« សំឡេងនៃការស្តារឡើងវិញ ៖ សមាគមសង្រ្គោះ » ចូរមកតាមខ្ញុំ—សម្រាប់គេហដ្ឋាន និងសាសនាចក្រ ៖ គោលលទ្ធិ និងសេចក្តីសញ្ញា ឆ្នាំ ២០២៥ ( ឆ្នាំ ២០២៥ )
« សមាគមសង្រ្គោះ » ចូរមកតាមខ្ញុំ—សម្រាប់គេហដ្ឋាន និងសាសនាចក្រ ៖ ឆ្នាំ ២០២៥
សំឡេងនៃការស្ដារឡើងវិញ
សមាគមសង្រ្គោះ
នៅក្នុងឆ្នាំ ១៨៤២ បន្ទាប់ពីសមាគមសង្គ្រោះត្រូវបានបង្កើតឡើងនៅក្នុងទីក្រុងណៅវូ រដ្ឋអិលលីណោយ នោះព្យាការី យ៉ូសែប ស៊្មីធ បានមានប្រសាសន៍ថា « សាសនាចក្រនឹងមិនបានរៀបចំយ៉ាងល្អឥតខ្ចោះឡើយ រហូតដល់ក្រុមស្ដ្រីត្រូវបានរៀបចំឡើង » ។ ស្រដៀងគ្នានេះដែរ ការសិក្សាអំពីការស្តារឡើងវិញនៃ សាសនាចក្ររបស់ព្រះអម្ចាស់ និងបព្វជិតភាពរបស់ទ្រង់ គឺមិនទាន់បានពេញលេញទេ រហូតដល់រួមបញ្ចូលទាំងការសិក្សាអំពីសមាគមសង្រ្គោះដែលវាផ្ទាល់គឺជា « ការស្តារឡើងវិញនៃគំរូពីបុរាណ » នៃកូនសិស្សស្ត្រីនៃព្រះយេស៊ូវគ្រីស្ទ ផងដែរ ។
អេលីហ្សា អ័រ ស្នូ បានដើរតួនាទីយ៉ាងសំខាន់នៅក្នុងការស្តារឡើងវិញនោះ ។ នាងមានវត្តមាននៅពេលដែលសមាគមសង្រ្គោះទើបបានបង្កើតលើកដំបូង ហើយក្នុងនាមជាលេខា នាងបានកត់ត្រាអំឡុងពេលប្រជុំ ។ នាងបានធ្វើជាសាក្សីតាំងពីដំបូងថា សមាគមសង្រ្គោះត្រូវបានបង្កើតឡើង « តាមគន្លងនៃបព្វជិតភាព » ។ ខាងក្រោមនេះគឺជាពាក្យពេចន៍របស់នាងដែលបានកត់ត្រាក្នុងអំឡុងពេលនាងកំពុងបម្រើជាប្រធានទីពីរនៃសមាគមសង្គ្រោះទូទៅ ដើម្បីជួយបងប្អូនស្រីរបស់គាត់ឲ្យយល់ដឹងអំពីកិច្ចការដ៏ទេវភាពដែលបានប្រគល់ឲ្យបុត្រីនៃសេចក្តីសញ្ញារបស់ព្រះ ។
ដើម្បីរៀនបន្ថែមទៀតអំពីរបៀបដែលសមាគមសង្រ្គោះត្រូវបានបង្កើតឡើង សូមមើល Daughters in My Kingdom: The History and Work of Relief Society ( ឆ្នាំ ២០១៧ ) ទំព័រ ១–២៥; The First Fifty Years of Relief Society ( ឆ្នាំ ២០១៦ ) ទំព័រ ៣–១៧៥ ។
រូបគំនូររបស់អង្គការសមាគមសង្រ្គោះ ដោយ ផល មេន
អេលីស្សា អ័រ ស្នូ
« ទោះបីជាឈ្មោះ [ សមាគមសង្រ្គោះ ] នេះជាឈ្មោះសម័យថ្មី តែស្ថាប័ននោះគឺមកពីជំនាន់ដើម ។ [ យ៉ូសែប ស្ម៊ីធ ] បានប្រាប់យើងថា អង្គការនេះមាននៅក្នុងសាសនាចក្រតាំងពីបុរាណ ដូចជាការរៀបរាប់នៅក្នុងសំបុត្រដែលបានកត់ត្រានៅក្នុងព្រះគម្ពីរសញ្ញាថ្មី ដោយផ្ដល់ងារមួយថា ‹ ស្រ្តីរើសតាំង › [ សូមមើល យ៉ូហាន ទី២ ១:១; គោលលទ្ធិ និងសេចក្ដីសញ្ញា ២៥:៣ ] ។
« នេះជាអង្គការមួយដែលមិនអាចបង្កើតឡើងដោយគ្មានអំណាចបព្វជិតភាពបានឡើយ ដោយហេតុថាវាវិវឌ្ឍន៍មកពីសិទ្ធិអំណាចទាំងអស់ និងឥទ្ធិពលមកពីប្រភពនោះ ។ នៅពេលដែលបព្វជិតភាពត្រូវបានដកយកចេញពីផែនដី ស្ថាប័ននេះក៏ដូចជាស្ថាប័នតូចៗទាំងឡាយនៃសេចក្តីពិតរបស់សាសនាចក្រនៃព្រះយេស៊ូវគ្រីស្ទនៅលើផែនដីនេះដែរ វាត្រូវបានសាបសូន្យ ។…
