1 ’E i muri a’era, ’ua ho’i atu ra Limehi ’e tōna mau ta’ata i te ’oire ra nō Nephi, ’e ’ua ha’amata ihora rātou i te pārahi fa’ahou i ni’a i te fenua ma te hau.

2 ’E i muri a’era, ’ia hope a’era te mau mahana e rave rahi, ’ua fa’atupu fa’ahou ihora te mau ’āti Lamana i te riri i te mau ’āti Nephi, ’e ’ua ha’amata ihora rātou i te haere mai i roto i te mau ’ōti’a nō te fenua ē ’ati noa a’e.

3 I teienei ’ua mata’u rātou ’ia taparahi ia rātou, nō te mea ’ua fa’aoti tō rātou ari’i i te hō’ē tapura’a ia Limehi ; ’āre’a rā ’ua tūpa’i noa mai rātou i tō rātou pāpāri’a, ’e ’ua fa’ahepohepo ho’i ia rātou ; ’e ’ua tu’u i te mau hōpoi’a teiaha i ni’a iho i tō rātou tapono, ’e ’ua fa’atere ho’i ia rātou mai tā rātou i fa’atere i te ’āsini vāvā ra—

4 ’Oia ïa, ’ua ravehia teie mau mea ato’a ’ia fa’ati’ahia te parau a te Fatu.

5 ’E i teienei ’ua fāri’i te mau ’āti Nephi i te mau ’ati rahi, ’e ’aita roa e rāve’a e ti’a ai a rātou ’ia fa’aora ia rātou iho i tō rātou rima, nō te mea ’ua ha’a’atihia rātou e te mau ’āti Lamana ē ’ati noa a’e.

6 ’E i muri a’era, ’ua ha’amata ihora te mau ta’ata i te amuamu atu i te ari’i nō tō rātou mau ’ati rahi ; ’e ’ua hina’aro ihora rātou ’ia haere atu e ’aro ia rātou. ’E ’ua ha’ape’ape’a rahi rātou i te ari’i i tā rātou mau amuamura’a ; nō reira ’ua fa’ati’a atu ’oia ia rātou ’ia rave mai te au i tō rātou mau hina’aro.

7 ’E ’ua ha’aputuputu fa’ahou ihora rātou ia rātou iho, ’e ’ua ’ahu ihora i tō rātou ’ahu tama’i, ’e ’ua haere atu ra e ’aro i te mau ’āti Lamana nō te tīahi ia rātou i rāpae i tō rātou fenua.

8 ’E i muri a’era, ’ua ha’avī ihora te mau ’āti Lamana ia rātou, ’e ’ua tūra’i ia rātou i muri i tō rātou fenua, ’e ’ua taparahi e rave rahi o tō rātou mau ta’ata.

9 ’E i teienei ’ua tupu ihora te ’oto rahi ’e te autā rahi i rotopū i te mau ta’ata o Limehi ; tē ’oto ra te vahine ’ivi nō tāna tāne, tē ’oto ra te tamaiti ’e te tamāhine nō tō rātou metua tāne, ’e te mau taea’e nō tō rātou mau taea’e.

10 I teienei ’ua rahi te mau vahine ’ivi i ni’a i te fenua, ’e ’ua ta’i pūai noa rātou i terā mahana ’e i terā mahana, i tupu na ho’i tō rātou mata’u rahi i te mau ’āti Lamana ’o tei ’aro mai ia rātou.

11 ’E i muri a’era, nā tō rātou mau ’oto hope’a ’ore i fa’ati’arepu i te toe’a o te mau ta’ata o Limehi ’ia riri atu i te mau ’āti Lamana ; ’e ’ua haere fa’ahou atu ra rātou nō te ’aro, ’āre’a rā ’ua tūra’i-fa’ahou-hia rātou i muri ma te pohe rahi.

12 ’Oia ïa, ’ua haere fa’ahou atu ra rātou i te toru o te taime, ’e hō’ē ā tō rātou pohe ; ’e te mau ta’ata tei ’ore i taparahihia, ’ua ho’i fa’ahou mai ra rātou i te ’oire ra nō Nephi.

13 ’E ’ua fa’aha’eha’a ihora rātou ia rātou iho i raro i te repo, i te tu’ura’a atu ia rātou iho i te zugo nō te tītīra’a ra, i te fa’ati’ara’a atu ’ia tā’irihia, ’e ’ia tīahihia rātou i terā vāhi ’e i terā vāhi, ’e ’ia tu’uhia ho’i te hōpoi’a i ni’a iho ia rātou, mai te au i te hina’aro o tō rātou ra mau ’enemi.

