Faamatalaga mai le Iosefa Samita i Navu, 1840, saunia e Theodore Gorka

10–16 Novema: “Ua Ou Vaai i Au Taulaga i le Usiusitai”

Mataupu Faavae ma Feagaiga 129–132

E ala mai ia Iosefa Samita, na aveese ai e le Alii nisi o mealilo mai le faavavau. O le silisiliese o le Atua, o le mamalu o le lagi, ma le telē o le faavavau e mafai ona foliga mai e toetoe lava a masani ai i le malamalama o le talalelei toefuataiina, e oo lava i mafaufau utiuti e pei o i tatou. O faaaliga i le Mataupu Faavae ma Feagaiga 129–32 o ni faataitaiga lelei. E faape‘i le Atua? E “i ai sona tino … e mafai ona pa‘i i ai e pei o le tagata.” E faape’i le lagi? “O lea lava mafutaga ua i ai ia te i tatou iinei o le a i ai ia te i tatou iina” (Mataupu Faavae ma Feagaiga 130:22, 2). O le mea moni, o se tasi o upumoni sili ona fiafia e uiga i le lagi e faapea, e mafai ona aofia ai a tatou sootaga faapelepele faaleaiga, pe afai e faamauina i le pule tatau. O upumoni e pei o nei e mafai ona avea ai le lagi ma mea e le mamao—e mamalu ae mafai ona oo i ai.

Ae peitai, e i ai taimi e fai mai ai le Atua tatou te faia ni mea e matuai le logolelei lava ma le mafai ona [tatou] oo atu i ai. Mo le toatele o le Au Paia anamua, o faaipoipoga autaunonofo sa o se tasi lea o na poloaiga. O se tofotofoga ogaoga o le faatuatua mo Iosefa Samita, lona faletua o Ema, ma le toetoe o i latou uma o e na mauaina. Ina ia faamanuiaina i lenei tofotofoga, sa latou manaomia ai le sili atu nai lo na’o ni lagona lelei e uiga i le talalelei toefuataiina; sa latou manaomia le faatuatua i le Atua sa sili atu le loloto nai lo o lenā. Ua le o toe i ai lea poloaiga i aso nei, ae o le faataitaiga faamaoni o tagata o e sa soifua ai o loo i ai pea. Ma o lenei faataitaiga e musuia ai i tatou pe a talosagaina i tatou e faia a tatou lava “taulaga i le usiusitai” (Mataupu Faavae ma Feagaiga 132:50).

Manatu mo le Aoaoina i le Aiga ma i le Ekalesia

Mataupu Faavae ma Feagaiga 130–132

E finagalo le Atua e faaeaina Lana fanau.

E tele mea tatou te le iloa e uiga i le faaeaga po o le olaga i le tikeri aupito maualuga o le malo selesitila—o le ituaiga olaga o loo soifua ai le Atua. O le tele lava atonu e le oo i ai lo tatou tomai i le taimi nei e malamalama ai. Ae ua faaali mai e le Atua ni nai faaiteite taua, ma o le tele lava e maua i le Mataupu Faavae ma Feagaiga 130–32. Atonu e te faitau ma ni fesili faapenei i lou mafaufau: O le a se mea ua ou aoaoina e uiga i le Atua? O le a se mea ua ou aoaoina e uiga i le olaga pe a mavae le olaga lenei? E mafai faapefea e lenei faamatalaga e uiga i le ola e faavavau ona faamanuiaina lo’u olaga i le taimi nei?

Tagai foi i le “Our Hearts Rejoiced to Hear Him Speak,” i le Revelations in Context, 277–80.

Mataupu Faavae ma Feagaiga 130:20–21; 132:5

E faamanuia e le Atua tagata o e usiusitai i Ana tulafono.

E faapefea ona e faaupuina, i au lava upu, mea o loo aoao mai e le Alii i le Mataupu Faavae ma Feagaiga 130:20–21 ma le 132:5? Mafaufau loloto pe na faapefea ona faaalia lenei mataupu faavae i lou olaga.

O nisi taimi, e tusa lava pe tatou te usiusitai i le Atua, o faamanuiaga tatou te faamoemoe i ai o le a le vave oo mai. E faapefea ona e faatumauina lou faatuatua ma le faamoemoe pe a tupu lenei mea? Vaavaai mo ni malamalamaaga i le sāvali a Elder D. Todd Christofferson “O Lo Tatou Sootaga ma le Atua” (Liahona, Me 2022, 78–80).

