15–21 nō Tītema :« ’Ua riro te ’utuāfare ’ei tumu nō te ’ōpuara’a a tei Hāmani »

Te ’Utuāfare : E Poro’i i tō te Ao nei

Hou tō tātou fānaura’a, ’ua riro tātou ’ei tuha’a nō te hō’ē ’utuāfare—te ’utuāfare o tō tātou nā Metua i te ao ra. Tē tāmau noa nei te reira hōho’a i ni’a i te fenua nei. E ’imi te mau ta’ata ato’a i ni’a i te fenua nei i te mau rāve’a nō te fa’ariro i tō rātou ’utuāfare ’ei mea maita’i roa.

’Aita e ha’apāpūra’a e riro te mau ’utuāfare i ni’a i te fenua nei ’ei mau ’utuāfare maita’i roa a’e ’e aore rā tere maita’i. Terā rā, mai tā te peresideni Henry B. Eyring i ha’api’i, e hōro’a te mau ’utuāfare « i te rāve’a maita’i roa a’e i te mau tamari’i a te Atua ’ia fa’ari’ihia rātou i teie ao ma te here i ni’a i te fenua nei tei piri atu i te here tā tātou i ’ite i te ra’i ra—te here metua » (« Haʼaputuputuraʼa i te ʼutuāfare o te Atua », Liahona, Mē 2017, 20). Nō tōna ’itera’a e’ita te mau ’utuāfare i te mea parauti’a ’e te ’arohia nei rātou e te ’enemi, ’ua tono mai te Atua i tāna Tamaiti here nō te fa’aora ia tātou ’e i tō tātou mau ’utuāfare. ’E ’ua tono ato’a ’oia i te mau peropheta i te mau mahana hope’a nei ma te hō’ē parau poro’i nō te pāruru ’e nō te ha’apūai i te mau ’utuāfare. Mai te mea e pe’e tātou i te mau peropheta ’e e tu’u tātou i te fa’aro’o i roto i te Fa’aora, noa atu e ’ere te mau ’utuāfare tāhuti nei i te mea maita’i roa, tē vai nei rā te tīa’ira’a nō te mau ’utuāfare—i ni’a i te fenua nei ’e i te ra’i.

Mana’o nō te ’apo i te ha’api’ira’a i te ’utuāfare ’e i te fare purera’a

« ’Ua riro te ’utuāfare ’ei tumu nō te ’ōpuara’a a tei Hāmani. »

« Te ’Utuāfare : E Poro’i i tō te Ao nei » e mea pāpū roa nō ni’a te reira i te mau ’utuāfare. E ’ōpuara’a ato’a rā te reira nō te fa’aorara’a a te Atua. Hō’ē rāve’a nō te tuatāpapa i te poro’i ’o tē pāpa’ira’a ïa i te mau pereota orara’a hou te tāhuti nei, orara’a tāhuti, ’e orara’a i muri a’e te tāhuti nei i ni’a i te hō’ē ’api parau ’e ’ia tāpura e aha tā te poro’i e ha’api’i nei nō ni’a i teie mau tumu parau tāta’itahi. E aha tā ’outou i ’apo mai ’ia tuatāpapa ’outou i te poro’i mai te reira ? Nāhea te reira i te tauturu ia ’outou ’ia māramarama nō te aha e mea faufa’a roa te fa’aipoipora’a ’e te ’utuāfare nō te fa’anahora’a a te Atua ? Nāhea te mau parau mau i roto i te poro’i i te fa’auru i tā ’outou mau mā’itira’a ?

E rave rahi mau ta’ata, nō te mau tumu rau, e mata’u paha nō ni’a i te fa’aipoipora’a ’aore rā te aupurura’a i te mau tamari’i. Mai te mea e parau mai te hō’ē hoa ia ’outou : « ’Aita roa vau e hina’aro e fa’aipoipo ’aore rā e fa’ari’i i te hō’ē ’utuāfare », e aha ïa tā ’outou e parau ? Pēnei a’e e nehenehe ’outou e ’imi i roto i te poro’i i te hō’ē mea o te tauturu i tō ’outou hoa ’ia tīa’i i roto i te fa’anahora’a a te Atua.

