1 I teienei, ’ua fa’aarahia Alama e te Fatu ē, e tae mai te mau nu’u fa’ehau o te ari’i Noa i ni’a iho ia rātou, ’e ’ua fa’a’ite atu i tōna ra mau ta’ata, ’e nō reira ’ua ha’aputuputu rātou i tā rātou mau nana māmoe, ’e ’ua rave ihora i tā rātou sītona, e haere atu ra i roto i te mēdēbara nā mua atu i te mau nu’u fa’ehau a te ari’i Noa.

2 ’E ’ua ha’apūai te Fatu ia rātou, ’ia ’ore rātou ’ia ro’ohia ’e ’ia ha’amouhia e te mau ta’ata o te ari’i Noa.

3 ’E ’ua horo ’ē atu ra rātou e va’u a’era mahana tō rātou tere i roto i te mēdēbara.

4 ’E ’ua tae mai ra rātou i te hō’ē fenua, ’oia ïa, i te hō’ē fenua nehenehe ’e te au maita’i, te hō’ē fenua pape mā.

5 ’E ’ua fa’ati’a ihora rātou i tō rātou mau ti’ahapa, ’e ’ua ha’amata ihora i te fa’a’apu i te fenua, ’e i te hāmani i te mau fare ; ’oia ïa, e feiā itoito rātou, ’e ’ua rave pūai ho’i i te ’ohipa.

6 ’E ’ua hina’aro ihora te mau ta’ata ’ia riro Alama ’ei ari’i nō rātou, nō te mea ’ua herehia ’oia e tōna ra mau ta’ata.

7 ’Ua parau atu ra rā ’oia ia rātou : Inaha, e ’ere i te mea tītauhia ’ia fa’ati’a tātou i te hō’ē ari’i ; nō te mea tē nā ’ō mai ra te Fatu : ’Eiaha ’outou e mana’o ē ’ua hau te tahi ta’ata i te tahi, e ’eiaha ho’i te tahi ta’ata e mana’o iāna iho ē, ’ua hau ’oia i te tahi atu ; nō reira tē parau atu nei au ia ’outou e ’ere i te mea tītauhia ’ia fa’ati’a ’outou i te hō’ē ari’i.

8 ’Āre’a rā, ’āhiri e ti’a ia ’outou ’ia fa’ati’a i te ta’ata parauti’a i te mau tau ato’a ’ei ari’i nō ’outou, e mea ti’a ïa ’ia fa’ati’a ’outou i te ari’i i reira.

9 ’Āre’a rā a ha’amana’o i te mau ’ohipa ’ī’ino a te ari’i Noa ’e tōna ra mau tahu’a ; ’e ’ua mau ato’a vau i roto i te mārei, i rave ai au i te mau mea vi’ivi’i e rave rahi i mua i te aro o te Fatu, ’e ’ua tātarahapa ho’i au ma te māuiui rahi.

10 ’Āre’a rā ’ia hope a’era te mau ’ati e rave rahi, ’ua fa’aro’o mai ra te Fatu i tā’u mau ti’aorora’a, ’e ’ua pāhono mai ra ho’i ’oia i tā’u mau pure, ’e ’ua fa’ariro ho’i ’oia iā’u ’ei mauha’a i roto i tōna nā rima nō te ’āfa’i mai ia ’outou e rave rahi i te ’ite i tāna parau mau.

11 ’Āre’a rā, ’aita vau e fa’ahanahana nei iā’u iho i roto i te reira, nō te mea e ’ere ho’i au i te mea ti’amā ’ia fa’ahanahana iā’u iho nei.

12 ’E i teienei, tē parau atu nei au ia ’outou, ’ua hāmani-’ino-hia ’outou e te ari’i Noa, ’e ’ua riro ’outou ’ei tītī nāna ’e nā tōna mau tahu’a, ’e ’ua arata’ihia ho’i ’outou i roto i te mau ’ohipa ’ī’ino e rātou ; nō reira ’ua ru’uru’uhia ’outou ’e te mau tā’amu nō te mau ’ohipa ’ī’ino.