« ការបានធ្វើជាតំណាងអង្គការ ‹ សមាគមសង្គ្រោះស្រ្តីនៅណៅវូ › … ក៏មានឱកាសទទួលបទពិសោធន៍ដែលមិនអាចកាត់ថ្លៃបាននៅក្នុងសមាគមនោះ ប្រហែលខ្ញុំអាចចែកចាយប្រាប់គន្លឹះមួយចំនួន ដែលអាចជួយដល់បុត្រីនៃស៊ីយ៉ូនក្នុងការឈានទៅមុខក្នុងតំណែងដ៏សំខាន់នេះ ដែលពោរពេញដោយអ្វីដែលថ្មី និងការទទួលខុសត្រូវយ៉ាងច្រើន ។ ប្រសិនបើកូនស្រី និងម្តាយទាំងឡាយក្នុងវង្សអ៊ីស្រាអែលកំពុងតែមានអារម្មណ៍ថាមិនអាចធ្វើកិច្ចការបានច្រើននៅក្នុងសកម្មភាពរបស់ពួកគេ នោះពួកគេនឹងរកឃើញសមត្ថភាពដ៏លើសលប់សម្រាប់ការប្រើប្រាស់ទេពកោសល្យ និងសមត្ថភាពដ៏អស្ចារ្យរបស់ពួកគេដើម្បីធ្វើកិច្ចការល្អ ដែលពួកគេត្រូវបានប្រទានឲ្យយ៉ាងបរិបូរណ៍ ។ …
អង្គការសមាគមសង្រ្គោះត្រូវបានបង្កើតឡើង នៅបន្ទប់ជាន់ខាងលើនៃហាងឥដ្ឋពណ៌ក្រហម ។
« តើមានសំណួរក្នុងគំនិតដែរទេថា តើអ្វីជាគោលបំណងរបស់សមាគមសង្គ្រោះស្រ្តី ? ខ្ញុំនឹងឆ្លើយតបថា—ដើម្បីធ្វើល្អ—ដើម្បីប្រើប្រាស់លទ្ធភាពទាំងអស់ដែលយើងមានសម្រាប់សេចក្តីល្អ មិនមែនគ្រាន់តែដើម្បីជួយមនុស្សទ័លក្រប៉ុណ្ណោះទេ គឺថែមទាំងដើម្បីសង្គ្រោះព្រលឹងថែមទៀតផង ។ កិច្ចខិតខំរួមគ្នានឹងនាំឲ្យសម្រេចជោគជ័យច្រើនឥតគណនា ជាងកាលដែលបុគ្គលពូកែម្នាក់ធ្វើ ។…
« ក្នុងការមើលថែមនុស្សទ័លក្រ សមាគមសង្គ្រោះស្រ្តីមានកាតព្វកិច្ចផ្សេងៗដែលត្រូវធ្វើច្រើនជាងការគ្រាន់តែជួយឲ្យធូរស្រាលតែខាងសាច់ឈាម ។ ភាពក្រខ្សត់ខាងគំនិត និងបេះដូងឈឺចាប់ក៏ត្រូវការការយកចិត្តទុកដាក់ ហើយគ្រប់ពេលគឺជាការសម្តែងនូវក្តីមេត្តា—ដោយផ្តល់ដំបូន្មានពីរបីម៉ាត់ ឬក៏គ្រាន់តែការចាប់ដៃដែលពេញដោយក្តីស្រឡាញ់ នោះនឹងធ្វើឲ្យមានការត្រេកអរ ហើយប្រសើរជាងបានកាបូបមាសទៅទៀត … ។
« នៅពេលដែលពួកបរិសុទ្ធប្រមូលផ្តុំគ្នាពីរដ្ឋនានា ជាមនុស្សចម្លែកចំពោះមនុស្សគ្រប់គ្នា ហើយអាចប្រឈមនឹងការដឹកនាំឲ្យវង្វេងពីសំណាក់មនុស្សកុហកដែលចាំឱកាសដើម្បីបោកបញ្ឆោត ពេលនោះហើយដែល [សមាគម ] សង្គ្រោះគួរតែជួយ [ ពួកគេ ] ជាបន្ទាន់ រួចហើយណែនាំពួកគេចូលក្នុងសមាគមន៍ដែលនឹងជួយកែលម្អ និងតម្កើងឡើង ហើយលើសពីនោះទៀតគឺពង្រឹងសេចក្តីជំនឿនៃដំណឹងល្អ ហើយការធ្វើដូច្នេះយើងបានក្លាយជាឧបករណ៍ក្នុងការសង្គ្រោះមនុស្សជាច្រើន ។
« វាត្រូវការសៀវភៅជាច្រើន ដើម្បីឲ្យនិយមន័យលើកាតព្វកិច្ច ឯកសិទ្ធិ និងការទទួលខុសត្រូវក្នុងកិច្ចការសមាគម … ។ ចូរធ្វើកិច្ចការ ( នៅក្រោមការដឹកនាំពីប៊ីស្សពរបស់បងប្អូន ) អត់ធ្មត់ ហ្មត់ចត់ ស្វាហាប់ដោយសាមគ្គីភាព និងពោរពេញដោយការអធិស្ឋាន នោះព្រះនឹងប្រទានពរដល់កិច្ចខិតខំរបស់បងប្អូនដោយនូវភាពជោគជ័យ » ។