14 ’E ’ua fa’aha’eha’a ihora rātou ia rātou iho i raro i te ha’eha’a rahi roa ; ’e ’ua ti’aoro māite atu rātou i te Atua ; ’oia ïa, ’ua ti’aoro atu rātou i tō rātou Atua i te mahana tā’āto’a, ’ia fa’aora ’oia ia rātou i tō rātou ra mau ’ati rahi.

15 ’E i teienei ’ua fa’atāere te Fatu i te fa’aro’o atu i tā rātou ti’aorora’a nō tā rātou mau ’ohipa ’ī’ino ; noa atu rā ’ua fa’aro’o te Fatu i tā rātou mau ti’aorora’a, ’e ’ua ha’amata ’oia i te ha’amarū i te ’ā’au o te mau ’āti Lamana, ’e ’ua ha’amāmā ri’i rātou i tā rātou mau hōpoi’a ; ’aita rā te Fatu i fa’aora ia rātou i te fa’atītīra’a.

16 ’E i muri a’era, ’ua ha’amata ri’i rātou i te manuia i ni’a i te fenua, ’e ’ua ha’amata ho’i rātou i te fa’arahi i tā rātou fa’a’apura’a i te sītona, ’e te fa’a’amura’a i te mau nana māmoe, ’e te mau nana pua’atoro, ’e ’aita rātou i pohe i te po’ia.

17 I teienei e rave rahi te mau vahine i reira, ’ua rahi atu rātou i te mau tāne ; nō reira ’ua fa’aue atu te ari’i ra ’o Limehi ’ia hōro’a te mau tāne ato’a i te tauturura’a i te mau vahine ’ivi ’e tā rātou mau tamari’i, ’ia ’ore rātou ’ia pohe nō te po’ia ; ’e ’ua nā reira rātou nō te rahi o te ta’ata i taparahihia.

18 I teienei ’ua ’āmui ihora te mau ta’ata ato’a o Limehi i roto i te pupu hō’ē i te mau tau e au, ’e ’ua tīa’i ho’i rātou i tā rātou sītona ’e tā rātou mau nana māmoe.

19 E ’aita te ari’i i haere i rāpae’au i te mau aua o te ’oire, maori rā tei pīha’i iho tōna mau tīa’i iāna, i mata’u ho’i ’oia ’o te tupu te hō’ē mea e riro atu ’oia i roto i te rima o te mau ’āti Lamana.

20 ’E ’ua fa’aue atu ra ’oia i tōna mau ta’ata ’ia hi’ohi’o māite i te fenua ē ’ati noa a’e, ’o te tupu te hō’ē mea e roa’a ai ia rātou te mau tahu’a tei horo ’ē atu i roto i te mēdēbara, ’e tei ’eiā ho’i i te mau tamāhine a te mau ’āti Lamana, ’e tei fa’atupu i te pau rahi ’ia tae mai i ni’a iho ia rātou.

21 ’E ’ua hina’aro roa rātou ’ia haru ia rātou ’e ’ia fa’autu’a ia rātou ; ’e ’ua haere mai ho’i rātou i te fenua nō Nephi i te pō, ’e ’ua hōpoi ’ē atu i tā rātou sītona ’e tā rātou mau tao’a faufa’a rahi e rave rahi ; nō reira ’ua tīa’i noa rātou ia rātou.

22 ’E i muri a’era, ’ua ’ore roa te pe’ape’a i rōpū i te mau ’āti Lamana ’e te mau ta’ata o Limehi, ē tae noa atu i te tau i tae mai ai Amona ’e tōna mau taea’e i taua fenua ra.

23 Tē pārahi ra te ari’i ’e tōna tīa’i ato’a i rāpae’au i te ’ūputa, ’e ’ua ’ite atu ra rāua ia Amona ’e tōna mau taea’e ; ’e ’ua mana’o ihora rāua ē, e mau tahu’a teie nō Noa, nō reira ’ua fa’aue ihora ’oia ’ia haruhia, ’e ’ia ru’uru’uhia ’e ’ia hurihia rātou i roto i te fare tāpe’ara’a. ’E ’āhiri e mau tahu’a rātou nō Noa, ’ua fa’aue ïa ’oia ’ia taparahihia rātou.

24 ’Āre’a rā ’ia ’ite a’era ’oia ē, e ’ere ïa ’o rātou, ’e e mau taea’e rā nōna, ’e ’ua haere mai rātou mai te fenua nō Zarahemela mai, ’ua ’ī ihora ’oia i te ’oa’oa rahi roa.

25 I teienei hou te taera’a mai o Amona, ’ua tono atu te ari’i ra ’o Limehi i te tahi mau tāne nō te ’imi i te fenua ra nō Zarahemela ; ’aita rā te reira i ’itea ia rātou, ’e ’ua mo’e rātou i roto i te mēdēbara.

