Domo ni Veivakalesuimai

Papitaiso ena Vukudra na Tubuda, “e dua na iVunau Lagilagi”

Na droini oqo e vakaraitaka tiko na tobu ni papitaiso ni Valetabu e Nauvu ni vakataqari toka ena tinikarua na bulumakau.

O Phebe kei Wilford Woodruff

A vakaitikotiko volekati Nauvu o Phebe Woodruff ena gauna sa tekivu vakavuvulitaka kina o Josefa Simici na kena rawa ni caka na papitaiso ena vukudra na a bula e liu. A vola kina na veika oqo vei watina, o Wilford, ka a veiqaravi tiko vakadaukaulotu e Igiladi:

“Sa vulica o Baraca Josefa … mai na ivakatakila ni o ira ena lotu oqo sa rawa me ra papitaisotaki ena vukudra e dua vei ira na wekadra era sa mate era a sega mada ni rogoca na kosipeli oqo, sa vakakina sara mada ga vei ira na nodra gone, itubutubu, tacidra, ganedra, tubunigone, momo kei na nei. … Ena gauna era sa papitaiso kina ena vukudra na nodra itokani era sa sereki mai valeniveivesu sa rawa ni ra kaya me ra nodra ena gauna ni tucake tale ka kauti ira mai ki na matanitu vakasilesitieli—na ivunau oqo sa ciqomi tiko ena lotu ka ra sa gole tiko yani ki liu vakalewelevu, ka so era sa papitaisotaki kina vaka 16 …ena dua na siga.”

E muri a qai kaya kina o Wilford Woodruff baleta na ivakavuvuli oqo: “Ena gauna ga au sa rogoca kina a lade na yaloqu ena reki. … Au sa toso ga ki liu ka a papitaisotaki baleti ira kece na wekaqu era sa mate au rawa ni vakasamataka. … Au vakila niu via kaya aleluia ni sa yaco mai na ivakatakila ka vakaraitaki mai kina vei keda na nodra papitaiso na mate. Au vakila ni sa noda na dodonu meda rekitaka na veivakalougatataki ni Lomalagi.”

Vilate Kimball

Me vakataki Sisita Woodruff, a rogoca o Vilate Kimball me baleta na papitaiso ena vukudra na mate ena gauna a lako tu kina na watina o Heber, me laki vunautaka na kosipeli. A volavola vua o Vilate:

“Sa mai dolava oqo o Peresitedi Smith e dua na ulutaga vou ka lagilagi … sa vakavuna kina e dua na veivakavoutaki ena loma ni lotu. Oya, na veipapitaisotaki me baleti ira na mate. A vosa kina o Paula ena imatai ni Korinica ena wase 15 ena tikina e 29. E sa ciqoma o Josefa e dua na kena ivakamacala vakavotukana sara ena iVakatakila. … Sa ikoya na dodonu ni Lotu oqo me ra papitaisotaki me baleta na nodra kawa ka ra sa mate ni se bera ni basika mai na Kosipeli oqo; ka lesu sara mada ga vei ira naTukadra kei na Budra vakarua. Ni vakayacori oqo, eda sa matataki ira tiko; ka solia vei ira na madigi mera na tucake mai ena imatai ni tucaketale. A kaya o koya ni na vunautaki na Kosipeli vei ira… ia e sega ni dua na yalo me na papitaisotaki. … Me vaka ni sa vunautaki tiko eke na ivakarau oqo, sa dau vakayavalati tiko ga na wai. Ena gauna ni koniferedi sa laki yacova sara na walu ki na tini na iTalatala Qase era sa tu e wai mera veipapitaisotaki. … Au a via papitaisotaki me baleti Tinaqu. Au sa cakacakataka meu waraka nomu lesu mai vale, ia na iotioti ni gauna a vosa kina o Josefa baleta na ulutaga oqo, a vakasalataka na tamata yadua mera lako yani ka laki cakava, ka sereki ira sara vakatotolo na wekadra mai na vesuki tu. Io au sa vakasamataka tiko meu sa gole yani ena macawa oqo, ni vica vei ira eda veivolekati tiko era na gole yani. E so era sa papitaisotaki oti vakavica. … O sa raica kina ni sa soli na madigi vei keda kece. E sega beka ni vunau lagilagi oqo?”

