“Domo ni Veivakalesuimai: Na Soqosoqo ni Veivukei,” Lako Mai, Mo Muri Au—Me Baleta na Vuvale kei na Lotu: Vunau kei na Veiyalayalati 2025 (2025)
“Na Soqosoqo ni Veivukei,” Lako Mai, Mo Muri Au—Me Baleta na Vuvale kei na Lotu: 2024
Domo ni Veivakalesuimai
Na Soqosoqo ni Veivukei
Ena 1842, ni oti na tauyavutaki ni Soqosoqo ni Veivukei e Nauvu, Ilinoi, a kaya na Parofita o Josefa Simici, “Na Lotu a sega ni taucoko sara na kena tauyavutaki me yacova na gauna esa tauyavutaki kina o ira na marama.” Sa vakakina, na vulici ni Vakalesuimai ni Lotu ni Turaga kei na Nona matabete ena sega ni taucoko me yacova ni sa okati kina na vulici ni Soqosoqo ni Veivukei, ni sai koya vakataki koya na “vakalesui mai ni dua na ivakarau makawa” baleti ira na tisaipeli yalewa i Jisu Karisito.
E a bibi sara na itavi nei Eliza R. Snow ena veivakalesui mai o ya. A tiko o koya ena matai ni gauna a tauyavutaki kina na Soqosoqo ni Veivukei ka, vaka ni a sekeriteri ni soqosoqo, a tauri tukutuku ena kena soqoni. A vakadinadinataka sara ga ni a tauyavutaki na Soqosoqo ni Veivukei “ena ivakarau ni matabete.” E toka e ra na nona vosa, a volai ena gauna a se veiqaravi tiko kina vakaikarua ni Peresitedi Raraba ni Soqosoqo ni Veivukei, mera vukei kina na tacina yalewa me ra kila na cakacaka vakalou sa nuitaki vei ira na luvena yalewa ni veiyalayalati na Kalou.
Mo vulica eso tale na ka me baleta na sala a tauyavutaki kina na Soqosoqo ni Veivukei, raica na Luvequ Yalewa ena Noqu Matanitu: Na iTukutuku kei na Cakacaka ni Soqosoqo ni Veivukei (2017), 1–25; Na iMatai ni Limasagavulu na Yabaki ni Soqosoqo ni Veivukei (2016), 3–175.
Droini ni matasoqosoqo ni Soqosoqo ni Veivukei mai vei Paul Mann
Eliza R. Snow
“E dina beka ni rogorogo vou na yaca ni [Soqosoqo ni Veivukei], na soqosoqo e se tekivutaki ena gauna makawa sara. E a tukuna vei keda o [Josefa Simici], ni a tiko ena lotu na soqosoqo vata ga ena gauna makawa, na vakasama eso esa vakayagataki ena so na ivola era tiko ena Veiyalayalati Vou, me vakayagataki na ulutaga, ‘marama sa digitaki tu’ [raica na 2 Joni 1:1; Vunau kei na Veiyalayalati 25:3].
“Oqo e dua na soqosoqo e sega ni rawa ni vakavotukana ke sega na Matabete, mai na dina kece ni sa yavutaki na kena dodonu ni lewa kei na veivakauqeti taucoko mai na ivurevure o ya. Ni sa kau tani na Matabete mai na vuravura oqo, na soqosoqo oqo ka vakakina o ira ka sema kina ena ivakarau dina ni Lotu i Jisu Karisito ena vuravura, sa kawaboko. …
“Niu a tiko ena kena tauyavu na ‘Soqosoqo ni Marama Veivukei e Nauvoo,’ … ka levu sara na veika au a sotava ena soqosoqo oya, meu vakaraitaka mada e vica na vakasama ena vukei ira na luvena yalewa ni Saioni mera kalawa yani ki na itutu bibi sara oqo, sa vakasinaiti tu ena ilesilesi vou ka vakaikuritaki. Kevaka e dua vei ira na goneyalewa kei na tina e Isireli e vakila ni vakaiyalayala walega na vanua era tu kina oqo, era sa na kunea oqo na madigi e veirauti kei na kaukauwa kece kei na galala ni caka vinaka era sa vakalougatataki mai kina. …
A tauyavutaki na Soqosoqo ni Veivukei ena rumu e cake ni Sitoa Vatu Damudamu.
“Kevaka e dua me na lomatarotaka tu vakaoqo, Na cava beka na inaki ni iSoqosoqo ni Veivukei ni Marama? Au na sauma—meda caka vinaka—me vakayagataki na veitaledi ni caka vinaka e tu vei keda, sega walega ena nodra vukei na dravudravua ia ena vakabulai ni yalo. Na sasaga vakaduavatataki ena rawaka vakalevu sara mai na kena e rawati ena igu kaukauwa taudua ni tamata yadua. …
“Ena nodra qaravi na dravudravua, sa tiko eso tale na itavi ni Soqosoqo ni Veivukei me qarava ka sega walega ni kena vakacegui na leqa vakayago. Na dravudravua ni vakasama kei na tauvimate ni yalo, sa gadrevi me na qaravi talega; ka vuqa na gauna na ivakaraitaki ni yalololoma—vica na vosa ni ivakasala, se na lululu nio kauwai ka veikaroni sara madaga ena vinaka cake vakalevu sara ka na taleitaki cake mai na dua na bausi ni koula. …
“Ena gauna sa ra soqoni kina na Yalododonu mai na veivanua tani, vulagi vei ira na tamata kecega, ka rawa mera muataki tani mai vei ira na dauveicavilaki, sa dodonu kina Soqosoqo ni [Veivukei] me tu vakarau me qaravi [ira] ka vakatakilai ira kina soqosoqo ena moica ka laveta, ka kena itinitini vaqaqacotaki ira ena vakabauti ni kosipeli, ka ni sa vakayacori, ena rawa ni mana sara ena vakabulai ni lewevuqa.
“Ena gadrevi kina e levu sara na ka me na vakamacalataka na itavi, na madigi kei na ilesilesi e basika ena loma ni kauwai ni Soqosoqo. … Cakava sara (ena veidusimaki ni nomu bisopi) vakavinaka, vakainaki, vakaukauwa, vakaduavata kei na masumasu, ka na vakacocovitaka na Kalou na nomu sasaga ena rawaka.”