1 ’Oia ïa, ’aita ānei Isaia i parau mai ē : ’O vai tei ti’aturi i tā mātou parau, ’e ’ia vai te fa’a’itera’ahia mai te rima o te Fatu ?

2 Mai te ohi ’āpī ra ho’i ’oia i te tupura’a i mua iāna ; ’e mai te a’a mai roto mai i te repo marō ra ; ’aita tōna e tino fa’ahiahia roa ’e te hanahana ; ’e ’ia ’ite atu tātou iāna ’aita roa ïa tōna e nehenehe e hina’aro atu ai tātou iāna.

3 ’Ua vahavahahia ’e ’ua pāto’ihia ’oia e te mau ta’ata ; e ta’ata mātau ’oia i te ’oto, ’e ’ua ’ite ho’i i te ’ati rahi ; ’e ’ua huna ’ē tātou i tō tātou mata iāna ; ’e ’ua vahavahahia ’oia, ’e ’ua ha’afaufa’a ’ore tātou iāna.

4 ’Oia mau roa ’ua amo ’oia i tō tātou mau ’ati rahi, ’e ’ua hōpoi ’ē ’oia i tō tātou mau ’oto ; ’ua mana’o rā tātou ē, ’ua tā’irihia, ’e ’ua papa’ihia ’oia e te Atua, ’e ’ua ha’amāuiuihia.

5 ’Āre’a rā ’ua tā’irihia ’oia nō tā tātou nei mau ’ōfatira’a ture ; ’e ’ua ha’apēpēhia ’oia nō tā tātou nei mau ’ohipa ’ī’ino ; ’ua fāri’i ’oia i te fa’autu’ara’a nō te fa’atae mai i te hau i ni’a ia tātou ; ’e nā roto i te mau pēpē i ni’a iāna ’ua fa’aorahia tātou.

6 ’Ua haere ’ē ana’e tātou ato’a, mai te māmoe ra ; ’ua fāriu ’ē tātou, te ta’ata i tōna iho haere’a ; ’e ’ua fa’airi te Fatu i ni’a iāna iho i te utu’a o tā tātou ato’a nei mau ’ohipa ’ī’ino.

7 ’Ua hāmani-’ino-hia ’oia, ’e ’ua ha’amāuiuihia ’oia, ’aita rā ’oia i hāmama noa atu i tōna vaha ; ’ua arata’ihia ’oia mai te fanau’a māmoe i te vāhi taparahira’a, ’e mai te māmoe e māmū i te aro o te feiā e paoti i tōna huruhuru ’e ’aita ’oia i hāmama noa atu i tōna vaha.

8 ’Ua rave-’ē-hia ’oia mai te fare ’āuri mai ’e mai te ha’avāra’a ; ’e nā vai e paraparau mai nō ni’a i tōna u’i ? ’Ua tāpū-’ē-hia ho’i ’oia i te fenua o te feiā e ora nei ; nō te mau ’ōfatira’a ture a tō’u ra mau ta’ata i taparahi-pohe-roa-hia ai ’oia.

9 ’Ua rave ’oia i tōna mēnema i rōpū i nā ta’ata parauti’a ’ore ’e i te ta’ata tao’a i tōna pohera’a ; ’aita rā tāna e ’ohipa ’ino i rave ; ’aore ato’a e ha’avare i roto i tōna vaha.

10 ’Ua ti’a rā i te Fatu ’ia ha’apēpēhia ’oia ; ’ua vaiiho ’oia iāna ’ia fāri’i i te ’ati rahi ; ’ia fa’arirohia ra ’oia ’ei tāra’ehara, e ’ite ’oia i tōna hua’ai, e ha’amaoro ’oia i tōna pu’e mahana ; ’e te hina’aro o te Fatu, e manuia ïa i tōna rima.

11 E ’ite ’oia i te māuiui rahi o tōna vārua, ’e e māuruuru roa ’oia ; nā roto i te ’ite iāna e fa’ati’a ai tō’u tāvini parauti’a i te mau ta’ata e rave rahi ; ’e nāna ho’i e amo i tā rātou mau ’ohipa parauti’a ’ore.

12 Nō reira, e hōro’a atu ho’i au i te tufa’a nāna i’ō i te feiā rahi ra, ’e e tufa ho’i ’oia i te tao’a haru i’ō i te feiā pūai ra ; nō te mea ’ua nīni’i ’oia i tōna vārua ē tae noa atu ra i te pohe ; ’e ’ua tai’ohia ’oia i rotopū i te feiā ’ōfati ture ra ; ’e ’ua amo ’oia i te hara a te ta’ata ato’a e rave rahi, ’e ’ua faariro iāna ’ei ārai nō te feiā ’ōfati ture ra.