13 ’E i teienei, ’ua fa’aorahia ’outou e te mana o te Atua i taua mau ru’uru’ura’a ra ; ’oia ïa, i te rima o te ari’i Noa ’e tōna mau ta’ata, ’e ’oia ato’a i te mau tā’amura’a nō te mau ’ohipa ’ī’ino, ’e nō reira ’ua hina’aro vau ’ia tāmau māite ā ’outou i roto i teie ti’amāra’a i fa’ati’amāhia ai ’outou ra, ’e ’ia ’ore ’outou ’ia ti’aturi i te hō’ē ta’ata ’ei ari’i nō ’outou.

14 ’E ’oia ato’a ’eiaha ’outou e ti’aturi i te tahi ta’ata ’ei ’orometua ’e ’ei ha’api’i nō ’outou, maori rā e ta’ata ’oia nō te Atua, i te haerera’a nā tōna ra mau ’ē’a ’e te ha’apa’ora’a i tāna ra mau fa’auera’a.

15 ’Ua nā reira Alama i te ha’api’i atu i tōna ra mau ta’ata, ’ia aroha te ta’ata tāta’itahi i tōna ta’ata tupu mai tāna e aroha iāna ihora, ’ia ’ore te mārōra’a ’ia tupu i rotopū ia rātou ra.

16 ’E i teienei, ’o Alama tō rātou tahu’a rahi, ’e nāna ho’i i fa’ati’a i tā rātou ’ēkālesia.

17 ’E i muri a’era, ’aita roa e ta’ata i fāri’i i te mana nō te a’o ’e nō te ha’api’i, maori rā nā roto iāna nō ’ō mai i te Atua ra. Nō reira ’ua fa’atōro’a ’oia i te mau tahu’a ato’a ’e te mau ’orometua ato’a ho’i nō rātou ra ; ’e ’aita roa te hō’ē a’e i fa’atōro’ahia maori rā ’o te feiā parauti’a ana’e.

18 Nō reira ’ua pāruru rātou i tō rātou mau ta’ata, ’e ’ua tauturu ho’i ia rātou i roto i te mau mea parauti’a.

19 ’E i muri a’era, ’ua manuia maita’i rātou i ni’a i te fenua, ’e ’ua ma’iri ihora rātou i te i’oa o taua fenua ra ’o Helama.

20 ’E i muri a’era, ’ua tupu rātou i te rahi ’e ’ua manuia maita’i ho’i rātou i taua fenua ra nō Helama ; ’e ’ua patu ihora rātou i te hō’ē ’oire, ’e ’ua ma’iri ihora i te i’oa o taua ’oire ra ’o Helama.

21 ’Āre’a rā ’ua ti’a i te Fatu ’ia ’avau mai i tōna ra mau ta’ata ; ’oia ïa, tē tāmata mai ra ’oia i tō rātou fa’a’oroma’i ’e tō rātou fa’aro’o ho’i.

22 ’Āre’a rā—’o ’oia ’o tē ti’aturi iāna ra, e fa’ateiteihia ïa i te mahana hope’a ra. ’Oia ïa, ’ua nā-reira-hia teie nei feiā.

23 Inaha ho’i, e fa’a’ite atu vau ia ’outou ē, ’ua arata’ihia rātou i roto i te fa’atītīra’a, ’e ’aore e ti’a i te tahi ’ia fa’aora ia rātou, maori rā ’o te Fatu tō rātou Atua ana’e ra ; ’oia ïa, te Atua o Aberahama ’e Isaaka ’e Iakoba.

24 ’E i muri a’era, ’ua fa’aora ’oia ia rātou ē, ’ua fa’a’ite ato’a atu ra ’oia i tōna mana rahi ia rātou, ’e ’ua ’oa’oa rahi rātou.

25 Inaha ho’i, i muri a’era, ’a pārahi ai rātou i te fenua ra nō Helama, ’oia ïa, i te ’oire nō Helama, ’e ’a fa’a’apu noa ai ho’i rātou i te fenua ē ’ati noa a’e, inaha, tei te mau ’ōti’a o te fenua ra te tahi nu’u fa’ehau o te mau ’āti Lamana.

26 I teienei, i muri a’era, ’ua horo mai ra te mau taea’e o Alama mai tā rātou mau fa’a’apu mai, ’e ’ua ha’aputuputu ihora rātou ia rātou iho i roto i te ’oire nō Helama ; ’e ’ua mata’u roa ihora rātou nō te taera’a mai te mau ’āti Lamana ra

27 ’Āre’a rā ’ua haere mai ra Alama ’e ’ua ti’a a’era i rotopū ia rātou, ’e ’ua a’o atu ra ia rātou ’eiaha rātou e mata’u, ’ia ha’amana’o rā i te Fatu tō rātou Atua, ’e nāna ho’i rātou e fa’aora.

