Wase 10

“Bula ki na Nomu Dodonu”

Ena dua na nodra soqoni taumada na iSoqosoqo ni Veivukei ni Marama e Nauvoo, a vakauqeti ira kina na marama o Josefa Simici me ra “bula ki na [nodra] dodonu.”¹ Ni kena yavu na veivakayaloqaqataki oqori, era sa vakavulici na marama ena Lotu i Jisu Karisito ni Yalododonu Edaidai me ra bula ki na nodra icavacava vakalou ena nodra vakataucokotaka na inaki ni Kalou ena vukudra. Ni sa yaco me ra kila se o cei dina o ira—na luvena yalewa na Kalou, kei na kaukauwa era sucu vata mai me ra dau loloma ka dauveisusu—era sa yacova kina na kedra icavacava vakamarama savasava. Ni tu e yalodra na loloma cecere, era sa vakataucokotaka kina na inaki ni iSoqosoqo ni Veivukei: me vakalevutaki cake na vakabauta kei na buladodonu yadua, vaqaqacotaki na matavuvale kei na vuvale, ka vakasaqarai ira ka vukei ira era vakaleqai tu.

Ni tauyavutaki me dua na tiki bibi ni Veivakalesui mai, sa dau vukei ira na marama Yalododonu Edaidai na iSoqosoqo ni Veivukei me ra bula ki na nodra dodonu. Mai na isoqosoqo oqo, era sa ciqoma kina na marama e dua na raivotu kei na veivakadeitaki ni kedra ivakatakilakila ni ra luvena yalewa na Kalou. Era sa ciqoma talega na madigi ni veiqaravi kei na idusidusi kei na veivakadonui era gadreva me ra vakataucokotaka kina na itavi eso oqori.

Luvena yalewa na Kalou

E vakavuvulitaka o Josefa Simici vei ira na marama ena iSoqosoqo ni Veivukei na kedra ituvaki vakamarama ni ra luvena yalewa na Kalou, ka vukei ira me ra kila ni lomani ira na Kalou ka tu na inaki cecere me ra vakataucokotaka. E yaga sara vakalevu na nodra itavi na marama ena Lotu ena nona ituvatuva ni veivakabulai na Tamada Vakalomalagi—e tautauvata na kena bibi kei na nodra itavi na tagane e tu vei ira na matabete. Na Turaga sa vakalougatataki ira na yalewa ena gagadre era sucu vata mai me ra veiqaravi ka veivakalougatataki vei ira na tani, ka sa nuitaki ira ena dua na itavi tabu me ra vakayagataka na nodra isolisoli me ra veivuke ena nodra vakabulai na Luvena.

Ena so na gauna era dau guilecava na yalewa na nodra itutu vakamarama ka ra soli ira ki na veivagolei tani kei na veitemaki ni vuravura. Ena nodratou leqataka tiko na ivalavala oqori, eratou vakila kina o Sisita Mary Ellen Smoot, na ikatinikatolu ni peresitedi raraba ni iSoqosoqo ni Veivukei, kei rau na nona daunivakasala o Sisita Virginia U. Jensen kei Sheri L. Dew, me ra vukei na yalewa ena Lotu me ra nanuma tiko na kedra ivakatakilakila. Ena dua na soqoni raraba ni iSoqosoqo ni Veivukei, era vakaraitaka kina na kena ibalebale na luvena yalewa na Kalou:

“Oi keimami na luvena yalewa lomani vakayalo na Kalou, ka vakaibalebale, vakainaki, ka muadonu tu na neimami bula. Ni keimami dua na veitacini marama e vuravura raraba, keimami duavata ena neimami yalodina vei Jisu Karisito, na neimami iVakabula ka iVakaraitaki. O keimami na marama vakabauta, ivalavala dodonu, raiyawa, ka dauloloma cecere ka keimami:

“Vakalevutaka cake na neimami ivakadinadina me baleti Jisu Karisito ena masu kei na vuli ivolanikalou.

“Vakasaqara na igu vakayalo ena neimami muria na veivakauqeti ni Yalo Tabu.

“Yalataki keimami ki na vaqaqacotaki ni bula vakawati, na matavuvale, kei na vuvale.

“Kunea na bula dokai vakamarama ena bula vakatina ka kune marau ena bula vakayalewa.

