Tatou faatasi ma Latou ma Latou faatasi ma Tatou, saunia e Caitlin Connolly

3–9 Novema: “O Se Leo o le Fiafia mo e o Ola ma e ua Oti”

Mataupu Faavae ma Feagaiga 125–128

Ia Aokuso 1840, na faalogologo ai Sieni Neyman, o sē sa faavauvau, i le Perofeta o Iosefa Samita o saunoa i le maliu o lana uo o Seymour Brunson. Sa le’i leva atu foi ona maliu le atalii talavou o Sieni, o Cyrus. Sa faaopoopo atu i lona faavauvau le mea moni e faapea, sa le’i papatisoina lava Cyrus, ma sa popole Sieni i le mea o le a tupu i lona agaga e faavavau. Sa mafaufau foi faapena Iosefa e uiga i lona uso pele o Alavini, o lē foi na maliu ae le’i papatisoina. O lea na tonu ai i le Perofeta e faasoa atu i tagata uma sa i ai i le maliu le mea na faaali mai e le Alii ia te ia e uiga ia i latou o e na maliliu e aunoa ma le mauaina o sauniga o le talalelei—ma le mea e mafai ona tatou faia e fesoasoani ai ia i latou.

O le aoaoga faavae o le papatisoga mo e ua maliliu na matua’i fiafia tele ai le Au Paia; sa vave ona liliu atu o latou mafaufauga i tagata o le aiga ua maliliu. O lea ua i ai le faamoemoe mo i latou! Sa tutusa le fiafia o Iosefa ma i latou, ma sa ia faaaogaina le gagana o le olioli ma le naunautai e faailoa atu ai le mea na aoaoina ai o ia e le Alii e uiga i le faaolataga o e ua maliliu: “Ia tuu atu i mauga e alalaga i le olioli, ma o outou vanu uma ia alalaga leo tetele; ma outou sami ma laueleele matutu uma ia taʼutaʼu atu mea ofoofogia a lo outou Tupu Faavavau!” (Mataupu Faavae ma Feagaiga 128:23).

Tagai i le Au Paia, 1:415–27; “Letters on Baptism for the Dead,” Revelations in Context, 272–76.

Manatu mo le Aoaoina i le Aiga ma i le Ekalesia

Mataupu Faavae ma Feagaiga 126

E finagalo le Alii ina ia ou tausia lo’u aiga.

Ina ua foi mai se misiona i Egelani—o se tasi o le tele o misiona sa ia auauna atu ai—sa maua ai e Polika Iaga se isi valaauga tāua mai le Alii. Sa talosagaina o ia e “tausi faapitoa lelei [lona] aiga” (fuaiupu 3), o e na mafatia i lona toesea ai. A o e suesueina lenei vaega, mafaufau pe aisea e manaomia ai e le Alii i nisi taimi le ositaulaga i la tatou auaunaga. O le a se mea e mafai ona e faia e tausi lelei ai lou aiga?

Tagai foi i le “Take Special Care of Your Family,” Revelations in Context, 242–49.

Mataupu Faavae ma Feagaiga 127:2–4

E mafai ona ou faalagolago i le Alii i taimi faigata.

O tuuaiga pepelo ma le taufaamata’u o le pu’eina na toe faamalosia ai Iosefa Samita e lafilafi solo ia Aokuso 1842. Ae peitai, o upu sa ia tusi atu i le Au Paia i le aluga o lea taimi, (ua avea nei ma Mataupu Faavae ma Feagaiga 127) e tumu i le talitonu o le a lelei mea uma ma le olioli. O a ni mea o aoao mai e fuaiupu 2–4 ia te oe e uiga i le Atua? e uiga i le feagai ai ma tauemuga po o mea faafeagai? O a fasifuaitau mai nei fuaiupu e ono fesoasoani ia te oe pe a e lagonaina le sauāina? Mafaufau e tusifaamaumau le ala e lagolagoina ai oe e le Alii i totonu o le “vai loloto” o lou olaga.

Mataupu Faavae ma Feagaiga 127:5–8; 128:1–8

“Soo se mea tou te tusi faamaumauina i le lalolagi o le a tusifaamaumauina i le lagi.”

A o e faitau i le Mataupu Faavae ma Feagaiga 127:5–8; 128:1–8, vaavaai mo mafuaaga na tuuina atu ai e le Alii ia Iosefa Samita ni faatonuga faapitoa faapena e uiga i le tusifaamaumauina o papatisoga mo e ua maliliu. O le a se mea e aoao mai e lenei mea ia te oe e uiga i le Alii ma Lana galuega? E faapefea ona e lagona e mafai ona faatatau lenei faatonuga i au lava faamaumauga faaleaiga, e pei o api talaaga a le tagata lava ia?

O le faia o auaunaga i le malumalu mo o tatou tuaa e fusia ai o tatou loto ia i latou.

