Veika matailalai ena Josefa Simici e Nauvu, 1840, mai vei Theodore Gorka

10–16 ni Noveba: “Au sa Raica na Nomu Solibula ena Talairawarawa”

Vunau kei na Veiyalayalati 129–132

Mai vei Josefa Simici, a kauta tani kina na Turaga eso na veika vuni mai na veigauna tawamudu. Na cecere ni Kalou, na lagilagi kei lomalagi, kei na rabailevu ni veigauna tawamudu e vaka me matalia ena rarama ni kosipeli vakalesui mai, kina veivakasama yalani sara mada ga me vaka na noda. Na ivakatakila e tiko ena Vunau kei na Veiyalayalati 129–32 era sa ivakaraitaki vinaka. E vakacava tu beka na Kalou? E ”taukena e dua na yago … me vaka ga na tamata.” E vakacava tu na ituvaki kei lomalagi? “Na ivakarau ni veimaliwai sa tu vei keda eke ena tu talega vei keda mai kea” (Vunau kei na Veiyalayalati 130:22, 2). Na ka dina, e dua na dina rekitaki duadua me baleti lomalagi sai koya ni rawa ni oka kina na noda veimaliwai vakamareqeti vakamatavuvale, ke vauci ena kena lewa dodonu. Na veidina vakaoqo sa rawa ni vakilai kina ni voleka mai o lomalagi—lagilagi ia e rawa ni yacovi.

Ia, ena so na gauna sa dau kerei keda na Kalou meda cakava na veika sega soti ni logavinaka ka dredre me yacovi. Vei ira e lewevuqa na Yalododonu, na vakawati vakalevu e dua vei ira na mataqali ivakaro vakaoqori. Sa dua na veivakatovolei ni vakabauta dredre sara kivei Josefa Simici, o Ema na watina, ka voleka nio ira kecega era a ciqoma. Me lako curuma rawa na veivakatovolei oqo, era gadreva e levu cake mai na veivakanananu taleitaki walega ni kosipeli vakalesui mai; sa gadrevi mera vakabauta vakatitobu na Kalou mai na nodra dui gagadre se nanuma ga. Sa sega tale ni tiko edaidai na vunau oqo, ia na nodra ivakaraitaki yalodina na a bulataka e se tiko ga. Ka sa vakauqeti keda na ivakaraitaki oqo ni da kerei meda cakava na noda dui “isoro ena talairawarawa” (Vunau kei na Veiyalayalati 132:50).

Vakasama eso ni Vuli e Vale kei na Lotu

Vunau kei na Veiyalayalati 130–132

E vinakata na Kalou me vakacerecerei ira na Luvena.

E vuqa na ka eda sega ni kila me baleta na bula vakacerecerei se na bula ena ivakatagedegede cecere duadua ni matanitu vakasilesitieli—na mataqali bula e bulataka na Kalou. E levu cake beka ena sega ni rawa ni da kila ena gauna oqo. Ia sa vakatakila mai na Kalou e vica na ivakatakilakila vakamareqeti, ka vuqa vei ira era kune ena Vunau kei na Veiyalayalati 130–32. Ona via wilika na wase 130–131 ka vakasamataka na taro eso vakaoqo: Na cava au sa vulica me baleta na Kalou? Na cava au sa vulica me baleta na bula ni oti na bula oqo? Ena vakalougatataka vakacava na noqu bula ena gauna oqo na noqu kila na itukutuku oqo baleta na bula tawamudu?

Raica talega na“Our Hearts Rejoiced to Hear Him Speak,” ena Revelations in Context, 277–80.

Vunau kei na Veiyalayalati 130:20–21; 132:5

Na Kalou e vakalougatataki ira na tamata era talairawarawa ki na Nona lawa.

O na tukuna vakacava, ena nomu vosa ga, na veika e vakavulica na Turaga ena Vunau kei na Veiyalayalati 130:20–21 kei na 132:5? Vakasamataka vakatitobu na sala sa vakaraitaki kina ena nomu bula na ivakavuvuli oqo.

Ena so na gauna, ena gauna mada ga eda talairawarawa kina vua na Kalou, e sega ni dau yaco totolo mai na veivakalougatataki eda nuitaka. Ona maroroya vakacava na nomu vakabauta kei na vakanuinui ni yaco na ka oqo? Vakaraica na vakasama eso ena itukutuku nei Elder D. Todd Christofferson“Na Noda Veiwekani kei na Kalou“ (Liaona, Me 2022, 78–80).

