Wase 1
iSoqosoqo ni Veivukei
Na Vakalesui Mai ni Dua na iVakarau Makawa
Ena gauna taucoko ni nona veiqaravi ena bula oqo, sa dau vakaraitaka na iVakabula na nona lomani ira ka kauwaitaki ira na marama. E kaya o Elder James E. Talmage ena Kuoramu ni iApositolo Le Tinikarua, “Na jabeni cecere duadua e vuravura me baleti ira na marama kei na bula vakamarama sai Jisu na Karisito.”1
E vakavulici ira na marama vakailawalawa lelevu, vakatamata yadua, e tolo ni sala kei na baravi, ena ikeliwai kei na nodra veivale, na iVakabula. E vakaraitaka vei ira na loloma kei na yalovinaka ka vakabulai ira kei ira na nodra lewe ni matavuvale. Ena vuqa na italanoa vakaibalebale, e tukuna me baleti ira na marama era vakaitavi ena nodra itavi ga ni veisiga. E vakaraitaka na nona kila vakavinaka tu na itovo ni bula ni marama ka rawata mai na nodra ivakarau ni bula e veisiga na veilesoni cecere vakosipeli. E vosoti ira. E tagi vata kei ira. E yalololoma vei ira ena nodra itutuº vakaluvena yalewa, marama radinivale, dauqaravi vuvale, tina, ka yada. E dau taleitaki ira ka vakamaramataki ira.
Ni sotava sara tu mada ga na mosi vakaiyanaqa ena kauveilatai, e vakaraitaka na iVakabula na nona kauwaitaka na Tinana, ka kena irairai ena gauna ko ya ni sa yada ka gadreva e dua me vakatawai koya.2 Na imatai ni tamata e rairai kina ko Koya ni oti na Nona Tucaketale e dua na marama.3
Tisaipeli Yalewa ena Veiyalayalati Vou
E lailai na ka e kilai rawa me baleta na isoqosoqo ni marama ena Veiyalayalati Vou, ia na ivakadinadina e tukuna ni ra a vakaitavi sara vakabibi na marama ena gauna ni nona veiqaravi vakalotu na iVakabula. Na Veiyalayalati Vou e okati kina na kedra itukutuku na marama, o koya e cavuti na yacana kei koya e sega, ka ra cakacakataka na nodra vakabauti Jisu Karisito, vulica ka bulataka na Nona ivakavuvuli, ka vakadinadinataka na nona cakacaka, cakamana, kei na nona bula vakaturaga. Era qai yaco na marama oqo me ra tisaipeli ivakaraitaki vinaka ka ra ivakadinadina bibi ni cakacaka ni veivakabulai.
Era a lako na marama vata kei Jisu kei iratou na Nona iApositolo Le Tinikarua. Era solia na nodra iyau me vukea na Nona veiqaravi. Ni oti na Nona mate kei na Nona Tucaketale, era sa yaco tiko ga me tisaipeli yalodina na marama. Era sota ka masu vata kei ira na iApositolo. Era solia na nodra veivale me nodra vanua ni vakasoqoni vata na lewe ni Lotu. Era vakaitavi ena yalodina ena cakacaka ni vakabula yalo, vakayago ka vakayalo talega.
Erau ivakaraitaki ni tisaipeli yalewa ena Veiyalayalati Vou o Marica kei na tacina o Meri. Ena Luke 10 e koto kina na itukutuku kei Marica ena nona dolava na nona vale vei Jisu. E qarava na Turaga ena nona sotava na Nona gagadre vakayago, a dabe ko Meri e yavana na iVakavuvuli ka tiloma na Nona ivunau.
Ena dua na itabagauna ka dau namaki walega kina vei ira na marama na veiqaravi ni veika vakayago, e vakavuvulitaka na iVakabula vei rau ko Marica kei Meri ni rawa vei ira na marama me ra vakaitavi talega ena veika vakayalo ni Nona cakacaka. E sureti rau me rau Nona tisaipeli ka vakaivotavota ena veivakabulai, “na ivotavota uasivi cake” ka na sega ni kau tani vei rau.4
Sa yaco me rau vakaitavi vakalevu o Meri kei Marica ena nona veiqaravi ena bula oqo na Turaga. E muri ena Veiyalayalati Vou, eda wilika kina na nona ivakadinadina qaqa o Marica me baleta na nona vakalou na iVakabula. Ena dua na veitalanoa vata kei Jisu, a kaya kina o koya, “Au sa vakadinata ni sa Karisito koi kemuni, na Luve ni Kalou, ko koya sa dodonu me lako mai ki vuravura.”5
E vuqa tale na tisaipeli yalewa era a lako vata kei Jisu kei iratou na Le Tinikarua, era vuli vakayalo mai Vua ka qaravi Koya vakayago. E vola ko Luke:
“Sa oti sa qai lako voli e muri ko koya [Jisu] ena veikoro kecega kei na veikoro lalai kecega, ka vunau, ka tukuna na itukutuku vinaka ni matanitu ni Kalou: kei ira vata kaya na lewe tinikarua,
“Kei na yalewa eso, sa vakabulai oti mai na yalo ca eso ka curumi ira kei na malumalumu, ko Meri sa vakatokai na yalewa ni Makitala, sa lako tani oti vua e vitu na tevoro,
“Kei Joana na wati Kusa na matanivanua nei Eroti, kei Susana, ka lewevuqa tale, era sa qaravi koya ena nodra iyau.”6
E kena irairai ni ra a vakarautaka na marama oqo eso na veivuke vakailavo vei Jisu kei iratou na Nona iApositolo, kei na veiqaravi eso me vaka na vakasaqa. Me ikuri ni nodra ciqoma na nona veiqaravi vakalotu o Jisu—na itukutuku vinaka ni Nona kosipeli kei na veivakalougatataki ni Nona kaukauwa veivakabulai—era qaravi Koya na marama oqo ena nodra solia na nodra iyau kei na yalodra dina.