28 Nō reira ’ua fa’a’ore rātou i tō rātou mata’u, ’e ’ua ha’amata ihora rātou i te ti’aoro atu i te Fatu ’ia ha’amarū ’oia i te ’ā’au o te mau ’āti Lamana, ’ia fa’aorahia rātou, ’e tā rātou mau vahine, ’e tā rātou mau tamari’i.

29 ’E i muri a’era, ’ua ha’amarū ihora te Fatu i te ’ā’au o te mau ’āti Lamana. ’E ’ua haere atu ra Alama e tōna mau taea’e, ’e ’ua tu’u atu ra ia rātou iho i roto i tō rātou rima ; ’e ’ua rave ihora te mau ’āti Lamana i te fenua ra nō Helama.

30 I teienei, ’ua mo’e roa te mau nu’u fa’ehau o te mau ’āti Lamana tei a’ua’u atu i te mau ta’ata o te ari’i Limehi, ’oia ïa, ’ua mo’e roa rātou i roto i te mēdēbara e rave rahi mahana.

31 ’E inaha, ’ua ’itehia ia rātou te mau tahu’a o te ari’i Noa i te tahi vāhi tā rātou i ma’iri i te i’oa ia Amulona ; ’e ’ua ha’amata rātou i te pārahi i te fenua nō Amulona, ’e ’ua ha’amata ho’i i te fa’a’apu i te fenua.

32 I teienei ’o Amulona te i’oa o te ta’ata fa’atere o taua mau tahu’a ra.

33 ’E i muri a’era ’ua tāparu atu ra Amulona i te mau ’āti Lamana ; ’e ’ua tono ato’a atu ra ’oia i tā rātou mau vahine, ’oia ho’i, te mau tamāhine a te mau ’āti Lamana, nō te tāparu atu i tō rātou mau taea’e, ’ia ’ore rātou ’ia taparahi i tā rātou mau tāne.

34 ’E ’ua aroha mai ra te mau ’āti Lamana ia Amulona ’e tōna mau taea’e, ’e ’aita atu ra ho’i rātou i taparahi ia rātou nō tā rātou mau vahine.

35 ’E ’ua ’āmui ihora Amulona ’e tōna mau taea’e i te mau ’āti Lamana, ’e tē haere noa ra rātou nā roto i te mēdēbara i te ’imira’a i te fenua nō Nephi, ’e ’ua ’ite a’era rātou i te fenua nō Helama, tei pārahihia e Alama ’e tōna ra mau taea’e.

36 ’E i muri a’era, ’ua fafau mai ra te mau ’āti Lamana ia Alama ’e tōna mau taea’e ē, mai te mea e fa’a’ite atu rātou ia rātou i te ’ē’a ē tae atu ai i te fenua ra nō Nephi, e’ita rātou e taparahi ia rātou ’e e hōro’a mai rātou i tō rātou ti’amāra’a.

37 ’Āre’a rā i muri iho i tō Alama fa’a’itera’a atu i te ’ē’a ia rātou ē tae atu ai i te fenua ra nō Nephi, ’aita te mau ’āti Lamana i ha’apa’o i tā rātou fafaura’a ; ’ua fa’ati’a rā rātou i te mau tīa’i ē ’ati noa a’e te fenua ra nō Helama, i ni’a a’e ia Alama ’e tōna ra mau taea’e.

38 ’E ’ua haere atu te toe’a o rātou i te fenua ra nō Nephi ; ’e ’ua ho’i mai ra te tahi pae o rātou i te fenua ra nō Helama, ’e ’ua ’āfa’i ato’a mai rātou i te mau vahine ’e te mau tamari’i a te mau tīa’i ’o tei vaiihohia atu i taua fenua ra.

39 ’E ’ua fa’ati’a mai ra te ari’i o te mau ’āti Lamana ’ia fa’arirohia Amulona ’ei ari’i ’e ’ei tāvana i ni’a a’e i tōna ta’ata i te fenua ra nō Helama ; ’āre’a rā ’aita tōna e mana ’ia rave i te tahi atu mea tei ’ore i au i te mana’o o te ari’i o te mau ’āti Lamana.