Tagai foi i le 1 Nifae 17:35; Mataupu Faavae ma Feagaiga 82:10.

Mataupu Faavae ma Feagaiga 132:13–21

Na faia e le Tama Faalelagi ia mafai ona faavavau aiga.

E ala mai i le perofeta o Iosefa Samita, na toefuatai mai ai e le Alii le upumoni e faapea, o le faaipoipoga ma sootaga faaleaiga e mafai ona faavavau. A o e faitauina le Mataupu Faavae ma Feagaiga 132:13–21, vaavaai mo fasifuaitau e fesoasoani e te malamalama ai i le eseesega i le va o mea o le a “tumau” e faavavau ma mea o le a lē tumau. O le a sou manatu i le uiga mo se sootaga faalefaaipoipoga e “ala atu i [le Alii]”? (fuaiupu 14).

I lana sāvali “I Le Viia ai o i Latou o E Laveai,” na faatusatusa ai e Peresitene Dieter F. Uchtdorf sootaga faalefaaipoipoga e faavavau ma mea e “faaaoga ma toe lafoa’i” (Liahona, Me 2016, 77–78). O le a se mea o aoao mai e lenei eseesega ia te oe e uiga i le auala e faafailele ai—pe saunia ai mo—se sootaga faalefaaipoipoga? Mafaufau i ou sootaga faaleaiga—i le taimi nei ma le lumanai—a o e faitauina le sāvali a Elder Uchtdorf. O le a se mea ua e maua iina e avatu ai ia te oe le faamoemoe ia Keriso mo ou sootaga faaleaiga?

Sa faasoa mai e Peresitene Henry B. Eyring lenei fautuaga na ia mauaina ina ua popole o ia e uiga i le tulaga o lona aiga: “Tau lava o lou ola agavaa mo le malo selesitila, ma o le a sili atu ona matagofie fuafuaga faaleaiga nai lo le mea e mafai ona e mafaufauina” (i le “O Se Aiga e Afio ai le Agaga o le Alii,” Liahona, Me 2019, 25). E mafai faapefea e lenei fautuaga ona fesoasoani ia te oe po o se tasi e te iloa?

Tagai foi i le “E Mafai na Fa’avavau Aiga,” Viiga, nu. 183; Autu o le Talalelei, “Faaipoipoga,” Potutusi o le Talalelei.

E mafai ona faamauina se faaipoipoga mo le faavavau i le maota o le Alii.

Mataupu Faavae ma Feagaiga 132:1–2, 29–40

O le faaipoipoga autaunonofo e faatoa taliaina e le Atua pe a poloai mai ai o Ia.

O le toatele o tagata ua faitau i le Feagaiga Tuai atonu sa mafaufau e uiga ia Aperaamo, Iakopo, Mose, ma isi na faaipoipo i ni avā e tele. Pe na mulilua ea nei auauna a le Alii? Pe na faatagaina e le Atua a latou faaipoipoga? Sa i ai se fesili foi faapea a Iosefa Samita. Vaavaai mo tali na tuuina mai e le Atua i le Mataupu Faavae ma Feagaiga 132:1–2, 29–40.

O le faaipoipoga i le va o se alii e toatasi ma se tamaitai e toatasi o le tulaga faatonuina lea a le Atua mo le faaipoipoga (tagai i le ulutala o le vaega o le Folafolaga Aloaia 1; Iakopo 2:27, 30). Ae ui i lea, sa i ai vaitaimi na poloaiina ai e le Atua Lana fanau ina ia faia faaipoipoga autaunonofo.

O tausaga amata o le Ekalesia toefuataiina o se tasi lea o na vaitaimi o le tuusaunoaga. Afai e te manao e aoao atili e uiga i faaipoipoga autaunonofo i le Au Paia anamua, tagai i le “Mercy Thompson and the Revelation on Marriage” (i le Revelations in Context, 281–93); Au Paia, 1:290–92, 432–35, 482–92, 502–4; Topics and Questions, “Plural Marriage in The Church of Jesus Christ of Latter-day Saints,“ Gospel Library; “Aisea Na Tatau ai mo Iosefa Samita ma Isi ona Faia Autaunonofo?” (vitio), ChurchofJesusChrist.org.

Why was it necessary for Joseph Smith and others to practice polygamy?