“Kune marau ena veiqaravi kei na caka vinaka.

“Taleitaka na bula kei na vuli.

“Tutaka na dina kei na buladodonu.

“Tokona na matebete ni veivakadonui ni Kalou e vuravura.

“Reki ena veivakalougatataki ni valetabu, kila na noda icavacava vakalou, ka segata na bula vakacerecerei.”²

Era sa vakananuma tale tiko ga vei ira na marama o ira na veiliutaki ni matabete me baleta na kedra ituvaki vakalou kei na nodra itavi tabu. E kaya kina o Elder M. Russell Ballard ena Kuoramu ni iApositolo Le Tinikarua: “Keimami vakabauta ka vakanuinui ena nomuni vinaka kei na nomuni igu, na nomuni dau taleitaka na ivalavala dodonu kei na yalodoudou, na nomuni yalovinaka kei na yaloqaqa, na nomuni igu kei na nomuni dau cariba lesu mai. Keimami vakabauta na nomuni itavi vakayalewa ni Kalou. … Keimami vakabauta ni na sega ni rawata na Lotu na veika e dodonu me rawata kevaka e sega na nomuni vakabauta kei na yalodina, na itovo o ni sucu kaya mai ena kena vakaliuci na nodra gagadre na tani mai na nomuni o kemuni, kei na nomuni igu vakayalo kei na nomuni tudei. Ka keimami vakabauta ni nona ituvatuva na Kalou sai koya mo ni yaco mo ni ranadi ka ciqoma na veivakalougatataki cecere duadua e rawa ni rawata e dua na marama ena gauna oqo se na gauna tawamudu.”³

Ni ra bula na marama ki na nodra dodonu kei na nodra icavacava ni ra luvena yalewa na Kalou, era sa vakarautaki ira kina ki na veivakalougatataki ni bula tawamudu. Oqo na na vanua lagilagi sa vakarautaka tu na Kalou me baleti ira na Luvena yalewa yalodina.

Na Loloma Cecere Dina, na iSolisoli mai na Yalo ki na Yalo

E vakavuvulitaka na Parofita o Josefa Simici, “O ira na marama era sucu vata mai kei na yalo ni loloma cecere.” Ena tauyavu ni iSoqosoqo ni Veivukei a tukuna kina vei ira na marama, “O ni sa koto kina oqo ena dua na itutu mo ni rawa kina ni veiqaravi me vaka na yalo ni loloma sa teivaka tu e lomamuni na Kalou.”⁴ Me seraka mai yalodra na loloma cecere dina, sa dodonu me ra wakia vata na marama na yalololoma sa tu rawa e lomadra kei na vakabauti Jisu Karisito kei na Nona Veisorovaki. E vakamacalataka o Peresitedi Henry B. Eyring, e dua na daunivakasala ena Mataveiliutaki Taumada, ni loloma cecere dina sai koya na nodra isolisoli na iSoqosoqo ni Veivukei:

“Au na tukuna vei kemuni … me baleta na isolisoli cecere era sa solia mai vei kemuni o ira era sa liu vei kemuni ena iSoqosoqo ni Veivukei. Na tikina … e vaka ni bibi duadua ka na ia tikoga oya ni loloma cecere e koto ena uto ni isoqosoqo ka dodonu me lako mai ki yaloda, me tiki sara ga ni noda bula, na lewena yadua. Na ibalebale ni loloma cecere vei ira, e sivia sara na yalo ni veiqaravi wale. Na loloma cecere e vu mai na vakabauta na Turaga o Jisu Karisito ni sa cakacaka ena yalodra na lewena na revurevu ni Nona Veisorovaki. …

Mai vei Peresitedi Henry B. Eyring — Henry B. Eyring

“Na isoqosoqo oqo era lewena na marama ka basika mai na nodra yalo ni loloma cecere ena kena sa veisautaki na yalodra ni sa ganiti ira ka ra dau rokova na veiyalayalati e soli duadua ga ena nona Lotu dina na Turaga. Na yalo ni nodra loloma cecere e lako mai Vua ena Nona Veisorovaki. E dusimaki mai na Nona ivakaraitaki na nodra ivalavala ni loloma cecere—ka vu mai na nodra vakavinavinaka ena Nona isolisoli tawavakaiyalayala ni loloma veivueti—kei na nona Yalo Tabu, sa tala mai ko Koya me sala vata kei ira na Nona italai ena nodra cakacaka ni loloma veivueti.”⁵

