1 I teienei tē vai ra te hō’ē vāhi i Semelona i reira te mau tamāhine a te mau ’āti Lamana i te ha’aputuputura’a ia rātou iho nō te hīmene, ’e nō te ’ori, ’e nō te fa’a’āarearea ia rātou iho.

2 ’E i muri a’era, ’ia tae a’era i te hō’ē mahana, ’ua putuputu mai te tahi pae iti o rātou nō te hīmene ’e nō te ’ori.

3 ’E i teienei, ’ua ha’amā te mau tahu’a o Noa ’ia ho’i atu i te ’oire nō Nephi, ’oia ïa, ’ua mata’u rātou ’o te taparahihia rātou e te mau ta’ata, nō reira ’aita rātou i ho’i atu i tā rātou mau vahine ’e tā rātou mau tamari’i.

4 ’E ’ua fa’aea noa rātou i roto i te mēdēbara, ’e ’ua ’ite a’era rātou i te mau tamāhine a te mau ’āti Lamana, ’e ’ua tāpuni ihora rātou ma te māta’ita’i atu ia rātou.

5 ’E ’ia iti a’era tō rātou i te ha’aputuputu mai nō te ’ori, ’ua haere atu ra rātou mai roto atu i tō rātou mau vāhi tāpunira’a ’e ’ua haru ihora ia rātou e hōpoi ’ē atu ra i roto i te mēdēbara ; ’oia ïa, e piti ’ahuru ’e ma maha mau tamāhine a te mau ’āti Lamana tā rātou i hōpoi ’ē atu i roto i te mēdēbara.

6 ’E i muri a’era, ’ia ’ite a’era te mau ’āti Lamana ē, ’ua mo’e tā rātou mau tamāhine, ’ua riri ihora rātou i te mau ta’ata o Limehi, nō te mea ’ua mana’o rātou ē, nā te mau ta’ata o Limehi i rave i te reira.

7 Nō reira ’ua tono atu ra rātou i tō rātou mau nu’u fa’ehau ; ’oia ïa, ’e ’ua haere ato’a atu te ari’i iho i mua i tōna ra mau ta’ata ; ’ua haere atu rātou i te fenua nō Nephi nō te taparahi i te mau ta’ata o Limehi.

8 ’E i teienei ’ua ’ite mai ra Limehi ia rātou nā ni’a mai i te pare, ’e ’ua ’ite ho’i ’oia i tā rātou fa’aineinera’a nō te ’arora’a ; nō reira ’ua ha’aputuputu ’āmui ’oia i tōna ra mau ta’ata, ’e ’ua tāpuni ihora ia rātou i roto i te mau ’āua ’e te mau uru rā’au.

9 ’E i muri a’era, ’ia tae mai ra te mau ’āti Lamana i ni’a, ’ua haere atu ra te mau ta’ata o Limehi mai roto atu i tō rātou mau vāhi tāpunira’a ’e ’aro atu ra ia rātou, ’e ha’amata ihora i te taparahi ia rātou.

10 ’E i muri a’era, ’ua tupu rahi roa ihora te ’arora’a, ’e ’ua tama’i rātou mai te liona ’ia roa’a tāna mā’a haru.

11 ’E i muri a’era, ’ua ti’avaru atu ra te mau ta’ata o Limehi i te mau ’āti Lamana mai mua atu ia rātou, ’e ’ua iti iho ho’i rātou i te ’āfara’a i te rahi i te mau ’āti Lamana. ’Ua ’aro rā nō tō rātou ora, ’e nō tā rātou mau vahine, ’e nō tā rātou mau tamari’i, nō reira ’ua hōro’a rātou i tō rātou pūai ato’a, ’e ’ua tama’i rātou mai tā te teni ra.

12 ’E i muri a’era, ’ua ’ite a’era rātou i te ari’i o te mau ’āti Lamana i rotopū i tō rātou feiā pohe ra ; ’aita ’oia i pohe, ’ua puta rā ’oia, ’e ’ua fa’aru’e-noa-hia ’oia i raro i te repo, nō te ’oi’oi o te horora’a o tōna mau ta’ata.

13 ’Ua rave ihora rātou iāna ’e ’ua rapa’au ihora i tōna mau puta, ’e ’ua hōpoi mai ra iāna i mua ia Limehi, ’e ’ua nā ’ō atu ra : Inaha, teie te ari’i o te mau ’āti Lamana ; nō te mea ’ua puta ’oia, i ma’iri ai ’oia i rotopū i tō rātou feiā pohe ra, ’e ’ua fa’aru’e rātou iāna ; ’e inaha, ’ua hōpoi mai mātou iāna i mua ia ’oe na ; ’e i teienei ’a vaiiho mai ia mātou ’ia taparahi iāna.

14 ’Āre’a rā ’ua parau atu ra Limehi ia rātou : ’Eiaha roa ’outou e taparahi iāna, ’a hōpoi mai na iāna i’ō nei ’ia ’ite au iāna. ’E ’ua hōpoi mai ra rātou iāna. ’E ’ua parau atu ra Limehi iāna : Nō te aha ’oe i haere mai ai nō te ’aro i tō’u nei mau ta’ata ? Inaha, ’aita tō’u nei mau ta’ata i ’ōfati i te tapura’a tā’u i tapu atu ia ’oe na ; nō reira, nō te aha ïa ’oe i ’ōfati ai i te tapura’a tā ’oe i tapu i tō’u ra mau ta’ata ?

