1 ’Ua ha’api’i-māite-hia ho’i au, ’o Zenifa, i te reo o te mau ’āti Nephi, ’e ’ua ’ite ho’i au i te fenua nō Nephi, ’oia ho’i, te fenua ’āi’a mātāmua o tō mātou ra mau metua, ’e ’ua tonohia ho’i au ’ei ta’ata tāmoemoe i rotopū i te mau ’āti Lamana, ’ia ti’a iā’u ’ia tāmoemoe i te rahi o tō rātou mau nu’u, ’ia ti’a i tō mātou nu’u fa’ehau ’ia haere atu e tama’i ’e e ha’amou ia rātou—’āre’a rā i tō’u ’itera’a i te maita’i i rotopū ia rātou, ’ua hina’aro ihora vau ’eiaha rātou ’ia ha’amouhia.

2 Nō reira, ’ua mārō vau i tō’u ra mau taea’e i roto i te mēdēbara, ’e ’ua hina’aro roa vau ’ia fa’aau tō mātou ta’ata fa’atere i te parau ia rātou ; ’e nō te mea e ta’ata ’iriā ’oia ’e te hina’aro taparahi ta’ata, ’ua fa’aue ihora ’oia ’ia taparahihia vau ; ’ua orahia mai au nō te rahi o te ta’ata e taparahihia ra ; ’ua ’aro ihora ho’i te metua tāne i te metua tāne, ’e te taea’e i te taea’e, ē tae noa atu ’ua pau te pae rahi o tō mātou nu’u fa’ehau i te mēdēbara ; ’e ’ua ho’i fa’ahou atu ra mātou, mātou ’o tei toe mai, i te fenua ra nō Zarahemela, nō te fa’ati’a atu i taua ’ā’amu ra i tā rātou mau vahine ’e tā rātou mau tamari’i.

3 ’E nō te mea ’ua hina’aro rahi au ’ia fatu mātou i te fenua o tō mātou mau metua, ’ua ha’aputuputu ihora vau i te mau ta’ata i hina’aro ’ia haere atu nō te rave mai i taua fenua ra, ’e ’ua ha’amata fa’ahou atu ra mātou i tō mātou tere nā roto i te mēdēbara nō te haere atu i taua fenua ra ; ’ua ha’afifihia rā mātou e te o’e ’e te mau ’ati rahi ; e feiā tāere ho’i mātou i te ha’amana’o i te Fatu tō mātou Atua.

4 ’Āre’a rā, ’ia hope a’era e rave rahi mau mahana nō tō mātou ori-haere-noa-ra’a i roto i te mēdēbara, ’ua fa’ati’a ihora mātou i tō mātou mau ti’ahapa i te vāhi i taparahihia ai tō mātou ra mau taea’e, tei pīha’i iho ïa i te fenua o tō mātou ra mau metua.

5 ’E i muri a’era, ’ua haere fa’ahou atu ra vau ’e nā ta’ata to’omaha ato’a o tō’u ra mau ta’ata i roto i te ’oire i te ari’i ra, ’ia ’ite au i tō te ari’i ra mana’o, ’e ’ia ’ite ho’i au ē e mea ti’a ānei iā’u ’ia haere atu e tō’u ra mau ta’ata nō te fatu i te fenua ma te hau.

6 ’E ’ua haere atu vau i mua i te ari’i, ’e ’ua fafau mai ’oia iā’u ē, e ti’a iā’u ’ia pārahi i te fenua ra nō Lehi-Nephi, ’e i te fenua ra nō Siloma.

7 ’E ’ua fa’aue atu ra ho’i ’oia i tōna ra mau ta’ata ’ia haere ’ē atu rātou i rāpae i te fenua, ’e ’ua haere atu ra vau e tō’u ra mau ta’ata i taua fenua ra ’ia roa’a mai te reira ia mātou.

8 ’E ’ua ha’amata ihora mātou i te patu i te mau fare, ’e i te fa’a’āpī ho’i i te mau patu o te ’oire, ’oia ïa, i te mau patu ato’a o te ’oire nō Lehi-Nephi, ’e te ’oire ho’i nō Siloma.

9 ’E ’ua ha’amata ihora ho’i mātou i te fa’a’apu i te fenua, ’oia ïa, i te mau huru huero ato’a, mai te huero tō, te sītona, te kerite, te neasi, te siheuma, ’e te mau huero o te mau huru mā’a hotu ato’a ; ’e ’ua tupu ihora mātou i te rahi ’e ’ua manuia i ni’a i te fenua.

