iKau

“E Dua na Ka Matalia”

Ena matai ni soqoni ni Soqosoqo ni Veivukei, a vakaraitaka o Ema Simici, “Eda sa na vakarau vakayacora e dua na cakacaka veivakurabuitaki.”¹ E dina o koya. Na iTukutuku makawa ni Soqosoqo ni Veivukei e sinai kina na nodra ivakaraitaki na marama era rawata e vuqa na vei ka vakasakiti ena nodra vakaraitaka na nodra vakabauta vua na Tamada Vakalomalagi kei Jisu Karisito. E a tauyavutaki na iSoqosoqo ni Veivukei me vukei ira na luvena yalewa na Kalou kina veivakalougatataki ni bula tawamudu. E veivuke na iSoqosoqo ni Veivukei ena nodra vakarautaki na marama kina veivakalougatataki ni bula tawamudu ena nodra vakalevutaka na nodra vakabauta na Tamada Vakalomalagi kei Jisu Karisito kei na Nona Veisorovaki, ka vaqaqacotaka na tamata yadua, matavuvale, kei na vuvale ena veicakacaka vakalotu kei na veiyalayalati; ka cakacaka ena duavata me ra vukei o ira era gadreva na veivuke. Era na vakayacora na nodra inaki na marama ena nodra vakasaqara, ciqoma, ka cakacakataka na nodra ivakatakila yadua kei na veikacivi ena nodra bula.

Na ivola oqo e sega ni itukutuku ni veigauna, e sega tale ga ni gadrevi me vakarautaki kina na veika kece sa rawati ena iSoqosoqo ni Veivukei. Ia, e vakarautaki kina e dua na rai vakaitukutuku makawa ni veiqaravi raraba ena iSoqosoqo ni Veivukei. E vakavuvulitaki kina mai na itukutuku makawa, na veika e sotavi vakatamata yadua, na ivolanikalou, kei na nodra vosa na parofita ni gauna oqo kei ira na veiliutaki ena iSoqosoqo ni Veivukei na nodra itavi kei na madigi eso e soli vei ira na marama Yalododonu Edaidai ena nona ituvatuva ni marau na Tamada Vakalomalagi.

Na Cava me da Vulica Kina na iTukutuku kei na Cakacaka ni iSoqosoqo ni Veivukei?

E kaya o Peresitedi Spencer W. Kimball, na ikatinikarua ni Peresitedi ni Lotu, “Eda kila ni o ira na marama era dau vakavinavinaka ena vuku ni veigauna sa oti era na kauwaitaka me ra tara cake na buladodonu ena veisiga ni mataka.”² Na vulici ni ivola oqo ena vukea me vakalevutaki cake na nodra vakavinavinakataka na marama na veigauna sa oti kei na nodra kila na nodra iyau vakayalo.

Na itukutuku ni iSoqosoqo ni Veivukei e vakavuvulitaka vei keda na kedra ivakatakilakila vakalou kei na kedra yaga tawayalani na luvena yalewa na Kalou. E kedra italanoa vakasinaiti vakayalo na marama qaqa, yalodina vakainaki ka sega ni dau kilai levu na nodra veiqaravi. Ni vulici na itukutuku oqo, era na raica na Yalododonu Edaidai ni kilai ira na Luvena yalewa na Tamada Vakalomalagi, ni lomani ira, ka nuitaki ira ena veiitavi tabu eso, ka dau tuberi ira ena nodra qarava na itavi eso oqori. Ena nodra sasaga, era sa duavata kina na marama ena Lotu kei ira na turaga ka ra taura tu na matabete me ra tara cake na matanitu ni Kalou e vuravura ka vaqaqacotaka na veivuvale e Saioni.

Vulici Yadua ni Luvequ Yalewa ena Noqu Matanitu

Na yaga ni ivola oqo e sega ni kune ena veitikinisiga kei na veitukutuku e vakarautaki kina ia ena inaki, na ivakavuvuli, kei na ivakarau e vakavuvulitaka. Ni ra vulica ka vulica tale na lewe yadua ni iSoqosoqo ni Veivukei na ivola oqo, era na raica ni iyau ni iSoqosoqo ni Veivukei e sega ni baleti ira walega na marama era a bula e liu; e baleti ira talega na marama e vuravura raraba nikua ka ra cakava ka rokova tiko na nodra veiyalayalati. Na kila ka oqori ena vukei ira na marama me ra kunea na veivakauqeti mai na veigauna sa sivi ka kune vakacegu ni qarava na veisiga ni mataka.

Na ivakavuvuli, italanoa, kei na ivakaraitaki ena ivola oqo e rawa ni tuberi ira na marama me ra vakotora na veika bibi kei na ivalavala eso ena nodra bula ka na vukei ira me vakalevutaki na nodra vakabauta kei na buladodonu yadua, vaqaqacotaka na matavuvale kei na veivuvale, ka vakasaqarai ira ka vukei ira era vakaleqai tu.

