Te Ne Taki ho Nimá, tā fakatātaaʻi ʻe Sandra Rast

24 Fēpuelí–1 Māʻasí

2 Nīfai 26–30

Ko ha Ngāue Fakaofo mo Fakaʻulia

Naʻe folofola ʻa e ʻEikí, “ʻOku ou fekauʻi ʻa e kakai kotoa pē … ke nau tohi ʻa e ngaahi lea ʻa ia ʻoku ou lea ʻaki kiate kinautolú” (2 Nīfai 29:11). ʻE folofola atu ʻa e ʻEikí kiate koe ʻi hoʻo ako ʻEne ngaahi folofolá, ʻo fakafou ʻi he Laumālié. Lekooti ʻa e meʻa ʻokú ke maʻú.

Lekooti e Ngaahi Ongo ʻOkú ke Maʻú

Naʻe tohi ʻe Nifai “ʻOku ou kikite kiate kimoutolu ʻo kau ki he ngaahi ʻaho fakaʻosí” (2 Nīfai 26:14). Ko hono fakalea ʻe tahá, naʻá ne tohi ʻo kau ki hotau kuongá ni. Pea ʻoku ʻi ai ha ʻuhinga ke tau tokanga ki he meʻa naʻá ne mamata ki aí: ʻa e fakaʻikaiʻi ʻe he kakaí mālohi mo e ngaahi mana ʻa e ʻOtuá, mafola ʻa e meheká mo e moveuveú, hono haʻi ʻe he tēvoló e kakaí ʻaki e ngaahi afo mālohí. Kae makehe mei he “ngaahi ngāue ko ʻeni ʻo e fakapoʻuli” ʻi he ngaahi ʻaho kimui ní, (2 Nīfai 26:10, 22) ʻa ia ʻoku taki ʻe he filí, naʻe toe lea ʻa Nīfai ki “ha ngāue fakaofo mo fakaʻulia” ʻe taki ʻe he ʻEikí tonu (2 Nīfai 27:26). Pea ʻe ʻi he ʻēlito ʻo e ngāue ko iá ha tohi—ko ha tohi ʻoku lea mei he efú, ʻokú ne fakahaaʻi e ngaahi loi ʻa Sētané, mo tānakai ʻa e kau angatonú hangē ha fuká. Ko e tohi ko iá, ko e Tohi [ia] ʻa Molomoná, ko e ngāue fakaofó ko e ngāue ia ʻa e Siasi ʻo e ʻEikí ʻi he ngaahi ʻaho kimui ní, pea ko e fakaʻuliá, ko ʻEne fakaafeʻi ia ʻa kitautolu kotoa ke tau kau ki ai, neongo hotau ngaahi vaivaí.

Ngaahi Fakakaukau ki hono Ako Fakataautaha ʻo e Folofolá

2 Nīfai 26:20–33

ʻOku fakaafeʻi ʻe Sīsū Kalaisi ʻa e tokotaha kotoa ke haʻu kiate Ia.

Naʻe akoʻi ʻe he Palōfita ko Siosefa Sāmitá ko e Tamai Hēvaní ʻoku “taʻe-fakangatangata ange ʻa ʻEne ʻaloʻofá mo ʻEne ngaahi tāpuakí, ʻi heʻetau tuʻunga mateuteu ke tui mo maʻu kinautolú” (The Joseph Smith Papers, “History, 1838–1856, Volume D-1,” p. 4 [addenda], josephsmithpapers.org). Lau ʻa e meʻa ne tomuʻa mamata ki ai ‘a Nīfaí ʻi he 2 Nīfai 26:20–22 mo e meʻa naʻá ne akoʻi fekauʻaki mo e Fakamoʻuí ʻi he veesi 23–33, pea fakafehoanaki ʻeni ki he fakamatala ʻa Siosefa Sāmitá. Ko e hā ʻokú ke ako fekauʻaki mo e taʻe-fakangatangata ʻo e ʻaloʻofa ʻa e ʻEikí? Ko e hā te ke lava ʻi hoʻo hoko ko e mēmipa ʻo e Siasi ʻo Sīsū Kalaisí ke ke anga faka-Kalaisi lahi ange ʻi hoʻo tōʻonga ki he fānau ʻa e ʻOtuá?

Vakai foki, 3 Nīfai 18:30–32.

2 Nīfai 26–27

Ko e hā ʻa e tohi ʻoku lau ki ai e ngaahi vahe ko ʻeni?

ʻOku tomuʻa fakahā ʻe he kikite ʻa Nīfai ʻi he 2 Nīfai 26–27, ʻa ia ʻoku fakamatala lahi mei ha kikite ʻa ʻĪsaia kimuʻa (vakai, ʻĪsaia 29), ʻa hono maʻu ko ia e Tohi ʻa Molomoná. ʻOku fakamatalaʻi ʻe he kikité ʻa e ngaahi meʻa ko ʻení:

• Ko e ngaahi lea ʻa e hako ʻo Līhaí (hono hakó) ʻi heʻenau lea “mei he loto efú” hangē “ha laumālie ʻuli” kuo ʻosi “fakamaʻu ʻi ha tohí” (2 Nifai 26:14–17; vakai foki, ʻĪsaia 29:4).

