Oi Keda Kei Ira vakakina O Ira kei Keda, mai vei Caitlin Connolly

3–9 ni Noveba: “Na Domo ni Mamarau Vei Ira na Bula kei Ira na Mate”

Vunau kei na Veiyalayalati 125–128

Ena Okosita ni 1840, a vakarorogo tiko ena yalorarawa o Jane Neyman vua na Parofita Josefa Simici ni vosa tiko ena lotu ni veibulu nei nona itokani o Seymour Brunson. Se qai mate oti toka ga na luvei Jane cauravou o Cyrus. A vakuria na nona rarawa nio Cyrus a se bera tu ni papitaiso, e lomaleqa o Jane ena cava ena yaco kina tawamudu ni nona bula vakayalo. A vakataroga talega o Josefa na ka vata oqo baleta na tuakana lomani o Alvin, ka mate talega ni se bera ni papitaiso. Sa qai nanuma na Parofita me wasea vei ira na tamata kecega ena soqo ni veibulu na veika sa vakatakila mai na Turaga vei koya me baleti ira era sa mate ka sega ni ciqoma na cakacaka vakalotu ni kosipeli—kei na cava eda rawa ni cakava meda vukei ira kina.

Na ivunau ni papitaiso me baleti ira na mate e vakamarautaki ira sara ga na Yalododonu; e gole yani vakatotolo na nodra vakasama vei ira na lewe ni matavuvale era sa takali Ia oqo sa tiko na nodra inuinui! A marau vata kei ira o Josefa, ka cavuta na vosa ni reki, ka veivagumatuataki me vakaraitaka na veika e vakavulici koya kina na Turaga me baleta na nodra vakabulai na mate: “Mera kaila ena reki na veiulunivanua, ia dou kaila vakadomoilevu na veibuca; dou seretaka na nona lagilagi na nomudou Tui Tawamudu oi kemudou na veiwasawasa kei na vanua mamaca! Vunau kei na Veiyalayalati 128:23).

Raica na Yalododonu,, 1:415–27; “Letters on Baptism for the Dead,” Revelations in Context, 272–76.

Vakasama eso ni Vuli e Vale kei na Lotu

Vunau kei na Veiyalayalati 126

E vinakata na Turaga meu qarava na noqu vuvale.

Ni sa lesu mai na kaulotu ki Igiladi—e dua vei ira na vuqa na tabana ni kaulotu a veiqaravi kina—a ciqoma tale o Brigham Young e dua na veikacivi bibi mai vua na Turaga. A kerei o koya me “qarauni iratou [nona] matavuvale” (tikina e 3),ka a kune rarawa tu ena nona yali. Nio vulica na iwase oqo, vakasamataka na vuna e dau gadreva kina na Turaga na solibula ena noda veiqaravi. Na cava ona cakava mo qarauna kina na nomu matavuvale?

Raica talega na “Take Special Care of Your Family,” ena Revelations in Context,, 242–49.

Vunau kei na Veiyalayalati 127:2–4

E rawa nida vakararavi vua na Turaga ena loma ni gauna dredre.

Na veibeitaki vakailasu kei na veivakarerei me vesu a vakasaurarataki Josefa Simici tale me vunitaki koya ena Okosita ni 1842. Ia na vosa e a vola vei ira na Yalododonu ena gauna oqo (sa mai Vunau kei na Veiyalayalati 127) sa sinai ena vakanuinui kei na reki. Na cava e vakavulica vei iko na tikina e 2–4 me baleta na Kalou? me baleta na kena sotavi na veivakalialiai se veisaqasaqa? Na malanivosa cava soti mai na veitikina oqo ena rawa ni vukei iko nio vakila na veivakacacani? Sa rawa mo vola na sala sa tokoni iko tiko kina na Turaga ena “wai titobu” ni nomu bula.

Vunau kei na Veiyalayalati 127:5–8; 128:1-8

“Na veika kecega dou vola e vuravura ena volai mai lomalagi.”

Nio wilika na Vunau kei na Veiyalayalati 127:5–8; 128:1–8, vakaraica na vuna a solia kina na Turaga vei Josefa Simici na idusidusi vakaoqo me baleta na volai ni papitaisotaki ena vukudra na mate. Na cava e vakavullica oqo vei iko me baleta na Turaga kei na Nona cakacaka? Na iwalewale cava o nanuma ni rawa ni vakayagataki kina na idusidusi oqo ena nomu ivolatukutuku ni matavuvale, me vaka na nomu ivolaniveisiga?

Nida cakava na veiqaravi ena valetabu me baleta na noda qase e liu e vauca na yaloda vei ira.

Vunau kei na Veiyalayalati 128:5–25

Na nodra vakabulai na noqu qase e liu sa ka bibi ki na noqu vakabulai.