E kaya vaqo o Sisita Belle S. Spafford, na ikaciwa ni peresitedi raraba ni iSoqosoqo ni Veivukei: “Na marama yadua nikua, au vakabauta, ni na vinaka vua me dikeva na veika e dau taleitaka, kalasitaka na itaviqaravi e vakaitavitaki koya kina, qai taura na ikalawa me vakarawarawataka na nona bula, vakaliuca na veika e dodonu me liu, ka vakabibitaka na vanua ena levu kina na kena isau ka levu na vosota e gadrevi kina, ka vakuwai koya mai na kena e sega na betena.”³

Ni ra vuli na marama mai na itukutuku ni iSoqosoqo ni Veivukei, era na rawa ni raica na ivakaraitaki, ivakamacala, kei na ivakavuvuli eso ka vakaibalebale vakalevu vei ira. Ni ra vakauqeti mai na veika era raica oqori kei na nodra ivakavuvuli na parofita ni gauna makawa kei ira ena gauna oqo, sa rawa me ra vakasaqara, ciqoma, ka cakacakataka na nodra ivakatakila yadua. E rawa ni ra tuberi ena nodra segata me ra yaco me vaka na tamata e vinakata na Turaga me ra vakakina ka kitaka na veika e vinakata o Koya me ra cakava.

E rawa ni ra vakayaloqaqataki na marama ena vosa nei Alama: “Raica na ka lailai ka beci sa tubu mai kina na ka levu.”⁴ Na veika lalai ka beci era qarava rawa ena vukei ira me ra raica na sala e vakaukauwataki ira tiko kina ka tubera tiko na nodra bula na Turaga.

Vulica Vata kei ira Eso na iTukutuku kei na Cakacaka ni iSoqosoqo ni Veivukei

Na ivola oqo e dua na ivurevure ni vuli bibi me vukei ira na marama ena iSoqosoqo ni Veivukei ena nodra vuli vata ena vei Sigatabu kei na so tale na siga ena loma ni macawa. Me ra kunea na idusidusi raraba me baleta na veivakavulici ena soqoni ni iSoqosoqo ni Veivukei me ra na gole na veiliutaki ni iSoqosoqo ni Veivukei ki na ivoladusidusi e vakayagataki tiko ena gauna oqo ka vakakina ki na LDS.org. Me ra raica na itukutuku e baleta vakatabakidua na vakayagataki ni ivola oqo ena soqoni ni iSoqosoqo ni Veivukei, e rawa me ra gole ki na LDS.org ka raica eso tale na idusidusi veivuke e tabaka na Lotu.

Na veivakauqeti ni ivola oqo e nakiti me ulabaleta yani na veisoqoni ni iSoqosoqo ni Veivukei. E rawa vei ira na veimatavuvale me ra vulica ka veivosakitaka vata na ivakaraitaki kei na ivakavuvuli eso ena ivola. E rawa ni ra wasea na ivola oqo kei ira na nodra itokani o ira na marama ena iSoqosoqo ni Veivukei. E rawa ni ra vakayagataka na lewe ni Lotu ena veitabayabaki kece sara na ivola me idusidusi ni lesoni, na vosa, kei na veimatabose.

Vakavinavinaka

O ira era vakarautaka na kena tabaki na ivola oqo era vakaraitaka na nodra vakavinavinaka vei Lucile C. Tate kei na vugona o Elaine R. Harris, ka rau a kacivi ka vakatikori ena 1996 me rau biuta vata e dua na itukutuku sega ni tabaki ni iSoqosoqo ni Veivukei. A maroroi na nodrau cakacaka me ivurevure ena itukutuku maroroi ni Lotu. Na nodrau sasaga me rau vakaivolataka na nodra bula na veiperesitedi raraba ni iSoqosoqo ni Veivukei kei na veisoqoni lelevu ni iSoqosoqo ni Veivukei sa vakayavutaki kina na ivola oqo.

E vagolei talega na vakavinavinaka vei ira oqo: Susan W. Tanner, ka vakatikori ena 2009 me vola na imatai ni itukutuku taucoko oqo ni iSoqosoqo ni Veivukei me baleta na Lotu raraba, ka vakayagataka na nodrau cakacaka o Sisita Tate kei Sisita Harris me kena yavu; o ira na edita, kei na daudroini, ka ra toboka rawa na yalo ni ivola oqo ena gauna sa na oti kina ka ra qai cakacaka vagumatua me rawati; o ira na dauvolaivola tale eso, o ira na cau, dauniitukutuku makawa, ka ra kilai ena kena laurai na nodra cakacaka sa tabaki tu ena idusidusi ena mua ni ivola oqo.

Me kena iotioti, ena sega ni rawa ni volai na itukutuku oqo ke a sega na nodra vakabauta, yalodina, kei na veiqaravi na marama ena iSoqosoqo ni Veivukei ena veitabagauna taucoko ni Lotu.

Era sa dau veiqaravi na marama ena iSoqosoqo ni Veivukei nikua vakatisaipeli yalodina i Jisu Karisito me vakataki Meri kei Marica ena Veiyalayalati Vou.

Ena vukei ira na marama me ra vulica na nodra itavi ena matanitu ni Kalou na nodra dau vuli yadua.

Ni ra dau veitalanoataka na marama na itukutuku kei na cakacaka ni iSoqosoqo ni Veivukei ena rawa kina vei ira me ra veivakatataki cake.