Taupou e Toasefulu, saunia e Jorge Cocco

17–23 Novema: “Ia Outou Saunia mo le Afio Mai o le Faatoafaiavā”

Mataupu Faavae ma Feagaiga 133–134

I le 1833, na osofaia ma faatamaia ai e le au faatupu faalavelave le falelomitusi a le Ekalesia. E aofia ai i galuega lolomi o loo faagasolo i lena taimi, o le Tusi o Poloaiga—o le taumafaiga muamua lava a le Ekalesia e tuufaatasia faaaliga a le Atua i aso e gata ai i se voluma e tasi. Sa faasalalauina e tagata faatupu faalavelave itulau sa le’i tuufaatasia, ma e ui ina sa faasaoina e le Au Paia lotototoa nisi o itulau, ae e laiti ni kopi e le’i atoatoa o le Tusi o Poloaiga o iloa na faasaoina mai ai.

O le mea ua tatou iloa nei o le vaega 133 o le Mataupu Faavae ma Feagaiga sa tatau ona avea ma faaopoopoga i le Tusi o Poloaiga, e pei o se faailoga malosi i le faaiuga o faaaliga lomiaina a le Alii. O loo lapatai mai e uiga i se aso o le a oo mai o le faamasinoga ma toe ta‘u mai ai le valaau o loo maua i faaaliga i ona po nei: Sola ese mai mea faalelalolagi, e pei ona faatusa i ai Papelonia. Fausia Siona. Saunia mo le Afio Mai Faalua. Ma faasalalau atu lenei sāvali “i atunuu uma, ma ituaiga, ma gagana, ma nuu” (fuaiupu 37). Sa le’i faataunuuina uluai fuafuaga mo le Tusi o Poloaiga, ae o le faaaliga lenei o se faamanatu ma o se molimau o le a agai pea i luma le galuega a le Alii, “Auā o le a faaali e ia lona aao paia … , ma o le a vaai tuluiga uma o le lalolagi i le faaolataga a lo latou Atua” (fuaiupu 3).

Manatu mo le Aoaoina i le Aiga ma i le Ekalesia

Mataupu Faavae ma Feagaiga 133:4–14

Ua valaauina a’u e Iesu Keriso e teena Papelonia ma sau i Siona.

O le faafeagai faaleagaga o Siona o Papelonia—o se aai anamua o loo faatusa i totonu o tusitusiga paia i le amioleaga ma le nofopologa faaleagaga. A o e faitauina le Mataupu Faavae ma Feagaiga 133:4–14, mafaufau loloto pe o faapefea ona valaauina oe e le Faaola e “o ese … mai Papelonia” (fuaiupu 5) ma “o atu … i … Siona” (fuaiupu 9). O faapefea ona e tali atu i Lana valaau? O le a se isi mea ua e aoaoina e uiga ia Siona mai le sāvali a Elder D. Todd Christofferson “O Mai i Siona”? Liahona, Nov. 2008, 37–40).

Mataupu Faavae ma Feagaiga 133:1–19, 37–39

E mafai ona ou saunia nei mo le Afio Mai Faalua o le Faaola.

O le vaega 1, o le faatomuaga a le Alii i le Mataupu Faavae ma Feagaiga, ma le vaega 133, o le uluai faaopoopoga i le Tusi o Poloaiga, o loo amata i le augani lava lea e tasi mai le Alii: “Faalogo mai ia, E, outou e tagata o laʼu ekalesia” (Mataupu Faavae ma Feagaiga 1:1; 133:1). Atonu e mafai ona e suesueina le Mataupu Faavae ma Feagaiga 133:1–19, 37–39 ma lisi ia savali ua valaaulia oe e le Alii e “faalogo” (faalogo ma usitai) i ai a o e sauniuni mo Lona Afio Mai Faalua. Aemaise lava, e mafai ona e lisiina mea e finagalo o Ia e te faia e (1) saunia ai oe lava ma (2) fesoasoani e saunia le lalolagi mo Lona toe foi mai. O a ni mea ua e aoao mai i nei lisi?