E matata mai na veika a vakatakila na Kalou mai vei Josefa Simici na vuna era gadrevi keda kina o ira na noda qase e liu era sega ni papitaiso ena bula oqo: eda sa papitaisotaki ena vukudra me rawa nira digitaka mera ciqoma se besetaka na cakacaka vakalotu oqo. Ia a vakatavulica talega na Parofita ni nodra vakabulai na noda qase e liu sa “ka yaga sara ka gadrevi ena noda vakabulai.” Nio wilika na Vunau kei na Veiyalayalati 128:15–18, vakasamataka na vuna.

E vakavulica natikina e 5 ni cakacaka vakalotu ni papitaiso ena vukudra na mate a vakarautaki “ni sa bera ni tauyavutaki ko vuravura.” Na cava e vakavulica vei iko na dina oqo me baleta na Kalou kei na Nona ituvatuva? Na cava e vakuria na itukutuku nei Elder Dale G. Renlund “Cakacaka ni Tuva Kawa kei na Valetabu:Veivauci kei na Veivakabulai” ki na nomu kila ka? Liaona, Me 2018, 46–49.

A vakayagataka o Josefa Simici na veimalanivosa me vaka na “kaukauwa ni veivauci,” “semati ena isema,” ka “vakataucokotaki na duavata” ni a veivakavulici me baleta na cakacaka vakalotu ni matabete, kei na papitaiso ena vukudra na mate. Vakaraica oqo kei na veimalanivosa era tautauvata ena nomu wilika na Vunau kei na Veiyalayalati 128:5–25. E rawa beka nio vakasamataka eso na iyaya o rawa ni vakayagataka mo vakaraitaka kina na malanivosa eso oqo, me vaka e dua na sinucodo se dali? Na cava na vuna era malanivosa vinaka kina me vakamacalataka na ivunau oqo?

Na vakasamataki ni taro eso oqo ena rawa talega ni vukea na nomu vulica na veitikina oqo:

• Ena nomu nanuma, na cava na vuna e vakatokai kina na papitaiso ena vukudra na mate me “kena ka lagilagi duadua mai vei ira na veiulutaga kecega ka okati kina kosipeli tawamudu”? (tikina e 17). Na cava soti o sa sotava ka sa vukei iko me vaqori na nomu nanuma?

• Ena ituvaki cava e rawa meda na kaya kina ni na cudruvi na vuravura kevaka e sega ni dua na “isema veivauci ena kedra maliwa na tama kei ira na gone”? (tikina e 18).

• Na cava e uqeti iko baleta na vosa nei Josefa Simici ena tikina e 19-25? E vakayaco-ka vakacava na veitikina oqo kina veika o nanuma baleti Jisu Karisito? me baleta na veiqaravi ni valetabu baleti ira na nomu qase e liu? (raica talega na“Come, Rejoice,” Sere ni Lotu, naba 9).

Nio vulica oti na veitikina oqo, o na vakauqeti beka mo cakava e dua na ka me baleti ira na nomu qase e liu. Na vakasama eso me baleta FamilySearch.org e rawa ni veivuke.

Na “Vidio Veivakauqeti” ena “Valetabu kei na Tuvakawa” e rawa ni solia vei iko na Valenivola Vakosipeli na veivuke rawarawa, italanoa veivakauqeti, kei na itukutuku mai vei ira na iliuliu me baleta na tuva kawa.

Vakayagataka na ivurevure veisemati ni Lotu. Na isema ena idusidusi ni Lako Mai, Mo Muri Au e rawarawa kina noda curuma na ivurevure veivukei ka rawa ni vukei iko mo kila vinaka ka bulataka na dina ni kosipeli se cakacakataka na veivakauqeti o ciqoma. Me ivakaraitaki, na isema ni QaraMatavuvale e cake e veimuataki kina itaviqaravi me vaka na tarai cake ni nomu vunikau ni matavuvale, kunei ira na tubumu era gadreva tu na cakacaka vakalotu ni valetabu, ka raica na vanua era lako mai kina na nomu qase e liu, se vakavodoki e dua na italanoa ni matavuvale.

Raica talega na Kevin R. Duncan, “E Dua na Domo ni Marau!,” Liaona, Me 2023, 95–97.

“Na Veivakarautaki E lagilagi ka Totoka.”

E kaya vakaoqo o Peresitedi Gordon B. Hinckley:

“Na Veisorovaki nei Jisu ena vukudra na tamata kecega e matataka e dua na solibula cecere ni veisosomitaki. Sa vakarautaka o Koya na ivakarau me yaco kina me sa veisosomitaki me baleti ira na tamata kecega. Na ivakarau oqo ka cakacaka kina edua na tamata ena vukuna e dua tale, sa vakadewataki sobu mai ena cakacaka vakalotu ni nona vale na Turaga. Eke eda veiqaravi ena vukudra o ira era sa mate ka sega ni kila na kosipeli. Sa qai nodra na digidigi me ciqoma se biliga na cakacaka vakalotu ka sa vakayacori tiko. Era sa biu mera tautauvata kei ira era sa bula e vuravura. Sa soli talega vei ira sa mate na madigi vata ga sa soli vei ira era bula tiko. Dua tale, sa dua na veivakarautaki lagilagi ka totoka sa cakava na Kalou Cecere mai na nona ivakatakila vua na Nona Parofita” (“Na Veika Cecere sa Vakatakila na Kalou,” Liaona, Me 2005, 82–83).