Mataupu Faavae ma Feagaiga 128:5–25

O le faaolataga o o’u tuaa e tāua tele i lo’u faaolataga.

E manino mai i le mea na faaalia mai e le Atua e ala mai ia Iosefa Samita le mafuaaga e manaomia ai i tatou e o tatou tuaa o e e lei papatisoina i lenei olaga: ua papatisoina i tatou mo i latou ina ia mafai ai ona latou filifili e talia pe teena lenei sauniga. Ae na aoao mai foi le Perofeta e faapea o le faaolataga o o tatou tuaa e “tatau ma e taua tele mo lo tatou olataga.” A o e faitauina le Mataupu Faavae ma Feagaiga 128:15–18, mafaufau pe aisea ua i ai lena mea.

Ua aoao mai lefuaiupu 5 e faapea o le sauniga o le papatisoga mo e ua maliliu sa “saunia … a o le’i faavaeina le lalolagi.” O le a se mea ua aoao mai e lenei upumoni ia te oe e uiga i le Atua ma Lana fuafuaga? O le a se mea ua faaopoopo atu e le sāvali a Elder Dale G. Renlund “Galuega o Talafaasolopito o Aiga ma le Malumalu: Faamauga ma le Faamalologa” i lou malamalamaaga? (Liahona, Me 2018, 46–49).

Sa faaaoga e Iosefa Samita fuaitau e pei o le “mana faamau,” “sooga mau,” ma le “faatasiga atoa” a o aoao atu e uiga i sauniga o le perisitua ma le papatisoga mo e ua maliliu. Vaavaai mo nei fuaitau ma fuaitau talitutusa a o e faitau i le Mataupu Faavae ma Feagaiga 128:5–25. E mafai ona e mafaufau i mea faitino e mafai ona e faaaogaina e faapupula ai nei fasifuaitau, e pei o se filifili po o se maea? Aisea ua avea ai nei fasifuaitau lelei e faamatala ai lenei aoaoga faavae?

O le mafaufau i fesili nei e mafai foi ona fesoasoani i lau suesuega o nei fuaiupu:

• I lou manatu, aisea e mafai ai ona manatu i le papatisoga mo e ua maliliu o le “mataupu sili ona mamalu o mataupu uma o le talalelei tumau-faavavau”? (fuaiupu 17). O a ni aafiaga na fesoasoani ia te oe e lagona ai faapea?

• I le a le itu e ono fetuuina ai le laueleele pe afai e leai se “sooga mau … i le va o tamā ma fanau”? (fuaiupu 18).

• O le a se mea ua uunaia ai oe e uiga i upu a Iosefa Samita i fuaiupu 19–25? O a ni aafiaga o nei fuaiupu i ou lagona e uiga ia Iesu Keriso? e uiga i auaunaga i le malumalu mo ou tuaa? (tagai foi “Come, Rejoice,” Hymns, no. 9).

A uma ona suesue i nei fuaiupu, atonu e te lagona le musuia e fai se mea mo ou tuaa. O manatu i luga o le FamilySearch.org e mafai ona fesoasoani.

O “Vitio Musuia” i le tuufaatasiga o le ”Malumalu ma Talafaasolopito o Aiga” o le Potutusi o le Talalelei e mafai ona tuuina atu ia te oe se fesoasoani faatino, tala musuia, ma sāvali mai taitai e uiga i talafaasolopito o aiga.

Faaaoga punaoa fesootai a le Ekalesia. O sootaga i otootoga o le Sau, Mulimuli Mai ia te A’u ua faigofie ai ona maua punaoa aoga e mafai ona fesoasoani ia te oe e malamalama ai ma faaaoga upumoni o le talalelei pe faatino ai uunaiga e te maua. Mo se faataitaiga, o le sootaga o le FamilySearch o loo i luga e taitai atu ai i gaoioiga e pei o le fausiaina o lau lava gafa o le aiga, sailia o tuaa o e manaomia sauniga o le malumalu, vaai po o fea na o mai ai ou tuaa, po o le utaina i luga o se tala o le aiga.

Tagai foi i le, Kevin R. Duncan, “O Se Leo o le Fiafia!,” Liahona, Me 2023, 95–97.

“O se Meaalofa Mamana ma Ofoofogia.”

Na saunoa mai Peresitene Gordon B. Hinckley:

“O le Togiola a Iesu mo tagata uma o se faatusa o se taulaga sui maoae. Na Ia faataatia le mamanu lea na avea ai o Ia o se sui mo tagata uma. O lenei mamanu e mafai ai e se tagata ona faatino mo se isi e faia i sauniga o le maota o le Alii. O iinei tatou te auauna atu ai mo i latou ua maliliu e aunoa ma se malamalama o le talalelei. Ua saoloto i latou e talia pe teena le sauniga ua faatinoina. Ua tuuina i latou i se tulaga tutusa ma i latou o loo savavali i le fogaeleele. E tuuina atu foi i e ua oti le avanoa lava e tasi e pei o e o ola. Ma, e maeu le mamalu ma le matagofie o lenei tulaga ua faia e le Silisili Ese e ala i Lana faaaliga i Lana Perofeta” (“O Mea Sili ua Faaalia Mai e le Atua,” Liahona, Me 2005, 82–83).