Te tahi ato’a uira’a e uihia paha ia ’outou—’e ’aore rā tā ’outou e ui ia ’outou iho—o te hō’ē ïa mai teie : « E aha te tupu mai te mea ’aita te huru o tō’u ’utuāfare e tū’ati ra i te mea i fa’a’itehia i roto i te poro’i nō ni’a i te ’utuāfare ? » Teie e piti vāhi e nehenehe ’outou e ’imi i te a’o a te peropheta : te tuha’a « Hō’ē tauira’a pūai » i roto i te a’ora’a a Elder Dieter F. Uchtdorf « ’O Iesu Mesia te pūai o te mau metua » (Liahona, Mē 2023, 55–59) ’e nā paratarāfa hope’a e maha o te parau poro’i a Elder D. Todd Christofferson « Nō te aha te fa’aipoipora’a, nō te aha te ’utuāfare » (Liahona, Mē 2015, 52).

E aha te mana’o i fa’auruhia mai nā roto i te mea tā ’outou i tuatāpapa ?

Hi’o ato’a Dallin H. Oaks, « Te fa’anahora’a ’e te poro’i », Liahona, Novema 2017, 28–31 ; Topics and Questions, « ’Utuāfare », Vaira’a buka ’evanelia.

« E tamaiti ’e ’aore rā e tamāhine here te [ta’ata] tāta’itahi nō te mau metua i te ao ra. »

Pinepine tātou i te feruri i te poro’i nō ni’a i te ’utuāfare ’ei arata’i nō te orara’a ’utuāfare. Tē ha’api’i ato’a nei rā te reira i te mau parau mau faufa’a rahi nō ni’a i tō tātou ’utuāfare i te ra’i ’e i tō tātou ti’ara’a ta’ata mure ’ore. Nō te aha e mea faufa’a nō ’outou ’ia ’ite e tuha’a tātou pā’āto’a nō teie ’utuāfare ? Nāhea teie parau mau i te fa’auru i te mau mā’itira’a tā ’outou e rave ?

Hi’o ato’a « E tamari’i au nā te Atua ra », Te mau hīmene, N°185.

« E mea pāpū a’e te ’oa’oa i roto i te orara’a ’utuāfare ’ia fa’atumuhia te reira i ni’a i te mau ha’api’ira’a a te Fatu ra ’o Iesu Mesia. »

’A feruri i te mau paratarafa 6 ’e te 7 o te poro’i nō ni’a i te ’utuāfare ’ei hōho’a nō te « ’oa’oa i roto i te orara’a ’utuāfare. » ’A tai’o ai ’outou i teie nā paratarafa, ’a hi’o i te mau parau tumu nō te « mau fa’aipoipora’a ’e te mau ’utuāfare manuia. » E nehenehe ’outou e feruri i te mau hi’ora’a nō teie mau parau tumu tā ’outou i ’ite i roto i tō ’outou iho ’utuāfare ’aore rā i roto i te tahi mau ’utuāfare. Nāhea teie mau parau tumu i te tauturu ’ia fa’ariro ia Iesu Mesia ’ei niu nō te orara’a ’utuāfare ?

’Ei reira ’a feruri i te hō’ē tā’amura’a i roto i te ’utuāfare tā ’outou e hina’aro e ha’apūai. ’A hāmani i te hō’ē fa’anahora’a, ma te tauturu a te Fa’aora, nō te ’ohipa mai te au i te mau fa’a’itera’a tā ’outou e fa’ari’i.

Hi’o ato’a L. Whitney Clayton, « Te mau fare maita’i a’e », Liahona, Mē 2020, 107–9.

E ti’a i te mau metua ’ia aupuru i tā rātou mau tamari’i i roto i te here ’e te parauti’a.

