1 I teienei ’ia oti a’era teie mau mea i te ravehia e Mosia, ’ua fa’atae atu ra ’oia i te parau i te mau fenua ē ’ati noa a’e, i rotopū i te mau ta’ata ato’a, ’ia ’ite i tō rātou mana’o ē, ’o vai te tano ’ia riro ’ei ari’i nō rātou.

2 ’E i muri a’era, ’ua tae mai ra te reo o te mau ta’ata i te nā-’ō-ra’a mai ē : ’Ua hina’aro mātou i tā ’oe tamaiti ia Aarona ’ia riro ’ei ari’i ’e ’ei tāvana nō mātou.

3 I teienei ’ua reva atu Aarona i te fenua ra nō Nephi, nō reira ’aita i ti’a i te ari’i ’ia tu’u atu i te bāsileia i ni’a iāna ; ’e ’aita ho’i ’o Aarona i hina’aro i te bāsileia i ni’a iāna ; ’e ’aita ato’a ho’i te hō’ē o te mau tamaiti a Mosia i hina’aro ’ia tu’uhia te bāsileia i ni’a iho ia rātou.

4 Nō reira ’ua fa’atae fa’ahou atu ra te ari’i ra ’o Mosia i te parau i rotopū i te mau ta’ata ; ’oia ïa, te parau i pāpa’ihia tāna i fa’atae atu i rotopū i te mau ta’ata. E teie te mau parau i pāpa’ihia, ’o tei nā ’ō atu ē :

5 Inaha, e tō’u mau ta’ata, ’oia ho’i e tō’u mau taea’e ē, ’ua fa’ariro ho’i au ia ’outou mai te reira te huru, tē hina’aro nei au ’ia feruri māite ’outou i te mea i anihia ia ’outou ’ia feruri—no te mea tē hina’aro na ’outou i te hō’ē ari’i.

6 I teienei tē parau atu nei au ia ’outou na, ’ua pāto’i mai te ta’ata ’o tē tano mau ’ia fāri’i i teie nei bāsileia, ’e ’aita roa ’oia i hina’aro ’ia rave i te bāsileia i ni’a iho iāna.

7 ’E i teienei, mai te mea e mā’itihia te tahi ’ē atu ’ei mono nōna, inaha, tē mata’u nei au ’o te tupu te mārōra’a i rotopū ia ’outou na. ’O vai ho’i ïa tei ’ite ē, e’ita e tupu te riri o tā’u ra tamaiti nōna te bāsileia ’e ’a arata’i ’ē atu ai i te tahi pae o teie nei mau ta’ata nā muri iho iāna, ’e nā te reira e fa’atupu i te mau tama’ira’a ’e te mau mārōra’a i rotopū ia ’outou, ’e nā te reira ho’i e ha’amani’i i te toto rahi ’e te ha’api’ira’a ho’i i te ’ē’a o te Fatu ra ; ’oia ïa, ’e e ha’amou i te vārua o te mau ta’ata e rave rahi.

8 I teienei tē parau atu nei au ia ’outou na, ’ia vai pa’ari tātou ’e ’ia feruri tātou i teie nei mau mea, e’ita ho’i i te mea ti’a ia tātou ’ia ha’amou i tā’u tamaiti, ’e e’ita ho’i i te mea ti’a ia tātou ’ia ha’amou i te tahi atu ta’ata mai te mea e mā’itihia ’oia ’ei mono nōna ra.

9 ’E mai te mea e fāriu fa’ahou tā’u ra tamaiti i tōna ra te’ote’o ’e te mea faufa’a ’ore ra, e tātarahapa ïa ’oia i te mau mea tāna i parau ra ; ’e ’a ani mai ai i tōna ti’ara’a nō te bāsileia, ’e nā te reira e fa’atupu i roto iāna ’e i teie nei feiā ho’i i te mau hara e rave rahi.

10 ’E i teienei ’ia pa’ari tātou i te hi’o-ātea-ra’a atu i teie nei mau mea, ’e ’ia rave tātou i te mea au nō te fa’atupu i te hau o teie nei feiā.

