Totoka o Nauvu, mai vei Larry Winborg Dodonu ni Lavelavetaki 2023

27 ni Okotova–2 ni Noveba: “E Dua na Vale kina Yacaqu”

Vunau kei na Veiyalayalati 124

Ena dredre eso era sotava tu na Yalododonu ena ono na yabaki sa oti, sa tekivu me vinaka mai ena vulaitubutubu ni 1839: Era kauwaitaki na Yalododonu ena kedra maliwa na lewenivanua e Quincy, Illinois. Era a vakatara na yadra mera dro na Parofita o Josefa Simici kei ira tale eso na iliuliu ni Lotu era a tiko vakavesu e Misuri. Ka se qai volia walega na Lotu e dua na vanua mai Ilinois mera laki tiko vata tale kina na Yalododonu. Io, e vanua lolobo, sinai ena namu, ia ni vakatauvatani kei na nodra bolebole na Yalododonu sa sotavi oti mai, na kena oqo e rairai rawa ni lewai vinaka. Era sa qai vakamacara na lolobo ka cakava e dua na droini ni siti vou, ka vakatoka me o Nauvu. Sa kena ibalebale “totoka” ena vosa vaka-Iperiu, dina ga ni a dua tu na ivakaraitaki levu ni vakabauta mai na ivakamacala taumada. Ia, sa veivakauqeti tiko na Turaga vua na Nona Parofita ena yalo ni vakusakusa. E levu cake na dina kei na cakacaka vakalotu me vakalesuya mai, ka gadreva o Koya e dua na valetabu savasava me rawa ni “vakaisalataki ira kina na [Nona Yalododonu] ena veidokai, tawamate rawa, kei na bula tawamudu” (Vunau kei na Veiyalayalati124:55). Ena vuqa na sala, na yalo ni vakabauta kei na vakusakusa era sa kune votu tu ena cakacaka ni Turaga nikua.

Raica na Yalododonu, 1:399–427; “Organizing the Church in Nauvoo,” ena Revelations in Context, 264–71.

Vulica eso tale na ka me baleta na vanua vakairogorogo ni Lotu mai Illinois.

Vakasama eso ni Vuli e Vale kei na Lotu

Vunau kei na Veiyalayalati 124:2–11

Au rawa ni sureti ira tale eso mera lako mai vei Karisito.

A kaya na Turaga vua na Parofita o Josefa Simici me “vunautaka yani na [Nona] kosipeli” kivei “ira kece na tui e vuravura” (raica na Vunau kei na Veiyalayalati 124:2–11). Kevaka o ciqoma na ilesilesi oqo, na cava beka ena tukuna na nomu ivakaro baleti Jisu Karisito kei na Nona kosipeli vakalesui mai? Vakasamataka talega vakatitobu na sala e rawa ni o wasea kina na nomu ivakadinadina ena ivakarau kei na itovo ni bula matau tu vei ira o veimaliwai kei ira ena veisiga.

Raica talega “Na Vakalesui Mai ni Taucoko ni Kosipeli i Jisu Karisito: A iVakaro ni Yabaki Ruanadrau ki Vuravura,” Valenivola Vakosipeli.

Vunau kei na Veiyalayalati 124:12–21

Au sa rawa ni dua na tisaipeli e nuitaka tu na Turaga.

Vakasamataka mo veiwasei vei ira na tani, me vaka a vakayacora na iVakabula ena Vunau kei na Veiyalayalati 124:12–21, na itovo vakarisito o raica vei ira. Sa vakaraitaka vakacava vei iko o Koya na Nona loloma kei na veivakabauti?

Raica talega na Richard J. Maynes, “Rawata na Veivakabauti ni Turaga kei na Nomu Matavuvale,” Liaona, Nove. 2017, 75–77.

Vunau kei na Veiyalayalati 124:22–24, 60–61

E vinakata na Turaga meu kidavaki ka ciqomi ira na tani.

Ni ko vakasamataka vakatitobu na ivakasala ni Turaga ena Vunau kei na Veiyalayalati 124:22–24, 60–61, vakasamataka na sala o rawa ni cakava kina na nomu itikotiko kei na nomu tabanalevu me vanua e vaka na raivotu ni Turaga me baleti Nauvu.

Raica talega na “A Friend to All” (vidio), ChurchofJesusChrist.org.

A Friend to All

Elder Ulisses Soares talks of the need for kindness and acceptance.

iVakamacala baleti Josefa Simici ena Valetabu e Nauvu, mai vei Gary E. Smith.

Vunau kei na Veiyalayalati 124:25–45, 55

Eda tara na valetabu vua na Turaga me ciqomi kina na veicakacaka tabu vakalotu.