• Naʻe ʻoange ha konga ʻo e tohí ki ha tangata poto ʻa ia naʻá ne pehē, “ʻE ʻikai te u lava ʻo lau ia” (2 Nīfai 27:15–20; Siosefa Sāmita—Hisitōliá 1:64–65; vakai foki, ʻĪsaia 29:11).

Makehe meia ʻĪsaia, naʻe lave mo ha kau palōfita kehe ʻi he Tohi Tapú ki he Tohi ʻa Molomoná, neongo ʻoku ʻikai ke nau ui ia ʻaki hono hingoá. Hangē ko ʻení, ʻoku lau e ʻIsikeli 37:15–20 ki ha ““vaʻakau ʻo Siosefa,” ʻa ia ʻe lava ke ʻuhinga ki he lekooti ʻo e kakai Nīfaí, ko e hako ʻo Siosefa. ʻE hoko ʻo taha ʻa e lekooti ko ʻení mo e “vaʻakau ʻo Siutá,” ʻo ʻuhinga ki he Tohi Tapú.

ʻE lava ke maʻu ha ngaahi sīpinga kehe ʻi he Fakahinohino ki he Folofolá, “Book of Mormon” (scriptures.ChurchofJesusChrist.org).

2 Nīfai 28

ʻOku feinga ʻa Sētane ke kākaaʻi.

ʻOku ʻasi ʻi he ngaahi fakamatala ʻa Nīfai ʻi he 2 Nifai 28 ki he ngaahi ʻaho fakaʻosí ha konga lahi ʻo e ngaahi loi mo e founga kākā ʻa Sētané. Vakai angé pe te ke lava ʻo maʻu kinautolu (hangē ko ʻení, vakai, veesi 6, 8, 21–23, 29). Ko e hā ʻoku fie maʻu ai ke ke ʻilo fekauʻaki mo e ngaahi loi ʻa Sētané? Ko e hā te ke fai ʻi he taimi ʻe feinga ai ʻa e filí ke kākaaʻi koé?

2 Nīfai 28:27–31; 29

ʻOku kei foaki mai ʻe he ʻOtuá e fakahaá ke tataki ʻEne fānaú.

ʻI heʻetau hoko ko e Kau Māʻoniʻoni ʻi he Ngaahi ʻAho Kimui Ní, ʻoku tāpuekina lahi kitautolu ʻaki e ngaahi folofola ʻa e ʻOtuá, pea ʻe lava leva ke fakaʻaongaʻi e ngaahi fakatokanga ʻa Nīfaí kiate kitautolu: kuo pau ke ʻoua naʻa tau teitei ongoʻi “kuo feʻunga!” ʻI hoʻo lau e ngaahi fakatokanga ʻi he 2 Nīfai 28 mo e 29, fakalaulauloto ki ha ngaahi fehuʻi hangē ko ʻení:

• Ko e hā e ongo ʻoku finangalo ʻa e Fakamoʻuí ke u maʻu mo tali ʻaki ʻEne folofolá?

• Ko e hā ʻoku faʻa “ʻita” ai e kakaí he taimi ʻe niʻihi fekauʻaki mo e lahi ange ʻa e moʻoni ʻoku maʻu mei he ʻOtuá? (2 Nīfai 28:28). Kuó u ongoʻi pehē nai? Kapau ko ia, ʻe founga fēfē haʻaku ongoʻi ngofua ange ke tali ʻa e moʻoní?

• Ko e ʻuhinga ki he hā ʻa e pehē ke tali e folofoa ʻa e ʻOtuá? Te u lava fēfē ke fakahaaʻi kiate Ia ʻoku ou fie maʻu lahi ange ʻa ʻEne folofolá?

Vakai foki, ʻAlamā 12:10–11; 3 Nīfai 26:6–10.

2 Nīfai 29–30

Naʻe teuteu ʻe he ʻOtuá e Tohi ʻa Molomoná maʻa hotau kuongá.

Naʻe ʻilo ʻe Nīfai ʻi he fakahā, kimuʻa ʻaupito pea toki hiki kakato e Tohi ʻa Molomoná, ʻe hoko ʻi ha ʻaho “[ʻo] ʻaonga lahi ia ki he fānau ʻa e tangatá” (2 Nīfai 28:2). Ko e hā ‘oku mahuʻinga lahi ai kiate koe ‘a e Tohi ‘a Molomoná? Fakakaukau ki he fehuʻi ko ʻení ʻi hoʻo lau ‘a e 2 Nīfai 29–30. Ko e hā ha niʻihi ʻo e ngaahi ngāue “fakaofo” ʻoku fakahoko ʻe he ʻOtuá ʻi māmani pea ʻi hoʻo moʻuí ʻo fakafou ʻi he Tohi ʻa Molomoná?

