Minerva K. Teichert (1888–1976), te a’ora’a aroha a te ari’i Beniamina, 1935, oil on masonite, 36 x 48 inches. Brigham Young University of Art

13–19 nō ’Ēperēra

Mosia 1–3

« ’Ia ’ī rātou i te aroha i te Atua ’e i te ta’ata ato’a ra ho’i »

’Ua hōro’a mai te ari’i Beniamina i te hō’ē tumu nō te pāpa’ira’a i te mau mana’o pae vārua : « ’Aita ho’i i ti’a i tō mātou ra metua tāne ’o Lehi ’ia ha’amana’o tāmau i teie nei mau mea, i ti’a ai ’ia ha’api’ihia atu i tāna ra mau tamari’i, maori rā nā roto i te tauturura’ahia i teie nei mau ’api » (Mosia 1:4).

Pāpa’i i te mau mana’o e tae mai

’Ia fa’aro’o ’outou i te ta’o ra ari’i, e mana’o ’outou i te mau korona, te mau aora’i ’e te mau terōno. I roto i te Mosia 1–3, e tai’o ’outou nō te tahi atu huru ari’i. ’Aita te ari’i Beniamina i ora i ni’a i te mau ’ohipa o tōna mau ta’ata, ’ua « ’ohipa [rā ’oia i tōna] iho nā rima » (Mosia 2:14). ’Aita ’oia i fa’atāvini iāna, ’ua tāvini rā ’oia i tōna mau ta’ata « ma te mana ato’a, ’e te hina’aro ato’a, ’e te pūai ato’a ho’i tā te Fatu i hōro’a mai [iāna] ra » (Mosia 2:11). ’Aita teie ari’i i hina’aro i tōna mau ta’ata ’ia ha’amori iāna ; ’ua ha’api’i rā ’oia ia rātou ’ia ha’amori i te hō’ē ari’i rahi a’e iāna, inaha ’ua māramarama ’oia ē, ’o « te Fatu pūai hope, tei iāna te hau » (Mosia 3:5). Mai te mau feiā fa’atere rahi ato’a i roto i te bāsileia o te Atua, ’ua fa’atoro te mau parau a te ari’i Beniamina ’e tōna hi’ora’a i ni’a i te Ari’i o te ra’i, ’oia ho’i te Fa’aora, ’o Iesu Mesia. ’Ua fa’a’ite pāpū te ari’i Beniamina ē, ’ua « tae mai [Iesu] i raro nei » ’e ’ua « haere atu i rotopū i te ta’ata nei i te ravera’a i te mau temeio rarahi… ’E inaha, e haere mai ’oia i ’ōna ihora, ’ia tae te ora i te mau tamari’i a te ta’ata na, nā roto i te fa’aro’o i tōna i’oa » (Mosia 3:5, 9).

Mau mana’o nō tā ’oe iho tuatāpapara’a pāpa’ira’a mo’a

Mosia 2:1–9

E tītau te fāri’ira’a i te parau a te Atua i te fa’aineinera’a.

I tō te ari’i Beniamina poro’ira’a ē, ’ua hina’aro ’oia e paraparau i tōna mau ta’ata, ’ua tae rahi mai te ta’ata « ’aita a’era rātou i tai’ohia » (Mosia 2:2). Te hō’ē tumu ’ua tae mai rātou, nō tō rātou ïa māuruuru ’e tō rātou here i tō rātou ti’a fa’atere. Hau atu rā, ’ua tae mai rātou ’ia ha’api’ihia rātou i te parau a te Atua.

’Ia tai’o ’oe i te Mosia 2:1–9, ’a hi’o i tā te ta’ata i rave ’ei fa’a’itera’a ē, tē ha’afaufa’a nei rātou i te parau a te Atua. E aha tā te ari’i Beniamina i ani ia rātou ’ia rave ’ei fa’aineinera’a nō te fa’aro’o i te parau a te Atua ? (hi’o ’īrava 9). Nāhea ’oe e nehenehe ai e fa’aineine maita’i a’e ia ’oe nō te fāri’i i te parau a te Atua i roto i tā ’oe iho tuatāpapara’a ’e te tuatāpapara’a a te ’utuāfare, ’e i roto ato’a i te mau purera’a a te ’Ēkālesia ?

Hi’o ato’a Mataio 13:18–23 ; Alama 16:16–17.