Phebe Chase

Ena gauna sa caka oti kina na tobu ni papitaiso ena Valetabu e Nauvoo, sa laki vakayacori e kea na papitaiso ena vukudra na mate ka sa sega tale ena uciwai. A volavola o Phebe Chase, a vakaitikotiko e Nauvoo, kivei tinana me baleta na valetabu, ka vakamacalataka na tobu ni papitaiso ni sa vanua “eda rawa ni papitaisotaki baleti ira na noda mate ka yaco meda dauveivakabulai ena Ulunivanua ko Saioni.” A tomana tale na nona vakamacala ni ena tobu oqo, “Au a sa papitaisotaki me baleti tamaqu daulomani kei ira kece na noqu itokani era sa mate. … Ia au sa vinakata oqo meu kila na yacai tamamu kei Tinamu meu rawa ni sereki rau, niu sa gadreva meu vakacegui ira na Mate. … Sa vosa tale mai na Turaga ka sa vakalesuamai na ivalavala makawa.”

Sally Randall

Ena nona volavola kivei ira na nona itokani kei na matavuvale me baleta na papitaiso ena vukudra na mate, a nanuma o Sally Randall na takali nei luvena tagane o George:

“Isa sa qai dua na gauna dredre sara vei au ka vaka se bera niu rawa ni veivakaduavatataki me vakakina, ia … sa papitaiso o tamana me baleti koya ka sa dua na ka lagilagi ni da sa vakabauta ka ciqoma na taucoko ni kosipeli me vaka sa vunautaki tu oqo ka rawa ni papitaisotaki me baleti ira kece na itokani era sa mate ka vakabulai ira ena kena yawa ki muri eda rawa ni kilai ira.

“Au vinakata mo vola vei au na imatai ni yacadra kece era sa mate eda semati tu vei ira me yacova sara vei ira na tukada kei na buda ena ivakarau cava ga. Au vinakata meu cakava na veika au rawata meu vakabulai ira na noqu itokani kau na marau vakalevu kevaka e so vei kemuni mo ni lako mai ka vukei au me baleta ni oqo sa dua na cakacaka levu me dua e cakava duadua ga. … Au sa namaka tiko mo na kaya ni oqo e dua na ivunau vakatani ia o na raica ni sa ka dina.”

iDusidusi

1. Phebe Woodruff letter to Wilford Woodruff, Oct. 6, 1840, Church History Library, Salt Lake City; vakavoutaki ni sipeli kei na pagitueti.

2. Wilford Woodruff, “Vosa,” Deseret News, Me 27, 1857, 91; vakavoutaki na pagitueti.

3. iVola nei Vilate Kimball kivei Heber C. Kimball, 11 ni Okot., 1840, Church History Library, Salt Lake City; vakavoutaki na sipeli kei na pagitueti.

4. iVola nei Phebe Chase, sega na tikinisiga, Church History Library, Salt Lake City; vakavoutaki na sipeli kei na pagitueti. Ena imatai ni gauna era sa papitaisotaki kina na Yalododonu ena vukudra na mate, ena so na gauna era sa papitaisotaki eso na tamata ena vukudra na tubudra tagane se yalewa. E a qai vakaraitaki e muri ni dodonu ga vei ira na tagane mera papitaiso baleti ira na tagane kei na yalewa vei ira na yalewa.

5. iVola nei Sally Randall, 21 ni Epe., 1844, Church History Library, Salt Lake City; vakavoutaki na sipeli kei na pagitueti.