« Tē ti’aoro nei mātou i te huira’atira ha’apa’o […] ’ia tāpe’a ’e ’ia ha’apūai i te ’utuāfare. »

Tei roto i te paratarafa hope’a o te poro’i nō ni’a i te ’utuāfare te hō’ē pi’ira’a ’ia rave i te ’ohipa. ’A feruri ai ’outou nāhea ’ia pāhono i taua pi’ira’a ra, e tauturu paha te reira ’ia tuatāpapa i te upo’o parau o te poro’i. ’Ei hi’ora’a, e aha te hō’ē poro’i ? E aha tā teie ta’o e tūra’i nei ia ’outou nō ni’a i te parau poro’i a teie parau ? E aha tei fa’ati’a i te Peresidenira’a Mātāmua ’e te pupu o te Tino ’Ahuru Ma Piti ’Āpōsetolo ’ia hāmani i te hō’ē poro’i i tō te ao nō ni’a i te mau ’utuāfare ? E nehenehe ato’a ’outou e hāmani i te hō’ē tāpura nō te mau mea tā ’outou e mana’o ’ei mau parau poro’i tumu nō te poro’i. Nāhea ’outou e fa’aitoito ai i teie mau parau poro’i i roto i tō ’outou orara’a, i roto i tō ’outou ’utuāfare, ’e i roto i tō ’outou huira’atira ?

Hi’o ato’a Bonnie L. Oscarson, « E mau tino pāruru i te Poro’i nō te ’Utuāfare », Liahona, Me 2015, 14–17 ; « Mau tino pāruru nō te fa’aro’o » (video), Vaira’a buka ’evanelia.

Defenders of the Faith

Marie Madeline Cardon and her family were holding a Church service in their home in Italy when an angry mob of men gathered and began shouting for the missionaries to be brought outside. It was Marie who marched out of the house to confront the mob.

Nō te tahi atu ā mana’o, ’a hi’o i te mau ve’a Liahona ’e Nō te pūai o te feiā ’āpī nō teie ’āva’e.

Mana’o nō te ha’api’i i te tamari’i

E mea faufa’a te mau ’utuāfare i roto i te ’ōpuara’a a te Metua i te Ao ra.

• ’A tauturu i te mau tamari’i ’ia feruri i ni’a i te mau mea faufa’a rahi mau ’o tā rātou e hina’aro e fa’a’ite i te mau ta’ata ato’a. ’A fa’a’ite i te mau tamari’i i te hō’ē hōho’a nō « Te ’Utuāfare : E Poro’i i tō te ao nei », ’e ’a fa’ata’a ē ’ua pāpa’i te mau peropheta ’e te mau ’āpōsetolo i te reira nō te parau ia tātou pā’āto’a e faufa’a rahi mau te mau ’utuāfare nō tō tātou Metua i te Ao ra. Nō te aha e mea faufa’a rahi te mau ’utuāfare nōna ? (’a hi’o ato’a i te video « What Is the Purpose of Family ? » [ChurchofJesusChrist.org]).

  What Is the Purpose of Family?

  The family is the divine building block of society.

• ’A fa’a’ite i tā ’outou mau tamari’i i te tahi mea i roto i te poro’i tā ’outou e mana’o ra e ti’a ia tātou pā’āto’a ’ia ’ite. ’A ani i te mau tamari’i ’ia fa’a’ite mai i tō rātou mau mana’o nō ni’a i teie mau parau mau. E aha ïa te mea ta’a ’ē i roto i tō tātou orara’a ’āhani ’aita tātou i ’ite i teie mau mea ? E nehenehe ’outou e hīmene ’āmui i te hō’ē hīmene e tū’ati i ni’a i te mau parau mau e ’itehia i roto i te poro’i, mai te « Je veux suivre le plan de Dieu » (Chants pour les enfants, 86–87).