Tagata, Nofoaga, Mea e Tutupu

• Polika Iaga

• Papatisoga mo e ua Maliliu

Kiliki e vaai i isi mea

Fautuaga mo le Aoaoina o Tamaiti

Mataupu Faavae ma Feagaiga 126:3

E mafai ona ou fesoasoani e tausi loʻu aiga.

• Ina ia fesoasoani i lau fanau e aoao e auauna atu i tagata o o latou aiga, mafaufau e faasoa atu le faamatalaga e uiga ia Polika Iaga i le “Mataupu 50: O le Au Paia i Navu” (i le Tala o le Mataupu Faavae ma Feagaiga, 184, po o le vitiō talafeagai i le Gospel Library) pe aotele le Mataupu Faavae ma Feagaiga 126 i au lava upu. E mafai ona e faamamafaina le fasifuaitau “tausi faapitoa lelei lou aiga” (fuaiupu 3) ma talanoa ma lau fanau e uiga i le tausia faapitoa o o tatou aiga.

  Chapter 50: The Saints in Nauvoo: January–July 1841

• Atonu e manaia mo oe ma lau fanau le matamata i ata o aiga (pe tusi ni ata) a o outou talanoa faatasi e uiga i auala e mafai ona tatou fesoasoani ai e “tausi” tagata o le aiga. E mafai foi ona outou usuina se pese e pei o le “Home Can Be a Heaven on Earth” (Hymns, no. 298).

Mataupu Faavae ma Feagaiga 128:5, 12

E manaomia e fanau uma a le Atua le avanoa e papatiso ai.

• Valaaulia lau fanau e saili mai le Mataupu Faavae ma Feagaiga 128:1 po o le a le mataupu sa i ai i le mafaufau o Iosefa Samita. E mafai foi ona latou suesue i le fuaiupu 17 e iloa ai po o le a le mataupu sa ia manatu i ai o le “mataupu sili ona mamalu.” Tuu atu ia i latou e faasoa mai mea latou te maua, ma talanoa e uiga i le mafuaaga e matuai faafiafia loto ai lenei mataupu.

• E faaopoopo atu i le fesoasoani i lau fanau e saunia mo (ma ola) i a latou lava feagaiga o le papatisoga, e mafai ona e fesoasoani ia i latou ia iloa pe faapefea ona fesoasoani i tagata e lei osia nei feagaiga i le āluga o o latou olaga. Mafaufau e taʻu atu i lau fanau e uiga i se tasi e te iloa na maliu e aunoa ma le papatisoina. Ona mafai lea ona outou faitau faatasi le Mataupu Faavae ma Feagaiga 128:5 ma vaai i se ata o se vai papatiso o le malumalu (e pei o le faatanoa o loo i le faaiuga o lenei otootoga). Ta’u atu i lau fanau ou lagona e uiga i le papatisoina i malumalu mo tagata ua maliliu ina ia maua e tagata uma le avanoa e osia ai feagaiga ma le Tama Faalelagi.

Mataupu Faavae ma Feagaiga 128:18

E finagalo le Tama Faalelagi ou te aoao e uiga i loʻu talafaasolopito o aiga.

• Atonu e mālie mo oe ma lau fanau le faia o se filifili pepa ma igoa o mātua, mātua matutua, mātua o mātua matutua, ma isi mea faapena (tagai i le itulau o gaoioigao lenei vaiaso). Ona mafai lea ona e faasoa atu i le tasi ma le isi mea ua e iloa e uiga i nei tuaa. Faitau faatasi le Mataupu Faavae ma Feagaiga 128:18 ia iloa po o le a le “sootaga mau” lea e faia a tatou talafaasolopito o aiga ia “o’oo’o ma atoatoa.” E mafai foi ona e matamata i le vitiō “Courage: I Think I Get It from Him” (Gospel Library).

  Courage: I Think I Get It From Him

  Learn about your ancestors strengths to discover your own strengths.

• O gaoioiga faaopoopo e fesoasoani ai i lau fanau e auai i talafaasolopito o aiga e mafai ona maua i le “O Le Malumalu ma le Fuafuaga o le Fiafia” i le faaopoopoga E po o le FamilySearch.org.

O sauniga o le malumalu e fesoasoani ia i tatou e tuufaatasia aiga e pei o sootaga i se filifili.

Mo nisi manatu, tagai i le lomiga o lenei masina o le mekasini o le Uo .

Faatanoa o le vai papatisoga i le Malumalu o Ogden Iuta.