1 ’E i muri a’era, ’ua ho’i fa’ahou atu ra te nu’u fa’ehau o te ari’i, i ’imi māite na rātou i te mau ta’ata o te Fatu ma te manuia ’ore.

2 ’E i teienei inaha, e mea iti te nu’u fa’ehau o te ari’i, i fa’aitihia ho’i rātou, ’e ’ua tupu ihora te ’āmahamaha i rotopū i te toe’a o te mau ta’ata.

3 ’E ’ua ha’amata atu ra te pae iti o te mau ta’ata i te parau ha’amata’u atu i te ari’i, ’e ’ua tupu ihora te mārōra’a rahi i rotopū ia rātou.

4 ’E i teienei tē vai ra te hō’ē ta’ata i rotopū ia rātou ’o Gideona tōna i’oa, e ta’ata pūai ’oia ’e e ’enemi ho’i nō te ari’i, nō reira ’ua unuhi ’oia i tāna ’o’e, ’e ’ua tapu ihora ’oia ma te riri ’ū’ana ’ia taparahi i te ari’i.

5 ’E i muri a’era, ’ua taputō ihora rāua ’o te ari’i ; ’e ’ia ’ite a’era te ari’i ē, ’ua fātata ’oia i te pau iāna, ’ua horo ’ē atu ra ’oia ’e ’ua horo atu ra ’e ’ua pa’uma atu ra i ni’a iho i te pare i pīha’i iho i te hiero.

6 ’E ’ua a’ua’u atu ra Gideona iāna, ’e ’ua fātata ’oia i te tae i ni’a i te pare nō te taparahi i te ari’i, ’e nānā a’era te ari’i i tōna mata ē ’ati noa a’e te pae fenua ra nō Semelona, ’e inaha, tei roto mai te nu’u fa’ehau o te mau ’āti Lamana i te ’ōti’a o te fenua.

7 ’E ’ua pi’i noa mai ra te ari’i ma te ’oto o tōna ’ā’au, i te nā-’ō-ra’a ē : E Gideona, ’a fa’aora mai na iā’u, teie mai nei ho’i te mau ’āti Lamana i ni’a ia tātou, ’e e taparahi rātou ia tātou ; ’oia ïa, e taparahi rātou i tō’u mau ta’ata.

8 ’E i teienei ’ua rahi tō te ari’i pe’ape’a i tōna iho ora i tō tōna ra mau ta’ata ; ’āre’a rā, ’ua fa’aora Gideona iāna.

9 ’E ’ua fa’aue atu ra te ari’i i tōna mau ta’ata ’ia horo ’ē atu mai mua atu i te mau ’āti Lamana, ’e ’ua horo ’ē ato’a atu ’oia iho nā mua ia rātou, ’e ’ua horo ’ē atu rātou i roto i te mēdēbara, ’e tā rātou ato’a ra mau vahine ’e tā rātou mau tamari’i.

10 ’E i muri a’era, ’ua a’ua’u atu ra te mau ’āti Lamana ia rātou, ’e ’ua noa’ahia rātou, ’e ’ua ha’amata ihora i te taparahi ia rātou.

11 I teienei, i muri a’era, ’ua fa’aue atu ra te ari’i ia rātou ’ia vaiiho te mau tāne ato’a i tā rātou mau vahine ’e tā rātou mau tamari’i, ’e ’ia horo ’ē atu mai mua atu i te mau ’āti Lamana.

12 I teienei e rave rahi te mau tāne tei ’ore i vaiiho ia rātou, ’ua hina’aro rā rātou ’ia pārahi ’e ’ia pohe i pīha’i iho ia rātou. ’E ’ua vaiiho te toe’a i tā rātou mau vahine ’e tā rātou mau tamari’i ’e ’ua horo ’ē atu ra.

13 ’E i muri a’era, ’o rātou ’o tei pārahi i pīha’i iho i tā rātou mau vahine ’e tā rātou mau tamari’i, ’ua tono atu ra rātou i tā rātou mau tamāhine purotu ’ia ti’a atu i mua i te mau ’āti Lamana ’e ’ia tāparu atu ia rātou ’eiaha rātou e taparahi mai ia rātou.

14 ’E i muri a’era, ’ua aroha mai te mau ’āti Lamana ia rātou, ’e ’ua au roa rātou i te purotu o tā rātou mau tamāhine.

15 Nō reira, ’ua fa’aora te mau ’āti Lamana ia rātou, ’e ’ua hōpoi tītī ihora ia rātou, ma te hōpoi atu ia rātou i te fenua ra nō Nephi, ’e ’ua hōro’a mai i te fenua ’ei fa’aeara’a nō rātou, mai te mea e tu’u atu rātou i te ari’i ra ia Noa i te rima o te mau ’āti Lamana, ’e ’ia hōro’a i tā rātou tao’a, ’oia ho’i te ’āfara’a o tā rātou mau faufa’a ato’a, ’e te ’āfara’a o tā rātou ’auro, ’e tā rātou ’ārio, ’e te tā’āto’ara’a nō tā rātou mau tao’a faufa’a rahi, ’e ’ia nā reira rātou i te ’aufau i te tute i te ari’i o te mau ’āti Lamana i terā matahiti ’e i terā matahiti.

