Falepuipui o Karefasi

Novema 24–30: Ua Ia “Faamau Faailogaina Lana Misiona ma Lana Galuega i Lona Lava Toto”

Mataupu Faavae ma Feagaiga 135–136

O le aoauli o le aso 27 o Iuni, 1844, na toe tuu ai foi Iosefa ma Ailama i le falepuipui, faatasi ai ma Ioane Teila ma Uiliata Risati. Sa latou talitonu sa le sala i latou i se solitulafono, ae sa latou ua’i atu ina ia pueina i latou, ma le faamoemoe ina ia saogalemu ai le Au Paia i Navu. Sa le ’o le taimi muamua lenei na tuu ai e fili o le Ekalesia le Perofeta o Iosefa i le falepuipui, peitai o le taimi lenei, sa foliga mai sa ia iloa lava o le a fasiotia o ia. Sa taumafai o ia ma ana uo e faamafanafana e le tasi le isi e ala i le faitau mai le Tusi a Mamona ma usuina viiga. Sa faalogoina le pāpā o fana, ma i totonu o ni nai minute, na faapea ona faamuta ai soifua i le olaga faitino o Iosefa Samita ma lona uso o Ailama.

Ae peitai, sa le o le mutaaga lea o le faamoemoe paia na la taliaina ma lagolagoina atoatoa. Ma sa le o le mutaaga lea o le Toefuataiga o le talalelei a Iesu Keriso. Sa tele le galuega e fai ma tele faaaliga o le a taiala ai le agai i luma o le Ekalesia. O le iuga o le soifua o le Perofeta e le o le mutaaga lea o le galuega a le Atua.

Tagai i le Au Paia, 1:521–52.

Manatu mo le Aoaoina i le Aiga ma i le Ekalesia

Mataupu Faavae ma Feagaiga 135; 136:37–39

Sa faamau faailogaina e Iosefa ma Ailama a la’ua molimau i o la’ua toto.

Vaai faalemafaufau pe faape’iī ou lagona pe ana faapea sa e nofo i Navu i le taimi na fasiotia ai Iosefa ma Ailama Samita (tagai i le Au Paia, 1:554–55). Faamata na faapefea ona e taumafai ia iloa le uiga o lenei mea leaga na tupu? O leMataupu Faavae ma Feagaiga 135, na lolomiina i le tolu masina mulimuli ane, atonu e fesoasoani. A o e suesue i lenei vaega, mafaufau po o le a se mea semanu e aumaia ia te oe le malamalamaaga ma le faamautinoaga. O le a sau tala e fai atu i se tasi e fesili, “Aisea o le a faataga ai e le Atua Lana Perofeta ina ia fasiotia?” (tagai i le Mataupu Faavae ma Feagaiga 136:37–39).

E mafai foi ona e suesue i le vaega 135 mo upu po o fasifuaitau e musuia ai oe ia faamaoni ia Keriso e oo i le iuga, e pei ona sa i ai Iosefa ma Ailama.

Tagai foi i le Mataupu Faavae ma Feagaiga 5:21–22; “Remembering the Martyrdom,” i le Revelations in Context, 299–306; Aoaoga a Peresitene o le Ekalesia: Iosefa Samita (2011), 522–23, 529–40; “Testimony of the Book of Mormon” (vitiō), Gospel Library.

Molimau i le Tusi a Mamona

Ua ta’ua e se Aposetolo o aso nei le faatuatua mausali sa faaalia e e na faavaeina le Ekalesia e oo lava i le oti, e tutu faamaoni ia latou molimau i le Tusi a Mamona.

Mataupu Faavae ma Feagaiga 135:3

O Iosefa Samita o se perofeta ma se molimau a Iesu Keriso.

Mataupu Faavae ma Feagaiga 135:3 loo ta’ua ai nisi o mea maoae na ausiaina e Iosefa Samita “i le va puupuu o le luasefulu tausaga.” O a ni auala ua e aafia ai ma aafia ai lou sootaga ma le Tama Faalelagi ma Iesu Keriso ona o ia mea? Mafaufau pe faapefea ona e faaumaina se fuaiupu faapenei: Ona o le mea na faia e le Alii e ala ia Iosefa Samita, ou te … E mafai foi ona e faamaumauina ma faasoa atu lau molimau i le Perofeta o Iosefa Samita i isi.

O le isi auala e aoao ai e uiga i le misiona a Iosefa Samita o le taumafai lea e tusi se talaaga puupuu po o se molimau mo ia. O le a sau tala e fai atu e fausia ai le faatuatua ia Keriso ma Lana talalelei toefuataiina? Atonu e te manao e faaaofia ai mea tāua na tutupu po o mea na ausia o loo maua i le Mataupu Faavae ma Feagaiga 135 po o mea o loo ta’ua i punaoa o loo i lalo.