Na isolisoli oqo ni loloma cecere e tekivu vei ira na marama mai Nauvoo, ka ra a vakaitavi ena veicakacaka tuvalaki ni loloma cecere ka ciqoma na veiyalayalati ni valetabu. A laki tomani e Winter Quarters kei na lakolako dredre ki na Bucabuca ni Salt Lake. A tokoni ira voli na yalewa Yalododonu Edaidai ena nodra tawavanua ena veitikotiko eso, nodra vosota na veivakacacani vakapolitiki kei na ivalu levu, kei na nodra yalonuinui tikoga ena gauna ni leqa vakailavo. Sa vakauqeta na loloma yalovinaka e vale kei na veisasaga ni veivuke e vuravura raraba. Sa vakauqeti ira na marama ena iSoqosoqo ni Veivukei ena nodra veiqaravi voli ena veivalenibula kei na nodra veivuke ena veivakubeci, maroroi witi, veivuke raraba vakatamata, kei na welefea. Sa dau vakauqeti ira tikoga na marama ena iSoqosoqo ni Veivukei nikua ni ra vakasoqoni vata me ra veivakavulici ka veiqaravi vei ira vakataki ira ka vakakina ena nodra veivaqaqacotaki ka veivakatawani yadua ena dua na gauna, na loloma savasava i Karisito.

Sa yaco me ra tiki ni isolisoli oqo ni loloma na yalewa Yalododonu Edaidai yadua ka sa nodra itavi ka nodra galala me ra wasea na isolisoli oqori vei ira tale eso.

E vakaraitaki ena itukutuku ni dua na matavuvale na kena a veisolitaki mai vei tina vua na luvena yalewa ena veitabatamata na iyau ni iSoqosoqo ni Veivukei. Na goneyalewa yadua era sa taura na ibole ni iSoqosoqo ni Veivukei, “Sa sega ni mudu na loloma.”

A tekivu na isolisoli vei Elizabeth Haven Barlow, ka a curu ki na Lotu ena 1837. A yaco me lewena o Elizabeth na iSoqosoqo ni Veivukei ni Marama e Nauvoo ena ika 28 ni Epereli, 1842, ka rogoca na nona vakavulica voli na Parofita o Josefa Simici na yavu ivakavuvuli ni iSoqosoqo. Na veivakavuvuli oqo a tokoni koya voli ena dua na bula ka oka kina na nodra veivakacacani na ilawalawa dauvakacaca, buketetaka voli e dua na gone ena ilakolako ki na Bucabuca ni Salt Lake, ka qarava tiko e dua na matavuvale gone ni lako tu ena kaulotu na watina. A veiqaravi vakaperesitedi ni iSoqosoqo ni Veivukei mai Bountiful e Utah, mai na 1857 ki na 1888, tolu na yabaki mai na gauna qai mate kina ni yabaki 81 voli.

Qai tomani na italanoa vua na luvena yalewa o Pamela Barlow Thompson. Rau a kacivi o Pamela kei na watina me rau tawavanua e Panaca mai Nevada, a yaco me peresitedi ni iSoqosoqo ni Veivukei mai kea. A vakavulica vei ira na marama na maqosa eso ni qaravi vuvale, oka kina na ivakarau ni kena vakayagataki e dua na misini vakasakiti: na misini ni culacula. Ni ratou vakaitikotiko voli mai Nevada, a vakamatei kina na watina. Eratou qai toki kina na nona matavuvale levu ki Bountiful e Utah, na vanua a laki kacivi tale kina me veiqaravi ena dua na mataveiliutaki ni iSoqosoqo ni Veivukei.