11 Nō reira, e riro noa vau ’ei ari’i nō ’outou ē hope noa atu te toe’a o tō’u nei pu’e mahana ; ’āre’a rā, ’ia fa’ata’a tātou i te tahi mau ha’avā, nō te ha’avā i teie mau ta’ata mai te au i tā tātou ture ; ’e e fa’anahonaho ’āpī tātou i te mau ’ohipa a teie nei mau ta’ata, ’e e fa’ata’a tātou i te mau ta’ata ’aravihi ’ei mau ha’avā, ’e nā rātou e ha’avā i teie mau ta’ata mai te au i te mau fa’auera’a a te Atua.

12 I teienei e mea maita’i a’e i te ta’ata ’ia ha’avāhia e te Atua i te ha’avāhia e te ta’ata nei, e mea parauti’a ho’i te mau ha’avāra’a a te Atua i te mau taime ato’a, ’āre’a rā tā te ta’ata nei mau ha’avāra’a e ’ere ïa i te mea parauti’a i te mau taime ato’a.

13 Nō reira, ’āhiri e noa’a ia ’outou te tahi mau ta’ata parauti’a ’ei mau ari’i nō ’outou, ’e ’o tē ha’amau i te mau ture a te Atua, ’e ’o tē ha’avā i teie nei mau ta’ata mai te au i tāna ra mau fa’auera’a ; ’oia ïa, ’āhiri e noa’a ia ’outou te tahi mau ta’ata ’ei mau ari’i nō ’outou ’e ’o tē rave mai tā tō’u metua tāne ra ’o Beniamina i rave nō teie nei mau ta’ata—tē parau atu nei au ia ’outou, ’āhiri e ti’a mai te reira te huru i te mau taime ato’a, e mea maita’i ïa ’ia vai noa te mau ari’i nō te fa’atere i ni’a a’e ia ’outou.

14 ’E ’ua rave ato’a vau iho i te ’ohipa ma tō’u mana ato’a ’e tō’u mau ’ite ato’a, nō te ha’api’i atu ia ’outou i te mau fa’auera’a a te Atua, ’e nō te fa’atupu i te hau i ni’a i te fenua ē ’ati noa a’e, ’ia ’ore te mau tama’i, ’e te mau mārōra’a, ’e te ’eiā, ’e te ’eiā haru, ’e te taparahira’a ta’ata, ’e te mau huru ’ohipa ’ī’ino ato’a.

15 ’E te ta’ata ho’i ’o tē rave i te mau ’ohipa ’ī’ino ra, ’o tā’u ïa e fa’autu’a mai te au i te hara o tāna i rave, mai te au i te ture i hōro’ahia mai ia tātou ’e tō tātou ra mau metua.

16 I teienei tē parau atu nei au ia ’outou, nō te mea e ’ere te mau ta’ata ato’a i te mea parauti’a, e’ita ïa i te mea au ’ia fa’ati’a ’outou i te hō’ē ta’ata ’e ’aore rā i te tahi mau ta’ata ’ei ari’i ’e ’aore rā ’ei mau ari’i nō te fa’atere i ni’a a’e ia ’outou.

17 Inaha ho’i, e aha te rahira’a o te mau ’ohipa ’ī’ino tā te hō’ē ari’i parauti’a ’ore e rave, ’oia ïa, ’o te hō’ē ha’amoura’a rahi ïa !

18 ’Oia ïa, ’a ha’amana’o na i te ari’i ra ia Noa, i tāna mau ’ohipa ’ī’ino ’e tāna mau ’ohipa vi’ivi’i ; ’e i te ’ohipa ’ī’ino ’e te mau ’ohipa vi’ivi’i a tōna ra mau ta’ata. Inaha, e ha’amoura’a rahi tei tae mai i ni’a iho ia rātou ; ’e nō tā rātou mau ’ohipa ’ī’ino ’ua fāri’i rātou i te fa’atītīra’a.

19 ’E ’āhiri ’aita te āraira’a a Tei Hamani ia rātou ra ’o tei ’ī i te pa’ari, nō tā rātou tātarahapa mau, ’ua vai noa ïa rātou i roto i te fa’atītīra’a ē tae roa mai i teienei.