A vola ko Paula me baleti ira na marama era a veiqaravi vei ira na Yalododonu ena vuku ni nodra itutu vaka-Lotu kei na nodra dui vakatulewa ga vakataki ira. Na nona ivakamacala me baleta e dua na yada buladodonu e tukuna na ivakarau ni nodra bula e vuqa na marama ena Lotu taumada: “Me rogo ena vuku ni ivalavala vinaka; kevaka sa qaravi ira na gone kevaka sa dau vakacegui ira na vulagi, kevaka sa vuya na yavadra era sa lotu, kevaka sa vukei ira era sa vakararawataki, kevaka sa gumatua ni dau cakava na cakacaka vinaka kecega.”7 A vola talega o Paula na nodra veivakauqeti na kena marama matua ka kila ka vakalevu cake. A vakasalataki Taito me vakauqeti ira na kena marama me ra veiqaravi ka vakavulici ira na marama gone me baleta na nodra itavi tawamudu vakamarama radinivale ka tina, “me ra vakavulici ira na marama gone me ra rakorako, me ra dau lomani ira na watidra, me ra lomana na luvedra.”8
Na ivola ni Cakacaka e oka kina e dua na tukutuku ni dua na marama ka a bulataka na ivakarau ni ivalavala dodonu a vakamacalataka o Paula. O Tapaica ka dau vakatokai talega me o Tokasa, a vakaitikotiko voli mai Jopa, ka dau cakaisulu kina me baleti ira na marama era vakaleqai tu.
“A sa tiko mai Jopa e dua sa lotu ko Tapaica na yacana, a kena ibalebale ko Tokasa: sa dauoga sara na yalewa oqo ena cakacaka vinaka, kei na cakacaka loloma sa kitaka tiko.
“A sa yaco ena gauna ko ya sa tauvimate ko koya ka ciba. …
“Ia ni sa veivolekati ko Jopa kei Lita, ka ra sa rogoca ko ira sa lotu ni sa tiko kina ko Pita, era sa tala e lewe rua na tamata vei koya, me masuta me lako vakatotolo sara mai vei ira.
“Sa qai ia ko Pita ka lako vata kei rau. Ia ni sa tadu ko koya, … a sa tu voleka vua ko ira na yada kecega era sa tagi, ka vakatakila na icurucuru eso kei na isulu ka cula ko Tokasa, ni sa bula vata kei ira.
“A sa vakatalai ira kece yani ko Pita, ka tekiduru ka masu; ka sa vuki vaka ki na yago ka kaya, Tapaica tu cake. A sa cereka na matana: ia ni sa kunei Pita, sa qai duri cake ko koya.”9
E tukuni ena Veiyalayalati Vou eso tale na marama yalodina. Ko Pirisila kei na watina o Akuila, erau sega ni kauwaitaka na nodrau bula ena vukudra na iApositolo ka solia na nodrau vale me ia kina na soqoni ni Lotu.10 E vola kina o Paula, “Sa loloma vakalevu yani vei kemudou o Akuila kei Pirisila ena Turaga, kei ira na isoqosoqo lewe ni lotu ena nodrau vale.”11
E dua na marama na yacana ko Meri “sa daucakacaka vakalevu” ena vukudra na iApositolo.12 E dua na marama na yacana ko Litia a papitaiso kei ira na lewe ni nona vale ka qai veiqaravi ena vukudra era a vakavulici koya.13
E dua na marama na yacana ko Fipi e kena irairai ni a vakaitutu ni veiqaravi ena nona ivavakoso. E kaya o Paula, “Ia kau sa tataunaki Fipi yani vei kemudou o koya na wekada, o koya sa dauqarava na isoqosoqo lewe ni lotu … mo dou vakacegui koya kina ena vuku ni Turaga, me vaka sa kilikili kei ira era sa lotu, ka mo dou vukei koya ena cakacaka kecega dou na yaga kina vua: ni sa dau vukei ira na lewevuqa ko koya.”14 Na mataqali veiqaravi a solia o Fipi kei ira tale eso na marama cecere ena Veiyalayalati Vou sa tomani tiko nikua mai vei ira na lewe ni iSoqosoqo ni Veivukei—o ira na veiliutaki, dausiko vuvale, tina, kei na so tale—ka ra dauveiqaravi, se dauveivukei, vei ira e vuqa.