• I roto i te tuha’a IV nō tāna a’ora’a « Te fa’anahora’a ’e te poro’i » (Liahona, Novema 2017, 30), ’ua fa’ata’a mai te peresideni Dallin H. Oaks nāhea te poro’i nō ni’a i te ’utuāfare i te pāpa’i-ra’a-hia. Pēnei a’e e nehenehe ’outou ’e tā ’outou mau tamari’i e hi’o ’āmui i tāna tātarara’a ’e ’ia paraparau nō te aha ’outou i māuruuru ai i te fa’aurura’a te Fatu i tāna mau tāvini nō te ha’api’i ia tātou i teie mau parau mau nō ni’a i te ’utuāfare.

• E nehenehe ato’a ’outou e fa’a’ite i te mau hōho’a i te mau tamari’i (’aore rā e ani ia rātou ’ia pāpa’i hōho’a i te tahi) ’o te fa’ahōho’a ra i te mau parau mau e ’itehia i roto i te poro’i nō te ’utuāfare. E nehenehe te reira mau hōho’a ’ei hō’ē hiero, hō’ē ’utuāfare e pure ra ’aore rā e ha’uti ’āmui ra, ’aore rā nā ta’ata e fa’aipoipo ra. I muri iho e nehenehe tā ’outou mau tamari’i e ’imi i te mau parau i roto i te poro’i nō te ’utuāfare e tū’ati i te mau hōho’a. E aha tā te Fatu e ha’api’i nei ia tātou nō ni’a i teie mau mea i roto i te poro’i ?

Tē hina’aro nei te Metua i te Ao ra ’ia ’oa’oa te mau ’utuāfare.

’Ia ara maita’i. ’A ha’api’i ai ’outou i te mau parau mau i ha’api’ihia i roto i te poro’i nō te ’utuāfare, ’a ara ē e rave rahi mau tamari’i e ora nei i roto i te mau ’utuāfare ’aita e ha’apa’o ra i te mau parau tumu i fa’ahitihia i roto i te poro’i. ’A feruri nāhea ’outou e nehenehe ai e fa’aitoito ’e e fa’auru ia rātou.

« E tamaiti ’aore rā e tamāhine vārua herehia vau nā te mau metua i te ao ra. »

• ’A hīmene ’āmui ai ’outou « E tamari’i au nā te Atua ra » (Chants pour les enfants, 2–3), e nehenehe ’outou e tāora i te hō’ē pōpō i te hō’ē tamari’i ’a parau ai ’outou : « ’Ua mātau vau i te hō’ē tamari’i nā te Atua te i’oa ’o [te i’oa o te tamari’i]. » I muri iho e nehenehe terā tamari’i e tāora i te tao’a i te tahi atu tamari’i, ma te parau i te hō’ē ā mau parau ’e ma te fa’ahiti i te i’oa o taua tamari’i ra. ’A tauturu i tā ’outou mau tamari’i ’ia ’imi i te pereota « tamaiti ’e ’aore rā tamāhine vārua herehia e nā metua i te ra’i ra » i roto i te poro’i nō ni’a i te ’utuāfare, ’e ’a fa’a’ite i tō ’outou ’itera’a pāpū nō teie parau mau.

E ’oa’oa rahi a’e te mau ’utuāfare ’ia pe’e rātou ia Iesu Mesia.

• Nō te ha’amata i te hō’ē ’āparaura’a nō ni’a i te ha’apūaira’a i tō ’outou ’utuāfare, e nehenehe ’outou ’e tā ’outou mau tamari’i e paraparau nō ni’a i te mea tā tātou e rave nō te ha’apūai i te tahi atu mau mea—mai tō tātou niho, tō tātou tino ’aore rā hō’ē fare. I muri iho e nehenehe ’outou e fa’aau i te reira mai te patura’a i te hō’ē ’utuāfare pūai. ’A tauturu i te mau tamari’i ’ia ’ite i te mau parau tumu keresetiano ’o te arata’i i te ’oa’oa i roto i te orara’a ’utuāfare, e ’itehia i roto i te paratarafa 7 ’o te poro’i nō ni’a i te ’utuāfare (hi’o ato’a i tō teie hepetoma ’api fa’a’ana’anataera’a).

Nō te tahi atu ā mana’o, ’a hi’o i te ve’a Hoa nō teie ’āva’e.