1 ’E i teienei, i muri a’era, ’ua ha’amata ihora Amona rāua te ari’i ra ’o Limehi i te paraparau atu i te mau ta’ata nāhea rātou ’ia fa’aora ia rātou iho i te fa’atītīra’a ; ’e ’ua ha’aputuputu rāua i te mau ta’ata ato’a i te vāhi hō’ē ; ’e ’ua nā reira rāua ’ia ti’a ia rāua ’ia fāri’i i te reo o te mau ta’ata nō ni’a i taua ’ōpuara’a ra.

2 ’E i muri a’era, ’aita roa i ’itea ia rātou te rāve’a nō te fa’aora ia rātou iho i te fa’atītīra’a, maori rā ’ia rave i tā rātou mau vahine ’e te mau tamari’i, ’e tā rātou mau nana māmoe, ’e tā rātou mau nana pua’atoro, ’e tō rātou mau ti’ahapa, ’e ’ia reva atu i roto i te mēdēbara ; nō te rahi o te mau ’āti Lamana, ’aita roa e ti’a i te mau ta’ata o Limehi ’ia tama’i atu ia rātou, nō te mana’ora’a ’ia fa’aora ia rātou iho i te fa’atītīra’a ma te fa’a’ohipa i te ’o’e.

3 I teienei, i muri a’era, ’ua haere atu ra Gideona ’e ti’a atu ra i mua i te ari’i, ’e ’ua nā ’ō atu ra iāna : I teienei, ’e te ari’i, ’ua fa’aro’o pinepine a’enei ’oe i tā’u ra mau parau, ’a tama’i ai tātou i tō tātou mau taea’e, i te mau ’āti Lamana.

4 ’E i teienei, e te ari’i, mai te mea ē, ’aita ā ’oe i ’ite iā’u ’ei tāvini faufa’a ’ore, ’e ’ua fa’aro’o a’enei ’oe i tā’u mau parau ato’a, ’e e mea faufa’a ia ’oe na, tē hina’aro nei ïa vau ’ia fa’aro’o ato’a mai ’oe i tā’u nei mau parau i teie taime, ’e e riro vau ’ei tāvini nō ’oe ’e e fa’aora vau i teie nei mau ta’ata i te fa’atītīra’a.

5 ’E ’ua fa’ati’a atu ra te ari’i iāna ’ia paraparau mai. ’E ’ua parau atu ra Gideona iāna :

6 ’A hi’o na i te ’ē’a i muri, ’o tē haere ra nā roto i te patu i muri, i te pae muri o te ’oire. I te ru’i e ta’ero noa te mau ’āti Lamana, ’oia ho’i, te mau tīa’i fa’ehau o te mau ’āti Lamana ; nō reira, e fa’atae atu tātou i te hō’ē fa’auera’a i rotopū i teie nei mau ta’ata ato’a, ’ia ha’aputuputu rātou i tā rātou mau nana māmoe ’e te mau nana pua’atoro, ’e ’ia fa’ahaere atu ia rātou i roto i te mēdēbara i te ru’i.

7 ’E e haere au mai te au i tā ’oe fa’auera’a ’e e ha’ape’e roa atu i te ’aufau i te tute hope’a nō te uaina i te mau ’āti Lamana, ’e e ta’ero rātou ; ’e i reira tātou e haere ti’a atu ai nā roto i te ’ē’a mo’emo’e nā te pae ’aui o tō rātou pūhapara’a ’a ta’ero ai ’e ’a ta’oto ai ho’i rātou.

8 ’E nā reira tātou ’e tā tātou mau vahine ’e tā tātou mau tamari’i, ’e tā tātou mau nana māmoe, ’e tā tātou mau nana pua’atoro i te haere atu i roto i te mēdēbara ; ’e e haere atu tātou nā te fenua ra nō Siloma.

9 ’E i muri a’era, ’ua fa’aro’o mai ra te ari’i i tā Gideona ra mau parau.

10 ’E ’ua fa’aue atu ra te ari’i ’o Limehi ’ia ha’aputuputu mai tōna ra mau ta’ata i tā rātou mau nana ; ’e ’ua fa’atae atu ’oia i te tute nō te uaina i te mau ’āti Lamana ; ’e ’ua fa’atae rahi atu ’oia i te uaina ’ei tao’a hōro’a nā rātou ; ’e ’ua inu rahi noa rātou i te uaina tā te ari’i tā Limehi i fa’atae atu ia rātou.

11 ’E i muri a’era, ’ua reva atu ra te mau ta’ata o te ari’i ’o Limehi ’e tā rātou mau nana māmoe ’e tā rātou mau nana pua’atoro i te ru’i i roto te mēdēbara, ’e ’ua haere atu rātou nā te fenua ra nō Siloma i roto i te mēdēbara, ’e ’ua fāriu ti’a atu ra rātou i te fenua ra nō Zarahemela, ’e ’ua arata’ihia rātou e Amona ’e tōna ra mau taea’e.

12 ’E ’ua ’āfa’i ato’a rātou i tā rātou ’auro ato’a ’e te ’ārio, ’e tā rātou mau tao’a faufa’a rahi tei mara’a ia rātou ; ’e tā rātou ato’a ra mau mā’a i roto i te mēdēbara ; ’e ’ua tere noa atu ra rātou.

13 ’E ’ia ma’iri a’era e rave rahi mahana i roto i te mēdēbara, ’ua tae atu ra rātou i te fenua ra nō Zarahemela, ’e ’ua ’āmui atu rātou i tō Mosia mau ta’ata, ’e ’ua riro ihora rātou i raro a’e i tāna fa’aterera’a.

14 ’E i muri a’era, ’ua fāri’i mai Mosia ia rātou ma te ’oa’oa ; ’e ’ua fāri’i ato’a ’oia i tā rātou mau pāpa’a parau ’e te mau pāpa’a parau ato’a tei ’iteahia ’e te mau ta’ata o Limehi.

15 ’E i teienei, i muri a’era, ’ia ’ite a’era te mau ’āti Lamana ē, ’ua reva ’ē atu te mau ta’ata o Limehi i rāpae i te fenua i te ru’i, ’ua tono atu ra rātou i te nu’u fa’ehau i roto i te mēdēbara nō te tāpapa ia rātou.

16 ’E i muri a’e i tō rātou tāpapa-noa-ra’a ia rātou e piti mahana, ’aita e ti’a ia rātou ’ia pe’e fa’ahou atu i tō rātou mau ’ē’a, ’e nō reira ’ua mo’e rātou i roto i te mēdēbara.