Na cava na vuna o nanuma kina ni sa “dau vakaroti” ira na Nona tamata na Turaga “me ra tara [valetabu] ki na yacana tabu”? Vakasamataka mo cakava e dua na ituvatuva ni vuna o kunea ena Vunau kei na Veiyalayalati 124:25–45, 55. E rawa nio kunea tale eso ena dua na serenilotu me vaka na “Na Vale Ni Kalou” (Serenilotu, naba 148) se na vidio “What Is a Temple?” (Valenivola Vakosipeli) E ivakatakilakila vakacava ni loloma ni Turaga vei iko na cakacaka ni kena tara na valetabu?

What Is a Temple?

The difference between chapels, where Latter-day Saints meet for regular Sunday worship, and temples is also explained.

Vakatekivu mai na gauna a tara kina na valetabu e Nauvu ena 1840 vakacaca, sa sivia oqo e 300 na valetabu e tara se sa kacivaki oti. A vakavulica o Peresitedi Russell M. Nelson: “Eda sa kila na noda gauna ena valetabu sa ka bibi ki na noda vakabulai ka vakacerecerei vakakina o ira na noda matavuvale. … Na ravuravu ni vunica sa tubu cake tikoga vakatotolo, ena kena kaukauwa kei na ituvaki. Na noda gagadre ni tiko vakawasoma ena valetabu ena veimacawa sa kaukauwa sara nikua” (“Meda iVakaraitaki Uasivi ni Yalododonu Edaidai, ” Liaona,Nove. 2018, 114). E vukei iko vakacava na valetabu mo vorata kina na “ravuravu ni vunica”? Na cava o sa vakauqeti kina mo cakava mo muria kina na ivakasala nei Peresitedi Nelson?

Raica talega na “Na Cava na Vuna Era Tara Valetabu Kina na Yalododonu Edaidai,” temples.ChurchofJesusChrist.org.

Vunau kei na Veiyalayalati 124:45–55

Na Turaga ena vakalougatataki ira era sasagataka mera talairawarawa ki na nona ivakaro.

Era a vakaroti na Yalododonu mera tara e dua na valetabu ena yasayasa vaka-Jekesoni e Misuri ia “ka ra qai tarovi mai vei ira na nodra meca” (Vunau kei na Veiyalayalati 124:51). Enatikina e 49–55 e koto kina na itukutuku veivakadeitaki vei ira era vinakata me ra talairawarawa ki na ivakaro ni Kalou ia qai sega ni rawa ena vuku ni nodra matavuvale se na ituvaki tale eso. Na ivakasala cava beka eda kunea ena veitikina oqo ena rawa ni vukea e dua ena ituvaki vakaoqo?

Vunau kei na Veiyalayalati 124:91–92

Ena rawa ni veidusimaki vei keda na Turaga ena Nona veivakalougatataki vaka peteriaki.

Ni oti ga vakalailai nona takali na tamana na Parofita, o Josefa Simici Levu, a kacivi Airame Simici na Turaga kina veikacivi a taura tu mai o tamana—me Peteriaki ki na Lotu. E rawa nio wilika oqo ena Vunau kei na Veiyalayalati 124:91–92.

Mo vulica eso tale na ka me baleta na itukutuku makawa ni peteriaki kei na veivakalougatataki vakapeteriaki, kiliki eke.

O na vakamacalataka vakacava e dua na veivakalougatataki vakapeteriaki ki vua e dua e se bera vakadua ni bau rogoca? Na cava ona kaya mo vakayaloqaqataka kina e dua me ciqoma e dua? Vakaraica na isau ni veitaro oqo ena itukutuku nei Elder Randall K. Bennett “Na Nomu Veivakalougatataki Vakapeteriaki—Na Veidusimaki Veivakauqeti mai vua na Tamada Vakalomalagi” (Liaona, Me 2023, 42–43) se Ulutaga kei na Taro, “Veivakalougatataki Vakapeteriaki” (Valenivola Vakosipeli).

Ni yavutaki mai na veika o sa vulica ka sotava, vakasamataka na sala mo vakacavara kina na iyatuvosa oqo: “Na veivakalougatataki vakapeteriaki e vaka na .” Na cava na vuna e vinakata kina na Tamada Vakalomalagi mera ciqoma na Luvena e dua na veivakalougatataki vakapeteriaki?

Kevaka o se bera ni ciqoma e dua na veivakalougatataki vakapeteriaki, na cava o rawa ni cakava mo vakavakarau kina kina dua? Kevaka o sa ciqoma na nomu veivakalougatataki vakapeteriaki, e rawa vakacava nio vakaraitaka vua na Kalou nio vakamareqeta na isolisoli oqo?

Raica talega na Kazuhiko Yamashita, “Gauna mo Ciqoma Kina na Nomu Veivakalougatataki Vakapeteriaki,” Liaona, Me 2023, 88–90; iVoladusidusi Raraba, 18.17, Valenivola Vakosipeli.