A question from the Worldwide Devotional: A Face to Face Event with Elder Cook on September 9, 2018

Tagata, Nofoaga, Mea e Tutupu

• Ema Hale Samita

• Fanny Alger

• Helen Mar Kimball Whitney

• O Tala o le Uluai Faaaliga

Kiliki e vaai i isi mea

Fautuaga mo le Aoaoina o Tamaiti

Mataupu Faavae ma Feagaiga 130:2, 18–19; 132:13, 19

E finagalo le Tama Faalelagi ia ou taulai atu i mea e faavavau.

• O le a le mea o loo aoao mai e le Mataupu Faavae ma Feagaiga 132:13 ia i tatou e uiga i mea o le lalolagi? Atonu e mafai e oe ma lau fanau ona tapenaina se atopau po o se atofaafafa faatasi ma aitema e fai ma sui o mea na, e tusa ma le Mataupu Faavae ma Feagaiga 130:2, 18–19; 132:19, e mafai ona tatou aveina atu i le isi olaga.

Mataupu Faavae ma Feagaiga 130:20–21; 132:5, 21–23

E faamanuia a’u e le Atua a o ou usitai i Ana tulafono.

• Atonu o se faatusatusaga faigofie e mafai ona aoao ai lau fanau e uiga i le usiusitai i poloaiga a le Atua. Mo se faataitaiga, e mafai ona e fai atu ia i latou e ta’u atu ia te oe faatonuga e savali ai i se mea, e pei o le alu i le aoga po o se fale o le Ekalesia. O le a le mea e tupu pe a tatou lē mulimuli i taiala? Ona tou faitauina lea o le Mataupu Faavae ma Feagaiga 130:21 ma faatusatusa nei faatonuga i poloaiga ua tuuina mai e le Atua ia i tatou.

• E mafai foi ona outou usuina faatasi se pese e faatatau i le usiusitai, e pei o le “Tausi Poloaiga” (Tusipese a Tamaiti, 68), ma vaavaai mo upu i le Mataupu Faavae ma Feagaiga 130:20–21 ma le 132:5 e talitutusa ma upu o loo i le pese. E faapefea ona faamanuiaina i tatou e le Atua a o tatou tauivi e tausia Ana poloaiga?

Mataupu Faavae ma Feagaiga 130:22

O le Tama Faalelagi ma Iesu Keriso e iai o la tino e ola pea faaletino.

• A uma ona faitau faatasi le Mataupu Faavae ma Feagaiga 130:22 , e mafai e oe ma lau fanau ona vaai i se ata o Iesu Keriso ma faasino atu i Ona foliga, Lona fofoga, ma isi vaega o Lona tino. Ona mafai lea e lau fanau ona latou faasino i vaega lava ia e tasi o o latou tino. Tau atu ia i latou pe aisea e tāua ai ia te oe le iloa o o tatou tino e foliga e pei o tino o le Tama Faalelagi ma Iesu.

Ona o sauniga o le maota o le Alii, e mafai ai ona faavavau aiga.

Mataupu Faavae ma Feagaiga 132:19

Na faia e le Tama Faalelagi ia mafai e aiga ona faatasia e faavavau.

• Fesoasoani i lau fanau e su’e faataitaiga o mea e lē tumau e faavavau—o meaai e leaga, fugalaau e mamae, ma isi. Ona vaai faatasi lea i le Mataupu Faavae ma Feagaiga 132:19 ma sue fuaitau autu e pei o le “feagaiga e faavavau,” “faamauina,” “e oo atu i le faavavau atoa,” ma le “faavavau ma faavavau lava.” (Tagai foi i le “Mataupu 55: O Se Faaaliga e uiga i le Faaipoipoga,” i le Tala o le Mataupu Faavae ma Feagaiga, 198, po o le vitiō talafeagai i le Gospel Library.) E mafai foi ona e tilotilo i ata o lou aiga ma molimau atu ua faia e le Alii ia mafai, e ala i sauniga ma feagaiga o le malumalu, mo aiga ina ia tumau e faavavau.

Chapter 55: A Revelation about Marriage: July 1843

Ia nofouta i tulaga faaleaiga. “O tamaiti i nei aso ua i ai i latou i le tele o foliga eseese ma lavelave faaleaiga. … E manaomia ona [tatou] aapa atu ia i [latou] o loo lagonaina le tuuatoatasi, faagaloina, pe tuulafoaiina i tuāpā” (Neil L. Andersen, “Ai Se Talia i Latou ua Talia A’u,” Liahona, Me 2016, 49, 52).

Mo nisi manatu, tagai i le lomiga o lenei masina o le mekasini o le Uo .

O se potu mo faamauga i totonu o le Maumalu o Pale Farani.