20 Inaha rā, ’ua fa’aora ’oia ia rātou nō te mea ’ua fa’aha’eha’a rātou ia rātou iho i mua iāna ; ’e nō te mea ho’i ’ua ti’aoro māite atu rātou iāna i fa’aora ai ’oia ia rātou i te fa’atītīra’a ; ’e nō reira ’ua fa’a’ohipa te Fatu i tōna mana i roto i te mau mea ato’a i rotopū i te mau tamari’i a te ta’ata nei, i te fa’atorora’a mai i te rima nō te aroha ia rātou ’o tē ti’aturi iāna ra.

21 ’E inaha, tē parau atu nei au ia ’outou, ’aita roa e ti’a ia ’outou ’ia fa’a’ore i te mana o te hō’ē ari’i parauti’a ’ore, maori rā nā roto i te mārōra’a rahi ’e te ha’amani’ira’a rahi i te toto.

22 Inaha ho’i, tei roto tōna mau hoa i te mau ’ohipa ’ī’ino, ’e te ha’a’atihia ra ho’i ’oia e tōna mau tīa’i ; ’e tē vāvāhi ra ’oia i te mau ture a te feiā i fa’atere na ma te parauti’a nā mua a’e iāna ra ; ’e tē ta’ata’ahi ra ’oia i raro a’e i tōna ’āvae i te mau fa’auera’a a te Atua ;

23 ’E ’ua ha’amana ’oia i te mau ture, ’e ’ua fa’atae atu i te reira i rotopū i tōna mau ta’ata ; ’oia ïa, i te mau ture ’ia au i tāna ihora mau ’ohipa parauti’a ’ore ; ’e te mau ta’ata ho’i ’o tē ’ore e ha’apa’o i tāna ra mau ture, e ha’amouhia ïa rātou ; ’e te mau ta’ata ho’i ’o tē mārō mai iāna, e tono atu ïa ’oia i tāna ra mau nu’u fa’ehau nō te ’aro atu ia rātou, ’e mai te mea e ti’a iāna, e ha’amou roa ’oia ia rātou ; e mea nā reira te hō’ē ari’i parauti’a ’ore i te ha’api’o i te mau haere’a o te mau ta’ata parauti’a ato’a.

24 ’E i teienei inaha tē parau atu nei au ia ’outou, e ’ere i te mea ti’a ’ia tae mai te reira mau ’ohipa vi’ivi’i i ni’a iho ia ’outou.

25 Nō reira, ’ia mā’iti ’outou nā roto i te reo o teie nei mau ta’ata, i te mau ha’avā, ’ia ha’avāhia ’outou mai te au i te mau ture i hōro’ahia mai ia ’outou e tō tātou ra mau metua, e mea parau mau te reira, ’e ’ua hōro’ahia mai ho’i ia rātou e te rima o te Fatu.

26 I teienei, e ’ere i te mea mātauhia ’ia tītau atu te reo o te mau ta’ata i te mea au ’ore i te mea ti’a ; ’āre’a rā e mea mātauhia i te pae iti o te mau ta’ata ’ia tītau i te mea ti’a ’ore ; nō reira teie tā ’outou e ha’apa’o ’e e fa’ariro ’ei ture nā ’outou—’ia fa’atere ’outou i tā ’outou mau ’ohipa nā roto i te reo o te mau ta’ata.

27 ’E ’ia tae i te taime e mā’iti ai te reo o te mau ta’ata i te mau ’ohipa ’ī’ino, ’ei reira ato’a ïa te taime e tae mai ai te mau ha’avāra’a a te Atua i ni’a iho ia ’outou, ’oia ïa, te reira ato’a ïa te taime e tāho’o mai ai ’oia ia ’outou i te ha’amoura’a rahi, mai tāna ho’i i tāho’o a’enei i teie nei fenua.

28 ’E i teienei mai te mea tē vai ra tō ’outou mau ha’avā, ’e ’aita rātou e ha’avā ia ’outou mai te au i te ture i hōro’ahia mai, ’ua ti’a ïa ia ’outou ’ia tu’u atu ia rātou ’ia ha’avāhia e te hō’ē ha’avā rahi a’e.

29 Mai te mea ē ’aita tō ’outou mau ha’avā rahi e ha’avā ma te rave i te mau ha’avāra’a parauti’a, e ha’aputuputu ’āmui mai ïa ’outou i te mau ha’avā ri’i, ’e nā rātou ïa e ha’avā i tō ’outou mau ha’avā rahi, mai te au i te reo o te mau ta’ata.