26 ’Āre’a rā, ’ua ’itea ia rātou te tahi fenua i ta’atahia i muta’a ihora ; ’oia ïa, e fenua i tāpo’ihia i te mau ivi marō ; ’oia ïa, e fenua i ta’atahia na, ’e ’ua ha’amouhia ; ’e tē mana’o ra rātou ē, ’o te fenua ra ïa nō Zarahemela, ’e ’ua ho’i mai ra rātou i te fenua ra nō Nephi, ’e ’ua tae mai rātou i te ’ōti’a o te fenua i nā mahana ri’i hou te taera’a mai o Amona.

27 ’E ’ua hōpoi mai rātou i te hō’ē pāpa’a parau nā muri ia rātou, ’oia ïa, te hō’ē pāpa’a parau nō te feiā nō rātou te mau ivi i ’iteahia e rātou ra ; ’e ’ua ’ō’otihia te reira i ni’a iho i te mau ’api i hāmanihia i te ’ōfa’i metalo ra.

28 ’E i teienei ’ia ’ite a’era Limehi, nā roto mai i te vaha o Amona ē, ’ua roa’a ia Mosia te hōro’a nō ’ō mai i te Atua ra e ti’a ai iāna ’ia ’īriti i taua mau mea i ’ō’otihia ra, ’ua ’ī fa’ahou ihora ’oia i te ’oa’oa ; ’oia ïa, ’ua ’oa’oa ato’a ho’i Amona.

29 ’E ’ua ’oto rahi Amona ’e tōna mau taea’e nō te mea ’ua rahi tō rātou mau taea’e i taparahihia.

30 ’E ’oia ato’a nō te mea ’ua fa’ati’a te ari’i ra ’o Noa ’e tōna mau tahu’a ’ia rave te mau ta’ata i te mau hara e rave rahi ’e te mau ’ohipa ’ī’ino i mua i te Atua ; ’e ’ua ’oto ato’a rātou i te pohera’a o Abinadi ; ’e nō te revara’a atu ho’i ’o Alama ’e te mau ta’ata i pe’e atu iāna, ’o tei fa’ati’a i te ’ēkālesia a te Atua nā roto i te pūai ’e te mana o te Atua, ’e te fa’aro’o ho’i i te mau parau i parauhia e Abinadi.

31 ’Oia ïa, ’ua ’oto rātou nō tō rātou revara’a, nō te mea ’aita rātou i ’ite i te vāhi tā rātou i haere. I teienei e ’oa’oa roa rātou ’ia ’āmui atu ia rātou, nō te mea ’ua fafau ato’a rātou i te tahi fafaura’a i te Atua ’ia tāvini iāna ’e ’ia ha’apa’o i tāna ra mau fa’auera’a.

32 ’E i teienei mai te taera’a mai o Amona, ’ua fafau ato’a te ari’i ra ’o Limehi ’e tōna mau ta’ata e rave rahi i te tahi fafaura’a i te Atua, ’ia tāvini iāna ’e ’ia ha’apa’o i tāna mau fa’auera’a.

33 ’E i muri a’era, ’ua hina’aro Limehi ’e tōna mau ta’ata e rave rahi ’ia bāpetizohia ; ’āre’a rā ’aita roa hō’ē a’e ta’ata i taua fenua ra tei iāna te mana nō ’ō mai i te Atua ra. ’E ’ua pāto’i Amona ’ia rave i te reira, nō te mea ’ua mana’o ’oia e ’ere ’oia i te tāvini ti’amā.

34 Nō reira ’aita rātou i fa’ariro ia rātou iho ’ei ’ēkālesia, ’ua tīa’i rā i te Vārua o te Fatu. I teienei ’ua hina’aro rātou ’ia riro ato’a rātou mai ia Alama ’e tōna ra mau taea’e ’o tei haere atu i roto i te mēdēbara.

35 ’Ua hina’aro rātou ’ia bāpetizohia ’ei ’ite ’e ’ei fa’a’itera’a pāpū ē, ’ua hina’aro rātou ’ia tāvini i te Atua ma tō rātou ’ā’au ato’a ; ’āre’a rā ’ua ha’amaoro rātou i te tau ; ’e e fa’a’itehia te ’ā’amu nō tō rātou bāpetizora’ahia i muri nei.

36 ’E i teienei ’ua ’imi Amona ’e tōna ra mau ta’ata, ’e te ari’i ra ’o Limehi ’e tōna ra mau ta’ata, i te rāve’a ’ia fa’aora ia rātou iho i te rima o te mau ’āti Lamana ’e i te fa’atītīra’a.