Sa faasoa mai e Peresitene Russell M. Nelson ni upumoni tāua e uiga i le tulaga o le a i ai le lalolagi pe a toe afio mai le Faaola—ma le auala e saunia ai. Ia saili nei upu moni i lana savali, “O Le Lumanai o le Ekalesia: Sauniaina o le Lalolagi mo le Afio Faalua Mai o le Faaola” (Liahona, Ape. 2020, 6–11). O le a se mea ua musuia oe e fai—pe faia pea—e “saunia ai le lalolagi mo le toe foi mai o le Faaola”? (“Autu a le Korama o le Perisitua Arona,” Potutusi o le Talalelei).

Tagai foi Mataio 25:1–13; Russell M. Nelson, “Talia le Lumanai ma le Faatuatua,” Liahona, Nov. 2020, 73–76; “O Mai Fanau a le Ali’i,” Viiga, nu. 24; Autu ma Fesili, “Afio Mai Faalua o Iesu Keriso,” Potutusi o le Talalelei.

Mataupu Faavae ma Feagaiga 133:19–56

O le Afio Mai Faalua o Iesu Keriso o le a avea ma se mea fiafia mo e amiotonu.

A o e faitau i le faamatalaga o le toe afio mai o le Faaola i fuaiupu 19–56, o le a se mea e te mauaina, lea o le a e tulimatai atu i ai? O a upu po o fuaitau o loo faamatala ai le alofa o le Alii i Lona nuu? Mafaufau e tusifaamaumau ou aafiaga patino i “le alofa agalelei o [lou] Alii, ma mea uma ua ia faaeeina i [ou] luga e tusa ma lona lelei” (fuaiupu 52).

Faamatalaga mai le Fomai, saunia e Kelsy ma Jesse Lightweave

Mataupu Faavae ma Feagaiga 134

“Sa faatutuina e le Atua malo mo le lelei o tagata.”

O sootaga a le Au Paia anamua ma le malo sa faigata. Ina ua faamalosia le tuliesea o le Au Paia mai le Itumalo o Siakisone, Misuri, i le 1833, sa latou talosagaina se fesoasoani mai le malo i le lotoifale ma le atunuu ma sa leai se fesoasoani na maua. I le taimi lava foi lea, sa faauigaina ai e nisi o tagata i fafo o le Ekalesia ia aoaoga e uiga ia Siona e faapea, na teena e le Au Paia le pule a malo faalelalolagi. O leMataupu Faavae ma Feagaiga 134 sa tusia, o se vaega, e faamanino ai le tulaga o le Ekalesia e faatatau i le malo. O le a se mea o fautua mai e lenei vaega e uiga i lagona e tatau ona i ai i le Au Paia a le Alii e uiga i faigamalo?

A o e suesueina le vaega 134, mafaufau e vaavaai mo mataupu faavae o le malo ma tiutetauave o tagatanuu. Na ono mafai faapefea ona fesoasoani nei manatu i le Au Paia anamua? O faapefea ona faatatau i le mea o loo e nofo ai?

Tagai foi i le Mataupu Faavae o le Faatuatua 1:11–12; Autu ma Fesili, “Saolotoga o Tapuaiga,” Potutusi o le Talalelei.

Tagata, Nofoaga, Mea e Tutupu

• O Le Tusi o Poloaiga

• Mataupu Faavae ma Feagaiga

Kiliki e vaai i isi mea

Fautuaga mo le Aoaoina o Tamaiti

Mataupu Faavae ma Feagaiga 133:4–5, 14

E finagalo le Alii ia ou aloese mai mea leaga i le lalolagi.

• E mafai e oe ma lau fanau ona lisiina nisi o nofoaga ma tulaga e finagalo le Alii ia tatou aloese mai ai. Ona mafai lea ona e faatusatusaina na nofoaga ma tulaga i le faauigaga o le “Papelu, Papelonia” o loo i le Taiala i Tusitusiga Paia (Potutusi o le Talalelei). Ona mafai lea ona latou faitauina le Mataupu Faavae ma Feagaiga 133:4–5, 14. O le a le uiga o le “o ese mai Papelonia”? (fuaiupu 5). E mafai foi ona e faia se lisi faapena o nofoaga ma tulaga e valaaulia ai i tatou e le Alii ma faatusatusa lena lisi i le faauigaga o “Siona” o loo i le Taiala i Tusitusiga Paia.

