Far West, Misuri, mai vei Al Rounds

“Sa Ka Tabu Cake Vei Au na Nona Solibula Mai na Veika e Rawata ”

Vunau kei na Veiyalayalati 115–120

Sa dodonu mera nanamaki tiko na Yalododonu ena nodra vanua vou ni vakasoqoni vata, Far West, Misuri. A tubu totolo sara tiko na siti, sa toso cake sara na vanua, ka voleka sara o Atama-onitai-Amani, e dua na vanua bibi vakayalo ena veigauna sa oti kei na veisiga ni mataka (raica na Vunau kei na Veiyalayalati107:53–56; 116). Ia, se vaka me dredre tikoga vei ira na Yalododonu mera kua ni vakasamataka na ka era sa vakayalia. Me ikuri ni nodra vakasavi tani mai Independence, na vanua o Saioni, era dro talega na Yalododonu i Katiladi, era biuta tu mai na nodra valetabu lomani ni oti ga e rua na yabaki. Ia ena gauna oqo e sega walega nio ira na meca ena taudaku ni Lotu era vakavu ca tiko—e vuqa na lewenilotu kilai levu era saqati Josefa Simici, oka kina e va na lewe ni Kuoramu ni iApositolo Le Tinikarua.

Me isosomi ni nodra vakanamata tikoga kina veika sa yali, o ira na yalodina era a tarai Saioni cake tikoga, ena gauna oqo mai Far West. Era sa tuvanaka me dua na valetabu vou. E va na iApositolo vou eratou kacivi. Era sa vulica na Yalododonu na vakayacori ni cakacaka ni Kalou e sega ni kena ibalebale ona sega ni lutu; e kena ibalebale mo “tucake tale.” E dina ga na solia yani eso na ka, na solibula vakaoqori sa na ka tabu tu vua na Kalou, ka sa “ka tabu cake … mai na ka [o sa] rawata” (Vunau kei na Veiyalayalati 117:13).

Raica na Yalododonu,, 1:296–99.

Vakasama eso ni Vuli e Vale kei na Lotu

Vunau kei na Veiyalayalati 115:3–6

Sa ka bibi vua na Turaga na yaca ni Lotu.

E kaya o Peresitedi Russell M. Nelson ni yaca ni Lotu sa “dua na ka bibi sara ” (“Na Yaca Dodonu ni Lotu,” Liaona, Nove. 2018, 87). Vakasamataka na vuna e dina kina oqo ena nomu wilika na Vunau kei na Veiyalayalati 115:4–6. Na cava sa vakavuna na yaca ni Lotu me baleta na kena cakacaka kei na ilesilesi?

Raica talega na 3 Nifai 27:1–11.

Vunau kei na Veiyalayalati 115:5–6

Sa vakarautaka o Saioni kei na kedra iteki na “ivakaruru mai na cava.”

Nio vulica na raitayaloyalo mana ena Vunau kei na Veiyalayalati 115:5–6, vakasamataka na itavi e vinakata na Turaga vei iko, me vaka e dua na lewe ni Nona Lotu, mo vakataucokotaka. Me vakataka, na cava o rawa ni cakava mo “tucake ka rarama mai ” se “mo ivakarau vei ira na veimatanitu”? (tikina e 5). Na cava vakayalo cava o raica ni wavoliti iko tu? Ona kunea vakacava na “idrodro” ena vakasoqoni vata? (tikina e 6).

Raica talega na “Cina Caudre ni Loloma,” Sere ni Lotu, naba 199.

Na Lotu ni iVakabula e rawa ni dua na rarama ka ivakaruru ena cava.

Vunau kei na Veiyalayalati 117

Sa ka tabu vua na Turaga na noqu solibula.

Raitayaloyalotaka mada nio iko o Niueli K. Witini se na watina, o Elizabeth, ka a sotava tiko e dua na bula vuavuai vinaka e Katiladi ka qai kerei mo toki. Na cava o sa raica ena Vunau kei na Veiyalayalati 117:1–11 e rawa ni a vukei iko ena solibula oqo? Na solibula cava soti o cakava me baleta na Kalou? Na cava era vakavulica vei iko na veitikina oqo me baleta o cei na Kalou kei na ka e cakava o Koya?

