Te Buka a Mosia

1 ’E i teienei, ’aita e mārōra’a fa’ahou i ni’a i te fenua tā’āto’a nō Zarahemela, i rotopū i te mau ta’ata i raro a’e i te hau o te ari’i ra ’o Beniamina, ’e ’ua pārahi noa te ari’i Beniamina ma te hau ē hope roa a’e te toe’a o tōna ra mau mahana.

2 ’E i muri a’era, ’ua fānau mai ’oia e toru tamari’i tamāroa ; ’e ’ua ma’iri ’oia i tō rātou ra mau i’oa ’o Mosia, ’o Heloruma, ’e ’o Helamana. ’E ’ua fa’aue ’oia ia ha’api’ihia ia rātou te reo o tōna ra mau metua, ’ia riro rātou ’ei feiā ’aravihi ; ’e ’ia ’ite rātou i te mau tohura’a i parauhia mai e te vaha o tō rātou ra mau metua, ’o tei fa’ataehia mai ia rātou e te rima o te Fatu.

3 ’E ’ua ha’api’i ato’a ho’i ’oia ia rātou nō ni’a i te mau pāpa’a parau i ’ō’otihia i ni’a i te mau ’api veo ra, i te nā ’ōra’a atu ē : E ta’u mau tamaiti, ’ua hina’aro vau ’ia ha’amana’o ’outou ē, ’āhiri ’aita teie nei mau ’api tei roto i te reira teie nei mau pāpa’a parau ’e teie nei mau fa’auera’a, ’ua pohe mau ïa tātou i roto i te pōiri i teienei, ’o tātou ’aore i ’ite i te mau parau ’aro a te Atua.

4 ’Aita ho’i i ti’a i tō tātou ra metua tāne ia Lehi ’ia ha’amana’o i teie nei mau mea, i ti’a ai ’ia ha’api’ihia atu i tāna ra mau tamari’i, maori rā nā roto i te tauturura’a a teie nei mau ’api ; ’ua ha’api’ihia ho’i ’oia i te reo o te mau ’Aiphiti nō reira i ti’a ai iāna ’ia tai’o i teie nei mau ’ō’otira’a, ’e ’ia ha’api’i atu i te reira i tāna ra mau tamari’i, ’ia ti’a ato’a ho’i ia rātou ’ia ha’api’i atu i tā rātou mau tamari’i, ’e ’ua nā-reira-hia nō te fa’atupura’a i te mau fa’auera’a a te Atua ē tae roa mai i teie nei tau.

5 Tē parau atu nei au ia ’outou na, e tā’u mau tamaiti, ’āhiri ’aita teie nei mau mea i ha’apa’ohia ’e i fa’ahereherehia ho’i e te rima o te Atua ra, ’ia ti’a ia tātou ’ia tai’o ’e ’ia māramarama i tāna ra mau parau ’aro, ’e ’ia vai māite noa tāna mau fa’auera’a i mua i tō tātou aro, ’ua riro ïa te fa’aro’o o tō tātou mau metua i te paruparu ; ’e ’ua riro ato’a tātou mai tō tātou mau taea’e, mai te mau ’āti Lamana ra te huru, ’o tei ’ore roa i ’ite i teie nei mau mea, ’e ’aita ato’a ho’i rātou i ti’aturi i te reira ’a ha’api’ihia atu ai rātou, nō te mea tē ti’aturi noa ra rātou i te mau peu tumu hape a tō rātou ra mau tupuna.

6 E tā’u mau tamaiti, ’ua hina’aro vau ’ia ha’amana’o ’outou ē, e parau mau teie nei mau parau, ’e e parau mau ato’a ho’i teie nei mau pāpa’a parau. ’E inaha, te mau ’api a Nephi tei roto i te reira te mau pāpa’a parau ’e te mau parau a tō tātou ra mau metua, mai te taime i fa’aru’e ai rātou i Ierusalema ē tae roa mai i teienei, e parau mau roa ïa ; ’ua ’ite māite tātou i te reira, nō te mea tei mua ïa i tō tātou nei mata.

7 ’E i teienei, e tā’u mau tamaiti, ’ua hina’aro vau ’ia ha’amana’o ’outou i te ’imi māite i taua mau mea nei, ’ia faufa’ahia ’outou i te reira ; ’e ’ua hina’aro ato’a vau ’ia ha’apa’o ’outou i te mau fa’auera’a a te Atua, ’ia manuia ’outou i ni’a i te fenua nei, mai te au i te mau fafaura’a tā te Fatu i nā reira i tō tātou ra mau metua.

8 ’E e rave rahi atu ā te mau mea tā te ari’i Beniamina i ha’api’i atu i tāna mau tamari’i tamāroa, ’e tei ’ore ho’i i pāpa’ihia i roto i teie nei buka.