10 I teienei, e rāve’a ha’avare ’e e ’ohipa tāviri teie nā te ari’i ra ’o Lamana nō te tu’u i tō’u mau ta’ata i raro a’e i te fa’atītīra’a, i hōro’a mai ai ’oia i te fenua ’ei fa’aeara’a nō mātou.

11 Nō reira, i muri a’era, i muri iho i tō mātou pārahira’a i ni’a i taua fenua ra nō te ārea e hō’ē ’ahuru ’e ma piti matahiti te maoro, ’ua tapitapi ihora te ari’i ra ’o Lamana, penei a’e ’o te tupu rahi tō’u mau ta’ata i taua fenua ra, ’e ’aita e ti’a i te mau ’āti Lamana ’ia ha’avī ia rātou ’e ’ia ’āfa’i mai ia rātou i raro a’e i te fa’atītīra’a.

12 I teienei e mau ta’ata fa’atau rātou ’e te ha’amori ’īdolo ; nō reira ’ua hina’aro rātou ’ia fa’atītī ia mātou, ’ia ti’a ia rātou ’ia fāna’o i te hō’ē orara’a fa’ahiahia nā roto i te ’ohipa a tō mātou rima ; ’oia ïa, ’ia ti’a ia rātou ’ia rave i te fa’a’amu’a nā rātou iho i te mau nana nō tā mātou mau ’āua.

13 Nō reira, i muri a’era, ’ua ha’amata te ari’i ra ’o Lamana i te fa’ati’arepu i tōna ra mau ta’ata ’ia tama’i mai rātou i tō’u ra mau ta’ata ; nō reira ’ua tupu ihora te mau ’arora’a ’e te mau mārōra’a i ni’a i te fenua.

14 ’E i te ’ahuru ma toru matahiti nō tā’u fa’aterera’a i ni’a i te fenua ra nō Nephi, ’e i te pae apato’a roa i te fenua ra nō Siloma, tē fa’ainu noa ra ’e tē fa’a’amu noa ra tō’u ra mau ta’ata i tā rātou mau nana, ’e tē fa’a’apu noa ra rātou i tō rātou mau fenua, ’ua tae mai ra te nu’u fa’ehau rahi o te mau ’āti Lamana e ’aro ia rātou, ’e ’ua ha’amata ihora i te taparahi ia rātou, ’e i te haru i tā rātou mau nana, ’e i te rave ho’i i te tō nō tā rātou mau fa’a’apu.

15 ’Oia ïa, i muri a’era, ’ua horo ’ē atu ra rātou ’o tei ’ore i roa’ahia ē tae roa mai ra i te ’oire nō Nephi, ’e ’ua ani mai rātou iā’u i te tauturura’a.

16 ’E i muri a’era, ’ua hōro’a vau i te mauha’a tama’i nā rātou, mai te fana, ’e te te’a, ’e te ’o’e, ’e te simetera, ’e te rā’au tā’iri, ’e te ma’a, ’e te mau huru mauha’a ato’a e ti’a ia mātou ’ia hāmani, ’e ’ua haere atu vau ’e tō’u ra mau ta’ata nō te ’aro atu i te mau ’āti Lamana.

17 ’Oia ïa, nā roto i te pūai o te Fatu ’ua haere atu mātou e ’aro i te mau ’āti Lamana ; nō te mea ’ua ti’aoro māite atu vau ’e tō’u ra mau ta’ata i te Fatu ’ia fa’aora ’oia ia mātou i te rima o tō mātou mau ’enemi, nō te mea ’ua fa’aarahia mātou ’ia ha’amana’o i te fa’aorara’ahia tō mātou mau metua.

18 ’E ’ua fa’aro’o mai te Atua i tā mātou mau ti’aorora’a, ’e ’ua pāhono mai i tā mātou mau pure ; ’e ’ua haere atu ra mātou ma tōna ra pūai, ’oia ïa, ’ua ’aro atu mātou i te mau ’āti Lamana, ’e i te mahana hō’ē ’e te pō hō’ē ’ua taparahi mātou e toru tauatini ’e e maha ’ahuru ma toru ; ’ua taparahi mātou ia rātou ē tae roa atu ’ua tīahi ’ē mātou ia rātou mai roto atu i tō mātou fenua.

19 ’E nā’u iho, nā tō’u iho rima i tauturu i te tanu i tō rātou feiā pohe. ’E inaha, ’ua fāri’i mātou i te ’oto rahi ’e te auē, i te mea ’ua taparahihia e piti hānere e hitu ’ahuru ma iva o tō mātou ra mau taea’e.