15 ’E i teienei ’ua parau mai ra te ari’i : ’Ua ’ōfati au i te tapura’a nō te mea ’ua hōpoi ’ē atu tō ’oe mau ta’ata i te mau tamāhine a tō’u ra mau ta’ata ; nō reira, nā roto i tō’u ra riri, ’ua arata’i mai au i tō’u ra mau ta’ata nō te ’aro atu i tō ’oe mau ta’ata.

16 ’E i teienei, ’aita roa Limehi i fa’aro’o na i taua parau ra ; nō reira ’ua nā ’ō atu ra ’oia : E ’imi au i rotopū i tō’u nei mau ta’ata, ’e te ta’ata i rave i te reira, e pohe ïa ’oia. Nō reira ’ua fa’aue atu ra ’oia ’ia ’imihia te reira i rotopū i tōna mau ta’ata.

17 I teienei ’ia fa’aro’o a’era Gideona, te ra’atira nō te ari’i, i teie mau mea, ’ua haere mai ra ’oia ’e ’ua parau mai ra i te ari’i : Tē parau atu nei au ia ’oe, ’a fa’a’oroma’i, ’e ’eiaha e ’imi i rotopū i teie nei feiā, ’e ’eiaha ho’i teie nei mea ’ino ’ia parihia i ni’a ia rātou.

18 ’Aita ānei ’oe e ha’amana’o ra i te mau tahu’a a tō ’oe metua tāne, tā teie nei feiā i ’imi ’ia taparahi ? ’E ’aita ānei rātou i roto i te mēdēbara i teienei ? ’E e ’ere ānei ho’i nā rātou i ’eiā i te mau tamāhine a te mau ’āti Lamana ?

19 ’E i teienei, inaha, ’a fa’a’ite atu i teie mau mea i te ari’i, ’ia fa’a’ite ato’a atu ’oia i tōna ra mau ta’ata, ’ia hau rātou ia tātou nei ; inaha ho’i, tē fa’aineine nei rātou i teienei ’ia haere mai e ’aro mai ia tātou nei ; ’e inaha ho’i e mea iti roa tātou nei.

20 ’E inaha, tē haere mai nei rātou ’e tō rātou mau nu’u fa’ehau e rave rahi ; ’e ’ia ’ore te ari’i e fa’ahau ia rātou ia tātou nei, e pohe ïa tātou.

21 ’E ’aita ānei te mau parau a Abinadi i tupu, ’oia ’o tāna i tohu nō ni’a ia tātou nei—’e ’ua nā-reira-hia nō te mea ’aita tātou i ha’apa’o i te mau parau a te Fatu, ’e i fa’aru’e ho’i i tā tātou mau ’ohipa ’ī’ino ?

22 I teienei, e fa’ahau tātou i te ari’i, ’e e ha’apa’o ho’i tātou i te tapu tā tātou i tapu atu iāna ra ; e mea maita’i a’e ho’i ia tātou ’ia fāri’i i te fa’atītīra’a i te pohe ; nō reira, ’ia fa’aea tātou i te ha’amani’i rahi i te toto.

23 ’E i teienei ’ua fa’a’ite atu ra Limehi i te ari’i i te mau mea ato’a nō ni’a i tōna metua tāne, ’e te mau tahu’a tei horo ’ē atu i roto i te mēdēbara, ’e ’ua pari ho’i ia rātou nō te hōpoi-’ē-ra’a atu i tā rātou ra mau tamāhine.

24 ’E i muri a’era, ’ua tupu te hau o te ari’i i mua i tōna ra mau ta’ata ; ’e ’ua parau atu ra ’oia ia rātou : Mai haere tātou e fārerei atu i tō’u ra mau ta’ata, ma te mauha’a tama’i ’ore ; ’e tē hōreo atu nei au ia ’oe na ma te tapu ē e ’ore roa tō’u ra mau ta’ata e taparahi i tō ’oe na mau ta’ata.

25 ’E i muri a’era, ’ua pe’e atu ra rātou i te ari’i, e haere atu ra rātou ma te mauha’a tama’i ’ore nō te fārerei i te mau ’āti Lamana. ’E i muri a’era ’ua fārerei atu rātou i te mau ’āti Lamana ; ’e ’ua tīpapa ihora te ari’i o te mau ’āti Lamana i raro i mua ia rātou, ’e ’ua tāparu atu ra ’oia ’ia fa’aorahia te mau ta’ata o Limehi.

26 ’E ’ia ’ite a’era te mau ’āti Lamana i te mau ta’ata o Limehi, ’e ’aita tā rātou e mauha’a tama’i, ’ua aroha mai ra rātou ia rātou ’e ’ua hau ihora ho’i ia rātou, ’e ’ua ho’i atu ra rātou ’e te ari’i ato’a i tō rātou ihora fenua ma te hau.