1 ’E i teienei, ’ia oti a’era tāna paraura’a atu i te mau ta’ata, ’ua mana’o ihora te ari’i Beniamina ē, e mea ti’a iāna ’ia pāpa’i i te i’oa o te mau ta’ata i fafau i te fafaura’a i te Atua nō te ha’apa’o i tāna mau fa’auera’a.

2 ’E i muri a’era, ’aore roa te hō’ē a’e ta’ata, maori rā te mau tamari’i ri’i, ’o tei ’ore i fafau i taua fafaura’a ra ’e tei ’ore i rave i ni’a ia rātou i te i’oa o te Mesia.

3 ’E teie fa’ahou ā, i muri a’era, i tō te ari’i Beniamina fa’aotira’a i teie nei mau mea ato’a, ’e i te fa’atāhinura’a i tāna tamaiti ia Mosia ’ei tāvana ’e ’ei ari’i i ni’a i tōna ra mau ta’ata, ’e te hōro’ara’a atu i te mau hōpoi’a ato’a nō te bāsileia iāna, ’e te fa’ata’ara’a i te mau tahu’a nō te ha’api’i i te mau ta’ata, ’ia ti’a ia rātou ’ia fa’aro’o ’e ’ia ’ite i te mau fa’auera’a a te Atua, ’e nō te fa’ati’arepu ia rātou ’ia ha’amana’o i te tapu tā rātou i tapu, ’ua tu’u atu ra ’oia i te mau ta’ata, ’e ’ua ho’i atu ra rātou, te ta’ata ’e tōna ’utuāfare, i tō rātou iho mau ’utuāfare.

4 ’E ’ua ha’amata ihora Mosia i te fa’atere ’ei mono i tōna metua tāne. ’E ’ua tae ’oia i te toru ’ahuru ’e ’aore o te matahiti i te fa’aterera’a, ’e ’ua fātata roa e maha hānere e hitu ’ahuru ma ono matahiti i te hope mai te taime mai i fa’aru’e ai Lehi ia Ierusalema.

5 ’E ’ua ora noa te ari’i Beniamina e toru matahiti ’e ’ua pohe ihora ’oia.

6 ’E i muri a’era, ’ua haere noa te ari’i Mosia nā te mau ’ē’a o te Fatu, ’e ’ua ha’apa’o ’oia i tāna ra mau parau ’e tāna mau ture, ’e ’ua ha’apa’o ’oia i tāna mau fa’auera’a i te mau mea ato’a tāna i fa’aue mai iāna.

7 ’E ’ua fa’aue atu ra te ari’i Mosia i tōna mau ta’ata ’ia fa’a’apu i te fenua. ’E ’ua fa’a’apu ho’i ’oia iho i te fenua ’ia ’ore ’oia ’ia fa’ateimaha i tōna ra mau ta’ata, ’ia ti’a iāna ’ia rave mai te au i tā tōna metua tāne i rave i roto i te mau mea ato’a. ’E ’aita roa e mārōra’a i rotopū i tōna mau ta’ata nō te ārea e toru matahiti te maoro.