A vakadewa na isolisoli oqo o Pamela vua na luvena yalewa o Theresa Thompson Call. Ni oti ga na nona vakamau o Theresa, erau sa toki sara kei watina ki Mexico. Ena dua na iwase levu ni nona bula, a veiqaravi voli kina ena dua ga na gauna vakaperesitedi ni iSoqosoqo ni Veivukei ka daunivakasala ena mataveiliutakli ni Lalai. A dau kilai vinaka o koya ena nona veiqaravi ni yalololoma, ena nona dau kau kakana vei ira na vakaleqai tu. Sa dau nona ivakarau me dau kauta na keke vei ira na nona itokani qase ena nodra siganisucu. Ena dua na gauna vakaoqori, a guilecava na nona siganisucu e dua na nona itokani me yacova ni sa gauna ni vakayakavi. Ni sa dinata tu na ivakavuvuli ni sa “sega ni mudu na loloma,” a waqaca tale na sitovu ka ulia e dua na keke. Ni yaco yani ki katuba ena bogilevu ko ya, a sorova na tagi na marama oqo ka kaya, “Au waraki iko tiko ena bogi taucoko nikua, ka sa vakarau sara toka ga meu nanuma ni o sa guilecavi au.”

E dau taleitaka talega na iSoqosoqo ni Veivukei na luvena yalewa o Athelia Call Sears. Sa dau kusa me vakaotiva na nona yayani ena veimataka ni Tusiti me rawa ni tiko kina ena soqoni ni iSoqosoqo ni Veivukei ena kena yakavi. Ni yabaki 70 vakacaca, a kacivi me veiqaravi vakaperesitedi ni iSoqosoqo ni Veivukei ena dua na tabanalevu. Ena gauna oya a dau gadrevi me da kumuni ilavo me baleta na iyaya kei na itaviqaravi, a liutaki ira na marama ena iSoqosoqo ni Veivukei me kumuni na ilavo me voli kina na iyaya ni valenikuro ni valenilotu, kei na $1,000 tale na dola me vakayagataka na bisopi me baleta na veika tale eso e gadrevi ena tabanalevu.

A kacivi o Athelia Sears Tanner na luvei Sisita Sears yalewa, ni se tina gone, me peresitedi ni iSoqosoqo ni Veivukei ni dua na tabanalevu. E vuqa na nona veiqaravi ni yalololoma sai koya me dau qaravi ira ka kauta na kedra na tinani gone vou. E dua e tu vua na taledi vakaqasenivuli kei na ivakadinadina tudei kei Jisu Karisito, a susugi ira cake na luvena e lewe 13 ka qaravi ira talega na tani ka vakabula yalo ena veitaba ni veiqaravi eso ena iSoqosoqo ni Veivukei ena nona bula taucoko.

Sa tomani tiko ena matavuvale oqo na isolisoli ni loloma cecere. O ira kece na luvei Sisita Tanner yalewa era sa veiqaravi ena yalodina ena iSoqosoqo ni Veivukei, kei ira na makubuna yalewa era sa muria na ivakaraitaki nei tinadra.⁶

Na veiqaravi ena loloma cecere sa noda isolisoli vakayalo na lewe kece sara ni iSoqosoqo ni Veivukei. Me vaka e vakamacalataka o Peresitedi Eyring: “O sa vakadewataka tiko yani na iyau ena nomu vukei ira tale eso me ra ciqoma na isolisoli ni loloma cecere e yalodra. Ena qai rawa vei ira me ra vakadewataka yani vei ira tale eso. Na itukutuku ni iSoqosoqo ni Veivukei e volai tu ena vosa kei na iwiliwili, ia na iyau e vakadewataki mai na yalo ki na yalo.”⁷

“Noqu Gauna ni Veiqaravi”

Ni oti na nona raica lesu e vuqa na ivakaraitaki ni tamata cecere na nodra vakabauta, e kaya na iApositolo o Paula, “Ni sa vakavolivoliti keda talega e lewe vuqa e vaka na o era sa vakaraici keda, me da biuta laivi tu na ka bibi kece kei na ivalavala ca eda sa tao rawarawa kina, ka me da ciciva tikoga na cere sa tu e matada, ka me da vakaraici Jisu o koya sa vakatekivuna ena sauma talega na noda vakabauta.”⁸

Era sa vakavolivoliti tu na yalewa ena Lotu mai vei ira e lewevuqa na ivakadinadina, oka kina na “Tinada lagilagi o Ivi” kei na “vuqa na luvena yalewa yalodina era sa bula ena veitabayabaki ka dau sokalou vua na Kalou dina ka bula.”⁹ O ira na luvena yalodina na Kalou era bula ki na nodra dodonu ena nodra muria na we ni yavadra na ivakadinadina oqo, ka biuta vakatikitiki na leqa kei na veitemaki ka dau vakataotaki ira ka ciciva na cere sa vakarautaka e matadra na Turaga.