30 ’E tē fa’aue atu nei au ia ’outou na ’ia rave i teie nei mau mea ma te mata’u i te Fatu ; ’e tē fa’aue atu nei ho’i au ia ’outou na ’ia rave i teie nei mau mea, ’e ’eiaha tō ’outou ’ei ari’i ; ’e ’ia rave teie nei feiā i te mau hara ’e te mau ’ohipa ’ī’ino, e tāho’ohia ïa te reira i ni’a i tō rātou iho mau upo’o.

31 Inaha ho’i tē parau atu nei au ia ’outou na, nā te mau ’ohipa ’ī’ino a te mau ari’i i fa’atupu i te mau hara a te mau ta’ata e rave rahi ; nō reira e hurihia tā rātou mau ’ohipa ’ī’ino i ni’a iho i te upo’o o tō rātou ra mau ari’i.

32 ’E i teienei ’ua hina’aro vau ’ia fa’a’orehia teie mea ’aifāito ’ore i ni’a i te fenua nei, ’e i rotopū ho’i i tō’u teie nei mau ta’ata ; ’āre’a rā ’ua hina’aro vau ’ia vai noa teie nei fenua ’ei fenua ti’amā, ’e ’ia fa’ati’ahia te ta’ata ato’a i tā rātou mau tufa’a ’e i tō rātou iho mau hina’aro ato’a, ’ia au ho’i i te hina’aro o te Fatu ’ia pārahi noa ’e ’ia fāri’i tātou i teie nei fenua ’ei ’āi’a nō tātou ; ’oia ïa, ’a pārahi noa ai te hō’ē toe’a o tō tātou hua’ai i ni’a i te fenua.

33 ’E e rave rahi atu ā mea tā te ari’i Mosia i pāpa’i atu ia rātou, i te ha’amahorara’a atu i te mau tāmatara’a ’e te mau fifi ho’i o te ari’i parauti’a ; ’oia ho’i te māuiui o te vārua i tō rātou mau ta’ata, ’e te mau amuamura’a a te mau ta’ata i tō rātou ari’i ; ’e ’ua fa’a’ite pāpū atu ’oia i te reira ia rātou.

34 ’E ’ua fa’a’ite atu ho’i ’oia ia rātou ē, e mea au ’ore taua mau mea ra, ’āre’a rā e tae te hōpoi’a i ni’a i te mau ta’ata ato’a e ti’a ai, ’ia ti’a i te ta’ata tāta’itahi ’ia amo i tāna tufa’a.

35 ’E ’ua ha’amahora ato’a atu ra ’oia i mua ia rātou pā’āto’a i te mau fifi tā rātou e fāri’i nā roto i te hō’ē ari’i parauti’a ’ore nō te fa’atere ia rātou ;

36 ’Oia ïa, i te tā’āto’ara’a nō tāna mau ’ohipa ’ī’ino ’e te mau ’ohipa vi’ivi’i, ’e te tā’āto’ara’a nō te mau ’arora’a ’e te mau mārōra’a, ’e te ha’amani’ira’a toto, ’e te ’eiā, ’e te ’eiā haru, ’e te tai’ata, ’e te mau huru ’ohipa ’ī’ino ato’a ’o tē ’ore e ti’a ’ia tai’ohia—ma te fa’a’ite atu ia rātou ē, e mea ti’a roa ’ia fa’a’orehia teie mau mea, ’e e mea au ’ore rahi ho’i te reira i te mau fa’auera’a a te Atua.

37 ’E i teienei, i muri a’era, ’ia fa’aoti a’era te ari’i Mosia i te fa’atae atu i teie mau mea i rotopū i te mau ta’ata, ’ua ti’aturi ihora rātou i te parau mau nō tāna mau parau.

38 Nō reira ’ua ha’apae rātou i tō rātou mau hina’aro nō te hō’ē ari’i, ’e ’ua hina’aro māite atu ra rātou ’ia ’aifāito tō te mau ta’ata ato’a huru i ni’a i te fenua tā’āto’a ; ’oia ïa, ’e ’ua fa’a’ite mai ra te mau ta’ata ato’a i tō rātou hina’aro ’ia fa’autu’ahia rātou nō tā rātou iho mau hara.