Veivakavulici mai na yaloda. Na veivakavulici e vakaibalebale vakalevu duadua ena gauna e oka kina na veika e sotavi kei na ivakadinadina. Me kena ivakaraitaki, kevaka o sa ciqoma e dua na veivakalougatataki vakapeteriaki, railesuva ena nomu vakavakarau mo vakavulica na veivakalougatataki digitaki oqo. Na cava na vuna o sa vakavinavinaka kina na nomu veivakalougatataki? O na vakauqeti ira vakacava eso tale mera vakavakarau mera ciqoma vakawasoma na nodra veivakalougatataki vakapeteriaki?

Vakasama eso ni Nodra Vakatavulici na Gonelalai

Vunau kei na Veiyalayalati 124:15, 20

E taleitaka o Jisu Karisito na bula dodonu.

• Me vukei ira na nomu gone me ra nanuma na veika era sa vulica mai na Vunau kei na Veiyalayalati 124:15, 20, e rawa nio vukei ira mera droinitaka ka kotiva na uto pepa. Ena uto, e rawa nio vukei ira mera vola na veimalanivosa bibi mai na veitikina oqo. E dua na sere me vaka na “Me da Dina” (Nodra iVolanisere na Lalai, 81) e rawa ni veivuke me vaqaqacotaka na vosa ni Turaga.

• Ni sa oti nomuni wilika vata na Vunau kei na Veiyalayalati 124:15, 20, de rawa nio vukei ira na luvemu me ra kila na cava na ibalebale ni bula dodonu ena tabana e 31 ni Me iSakisaki ni iTabagone: E Dua na iDusidusi ni Digidigi. Na cava e tukuna vakatabakidua na Turaga me baleti George Miller ena tikina e 20 “ena vuku ni dina ni yaloi [George]”? E rawa talega nio wasea na ivakaraitaki ni dua na gone ka vakaraitaka na bula dodonu o a sotava beka ena nomu bula se mai na mekasini na iTokani . Sureti ira na nomu gone mera tuva e dua na takete me ra vakaraitaka na yalodina ena macawa oqo ka tukuna vei iko na veika era vakila nira cakava.

Vunau kei na Veiyalayalati 124:28–29, 39

A vakaroti ira na Nona tamata o Jisu me ra tara na valetabu.

• Era na marautaka beka na nomu gone me ra sarava na iyaloyalo ni valetabu, oka kina e dua na valetabu makawa kei na valetabu voleka kina vanua era tiko kina (raica na ChurchofJesusChrist.org/temples/list). Sa rawa mo vakayagataka na iyaloyalo oqo kei na Vunau kei na Veiyalayalati 124:39 mo vakamacalataka nio Jisu Karisito e sa dau vakaroti ira na Nona tamata me ra tara valetabu—ena gauna makawa kei na noda gauna (raica talega na tabana ni itaviqaravi) ena macawa oqo.

• Kevaka o bula voleka kina dua na valetabu, navuca mo kauti ira na nomu gone ki kea ka taubaletaka ena vakarokoroko na rara ni valetabu. Sureti ira mera vaqara na vosa “Me Savasava Vua na Turaga—Na Vale ni Turaga” ena taudaku ni valetabu. Veitalanoataka kei ira na nomu gone na ibalebale ni veivosa oqo.

• Sa rawa mo vakayagataka na vakasama ena “Mo Papitaiso ka Vakadeitaki Baleti Ira na Qase e Liu” ena ikuri ni iVakamacala A me vukei ira na nomu gone mera nanamaki kina siga era sa na rawa ni curu kina ena valetabu (raica talega “Na Valetabu kei na iTuvatuva ni Marau” ena ikuri ni ivakamacala B).

Valetabu i Solomoni, mai vei Sam Lawlor

Vunau kei na Veiyalayalati 124:91–92

Ena vakalougatataki au na Turaga ena dua na veivakalougatataki vakapeteriaki.

• Nio wilika vata na Vunau kei na Veiyalayalati 124:91–92, vukei ira na gone mera raica na ka a kacivi Airame Simici kina na Turaga me cakava. Veivosakitaka na cava na veivakalougatataki vakapeteriaki: e dua na veivakalougatataki uasivi e vakavulica kina vei keda na Turaga me baleti keda kei na veika e vinakata o Koya meda cakava ka yaco me vakakina. Sa rawa mo vakayagataka na wase “Ciqoma e dua na Veivakalougatataki Vakapeteriaki” ena ikuri ni ivakamacala A me vukei ira na nomu gone mera vakavakarau kina nodra ciqoma na veivakalougatataki vakapeteriaki.

Me baleta na vakasama tale eso, raica na ilavelave ni mekasini ni iTokani ni vula oqo.

Na Valetabu e Nauvu, mai vei George D. Durrant