Mosia 2:10–26

’Ia tāvini au i te ta’ata, tē tāvini ato’a ra vau i te Atua.

Tē tāfifi ra ānei ’oe nō te fa’ata’a i te tahi taime nō te tāvini i te ta’ata ’aore rā tē hia’ai nei ’oe ’ia fa’atupu rahi a’e tā ’oe tāvinira’a i te ’oa’oa ? ’Ia mana’o ’oe, e aha tā te ari’i Beniamina e parau ’āhani e ui atu ’oe iāna nō te aha ’oia i tāvini ai « ma te mana’o ato’a, te hina’aro ato’a ’e te pūai ato’a ho’i » ? (Mosia 2:11). ’Ia tai’o ’oe i te Mosia 2:10–26, ’a hi’o mai i te mau parau mau tā te ari’i Beniamina i ha’api’i nō ni’a i te tāvinira’a ’e ’a feruri nāhea ’oe i te fa’a’ohipa i te reira i roto i tō ’oe orara’a. ’Ei hi’ora’a, e aha te aura’a nō ’oe ’ia ’ite ē, ’ia tāvini ’oe ia vetahi ’ē, tē tāvini ato’a ra ’oe i te Atua ? (hi’o Mosia 2:17). ’A feruri i te hō’ē rāve’a nō te tāvini i te tahi ta’ata i teie hepetoma !

Hi’o ato’a Mataio 25:40.

’Ia tāvini au i te ta’ata, tē tāvini ato’a ra vau i te Atua.

Mosia 3:1–20

E ti’a iā’u ’ia upo’oti’a i ni’a i te ta’ata tino nei ’e ’ia riro ’ei ta’ata mo’a nā roto i te tāra’ehara a Iesu Mesia.

’Ua fa’a’ite pāpū te ari’i Beniamina, mai te tā’āto’ara’a o te mau peropheta, nō Iesu Mesia ’ia ti’a i tōna mau ta’ata ’ia « roa’a… te mātarara’a i tā rātou mau hara, ’e ’ia ’oa’oa ma te ’oa’oa rahi » (Mosia 3:13). ’Ua ha’api’i ato’a ’oia ē, ’aita te Fa’aora, nā roto i tāna tāra’ehara, e tāmā noa ia tātou, e hōro’a ato’a rā ’oia ia tātou i te mana nō te tute ’ē i te « ta’ata tino nei » nō te riro mai « ’ei ta’ata mo’a » (Mosia 3:19 ; hi’o ato’a Arata’i nō te mau pāpa’ira’a mo’a, « Ta’ata tino nei », scriptures.ChurchofJesusChrist.org).

’Ua fa’ata’a Elder David A. Bednar : « Nā te tāra’ehara a Iesu Mesia e hōro’a mai i nā mea to’opiti nei, te mana tāmā ’e te fa’aoranā te reira e tauturu ia tātou ’ia upo’oti’a i ni’a i te hara ’e te hō’ē mana ha’amo’ara’a ’e te pūainō te tauturu ia tātou ’ia riro ’ei ta’ata maita’i a’e, ’o te ’ore roa e roa’a ia tātou nā roto noa i tō tātou iho pūai. Nō te ta’ata hara ’e nō te ta’ata mo’a te tāra’ehara mure ’ore » (« Rima mā ’e te ’ā’au maita’i », Ensign ’aore rā Liahona, Nov. 2007, 82).

Teie te tahi mau uira’a e feruri ’a tai’o ai ’oe i te ’itera’a pāpū o te ari’i Beniamina nō ni’a i te Fa’aora i roto i te Mosia 3:1–20:

• E aha tā’u e ha’api’i nei i roto i teie mau ’īrava nō ni’a i te Fa’aora ’e tāna misiōni ?

• E aha tā Iesu Mesia i rave nō te tauturu iā’u ’ia upo’oti’a i ni’a i te hara ? E aha tāna i rave nō te tauturu iā’u ’ia taui i tō’u nātura ta’ata ’e ’ia riro rahi atu ā ’ei ta’ata mo’a ?

• E aha tā’u e ha’api’i nei nō ni’a i te rirora’a ’ei ta’ata mo’a i roto i te Mosia 3:19 ?

Mosia 3:8

Nō te aha i parau ai te ari’i Beniamina nō Iesu ’ei « Metua o te ra’i, ’e te fenua » ?