39 Nō reira, i muri a’era ’ua ha’aputuputu mai ra rātou ia rātou iho i roto i te mau pupu i ni’a i te fenua ato’a ē ’ati noa a’e, nō te fa’a’ite mai i tō rātou mau mana’o nō ni’a i te mau ta’ata e ti’a ’ia riro ’ei mau ha’avā nō rātou, nō te ha’avā ia rātou mai te au i te ture i hōro’ahia mai ia rātou ra ; ’e ’ua ’oa’oa roa a’era rātou nō te ti’amāra’a i hōro’ahia mai ia rātou ra.

40 ’E ’ua tupu ihora tō rātou aroha rahi ia Mosia ; ’oia ïa, ’ua fa’ariro rātou iāna ’ei ta’ata rahi atu i te tahi atu mau ta’ata ; ’e ’aita rātou i mana’o noa a’e ē ’ua riro ’oia ’ei ari’i fa’ahepo ’o tei tītau i te faufa’a, ’oia ïa, i te tao’a ti’a ’ore e vi’ivi’i ai te vārua ; ’e ’aita roa ’oia i tītau i te tao’a ia rātou, ’e ’aita ho’i ’oia i pōpou i te ha’amani’i i te toto ; ’āre’a rā ’ua fa’atupu ’oia i te hau i ni’a i te fenua, ’e ’ua fa’ati’a ’oia i tōna mau ta’ata ’ia fa’aorahia i te mau huru fa’atītīra’a ato’a ; nō reira ’ua fa’ariro rātou iāna, ’oia ïa, ’ei mea maita’i roa, ’e te fa’ahiahia roa.

41 ’E i muri a’era ’ua fa’ata’a ihora rātou i te tahi mau ha’avā nō te fa’atere ia rātou, ’e nō te ha’avā ho’i ia rātou mai te au i te ture ; ’e ’ua nā reira rātou ē ’ati noa a’e te fenua tā’āto’a.

42 ’E i muri a’era ’ua fa’ata’ahia ihora Alama ’ia riro ’ei ha’avā rahi mātāmua, ’e e tahu’a rahi ato’a ho’i ’oia, ’e nā tōna metua tāne i fa’atōro’a iāna, ’e i hōro’a mai ho’i iāna i te fa’aterera’a nō ni’a i te mau ’ohipa ato’a a te ’ēkālesia.

43 ’E i teienei, i muri a’era, ’ua haere noa Alama nā te ’ē’a o te Fatu ra, ’e ’ua ha’apa’o ’oia i tāna ra mau fa’auera’a, ’e ’ua ha’avā ’oia i te mau ha’avāra’a parauti’a ; ’e ’ua vai tāmau noa te hau i ni’a i te fenua ē ’ati noa a’e.

44 ’E ’o te ha’amatara’a ïa nō te fa’aterera’a a te mau ha’avā ē ’ati noa a’e te fenua nō Zarahemela i rotopū i te mau ta’ata ato’a i parauhia te mau ’āti Nephi ; ’e ’o Alama te ha’avā rahi mātāmua.

45 ’E i teienei, i muri a’era, ’ua pohe ihora tōna metua tāne, i te va’u ’ahuru ’e ma piti o tōna ra matahiti, ’e ’ua ora noa ho’i ’oia ’ia tupu te mau fa’auera’a a te Atua.

46 ’E i muri a’era, ’ua pohe ato’a ihora Mosia, i te toru ’ahuru ’e ma toru o te matahiti nō tāna ra fa’aterera’a, ’oia ho’i, i te ono ’ahuru ’e ma toru o tōna ra matahiti ; ’e ’ia ’āmuihia te tā’āto’ara’a, e pae hānere ’e e iva ïa matahiti mai te tau i fa’aru’e ai Lehi i Ierusalema.

47 ’E ’o te hope’a te reira nō te fa’aterera’a a te mau ari’i i ni’a i te mau ta’ata o Nephi ; ’e ’o te hope’a ato’a ïa o te pu’e mahana o Alama, ’o tei fa’ati’a i tā rātou ’ēkālesia.