9 ’E i muri a’era, ’ia fa’aoti a’era te ari’i Beniamina i te ha’api’ira’a atu i tāna mau tamari’i tamāroa, ’ua ruhiruhiā roa ihora ’oia ; ’e ’ua ’ite ho’i ’oia ē, e haere vave atu ’oia nā te ’ē’a e haerehia nei e tō te ao ato’a nei ; nō reira, ’ua mana’o ’oia e mea ti’a iāna ’ia ha’amau i te bāsileia i ni’a i te hō’ē o tāna mau tamari’i tamāroa.

10 Nō reira, ’ua ani a’era ’oia ’ia arata’ihia mai Mosia i mua iāna, ’e teie te mau parau tāna i parau atu iāna, i te nā-’ō-ra’a atu ē : E tā’u tamaiti, ’ua hina’aro vau ’ia fa’ahaere atu ’oe i te hō’ē parau poro’i i ni’a i teie fenua ta’ata i rotopū i teie mau ta’ata ato’a, ’oia ho’i i te mau ta’ata o Zarahemela, ’e te mau ta’ata o Mosia ’o tē pārahi nei i ni’a i te fenua nei, ’ia ti’a ia rātou ’ia ha’aputuputu-’āmui-hia mai ; e ananahi au e poro atu ai nā roto i tō’u iho nei vaha i tō’u nei mau ta’ata ē, ’o ’oe te ari’i ’e te tāvana i ni’a iho i teie nei mau ta’ata ’o tā te Fatu tā tō tātou Atua i hōro’a mai ia tāua.

11 ’E ’oia ato’a, e ma’iri au i te hō’ē i’oa i ni’a i teie nei feiā, ’ia ’ite-’ē-hia rātou i te mau ta’ata ato’a i arata’ihia mai e te Fatu te Atua i rāpae i te fenua ra nō Ierusalema ; e nā reira vau nō tō rātou itoito i te ha’apa’ora’a i te mau fa’auera’a a te Fatu.

12 E ma’iri ho’i au i te hō’ē i’oa i ni’a ia rātou, ’o tē ’ore roa e paraihia, maori rā nā roto i te ’ōfatira’a ture.

13 ’Oia ïa, tē parau fa’ahou atu nei ā vau ia ’oe, mai te mea e ’ōfati teie mau ta’ata ’o tei ha’amaita’i-rahi-hia e te Fatu i te ture, ’e ’a riro ai ’ei feiā parauti’a ’ore ’e te fa’aturi, e fa’aru’e te Fatu ia rātou, ’ia riro noa rātou ’ei feiā paruparu mai tō rātou ra mau taea’e ; ’e ’aita roa ’oia e fa’aherehere fa’ahou ia rātou nā roto i tōna mana fāito ’ore ’e te māere, mai tāna i fa’aherehere i tō tātou mau metua.

14 ’E tē parau atu nei au ia ’oe, ’āhiri ’aita ’oia i fa’atoro mai i tōna rima nō te fa’aherehere i tō tātou mau metua, ’ua topa ïa rātou i roto i te rima o te mau ’āti Lamana, ’ei tītī nō tō rātou ’ino’ino.

15 ’E i muri a’era, ’ia fa’aoti a’era te ari’i Beniamina i teie nei mau parau i tāna tamaiti, ’ua hōro’a atu ra ’oia i te hōpoi’a iāna nō ni’a i te mau ’ohipa ato’a o te bāsileia.

16 ’E ’oia fa’ahou, ’ua fa’aue ato’a atu ra ’oia iāna ’ia ha’apa’o i te mau pāpa’a parau i ’ō’otihia i ni’a i te mau ’api veo ; ’e te mau ’api ato’a a Nephi ; ’e te ’o’e a Labana, ’e te pōpō, ’oia ho’i, te ’avei’a, tei arata’i i tō tātou mau metua nā roto i te mēdēbara, ’e tei fa’aineinehia ho’i e te rima o te Fatu ’ia arata’ihia rātou e te reira, te ta’ata ato’a tei au i tōna fa’aro’o ’e tōna ha’apa’o maita’i iāna ra.

17 Nō reira, nō tō rātou ha’apa’o ’ore i ’ore ai rātou i manuia, ’aore ho’i i tere maita’i i tō rātou ra haere’a, ’āre’a rā ’ua tūra’ihia rātou i muri, ’e ’ua fa’ataehia mai te riri o te Atua i ni’a ia rātou ; ’e nō reira ’ua tā’irihia rātou i te o’e ’e te mau ’ati rahi, nō te fa’ati’arepu ia rātou ’ia ha’amana’o i tā rātou ’ohipa.

18 ’E i teienei, i muri a’era, ’ua haere atu ra Mosia ’e ’ua rave ihora i tā tōna metua tāne i fa’aue mai iāna ra, ’e ’ua poro atu ra i te mau ta’ata ato’a i te fenua nō Zarahemela, ’ia putuputu mai rātou, ’e ’ia haere atu rātou i te hiero nō te fa’aro’o i te mau parau tā tōna metua tāne e parau mai ia rātou ra.