka okati kina na veituberi vakai kemuni “e ligadra” (me vaka e dua na ilakolako dredre). E liutaki keda vakacava na Turaga “ena ligada,” e dina ga ni sega ni tiko vakayago vata kei keda? Na cava na vuna eda gadreva kina na Turaga me liutaki keda? Na gauna cava eda a vakila kina ni liutaki keda tiko na Turaga?

• Sa rawa vei iko se o ira na luvemu mo vola na vosa ni Vunau kei na Veiyalayalati 112:10 ka toqa na veivakalougatataki e solia vei keda na Turaga ni da gole Vua ena yalomalumalumu. Vakayaloqaqataki ira na luvemu mera wasea na gauna era a kerea kina ena yalomalumalumu na veivuke ni Turaga ka ciqoma na isau ni nodra masu se a muataki mera cakava e dua na ka vinaka (raica na Moronai 7:13, 16).

iTukutuku matailalai mai na Tucake ka Lako, mai vei Simon Dewey

Vunau kei na Veiyalayalati 112:11

E vinakata o Jisu meu lomani ira na tamata kecega.

• Sureti ira na gone me ra veivukevuke ena wiliki ni “Wase 41: Leqa e Katiladi” (ena iTalanona mai na Vunau kei na Veiyalayalati, 158 – 60). O cei ena italanoa mai Katiladi e vakavuna me ca sara na leqa? O cei ea tovolea me vakavinakataka? Mo qai wilika na Vunau kei na Veiyalayalati 112:11 ka veivosakitaka na vuna e vinakata kina na iVakabula meda lomana na tamata kecega. Ena gauna cava a vakaraitaka kina o Koya na loloma vei ira na tamata era dau yaloca Vua? (me ivakaraitaki, raica na Luke 23:34). E rawa talega mo ni lagata e dua na sere me baleta na lomani ira na tani, me vakataka “Meu Lako Tu kei Iko” (iVolanisere ni Lalai, 78).

Chapter 41: Trouble in Kirtland: 1837–1838

Vunau kei na Veiyalayalati 112:11–14, 24–26

O ira era sa saumaki vakaidina e yaco me ra sa kilai Jisu Karisito.

• Ni wiliki oti na Vunau kei na Veiyalayalati 112:24–26, sa rawa mo ni veivosakitaka kei ira nomu gone na kedrau duidui na kilai ni yacana e dua kei na kilai koya. Na ivakavuvuli cava mai na tikina e 11–14 e vukei keda meda kila vinaka na ibalebale ni noda kila na Turaga?

Me baleta na vakasama tale eso, raica na ilavelave ni mekasini ni iTokani ni vula oqo.

Mo Yalo Malumalumu, mai vei Julie Rogers.