Na solibula a kerei vei Oliver Granger a duidui toka: a lesi koya na Turaga me tiko e Katiladi ka vakameautaka na veika vakailavo ni Lotu. Ni matataka tiko vakadodonu na Lotu, a qai yaco me sega ni gugumatua sara. Vakasamataka na sala e vakayagataki kina na vosa ni Turaga ena Vunau kei na Veiyalayalati 117:12–15 ki na veika sa kerea vei iko o Koya.

Raica talega na “Far West and Adam-ondi-Ahman,” ena Revelations in Context, 239–40.

Vunau kei na Veiyalayalati 119–20

Na noqu ikatini e vukea na tarai cake ni matanitu ni Kalou.

Na idusidusi ena wase 119 kei na 120 e vakamatatataka na cava na ikatini: eda cau ena “dua na ikatini” ni veika eda rawata (se keda isau) ena veiyabaki (raica na Vunau kei na Veiyalayalati 119:4). Ia na ivakatakila oqo e sega walega ni vakamacalataka. E tukuna na Turaga vei ira na Yalododonu ni ikatini ena “vakatabuya na vanua ko Saioni.” Ia ni sega na lawa oqo, sa kaya o Koya, “sana sega … na nomudou Saioni” (tikina e 6). O sa bau vakasamataka mada na ikatini ena sala oqo? Ena vukei iko vakacava na saumi ikatini mo vakasavasavataki vakalevu cake, vakavakarau vakalevu cake ki Saioni?

Na cava o vulica mai na ivakatakila oqo me baleta na sala era vakayagataka kina na italai ni Turaga na ilavo ni ikatini? Na cava e bibi kina vei iko na malanivosa “na domoqu koi au vei ira” ena Vunau kei na Veiyalayalati 120?

Sa solia o Elder David A. Bednar e dua na ivakamacala yaga sara ni kena vakayagataki na ikatini kei na veivakalougatataki e yaco mai ena talairawarawa ki na lawa oqo ena “Na Katuba ni Lomalagi” (Liaona, Nove. 2013, 19–20). Ena rawa ni veivuke na taro eso oqo ni o vulica na nona itukutuku:

The Windows of Heaven

Spiritual and temporal blessings come into our lives as we live the law of tithing.

• O cei ena vakatulewataka na kena vakayagataki na ikatini ni sa saumi oti ki na Lotu?

• Na cava na inaki ni ikatini?

• Na veivakalougatataki cava ena yaco mai ena vuku ni saumi ikatini? Me ivakaraitaki, ena sala cava e vaqaqacotaka kina na nomu veiwekani kei na Tamada Vakalomalagi kei Jisu Karisito na saumi ikatini?

• Na cava o sa vulica ena veisureti nei Elder Bednar?

• Eda na vukei ira vakacava eso tale me vakalevutaki na nodra vakabauta na lawa ni ikatini ni Turaga?

Raica talega na Malakai 3:8–12; “The Tithing of My People,” ena Revelations in Revelations in Context, 250–55.

Vukei ira na tani mera bulataka na veika era sa vulica tiko. Ena gauna mada ga e vinakata kina e dua na tamata me saumi ikatini, ena so na gauna era sega ni kila na kena icakacaka. Kevaka o vakavulica tiko na nomu matavuvale se kalasi, navuca mo taura e dua na gauna mo vakamacalataka kina na saumi ikatini, ena initaneti se ena dua na tikidua ni iKatini kei na iSolisoli Tale Eso. (Raica na Veivakavulici ena iVakarau ni iVakabula,, 27.)

Me baleta na vakasama tale eso, raica na ilavelave ni vula oqo ni Liaona kei na mekasini Me iSakisaki ni iTabagone.

Vakasama eso ni Nodra Vakatavulici na Gonelalai

Vunau kei na Veiyalayalati 115:4–5

Au lewena na Lotu i Jisu Karisito ni Yalododonu Edaidai.

• Me vukei ira na luvemu mera vulica na yaca ni Lotu ka kila na vuna e bibi kina, navuca mo taroga kevaka e dua vei ira e rawa ni cavuta taucoko na yaca ni Lotu. Sa rawa mo qai vakaraitaka vei ira na yaca mai na Vunau kei na Veiyalayalati 115:4 ka mera cavuta vata kei iko. Ni o vakayacora, vakasamataka mo dusia na veivosa bibi kei na vuna era bibi kina. Sa rawa talega mo railesuva na “Wase 43: Vakayacana o Jisu Karisito na Nona Lotu” (ena iTalanoa mai na Vunau kei na Veiyalayalati, 164, se na kena vidio ena Valenivola Vakosipeli) se lagata na “Au Lewe ni Lotu i Jisu Karisito” (iVolanisere ni Gonelalai, 48).

