iTukutuku Taumada

Na iTukutuku mai na Mataveiliutaki Taumada

Kemuni na Marama:

Ni raici ena vakavinavinaka na veivakalougatataki ni iSoqosoqo ni Veivukei ena nodra bula na lewe ni Lotu, keitou sa veidusimaki kina ena kena vakarautaki na Luvequ Yalewa ena Noqu Matanitu: Na iTukutuku kei na Cakacaka ni iSoqosoqo ni Veivukei. Keitou masuta me na yaco me veivakalougatataki vei kemuni vakakina vei ira o ni na tara na nodra bula na ivola oqo.

Keitou vakaraitaka na neitou iloloma kei na neitou qoroi kemuni ka keitou kila ni sai kemuni na luvena yalewa lomani na Tamada Vakalomalagi ka nona tisaipeli yalodina na Turaga ko Jisu Karisito. O ni tiki ni dua na veitacini marama e vuravura raraba. Ko ni dusimaki mai na nomuni ibole, “Sa Sega ni Mudu na Loloma,” o ni veivuke ena kena vaqaqacotaki na veimatavuvale ka tarai cake na matanitu ni Kalou e vuravura.

Keitou vakayaloqaqataki kemuni mo ni vulica na ivola oqo ka laiva na kena dina tawayalani kei na kena ivakaraitaki veivakauqeti me tara na nomuni bula.

Keitou vakadinadinataka ni sa vakalesuya mai na Turaga na taucoko ni kosipeli mai vua na Parofita ko Josefa Simici ka ni sa dua na tiki bibi ni veivakalesui mai oqori na iSoqosoqo ni Veivukei. Sa dua na nodra iyau talei na marama ena iSoqosoqo ni Veivukei. Keitou masuta me na dua na ivurevure uasivi ni kena maroroi na iyau oqori na ivola oqo.

Na Mataveiliutaki Taumada