Raica talega na 1 Nifaii 17:35; Vunau kei na Veiyalayalati 82:10.

Vunau kei na Veiyalayalati 132:13–21

Sa rawata na Tamada Vakalomalagi me tawamudu na matavuvale.

Mai vua na Parofita ko Josefa Simici, sa vakalesuya mai na Turaga na dina ni vakamau kei na isema vakamatavuvale e rawa ni tawamudu. Nio wilika na Vunau kei na Veiyalayalati 132:13–21, vakaraica na veimalanivosa e vukei iko mo kila na duidui ni veika ena “tikoga” tawamudu kei na veika ena sega ni yaco. Na cava o nanuma e kena ibalebale na veiwekani vakaveiwatini me “mai vua na [Turaga]”? (tikina e 14).

Ena nona itukutuku “Vakacaucautaki Ira Era Veivakabulai,” e vakatautauvatataka o Peresitedi Dieter F. Uchtdorf na isema ni vakamau tawamudu kei na veika “cakitaki” (Liaona, Me 2016, 77–78). Na cava e vakavulica vei iko na veibasai oqo me baleta na kena susugi cake—se vakavakarau kina—dua na veimaliwai ni vakamau? Vakasamataka na nomu veimaliwai vakamatavuvale—ena gauna oqo kei na veisiga ni mataka—nio wilika na itukutuku nei Elder Uchtdorf. Na cava o kunea e kea ka solia vei iko na inuinui vei Karisito me baleta na nomu veimaliwai vakamatavuvale?

A wasea o Peresitedi Henry B. Eyring na ivakasala oqo a ciqoma ena gauna a lomaleqataka kina na ituvaki ni nona matavuvale: “O bula kilikili voli ga ena matanitu vakasilesitieli, ka na vakasakiti cake na ituvatuva ni matavuvale mai na kena o rawa ni vakasamataka rawa” (ena“Na iTikotiko e Vakaicili Kina na Yalo ni Turaga,” Liaona, Me 2019, 25). Ena vukei iko vakacava na ivakasala oqo se dua tale o kila?

Raica talega na “Rawa ni Tawamudu na Matavuvale,” Sere ni Lotu, naba. 184; Ulutaga kei na Taro,“Vakamau,” Valenivola Vakosipeli.

Na vakamau e rawa ni vauci me tawamudu ena vale ni Turaga.

Vunau kei na Veiyalayalati 132:1–2, 29–40

Na vakawati vakalewelevu esa vakatara na Kalou ena gauna duadua ga sa vakarota kina o Koya.

E vuqa na tamata era sa wilika na Veiyalayalati Makawa era na rairai vakataroga me baleti Eparaama, Jekope, Mosese, kei na so tale ka levu na watidra. Era sa veibutakoci tiko li na italai ni Turaga oqo? Se sa vakadonuya beka na Kalou na nodra vkawati vakalevu? A tu talega vei Josefa Simci na taro vata oqori. Vakaraica na isaunitaro ena Vunau kei na Veiyalayalati 132:1–2, 29–40.

Na vakawati ni dua na turaga kei na dua na marama esa ivakarau ni vakawati va-Kalou (raica na ikau ni wase ni Ai Vakaro Raraba 1; Jekope 2:27, 30). Ia, a yaco ena so na gauna ni a vakaroti ira na Luvena na Kalou me ra vakatovotovotaka na vakawati vakalewelevu.

Na veiyabaki taumada ni Lotu vakalesui mai e dua tu vei ira na gauna oya. Kevaka o gadreva mo vulica eso tale na ka me baleta na vakawati vakalevu vei ira na Yalododonu taumada, raica na “Mercy Thompson and the Revelation on Marriage” (ena Revelations in Context, 281–93); Yalododonu, 1:290–92, 432–35, 482–92, 502–4; Ulutaga kei na Taro, “Vakawati Vakalewelevu ena Na Lotu i Jisu Karisito ni Yalododonu Edaidai,” Valenivola Vakosipeli; “Na Cava Na Vuna A Gadrevi kina vei Josefa Simici kei Ira Tale Eso mera Vakatovotovotaka na Vakawati Vakalevu?” (vidio), ChurchofJesusChrist.org.

Why was it necessary for Joseph Smith and others to practice polygamy?