Na faaali mai e Iesu Keriso le tele o upumoni e uiga ia te Ia lava ma Lana Togiola e ala mai ia Iosefa Samita. Mafaufau loloto i le aafiaga na e maua i le suesueina o le Mataupu Faavae ma Feagaiga i lenei tausaga. O a ni upu moni sa tulaga ese ia te oe? Atonu e te manao e faasoa atu nei mea i lou aiga, tagata o le vasega po o le korama, po o isi a o e suesue i lenei vaiaso. E mafai faapefea e nei upu moni paia ona fesoasoani ia te oe e malamalama ma faalatalata atili ai i le Faaola?

Tagai foi i le “Iosefa Samita: Perofeta o le Toefuataiga” (vitiō), Gospel Library; Tad R. Callister, “Iosefa Samita--Perofeta o le Toefuataiga,” Liahona, Nov. 2009, 35–37; “Viia Lē na Fetaia’i ma Ieova,” Viiga, nu. 15; Autu ma Fesili, “Iosefa Samita,” Gospel Library.

Joseph Smith: The Prophet of the Restoration

A motion picture about the life and legacy of Joseph Smith, the founding prophet of The Church of Jesus Christ of Latter-day Saints.

Musika e Fesootai

O le usuina o viiga nei po o le matamata i vitiō e mafai ona valaaulia ai le Agaga Paia pe uunaia ai se talanoaga i le galuega a le Perofeta o Iosefa Samita ma osigataulaga a le Au Paia na mulimuli pea ia te ia.

“Se Tagata Mativa Fa’anoanoa” (Viiga, nu. 16). A o i ai i le Falepuipui o Karefasi, na usuina ai e Ioane Teila lenei viiga.

“Viia Lē na Fetaia’i ma Ieova” (Viiga, nu. 15; tagai foi i vitiō). O upu i lenei viiga na tusia o se faamamaluga ia Iosefa Samita.

Praise to the Man – The Tabernacle Choir at Temple Square

The Tabernacle Choir and Orchestra at Temple Square perform "Praise to the Man". Follow along a recording session and see beautiful historical scenery and art.

“O Mai, Outou o le ‘Au Paia” (Viiga, nu. 17; tagai foi i le vitiō).

Come, Come, Ye Saints - Mormon Tabernacle Choir

The Mormon Tabernacle Choir and Orchestra at Temple Square perform one of their signature anthems, "Come, Come Ye Saints" arranged by Mack Wilberg. From the Music and the Spoken Word broadcast episode 4323, July 22, 2012.

“Faatuatua i Tulaga Aao Uma” (tagai i le vitiō).

Faith in Every Footstep - Mormon Tabernacle Choir

The Mormon Tabernacle Choir performs "Faith in Every Footstep" from the 2014 Pioneer Day concert. Music and lyrics by K. Newell Dayley.

Mataupu Faavae ma Feagaiga 136

E mafai ona ou fesoasoani e faataunuu le finagalo o le Alii ao o’u mulimuli i Ana fautuaga.

Ina ua mavae le maliu o Iosefa Samita, sa tuliesea le Au Paia mai Navu. Ua latou feagai nei ma se malaga e 1,300 maila (2,100 km) i se vao matautia. O Polika Iaga, Peresitene o le Korama a Aposetolo e Toasefululua, sa popole i le ala o le a faasaoina ai le Au Paia mai le savaliga. I se nofoaga le tumau e ta’ua o Winter Quarters, sa ia aioi atu ai mo se taitaiga. O le tali a le Alii o loo tusia i le vaega 136. “E ala i le fesoasoani atu i le Au Paia ia manatua o a latou amioga i le malaga sa tutusa lava le taua ma lo latou taunuuga, ma na fesoasoani le faaaliga e suia le malaga agai i sisifo mai se manaoga le fiafia i se aafiaga faaleagaga taua na laugatasia ai” (“This Shall Be Our Covenant,” i le Revelations in Context, 308).

Manatua le tulaga lenei a o e suesue i le vaega 136. O le a se fautuaga e te maua e mafai ona fesoasoani e liliu ai se tofotofoga faigata i lou olaga “i se aafiaga faaleagaga … taua”? Atonu foi e te mafaufau loloto pe faapefea ona fesoasoani lenei fautuaga ia te oe e te ausia ai le finagalo o le Alii i lou lava olaga, e pei ona sa fesoasoani i uluai Au Paia i le latou malaga.

Tagai foi i le “This Shall Be Our Covenant,” i le Revelations in Context, 307–14; “O Mai, Outou o le Au Paia,” Viiga, nu. 17; O Autu o le Talafaasolopito o le Ekalesia, “Faasologa o Le Taitaiga o le Ekalesia,” Gospel Library.

Faamatalaga mai i le Winter Quarters, saunia e Greg Olsen

Tagata, Nofoaga, Mea e Tutupu

• Iosefa Samita le Itiiti

• Polika Iaga

• Maliliu o Iosefa ma Ailama Samita

Kiliki e vaai i isi mea

Fautuaga mo le Aoaoina o Tamaiti

Mataupu Faavae ma Feagaiga 135:1–2, 4–5

Na tuuina atu e Iosefa ma Ailama Samita o la’ua ola mo Iesu Keriso ma Lana talalelei.

