“O Leo o le Toefuataiga: Papatisoga mo o Tatou Tuaa, ‘o se Aoaoga Faavae Mamalu,’” Sau, Mulimuli Mai ia te A’u—Mo le Aiga ma le Ekalesia: Mataupu Faavae ma Feagaiga 2025 (2025)
“Papatisoga mo o Tatou Tuaa, ‘o se Aoaoga Faavae Mamalu,’” Sau, Mulimuli Mai ia te A’u—Mo le Aiga male Ekalesia: 2025
O Leo o le Toefuataiga
Papatisoga mo o Tatou Tuaa, “o se Aoaoga Faavae Mamalu”
O le ata lenei o loo faaalia ai le faatanoa o le vai papatisoga o le Malumalu o Navu o loo taatia i luga o ni povi e sefululua.
Phebe ma Uilifoti Uitilafi
Sa nofo Phebe Uitilafi e latalata i Navu ina ua amata ona aoao atu Iosefa Samita e uiga i le avanoa e papatiso ai mo i latou o e sa soifua muamua. Sa ia tusi e uiga i ai i lana tane o Uilifoti, o lē sa auauna atu i se misiona i Egelani:
“Ua iloa e Tuagane Iosefa … e ala i le faaaliga e faapea, o i latou e i totonu o lenei ekalesia e mafai ona papatisoina mo soo se tasi o o latou aiga ua maliliu ae sa le’i maua le avanoa e faalogo ai i lenei talalelei, e oo foi i a latou fanau, mātua, tuagane, uso, mātua matutua, alii ma tamaitai o aiga. … O le taimi lava latou te papatiso ai mo o latou uo e faasaoloto mai ai i latou mai le falepuipui ma e mafai ona latou maua i latou i le toetutu ma aumai i latou i le malo selesitila—ua talia fiafia e le ekalesia lenei aoaoga faavae ma ua latou o atu toatele i luma, o nisi o le a faa-16 ona papatiso … i le aso e tasi.”
Sa saunoa Uilifoti Uitilafi i se taimi mulimuli ane e uiga i lenei mataupu faavae: “O le taimi lava na ou faalogo ai e uiga i ai, sa osooso lo’u agaga i le olioli. … Sa ou alu atu i luma ma papatisoina mo tagata uma o lo’u aiga na maliliu sa mafai ona ou manatua. … Sa ou lagonaina le fia fai atu aleluia ina ua oo mai le faaaliga na faaalia mai ai ia i matou le papatisoga mo e ua maliliu. Sa ou lagonaina sa i ai so matou aia tatau e olioli ai i faamanuiaga o le Lagi.”
Vilate Kimball
E pei o Sister Uitilafi, sa faalogo foi Vilate Kimball e uiga i le papatisoga sui a o toesea foi lana tane o Heber, e talai le talalelei. Sa ou tusi atu ia te ia:
“Ua folasia mai e Peresitene Samita se mataupu fou ma matagofie … ua faapea ona afua ai se fiafia faafouina i totonu o le ekalesia. O lena mataupu, o le papatisoga mo e ua maliliu. O loo talanoa Paulo e uiga i lena mea, i le muamua Korinito mataupu e 15 fuaiupu e 29. Ua mauaina e Iosefa se faamalamalamaga sili atu ona atoatoa e ala i se Faaaliga. … O se faamanuiaga lea mo lenei ekalesia le papatisoina mo tagata uma o o latou aiga o e na maliliu a o lei oo mai lenei Talalelei; e oo lava i tua i Matua o o latou matua matutua. … I le faia o lea mea, ua avea ai tatou ma o latou sui; ma tuu atu ia i latou le avanoa e o mai ai i le uluai toetutu. Fai mai o ia o le a talaiina atu le Talalelei ia i latou … ae e leai se mea e ta’u o le papatisoina o agaga. … Talu lava ona tala’ia mai lenei avea’i iinei, ua faaauau ai lava ona gaepuina le vai. I le taimi o le konafesi, sa i ai i nisi o taimi le toavalu i le toasefulu Toeaiina i totonu o le vai i le taimi e tasi i le faia o papatisoga. … Ou te fia papatiso mo lo’u Tina. Sa ou fuafua e faatali seia e foi mai i le fale, ae o le taimi mulimuli atu nei na saunoa ai Iosefa e uiga i lea mataupu, sa ia fautuaina tagata uma ina ia tutu i luga ma faia loa, ma faasaoloto a latou uo mai le nofo pologa i se vave e mafai ai. O lea la ua ou mafaufau o le a ou alu i ai i le vaiaso lenei, ona e feololo foi nisi o tuaoi o le a o i ai. O nisi ua uma ona papatisoina mo ni nai taimi. … Ua faapea ona e vaai ai, e i ai se avanoa mo tagata uma. Pe le o se aoaoga faavae matagofie ea lenei?”
Phebe Chase
O le taimi lava na faamaeaina ai le faatanoa mo papatisoga i le Malumalu o Navu, sa faataunuuina ai loa papatisoga sui nai lo o le faia i totonu o le vaitafe. Sa tusi atu Phebe Chase, o se tasi na nofo i Navu, i lona tina e uiga i le malumalu, ma faamatala i ai le faatanoa mo papatisoga o le nofoaga lea “e mafai ona tatou papatiso ai mo o tatou aiga ua maliliu ma avea ma ni faaola i le Mauga o Siona.” Sa faapea ona ia faamatalaina atu, i totonu o lenei faatanoa, “Na papatisoina ai a’u mo lo’u tamā pele ma a’u uo uma ua maliliu. … O lea la ua ou manao e iloa igoa o lou tamā ma lou Tina ina ia mafai ona ou faasaoloto i laua, ona ou te manao e fesoasoani i e ua Maliliu. … Ua toe fetalai mai le Alii ma toefuatai mai le faatulagaga anamua.”
Sally Randall
I le tusi atu i ana uo ma aiga e uiga i le papatisoga mo tagata o aiga o e na soifua, sa faamatala ai e Sally Randall le maliu o lana tama tama o Siaosi:
“O se taimi ina a faigata lea ia te a’u, ae e foliga mai e le mafai ona ou taliaina e fai lea mea, ae … ua papatisoina lona tamā mo ia ma o se mea matagofie tele lo matou talitonu ma maua le atoatoa o le talalelei e pei ona talaiina nei ma mafai ona papatisoina mo o tatou uo uma ua maliliu ma laveai i latou i le po o le a lava le mamao i tua e mafai ona tatou iloa ai i latou.
“Ou te manao tou te tusia mai igoa muamua o o tatou auaiga uma ua maliliu i le mamao i tua e tau atu i tamamatutua ma tinamatutua i soo se vave e mafai ai. Ua ou fuafua e fai le mea ou te mafaia e laveai ai a’u uo ma e tatau ona matuai ou fiafia pe afai e o mai ni isi o outou e fesoasoani ia te a’u ona e telē tele le galuega mo le faia e se tagata e toatasi. … Ou te manatu o le a outou faapea o se aoaoga faavae ese lenei peitai o le a outou iloa e moni lava.”