A question from the Worldwide Devotional: A Face to Face Event with Elder Cook on September 9, 2018

Vakasama eso ni Nodra Vakatavulici na Gonelalai

Vunau kei na Veiyalayalati 130:2, 18–19; 132:13, 19

E vinakata na Tamada Vakalomalagi meu vakanamata ki na veika tawamudu.

• Na cava e vakavulici keda kina na Vunau kei na Veiyalayalati 132:13 me baleta na veika ni vuravura? De na rawa beka mo dou vakatawana e dua na katonisulu se avisake kei iratou na luvemu ena yaya eso e matataki kina na veika, mai na Vunau kei na Veiyalayalati 130:2, 18–19; 132:19, eda rawa ni kauta vata kei keda ki na bula ka tarava.

Vunau kei na Veiyalayalati 130:20–21;132:5, 21–23

E vakalougatataki au na Kalou niu talairawarawa kina Nona lawa.

• E rairai ni dua na veivakatauvatani rawarawa e rawa ni vakavulici ira na luvemu me baleta na talairawarawa kina ivakaro ni Kalou. Me ivakaraitaki, e rawa nio kerei ira me ra dusimaki iko mo taubale ena dua na vanua, me vaka e dua na koronivuli se vale ni Lotu. Na cava ena yaco ni da sega ni muria na idusidusi? Mo qai wilika na Vunau kei na Veiyalayalati 130:21 ka vakatauvatana na veidusimaki oqo kina ivakaro sa solia vei keda na Kalou.

• Sa rawa talega moni lagata vata e dua na sere me baleta na talairawarawa, me vaka na “Talairawarawa ki na iVunau” (iVolanisere ni Gonelalai, 68), ka vakaraica na vosa ena Vunau kei na Veiyalayalati 130:20–21 kei na 132:5 e tautauvata kei ira ena sere. Na sala cava e vakalougatataki keda kina na Kalou nida segata meda maroroya na Nona ivakaro?

Vunau kei na Veiyalayalati 130:22

Na Tamada Vakalomalagi kei Jisu Karisito e vaka yago tawa mate rawa.

• Ni wiliki oti vata na Vunau kei na Veiyalayalati 130:22 sa rawa mo ni raica vata kei ira na luvemuni e dua na iyaloyalo kei Jisu Karisito ka dusia na Matana, Gusuna, kei na veitiki ni Yagona tale eso. Me ra qai dusia na gone na tiki ni yagodra vata ga. Tukuna vei ira na vuna e bibi kina vei iko mo kila ni yagoda e vaka na irairai ni yagona na Tamada Vakalomalagi kei Jisu.

Ena vuku ni cakacaka vakalotu ni vale ni Turaga, sa rawa ni tawamudu kina na matavuvale.

Vunau kei na Veiyalayalati 132:19

Na Tamada Vakalomalagi e sa vakarautaka me rawa ni tikovata na matavuvale me tawamudu.

• Vukei ira na nomu gone me ra vakasamataka na ivakaraitaki ni veika e sega ni (tu me tawamudu—kakana e dau ca, na senikau ka na malai mai, kei na so tale. Qai raica vata na Vunau kei na Veiyalayalati 132:19 ka raica na veimalanivosa bibi me vaka na “veiyalayalati tawamudu,” kei na “vauci,” ena veigauna tawamudu.” (Raica talega na “Wase 55: E Dua na iVakatakila Baleta na Vakamau,” ena iTalanoa mai na Vuanau kei na Veiyalayalati, 198, se na kena vidio ena Valenivola Vakosipeli.) Sa rawa talega mo raica na iyaloyalo ni nomu matavuvale ka vakadinadinataka ni sa rawata na Turaga, mai na cakacaka vakalotu kei na veiyalayalati ni valetabu, me tawamudu na matavuvale.

Chapter 55: A Revelation about Marriage: July 1843

Mo dau qarauna na kedra ituvaki vakamatavuvale. “O ira na gonelalai nikua era sa voliti tu ena vuqa sara na veimataqali ituvatuva veicurumaki ni matavuvale. … Sa dodonu meda dodoliga yani vei [ira] era dau galili, guilecavi, se tiko ena taudaku ni bai” (Neil L. Andersen,“O Koya sa Vinakati Ira, sa Vinakati Au,” Liaona, Me 2016, 49, 52).

Me baleta na vakasama tale eso, raica na ilavelave ni mekasini ni iTokani ni vula oqo.

E dua na rumu ni veivauci ena Valetabu e Parisi Varanise.