Tisaipeli Yalewa Edaidai
O ira na marama ena Lotu makawa era marama dokai ka vakaturaga, gadrevi ka yaga vakalevu. Era veiqaravi vei ira na tani, era tubu cake ena nodra savasava yadua, ka ra vakaitavi ena cakacaka cecere ni vakabula yalo.
Na ivakarau eso oqo sa vakalesui mai ena gauna oqo ena kena tauyavu na iSoqosoqo ni Veivukei. A kaya kina na Parofita o Josefa Simici, “A sega mada ni taucoko sara na tauyavu ni Lotu me yacova na gauna era sa qai tauyavu kina na marama.”15 A tokaruataka na ivakavuvuli oqo o Sisita Eliza R. Snow, na ikarua ni peresitedi raraba ni iSoqosoqo ni Veivukei. E kaya kina: “E dina beka ni rogorogo vou na yacana, na isoqosoqo e se tekivutaki ena gauna makawa sara. E tukuna vei keda na noda parofita ka a vakamatei ena vuku ni nona vakabauta ni isoqosoqo vata ga qo a dau tu ena lotu ni gauna makawa.”16
Era sa vakadinadinataka na veiparofita tale eso ni gauna oqo, sega ni oka kina o Josefa Simici, ni kena tauyavu na iSoqosoqo ni Veivukei e dua na tiki vakauqeti ni Veivakalesui Mai, ka ra kacivi kina na marama ena Lotu ki na veitutu vakalotu me ra veiqaravi vakataki ira ka vakalougatataka na Lotu raraba. E kaya o Peresitedi Joseph F. Smith, na ikaono ni Peresitedi ni Lotu, “Na isoqosoqo oqo e ibulibuli vakalou, vakadonui vakalou, tauyavu vakalou, ka tabaki vakalou mai vua na Kalou me qarava na nodra vakabulai na yalo ni yalewa kei na yalo ni tagane.”17 E kaya vaqo o Peresitedi Lorenzo Snow, na ikalima ni Peresitedi ni Lotu, vei ira e dua na ilawalawa marama ena iSoqosoqo ni Veivukei: “Ko ni sa dau tu ga e yasadra na Matabete, ka vakarau tu mo ni vaqaqacotaka na ligadra ka qarava na nomuni itavi ni veivuke ena kena tosoi ki liu na matanitu ni Kalou; ia me vaka ni ko ni sa vakaitavi ena cakacaka oqori, ko ni na vakaivotavota talega vakakina ena kena qaqa kei na bula vakacerecerei kei na lagilagi ka na solia na Turaga vei ira na Luvena yalodina.”18
Ni ra vakaitavi na marama ena iSoqosoqo ni Veivukei, era sa veiqaravi tiko vakatisaipeli yalodina i Jisu Karisito ena cakacaka ni veivakabulai. Me vakataki ira na marama ena Lotu makawa, era cakacaka tikivi ira na tagane ena matabete me vakalevutaki na vakabauta kei na buladodonu ni tamata yadua, vaqaqacotaka na matavuvale kei na vuvale, ka vakasaqarai ira ka vukei ira era vakaleqai tu. E vakavuvulitaka o Sisita Julie B. Beck, na ikatinikalima ni peresitedi raraba ni iSoqosoqo ni Veivukei: “Ena iSoqosoqo ni Veivukei eda vakatovotovotaka kina na bula vakatisaipeli i Karisito. Eda vulica na veika e vinakata o Koya me da vulica, ka da cakava na veika e vinakata o Koya me da cakava, ka da yaco me vaka na ka e vinakata o Koya me da vaka.”19
“A sa kauti [Jisu] ki na nona vale e dua na yalewa na yacana ko Marica.” Sa dua na tacina na yacana ko Meri “sa tiko talega ena yavai Jisu, ka rogoca na nona vosa” (Luke 10:38 39).
Ena gauna taucoko ni nona veiqaravi ena bula oqo, sa dau vakaraitaka na iVakabula na nona lomani ira ka kauwaitaki ira na marama.
Ko Tapaica “sa dau oga ena cakacaka vinaka kei na cakacaka loloma” (Cakacaka 9:36).