16 ’E i teienei tei rotopū ho’i i te mau ta’ata i hōpoi-tītī-hia te hō’ē o te mau tamaiti a te ari’i, ’o Limehi tōna i’oa.

17 ’E i teienei ’ua hina’aro Limehi, ’eiaha tōna metua tāne ’ia taparahihia ; ’ua ’ite rā Limehi i te mau ’ohipa ’ī’ino a tōna metua tāne, ’e e ta’ata parauti’a rā ’oia iho.

18 ’E i muri a’era, ’ua tono huna atu ra Gideona i te mau ta’ata i roto i te mēdēbara, nō te ’imi haere i te ari’i ’e ia rātou ato’a tei pe’e atu iāna ra. ’E i muri a’era ’ua fārerei atu ra rātou i te mau ta’ata i roto i te mēdēbara, ’o rātou pā’āto’a, ’eiaha rā te ari’i ’e tōna mau tahu’a.

19 I teienei ’ua tapu na rātou i roto i tō rātou ’ā’au ē e ho’i fa’ahou rātou i te fenua ra nō Nephi, ’e mai te mea ē ’ua taparahihia tā rātou mau vahine ’e tā rātou mau tamari’i, ’e te mau ta’ata ato’a ho’i tei fa’aea i pīha’i iho ia rātou ra, e tītau rātou i te tāho’o i reira, ’e e pohe ato’a ’e ’o rātou ra.

20 ’E ’ua fa’aue mai ra te ari’i ia rātou, ’eiaha rātou e ho’i fa’ahou ; ’e ’ua riri a’era rātou i te ari’i, ’e ’ua tītau ihora rātou ’ia ha’apohe iāna, ’oia ïa, i te pohe auahi.

21 ’E ’ua fātata roa rātou i te rave i te mau tahu’a ’e ’ia taparahi ato’a ia rātou, ’e ’ua horo ’ē atu ra rātou mai mua atu ia rātou.

22 ’E i muri a’era, ’ua fātata rātou i te ho’i fa’ahou i te fenua ra nō Nephi, ’e ’ua fārerei atu rātou i te mau ta’ata o Gideona. ’E ’ua fa’a’ite atu te mau ta’ata o Gideona ia rātou i te mau mea ato’a i tupu i ni’a i tā rātou mau vahine ’e tā rātou mau tamari’i ; ’e ’ua fa’ati’a te mau ’āti Lamana ’ia fāri’i rātou i te fenua nā roto i te ’aufaura’a i te tute i te mau ’āti Lamana, ’oia ho’i, te ’āfara’a o tā rātou mau faufa’a ato’a.

23 ’E ’ua fa’a’ite mai ra te mau ta’ata i te feiā o Gideona ’e ’ua taparahi rātou i te ari’i, ’e ’ua horo atu tōna mau tahu’a i roto roa i te mēdēbara.

24 ’E i muri a’era, ’ia fa’aoti a’era rātou i te ’ōro’a paraparaura’a, ’ua ho’i fa’ahou atu ra rātou i te fenua ra nō Nephi ma te ’oa’oa, nō te mea ’aita tā rātou mau vahine ’e tā rātou mau tamari’i i taparahihia ; ’e ’ua fa’a’ite atu rātou ia Gideona i tā rātou i rave i te ari’i.

25 ’E i muri a’era, ’ua tapu ihora te ari’i o te mau ’āti Lamana i te hō’ē tapu ia rātou ē, ’aita tōna mau ta’ata e taparahi ia rātou.

26 ’E ’o Limehi ato’a, e tamaiti ’oia nā te ari’i, ’e ’ua hōro’ahia mai te bāsileia iāna e te mau ta’ata, ’ua tapu ’oia i te ari’i o te mau ’āti Lamana, e ’aufau atu tōna mau ta’ata i te tute iāna, ē tae noa atu i te ’āfara’a o tā rātou ra mau faufa’a ato’a.

27 ’E i muri a’era, ’ua ha’amata ihora Limehi i te fa’ati’a i te bāsileia ’e i te fa’atupu ho’i i te hau i rotopū i tōna ra mau ta’ata.

28 ’E ’ua ha’a’ati atu ra te ari’i o te mau ’āti Lamana i te fenua ē ’ati noa a’e i te mau tīa’i fa’ehau, ’ia tāpe’a ’oia i te mau ta’ata o Limehi i roto i te fenua, ’ia ’ore rātou ’ia haere atu i roto i te mēdēbara ; ’e ’ua tauturu atu ’oia i tōna ra mau tīa’i fa’ehau nā roto i te tute tei ’aufauhia mai iāna e te mau ’āti Nephi.

29 ’E i teienei ’ua fāri’i tāmau noa te ari’i ra ’o Limehi i te hau i roto i tōna ra bāsileia nō te ārea e piti matahiti te maoro, ’e ’aita roa te mau ’āti Lamana i hāmani ’ino ’e ’aore ho’i i tītau ’ia taparahi ia rātou.