Na veitabatamata kece era tu kina na yalewa vakaturaga, dauloloma cecere, yalodina ka savasava. E dina ni na vica wale vei ira na marama oqo ena volai na yacadra ena itukutuku, e kilai ira vakavinaka tu na Tamadra Vakalomalagi. Ia oqo, me vaka e tukuna o Eliza R. Snow, sai koya na ka e bibi duadua: “E vuqa vei ira na marama e sega ni kilai ena taudaku ni nodra itikotiko na nodra cakacaka ka rairai sega talega ni dau taleitaki kina, ia na cava na kena duidui? Kevaka sa ciqoma na Kalou na nomu cakacaka, se vakacava na kena rawarawa na nomu itavi, kevaka sa qaravi ena yalodina, mo kakua sara ni yalolailai kina.”¹⁰

Na italanoa oqo e dua vei ira na ivakaraitaki sega ni wili rawa ni nodra veivakauqeti na marama yalodina ena iSoqosoqo ni Veivukei. Ena italanoa oqo, e vica na yalewa era tara na nona bula e dua na goneyalewa na yacana o Lynne. Ni dau raica voli o Lynne na nodra dau veiqaravi na marama oqo, sa mani nanuma kina me na dau vakayacora vakakina ni sa yacova yani na iSoqosoqo ni Veivukei.

Ni tiko na yabaki nei Lynne ena mua ni tinivakacaca, erau a kila kei tinana ni a mavoa vakaca sara na tamana vakube ena dua na siti vakayawa toka. Erau a vodo waqavuka yani vakatotolo me rau laki sikovi koya, ia a mate ni bera ni rau yacovi koya yani. A qai tukuna e muri o Lynne na veika a yaco ena nodrau lesu mai ki vale:

“Ni keirau siro sobu mai kei tinaqu ena ikabakaba ni waqavuka ena oca kei na mosi ni yalo, erau lako yani e dua na tagane kei na dua na yalewa ka rau duri tu yani ena ikelekele ni waqavuka ka mokoti keirau. Oqori oi rau na peresitedi ni tabana kei na peresitedi ni iSoqosoqo ni Veivukei. …

“A veilecayaki vakalevu na veisiga oqori ena neirau segata vakaukauwa me keirau ciqoma ni sa mate na [tamaqu vakacabecabe]. … Ia e dau toka voli ga e kea e dua na marama, dau wawa voli ga—me tauri itukutuku, me dolava na katuba, me taura na ligai keirau ni keirau qiri vei ira na neirau matavuvale kei ira na itokani. Era a tu me ra veivuke ena neirau vakasosolo, me ra cakava na veika kece e dodonu me caka.

“Ena loma ni gauna kece oqori, sa tekivu me cadra cake mai vei au e dua na yalo ni vakavinavinaka kau sega ni vakasamataka rawa na sala e rawa niu sauma lesu kina vei ira na marama daulomani oqori. Au tovolea vakaukauwa meu vakasamataka e dua na sala, ia sa guce na vakasama ni sa levu na oca.”

Ena vica vata na yabaki e muri, ni sa vakawati o Lynne ka tolu na luvena, a kacivi me veiqaravi ena dua na mataveiliutaki ni iSoqosoqo ni Veivukei. Ena so na gauna e dau vakataroga kevaka e rawa ni sotava na gagadre kece ni nona veikacivi. Ia a qai nanuma na veiqaravi a vakayacori vua ena gauna e mate kina na tamana vakacabecabe. “Oqo,” e vakasamataka, “na noqu gauna.” A wasea na veika oqo:

“Sa mate na luvena yalewa yabaki tinikava e dua na marama ena tabanalevu. A kerei au o tinana meu volia e dua na ivinivo balavu totoka me daramaki ena yagona na luvena ni vakarau me laki bulu. A rawa niu cakava—kau raica ni dua na ka vakaciriloloma. Sa noqu gauna ni veiqaravi, me vaka ni ra a qaravi au na [marama tale eso].

“A gunuva vakasivia e dua na kena marama ena tabanalevu na mena wainimate ka koto kina e na dua na ituvaki ca sara me tolu na siga. Keirau a raici koya kei na daunivakasala tale kadua ni se bula tiko ena nona vale ka vakasavasavataki koya ni bera ni yaco mai na lori ni valenibula. Keirau qai tiko mai me masia na nona vale—lalaga kei na vuloa—ena wainimate ni sasamaki. Na noqu gauna tale.