’Ua fa’ata’a te peresideni Joseph F ’Smith : « Iesu Mesia, ’o tā tātou ato’a i mātau i te i’oa nō Iehova, ’o ’oia te fa’aueue a te Metua, ’o Elohima, i roto i te ’ohipa o te hāmanira’a… Nō te mea ’o Iesu Mesia te Hāmani, mea pinepine ’oia i te pi’ihia ’ei Metua nō te ra’i ’e nō te fenua…e nō te mea mea mure ’ore tāna mau hāmanira’a, mea ti’a ïa ’ia pi’ihia ’oia te Metua mure ’ore o te ra’i ’e o te fenua » (Te Mau Ha’api’ira’a a te Mau Peresideni o te ’Ēkālesia : Joseph F. Smith [1998], 357).

Mau mana’o nō tā te ’utuāfare tuatāpapara’a pāpa’ira’a mo’a ’e nō te pō ’utuāfare

’Ia tai’o ’outou i te mau pāpa’ira’a mo’a ’e te ’utuāfare, e nehenehe te Vārua e tauturu ia ’outou ’ia ’ite e aha te mau parau tumu e ha’afaufa’a ’e e ’āparau nō te pāhono i te mau hina’aro o te ’utuāfare. Teie te tahi mau mana’o.

Mosia 1:1–7

E mea nāhea te mau ’api veo ’e te mau ’api a Nephi i te ha’amaita’ira’a i te mau ta’ata o te ari’i Beniamina ? E mea nāhea te mau pāpa’ira’a mo’a e ha’amaita’i ai i tō tātou ’utuāfare ?

Mosia 2–3

E ’ohipa ’ārearea paha nō te ’utuāfare ’ia hāmani fa’ahōho’a i te vāhi mai reira mai te ari’i Beniamina i te paraparaura’a. E nehenehe e hāmani i te hō’ē pare iti ’e e fa’a’ohu te mau melo o te ’utuāfare nō te haere i ni’a mai e tai’o i te tahi tuha’a o te mau parau a te ari’i Beniamina. E nehenehe te toe’a o te ’utuāfare e fa’aro’o mai mai roto mai i te tahi vāhi e fa’anahohia mai te hō’ē ti’ahapa.

Mosia 2:9–19

E aha tā tātou e ha’api’i nei nō ni’a i te tāvinira’a i roto i te mau ha’api’ira’a a te ari’i Beniamina ’e tōna hi’ora’a ? E aha te mana’o e tae mai nō te ’ohipa e rave ?

Mosia 2:15–25

E mea maita’i ānei nō te ’utuāfare ’ia paraparau nō ni’a i te ha’eha’a ? Nō te aha ’aita te ari’i Beniamina i fa’atietie iāna i te mau mea ato’a tāna i rave ? E aha tā tātou e nehenehe e ’apo mai i roto i tāna mau ha’api’ira’a nō ni’a i tō tātou aura’a ’e te Atua ?

Mosia 2:36–41

E aha tā te ari’i Beniamina i ha’api’i nō ni’a i te mau fa’ahope’ara’a nō te ’itera’a i te parau mau ’e te ’orera’a e ora i te reira ? E aha tāna i ha’api’i mai nō ni’a i te rāve’a e noa’a ai te ’oa’oa mau ?

Mosia 3:19

E aha te tītauhia ’ia rave nō te riro ’ei ta’ata mo’a ? E aha hō’ē huru i roto i teie ’īrava ’o tā tātou te ’utuāfare e nehenehe e rōtahi atu i te fa’atupura’a ?

Nō te mau mana’o hau atu nō te ha’api’ira’a i te mau tamari’i, hi’o te arata’i ha’api’ira’a o teie hepetomai roto Mai, pe’e mai—nō te Paraimere

Ha’amaita’ira’a i te tuatāpapara’a pāpa’ira’a mo’a a te ta’ata iho

Ha’amau i te mau fā e nehenehe e fāito. Noa atu e ma’a minuti noa i te mahana hō’ē nō te tuatāpapa i te mau pāpa’ira’a mo’a, e nehenehe te reira e ha’amaita’i i tō ’oe orara’a. E pūpū ia ’oe i te tuatāpapara’a tāmahana, ’e e ’imi i te hō’ē rāve’a nō te fa’aha’amana’o ia ’oe i te reira.

Te a’ora’a a te ari’i Beniamina, nā Jeremy Winborg