• Aotele mo lau fanau le Mataupu Faavae ma Feagaiga 135:1 pe faasoa atu le “Mataupu 57: Ua Fasiotia le Perofeta” (i le Tala o le Mataupu Faavae ma Feagaiga, 201–5, po o le vitiō talafeagai i le Gospel Library). Atonu o se avanoa lelei lea mo oe ma lau fanau e faasoa atu ai ou lagona e uiga i le taulaga na faia e Iosefa ma Ailama mo le Faaola ma Lana talalelei.

  Chapter 57: The Prophet Is Killed: June 1844

• O loo ta’u mai i leMataupu Faavae ma Feagaiga 135:4–5 e faapea, na faitau e Ailama Samita se fuaitau mai le Tusi a Mamona a o lei alu atu o ia i le Falepuipui o Karefasi. E mafai e oe ma lau fanau ona faitau faatasi lenei fuaitau (tagai i le Eteru 12:36–38). Na mafai faapefea e nei fuaiupu ona faamafanafanaina Ailama? E mafai foi ona e faasoa atu mau e aumaia ia te oe le mafanafana pe a e popole pe faanoanoa.

• E mafai e oe ma lau fanau ona matamata i ata o perofeta (tagai i le Tusi Ata o le Talalelei, nu. 7, 14, 67) ma talanoa e uiga i nisi o mea e finagalo le Atua i perofeta e fai. O le a le mea na taulagaina e nei perofeta mo le Faaola?

  

I le aiga, o le aoaoina ma le ola ai e le tuueseeseina. “E fesootai vave lava le talalelei i totonu o le aiga. O iina o tagata o loo outou aoaoina le talalelei o tagata ia o le a outou ola faatasi —i aso uma. O le mea moni, o le tele o taimi, o le ola ai i le talalelei o le auala lea tatou te aoaoina ai le talalelei” (Aoao Atu i le Ala a le Faaola, 31).

Mataupu Faavae ma Feagaiga 135:3

O Iosefa Samita o se perofeta ma se molimau o Iesu Keriso.

• Ina ia fesoasoani i lau fanau ia manatua ma talisapaia le ala ua faamanuiaina ai i tatou e le Alii e ala i le misiona a Iosefa Samita, e mafai ona e faaali atu ni mea faitino e faatusa i mea na faia e Iosefa, e pei o le Tusi a Mamona, le Mataupu Faavae ma Feagaiga, po o se ata o se malumalu (tagai foi i le itulau o gaoioigao lenei vaiaso). Ona vaavaai lea o lau fanau i le Mataupu Faavae ma Feagaiga 135:3 mo nisi mea na faia e Iosefa Samita e fesoasoani ai ia i tatou ia latalata atili atu i le Tama Faalelagi ma Iesu Keriso. Valaaulia lau fanau e faasoa mai pe aisea latou te faafetai ai mo nei mea.

O Le Perofeta Amerika, saunia e Del Parson

Mataupu Faavae ma Feagaiga 136

E mafai ona faamanuiaina a’u e le Alii pe a ou tauivi.

• Mafaufau e tuu se ata o le Malumalu o Navu i le tasi itu o se potu ma fatu se malutaga faigofie i le isi itu. Valaaulia lau fanau e faapotopoto latalata i le ata, ma faamatala atu ia i latou e uiga i le Au Paia o e na tuua Navu ina ua mavae le maliu o Iosefa Samita (tagai i mataupu 58, 60, ma le 62 i le Tala o le Mataupu Faavae ma Feagaiga, 206–8, 211–16, 222–24, po o vitiō talafeagai i le Gospel Library). Faamamafa atu le faatuatua na i ai i nei Au Paia ia Iesu Keriso, ma valaaulia lau fanau e savavali i le malutaga e fai ma sui o le malaga i Winter Quarters. E mafai ona latou usuina se pese e pei o le “To Be a Pioneer” (Children’s Songbook, 138–19) a’o latou savavali.

  Chapter 58: A New Leader for the Church: July–August 1844

  Chapter 60: The Saints Leave Nauvoo: September 1845–September 1846

  Chapter 62: The Saints Establish Winter Quarters: 1846–1847

• Faamalamalma atu e faapea i le Mataupu Faavae ma Feagaiga 136, na tuuina mai ai e le Alii ni fautuaga e fesoasoani ai i le Au Paia i la latou faigamalaga agai atu i le Vanu o Sate Leki. Fesoasoani i lau fanau e sue se mea i lenei faaaliga e mafai ona latou maua ai le lototele mo lenei malaga (tagai i fuaiupu 4, 10–11, 18–30). E mafai faapefea e lenei fautuaga ona fesoasoani ia i tatou i tofotofoga o loo tatou feagai i aso nei?

Mo nisi manatu, tagai i le lomiga o lenei masina o le mekasini o le Uo .

E Le Sili Lava le Alofa o Se Tasi i Lenei Alofa, saunia e Casey Childs