“E dua na tina gone ena tabanalevu, e dua na noqu itokani, a yali vakasauri na luvena e duabau ga, e dua na goneyalewa totoka yabaki tolu, ena dua na mate ka a kauta na nona bula ni ra se sega mada ga ni kila na vuniwai na bibi ni kena mate. Keirau a lako ki na nodratou vale kei na daunivakasala tale kadua ena gauna vata ga keirau rogoca kina na mate nei Robin lailai. Ni keirau volekata yani na katuba lawalawa ena varada, keirau rogoca na tamana (ka se bera ni lewe ni Lotu) ni vosa tagitagi tiko vei tinana ka tu sara vakayawa. Ni rai cake, e raici keirau ka, ni se tagi tikoga, a vosa ena talevoni: ‘Ena sega ni dua na leqa, Na. Era sa tu oqo na yalewa ni Momani.’ Baci noqu gauna tale.”

A qai tukuna e muri o Lynne ni ra dau tarogi koya na tamata ena nona nanuma me baleta na iSoqosoqo ni Veivukei, e dau tukuna vei ira na veika a sotava ena ciqomi kei na soli ni veiqaravi. E kaya o koya: “Oqori na noqu nanuma me baleta na iSoqosoqo ni Veivukei vakatitobu sara e yaloqu. Kei na vuna.”¹¹

E tautauvata na veika era nanuma na yalewa ena iSoqosoqo ni Veivukei e vuravura raraba, “vakatitobu sara e yalodra.” Me vakataki Lynne, sa yaga vakalevu vei ira na veiqaravi mai na iSoqosoqo ni Veivukei, ka ra kila ni sa nodra gauna oqo me ra veiqaravi ena loloma cecere kei na vakabauta. Era solia na veiqaravi oqo ena veitutu duidui—ni ra goneyalewa, yalewa vakawati, tina, tacidra, nei, dusiko vuvale, veiliutaki ni iSoqosoqo ni Veivukei, tiko veivolekati, ka itokani. Eso na nodra veiqaravi e dau yaco ena nodra lako ena ilesilesi mai vei ira na veiliutaki ena Lotu, ka so na nodra veiqaravi e dau yaco ena nodra rogoca na veivakauqeti malumu ni Yalo Tabu. Ni ra raica ni ra sa “vakavolivoliti talega [vei ira] e lewevuqa e vaka na o,” era sa vakarau kina me ra “ciciva ena vosota na cere sa tu e matadra.”

“Liutaka na Vuravura … ena Veika Kecega e Yaga me Vakacaucautaki”

O Peresitedi Joseph F. Smith, na ikaono ni Peresitedi ni Lotu, e vakauqeti ira na marama Yalododonu Edaidai me ra “liutaka na vuravura ia me ra liutaki ira vakauasivi cake na marama e vuravura, ena veika kecega e yaga me vakacaucautaki, na veika kecega e va-Kalou, na veika kecega e veilaveti kei na ka e veivakasavasavataki.” E kaya o koya, “O ni sa kacivi mai na domona na Parofita ni Kalou mo ni cakava, mo ni kena iveta sara e cake, mo ni cecere ka vinaka duadua, mo ni savasava duadua ka yalodina duadua ki na dodonu.”¹²

Ena itabagauna taucoko ni itukutuku ni Lotu vakalesuimai ni Turaga, era sa bulataka tiko na tisaipeli yalewa nei Karisito na ivakatagedegede oqo. Me vakataki Esiteri, era sa dau yalodina ka yaloqaqa tu ena gauna ni veibolebole dredre. Sa vakainaki na nodra bula, me vaka a vakayacora o Esiteri ena gauna e tarogi koya kina na tavalena ko Moatekai, “Ko cei e kila de ko sa yaco beka mo ranadi ena vuku ni gauna oqo?”¹³ Me vakataki Niemaia ena Veiyalayalati Makawa, era sega ni vagolei tani mai na nodra itavi tabu. Ni ra tovolea na meca nei Niemaia me ra temaki koya tani mai na nona itavi me tara tale na bai kei Jerusalemi, a sauma vaqo o koya, “Au sa kitaka tiko e dua na cakacaka levu, au sa dredre kina ni lako sobu: me mudu me icavai na cakacaka niu sa biuta ka lako sobu vei kemudrau?”¹⁴ Era temaki koya tikoga na nona meca, ia a kaukauwa ka tudei tiko ga ena nona cakacaka bibi. Sa dau tovolea na vuravura me vakayarayarataki ira na marama me ra biuta tu na nodra itavi e solia na Kalou, ia era sega ni dau “lako sobu” na marama yalodina ena iSoqosoqo ni Veivukei.