Ngaahi Fakakaukau ki he Ako Fakafāmili e Folofolá mo e Efiafi Fakafāmili ʻi ʻApí

ʻI hoʻo lau mo ho fāmilí e folofolá, ʻe lava ke tokoniʻi koe ʻe he Laumālié ke ke ʻiloʻi ʻa e ngaahi tefitoʻi moʻoni ke fakamamafaʻi mo aleaʻí kae lava ke feau e ngaahi fie maʻu ho fāmilí. Ko ha ngaahi fakakaukau ʻeni ʻe niʻihi.

2 Nīfai 26:12–13

Naʻe akoʻi ʻe Nīfai ʻoku fakahā ʻe Sīsū Kalaisi Ia ʻo fakafou ʻi he Laumālie Māʻoniʻoní. Ko e hā ha ngaahi aʻusia ʻe lava ke fevahevaheʻaki ʻe he kau mēmipa ʻo e fāmilí fekauʻaki mo ha taimi naʻe fakamālohia ai ʻe he Laumālie Māʻoniʻoní ʻenau fakamoʻoní?

2 Nīfai 26:22; 28:19–22

Mahalo ʻe fiefia homou fāmilí ʻi ha lēsoni fakataumuʻa ʻoku fakatātaaʻi ai e meʻa ʻoku akoʻi ʻe he 2 Nīfai 26:22 fekauʻaki mo e tēvoló. ʻI hoʻo lau fekauʻaki mo e ngaahi founga ʻa Sētane ʻi he 2 Nīfai 28:19–22, te ke lava ʻo takatakai ha tuʻoni filo ʻi he ongo fasiʻanima ʻo ha taha ke ne fakafofongaʻi ha “filo vavae.” ʻOku tatau fēfē ha filo vavae mo e ngaahi fakatauele ʻa Sētané? ʻE founga fēfē haʻane lava ʻo hoko koha afo mālohi? ʻE lava fēfē ke tau ʻiloʻi e ngaahi loi ʻa Sētané?

Naʻe fakafehoanaki ʻe Nīfai ʻa e ngaahi fakatauele ʻa e tēvoló ki “ha filo vavae.”

2 Nīfai 27:20–21

Ko e hā nai e ʻuhinga ʻa e ʻEikí ʻi he taimi naʻá Ne folofola ai, “ʻOku ou mafai ke fai ʻa ʻeku ngāue pē ʻaʻakú”? ʻOku kaunga fēfē ʻa e moʻoni ko ʻení ki he founga ʻo ʻetau ngāue ʻi Hono Siasí?

2 Nīfai 28:30–31

ʻE lava nai homou fāmilí ke fakakaukau ki ha faʻahinga meʻa, hangē ko e fakahā mei he ʻOtuá, ʻe lelei tahá ke maʻu fakakongokonga iiki mei he taimi ki he taimi? Ko e hā ʻoku fakahā mai ai ʻe he ʻOtuá ʻa e moʻoní “ʻi he ʻotu lea ki he ʻotu lea, ʻi he akonaki ki he akonaki, ʻo siʻi ʻi heni pea siʻi ʻi hena,” kae ʻikai fakaʻangataha mai peé?

2 Nīfai 29:7–9

Ko e hā ʻa e taumuʻa ʻoku feinga ʻe ʻEikí ke Ne fakamoʻoniʻi pe fakahaaʻi ʻaki e Tohi ʻa Molomoná?

Ke maʻu ha ngaahi fakakaukau lahi ange ki hono akoʻi ʻo e fānaú, vakai ki he fokotuʻutuʻu ʻo e uike ní ʻi he Haʻu, ʻo Muimui ʻIate Au—Maʻá e Palaimelí.

Fakatupulaki e Ako Fakatāutahá

Vahevahe e ngaahi fakakaukaú. ʻE lava ʻo fakalahi hoʻo mahinó ʻi hono aleaʻi mo e niʻihi kehé e meʻa ʻokú ke akó. Te ka ala ongoʻi ʻoku ueʻi koe ke ke fakamatala ki haʻo kaungāmeʻa ʻa e ʻuhinga ʻoku tau fie maʻu ai e Tohi ʻa Molomoná, ʻi he hili hoʻo lau ʻa e 2 Nīfai 29:6–14.

Naʻe tomuʻa fakahā ʻe he ngaahi tohi ʻa Nīfaí “ha ngāue fakaofo mo fakaʻulia” ʻe hoko ʻi he ngaahi ʻaho fakaʻosí (2 Nīfai 27: 26).