Vakasama eso ni Nodra Vakatavulici na Gonelalai

Vunau kei na Veiyalayalati 126:3

Au rawa ni veivuke me qarava na noqu matavuvale.

• Me vukei ira na luvemu me ra vulica mera qaravi ira nodra lewe ni matavuvale, navuca mo wasea na itukutuku me baleti Brigham Young ena “Wase 50: Ira na Yalododonu e Nauvu” (ena iTalanoa mai na Vunau kei na Veiyalayalati, 184, se na kena vidio ena Valenivola Vakosipeli) se vakalekalekataka na Vunau kei na Veiyalayalati 126 ena nomu vosa ga. Sa rawa mo vakabibitaka na malanivosa “mo qarauna vakavinaka sara na nomu matavuvale” (tikina e 3) ka veitalanoa kei ira na luvemu me baleta na ibalebale ni qaravi ni noda matavuvale.

  Chapter 50: The Saints in Nauvoo: January–July 1841

• Ena ka marautaki beka vei iko kei ira na luvemu mera raica na iyaloyalo ni matavuvale (se droinitaka na iyaloyalo) ni o ni veitalanoataka na sala eso eda rawa ni veivuke kina meda “kauwaitaki” ira na lewe ni matavuvale. E rawa talega ni o lagata e dua na sere me vaka na “Vale Me Vaka mai Lagi” (Sere ni Lotu, naba 181).

Vunau kei na Veiyalayalati 128:5, 12

Ira kece na luve ni Kalou sa gadreva na madigi me ra papitaiso.

• Sureti ira na luvemu me ra vaqara mai na Vunau kei na Veiyalayalati 128:1 na ulutaga cava a lewe tu ni vakanananu nei Josefa Simiici. Sa rawa mera vakasaqara talega na tikina e 17 mera raica kina na ulutaga cava e vakatoka o koya me“lagilagi duadua.” Mera wasea na veika era sa kunea, ka veivosakitaka na vuna e totoka kina na ulutaga oqo.

• Me ikuri ni nodra vukei na luvemu mera vakavakarau (ka bula) ena nodra veiyalayalati ni papitaiso, sa rawa mo vukei ira mera kila na sala mera vukei kina na tamata era sega ni cakava na veiyalayalati oqo ena nodra gauna ni bula. Vakasamataka mo tukuna vei ira na luvemu me baleta e dua o kila sa mate ka se sega ni papitaiso. Mo ni qai wilika vata na Vunau kei na Veiyalayalati 128:5 ka raica na iyaloyalo ni tobu ni papitaiso ni valetabu (me vaka na kena ena mua ni ituvatuva oqo). Tukuna vei ira na luvemu na nomu nanuma me baleta na papitaiso ena valetabu ena vukudra na tamata era sa mate me rawa nira cakava na tamata yadua na veiyalayalati kei Tamada Vakalomalagi.

Vunau kei na Veiyalayalati 128:18

Na Tamada Vakalomalagi e vinakati au meu vulica noqu ituvatuva ni kawa.

• Ena rawa ni ka marautaki vei iko kei ira na luvemu moni cakava e dua na itui pepa kei na yacadra na itubutubu, tubudra, tukadra vakarua, kei na so tale (raica na tabana ni itaviqaraviena macawa oqo) . Mo qai veiwaseitaka na veika o kila me baleti ira na qase e liu oqo. Wilika vata na Vunau kei na Veiyalayalati 128:18 ka vakasaqara na cava na “isema kaukauwa” ka cakava na noda tuva kawa me “veisemati e taucoko.” E rawa talega nio sarava na vidio “Courage: I Think I Get It from Him” (Valenivola Vakosipeli).

  Courage: I Think I Get It From Him

  Learn about your ancestors strengths to discover your own strengths.

• Na ikuri ni itaviqaravi me vukei ira na luvemu mera vakaitavi ena tuva kawa e rawa ni kunei ena “Na Valetabu kei na iTuvatuva ni Bula Marau” ena ikuri ni vakamacala B se FamilySearch.org.

Na cakacaka vakalotu ni valetabu ena vukei keda meda vakaduavatataka na matavuvale me vaka na isema ena dua na sinucodo.

Me baleta na vakasama tale eso, raica na ilavelave ni mekasini ni iTokani ni vula oqo.

Tobu ni veipapitaisotaki ena Valetabu e Ogden Utah