Na ivakaro me ra liu ena veika kecega e yaga me vakacaucautaki, va-Kalou, veilaveti, ka veivakasavasavataki e dredre toka. Sa dau vaka tu ga kina. Ia era sega ni tu duadua na marama ena iSoqosoqo ni Veivukei ena nodra ciqoma na ivakaro oqo. Era tiki ni dua na isoqosoqo cecere, ka tauyavutaki ena veivakadonui ni matabete qai vaqaqacotaki ena ivakavuvuli kei na nodra veivakaroti na parofita. O ira na luvena yalewa daulomani na Kalou ka tu na nodra itavi tabu. Era nona tamata ni veiyalayalati na Lami, “era sa vakaiyaragi ena yalododonu kei na lagilagi ni nona kaukauwa na Kalou.”¹⁵ Ni ra duavata kei ira tale eso na Yalododonu yalodina ka vuli mai na nodra ivakaraitaki o ira era sa liu yani, e rawa ni ra qaqa ena veibolebole ni bula oqo. E rawa ni ra veivuke me tarai na matanitu ni Kalou e vuravura raraba kei na loma ni nodra vuvale. E rawa ni ra kaya, “Sa neimami gauna oqo—neimami gauna ni veiqaravi ka vola e dua na iwase vou ena veidraunipepa ni itukutuku ni iSoqosoqo ni Veivukei.” Ni vakadeitaki vei ira na nona loloma na Tamada Vakalomalagi kei na ivakadinadina me baleta na kaukauwa ni Veisorovaki i Jisu Karisito, era tubu sivita kina na veivakasama kei na sasaga wale ka ra tiki ni “dua na ka matalia.”¹⁶

E dei tu na yalayala ni Turaga ni ra muria na marama na ivakasala a solia vua na imatai ni peresitedi ni iSoqosoqo ni Veivukei: “Au sa kaya vakaidina vei iko, ko ira kecega sa vakabauta na noqu ivakavuvuli, era sa yaco me luvequ ena noqu matanitu. … Mo kakua ni domona na iyau vakavuravura, ia mo vakasaqara na iyau e uasivi sara. … Mo nanuma tiko na veiyalayalati ko sa cakava.”¹⁷ Ni tukuna na Parofita o Josefa Simici vei ira na marama ena iSoqosoqo ni Veivukei “me ra bula ki na nodra dodonu,” e wakia vata na ivakasala oqori kei na dua na yalayala: “ena sega ni rawa ni ra tarovi na agilosi ena nodra mai tokani kemuni. … Kevaka o ni savasava, e sega ni dua na ka ena vakalatilati rawa.”¹⁸

Sa vakalougatataki ira na luvena yalewa na Kalou ena kaukauwa levu me ra dauloloma ka dauveisusu.

Ni ra sotava na yalewa na kedra icavacava vakaluvena yalewa na Kalou, era sa vakarautaki ira tiko ki na veivakalougatataki ni bula tawamudu.

“E volai tu na itukutuku ni iSoqosoqo ni Veivukei ena veimalanivosa kei na matanifika, ia na iyau e soli mai na yalo ki na yalo” (Henry B. Eyring).

Sa dau vakauqeti ira tikoga na marama ena iSoqosoqo ni Veivukei na loloma savasava i Karisito ena nodra veivakavulici ka veiqaravi vakataki ira.

E rawa ni ra wasea na tina na iyau ni iSoqosoqo ni Veivukei vei ira na luvedra yalewa.

“Ena vuku ni gauna oqo” (Esiteri 4:14)

Ena veitabatamata vou yadua, e rawa ni ra kaya na marama ena iSoqosoqo ni Veivukei, “Sa neimami gauna ni veiqaravi oqo.”