Mataupu Faavae ma Feagaiga 133:19–21, 25

O le a toe afio mai Iesu Keriso.

• Atonu e fiafia lau fanau e faatino pe faape’i le saunia mo se mea, e pei o se tauvaga taaloga, se tagata asiasi tāua, po o se aso malolo e fiafia i ai. Aisea e tāua ai sauniuniga? Ona mafai lea ona outou faitau faatasi le Mataupu Faavae ma Feagaiga 133:17–19, 21 ma valaaulia lau fanau e vaavaai mo mea ua valaaulia i tatou e le Alii e sauniuni i ai. E mafai ona e faaali atu ia i latou ia ata mai le otootoga o lenei vaiaso ma fesili i lau fanau po o le a se mea latou te iloa e uiga i le Afio Mai Faalua o Iesu Keriso. O le a se isi mea tatou te aʻoaʻoina mai i fuaiupu 19–25, 46–52? O le a se mea e mafai ona tatou faia e saunia ai mo lenei mea fiafia?

• E mafai ona e nanāina ata eseese po o mea faitino e faaalia ai se mea e mafai ona tatou faia e saunia ai mo le Afio Mai Faalua o Iesu Keriso (e pei o le faitauina o tusitusiga paia, faasoa atu o le talalelei, pe auauna atu foi i o tatou aiga). Tuu atu i tamaiti e sue ia ata po o mea faitino ma talanoa e uiga i le auala e fesoasoani ai nei mea ia i tatou ia saunia e feiloai ma le Faaola pe a toe afio mai o Ia.

• E mafai foi ona outou usuina faatasi se pese e faatatau i le Afio Mai Faalua, e pei o le “Pe A Ia Toe Afio Mai” (Tusipese a Tamaiti, 46). Faasoa atu i le tasi ma le isi lou alofa mo le Faaola ma ou lagona e uiga i Lona toe foi mai.

Mataupu Faavae ma Feagaiga 133:52–53

O Iesu Keriso e alofa ma agalelei.

• E mafai e oe ma lau fanau ona matamata i ata e faaalia ai e alofa ma agalelei Iesu. (Mo se faataitaiga, tagai i le Tusi Ata o le Talalelei, nu. 42, 47.) O le a se isi mea na faia e Iesu e faaalia ai Lona alofa ma le agalelei? Faitau faatasi le Mataupu Faavae ma Feagaiga 133:52, ma fesoasoani i lau fanau e mafaufau i auala e mafai ai ona latou “ta’uta’ua le alofa agalelei o lo latou Alii” i isi.

  

Faamatalaga mai I Lona Malamalama, saunia e Greg Olsen

Aoao atu aoaoga faavae manino ma faigofie. Ua faamatalaina e le Alii Lana talalelei i upu “manino ma le faigofie” (Mataupu Faavae ma Feagaiga 133:57). O le a se mea ua fautua atu e nei upu ia te oe e uiga i le aoao atu o le talalelei i lou aiga po o le vasega?

Mataupu Faavae ma Feagaiga 134: 1–2

E finagalo le Alii ia ou usitai i le tulafono.

• E mafai e lau fanau ona fai se lisi o tulafono latou te usitaia. O le a faape’i le olaga pe afai e leai se tasi e usitai i nei tulafono? Ona faitau faatasi lea ma i latou le Mataupu Faavae ma Feagaiga 134:1-2 , ma fesoasoani ia i latou ia malamalama i soo se upu po o fuaitau atonu latou te le malamalama ai. Aisea e finagalo ai le Alii ia tatou usiusitai i le tulafono? (tagai foi i le Mataupu Faavae o le Faatuatua 1:12).

Mo nisi manatu, tagai i le lomiga o lenei masina o le mekasini o le Uo .

O Keriso i Lona Ofu Talaloa Lanumumu, saunia e Minerva Teichert