Chapter 43: Jesus Christ Names His Church: April 1838

Vunau kei na Veiyalayalati 115:4–6

Noqu ivakaraitaki ena rawa ni vukei ira tale eso me ra lako mai vei Karisito ka kunea kina na taqomaki.

• Era na kila beka na luvemu na tamata era sotava tiko na dredre ka gadreva na “idrodro” mai na “cava ni bula” (tikina e 6). Era na vukei ira vakacava na tamata oqo? Sureti ira na gone mera tucake nio wilika na vosa tucake ena Vunau kei na Veiyalayalati 115:5. E rawa ni ra dodoka yani na iqaqalo ni ligadra me vaka na rarama ni matanisiga ni ko wilika na cila yani. Vakananuma vei ira na gone ni noda rarama e lako mai vei Jisu Karisito, ka vukei ira mera vakasamataka na sala eso era rawa kina ni “cila yani” me vakataki Koya.

• Sureti ira na gone me ra droinitaka na iyaloyalo e tukuna tiko na Vunau kei na Veiyalayalati 115:6. Me kena ivakaraitaki, sa rawa mera droinitaka e dua na cava, vata kei ira na tamata era vakaruru e vale ni Lotu. Na cava e rawa ni matataka na cava? E vakarautaka vakacava na veivuke na Lotu ni iVakabula? Vukei ira na luvemu me ra vakasamataka e dua na itokani, lewe ni matavuvale, se wekamu e vakaleqai tu. E rawa vakacava ni da sureti ira mera kune veivuke ena Lotu i Jisu Karisito?

Vunau kei na Veiyalayalati 117

Sa ka tabu vua na Turaga na noqu solibula.

• Sureti ira na luvemu mera vakatayaloyalotaka nio ira o Niueli K. Witini. Na cava era na vakila ke kerei ira na Turaga mera biuta na nodra cakacaka vinaka ka toso yani kina dua na vanua vou? (Ena rawa ni veivuke me railesuvi na “Wase 41: Leqa e Katiladi,” ena iTalanoa mai na Vunau kei na Veiyalayalati, 158–60, se na kena vidio ena Valenivola Vakosipeli.) Nio wilika vata na Vunau kei na Veiyalayalati 117:1–11, kerei ira na gone mera tarovi iko nira rogoca e dua na ka ena vukei ira ena vakabauta me solibula ka talairawarawa vua na Turaga. Na solibula cava soti eda cakava meda talairawarawa vua na Turaga? E dau vakalougatataki keda vakacava o Koya?

Chapter 41: Trouble in Kirtland: 1837–1838

Vunau kei na Veiyalayalati 119–20

E vakayagataka na Tamada Vakalomalagi na ikatini me vakalougatataki ira kina na Luvena.

• E vuqa vei ira na gone o vakatavulica tiko era se rui gone beka me ra rawa ilavo me rawa nira sauma na ikatini, ia e vinaka mera kila vakavinaka na sala e cau kina na ikatini ena cakacaka levu ni Lotu e vuravura raraba. Vakasamataka mo vakayagataka na iyaloyalo kei na tabana ni itaviqaravi ena mua ni ituvatuva oqo me vukei ira mera kila na cava na ikatini. (Raica talega na “Wase 44: iKatini,”ena iTalanoa mai na Vunau kei na Veiyalayalati, 165–66, se na kena vidio ena Valenivola Vakosipeli.) E vakayagataka vakacava na Tamada Vakalomalagi na ikatini me vakalougatataki ira kina na Luvena? Wasea na nomu nanuma me baleta na lawa ni ikatini kei na sala sa vakalougatataki iko kina.

Chapter 44: Tithing: July 1838

Eda vakaraitaka na noda vakabauti Jisu Karisito ena noda sauma na noda ikatini.

Me baleta na vakasama tale eso, raica na ilavelave ni mekasini ni iTokani ni vula oqo.