« 20–26 nō ’Ēperēra. Mosia 4–6 : ‘E pūai hope tei fa’ahuru ’ē’ », Mai, pe’e mai—nō te ta’ata hō’ē ’e te ’utuāfare : Buka a Moromona 2020 (2020)

« 20–26 nō ’Ēperēra. Mosia 4–6 », Mai, pe’e mai—nō te ta’ata hō’ē ’e te ’utuāfare : 2020

Hōho’a

te ha’api’i ra te ari’i Beniamina i tōna mau ta’ata

I roto i te tāvinira’a i tō ’outou Atua, nā Walter Rane

20–26 nō ’Ēperēra

Mosia 4–6

« E pūai hope tei fa’ahuru ’ē »

’Ia tai’o ’e ’ia feruri ’outou i te Mosia 4–6, ’a ha’apa’o maita’i i te mau muhumuhu a te Vārua Maita’i. E aha te mau mea maita’i tei fa’auruhia ia ’outou ’ia rave ? (hi’o Mosia 5:2).

Pāpa’i i te mau mana’o e tae mai

’Ua fa’aro’o a’enei ’outou i te tahi ta’ata i te paraparaura’a ’e ’ua fa’auru-roa-hia ’outou ’ia taui i tō ’outou orara’a ? Penei a’e ’ua fa’aoti ’outou ē, nō te mea tā ’outou i fa’aro’o, e taui ri’i ’outou i tō ’outou orara’a—’aore rā e taui rahi roa. Mai te reira ato’a te a’ora’a a te ari’i Beniamina, ’e ’ua fa’atupu te mau parau mau tāna i ha’api’i i terā mana’o i ni’a i te mau ta’ata tei fa’aro’o iāna. ’Ua fa’a’ite te ari’i Beniamina i tōna mau ta’ata i te mea tā te ho’ē melahi i ha’api’i iāna—’oia ho’i e noa’a te mau ha’amaita’ira’a māere nā roto i « te toto tāra’ehara o te Mesia » (Mosia 4:2). ’Ua taui roa tāna poro’i i tō rātou hi’ora’a ia rātou iho (hi’o Mosia 4:2), ’ua taui tō rātou mau hia’ai (hi’o Mosia 5:2), ’e ’ua fa’auru ia rātou ’ia fafau i mua i te Atua ē e rave noa rātou i tōna hina’aro (hi’o Mosia 5:5). ’O te reira te ’ohipa tā te mau parau a te ari’i Beniamina i fa’atupu i ni’a i tōna mau ta’ata. E aha tā te reira e fa’atupu i ni’a ia ’outou ?

Hōho’a

ītona tuatāpapara’a a te ta’ata iho

Mau mana’o nō tā ’oe iho tuatāpapara’a pāpa’ira’a mo’a

Mosia 4

Nā roto ia Iesu Mesia, e ti’a iā’u ’ia fāri’i i te fa’a’orera’a o tā’u mau hara ’e ’ia vai mātara noa te reira.

E ’ere te upo’oti’ara’a i ni’a i te ta’ata tino nei i te ’ohipa ’ōhie. Tītauhia te tauto’ora’a rahi nō te riro « ’ei ta’ata mo’a nā roto i te tāra’ehara a te Mesia ra te Fatu » (Mosia 3:19). I te tahi taime, noa atu ’ua tae mai te mana’o nō te fa’a’orera’a hara, e nehenehe e fifi ’ia tāpe’a noa i te reira mana’o ’e ’ia fa’aea noa i ni’a i te ’ē’a o te parau ti’a. ’Ua ha’api’i te ari’i Beniamina i tōna mau ta’ata nāhea i te fāri’i i te fa’aorera’a hara ’e ’ia vai mātara noa te reira ’e ’ia ora tāmau noa ’ei ta’ata mo’a. ’Ia tai’o ’oe i te pene 4 o Mosia, e ui paha ’oe ia ’oe iho i te mau uira’a mai teie :

Mau ’īrava 1–12 :E aha te mau ha’amaita’ira’a i tae i ni’a i te mau ta’ata o te ari’i Beniamina maoti te fa’aorera’a o te mau hara ? E aha tā te ari’i Beniamina i ha’api’i atu ’ei tauturura’a ia rātou ’ia vai mātara noa tā rātou mau hara ? E aha tāna i ha’api’i nō ni’a i te fāri’ira’a i te fa’aorara’a ? E hi’o maita’i i tā te ari’i Beniamina i parau ’o te tītauhia ia tātou ’ia « tāpe’a tāmau i te mana’ora’a » (’īrava 11). E aha tā ’oe e mana’o ra e rave nō te ha’amana’o i teie mau mea ?

Mau ’īrava 12–16:’Ia au i teie mau ’īrava, e aha tē tupu i roto i tō tātou orara’a mai te mea e rave tātou i te mau mea i parauhia i roto i te ’īrava 11 ? ’Ua tupu a’ena ānei teie mau tauira’a i roto i tō ’oe orara’a ? E aha te tū’atira’a ’e te mau tauira’a i fa’ahitihia i roto i te Mosia 3:19 ?

Mau ’īrava 16–30 :Nāhea te ’ōperera’a i tā tātou nō te feiā veve e tauturu ia tātou ’ia vai mātara noa tā tātou mau hara ? Nāhea ’oe e nehenehe ai e fa’a’ohipa i te ’īrava 27 i roto i tā ’oe tauto’ora’a nō te riro te Mesia te huru ?

Hi’o ato’a David A. Bednar, « ’Ia vai matara noa tā ’outou mau hara », Ensign ’aore rā Liahona, Mē 2016, 59–62 ; Dale G. Renlund, « Te tāpe’ara’a i te tauira’a pūai o te ’ā’au », Ensign ’aore rā Liahona, Nov. 2009, 97–99.

Mosia 5:1–7

E nehenehe te Vārua o te Fatu e fa’atupu i te tauira’a rahi i roto i tō’u ’ā’au.

E ’ere i peu ’āpī ’ia fa’aro’o i te ta’ata ’ia parau ē : « E’ita tā’u e nehenehe e taui. Mai te reira iho ā vau. » I te tahi atu pae, tē fa’a’ite nei te ’ohipa i tupu nō mau ta’ata o te ari’i Beniamina nāhea te Vārua o te Fatu e nehenehe mau e taui i tō tātou ’ā’au. ’Ua ha’api’i te peresideni Russell M. Nelson : « E nehenehe tā tātou e taui i tō tatou huru. E nehenehe i tō tātou mau hina’aro iho e taui. E nehenehe te tauira’a mau—te tauira’a tāmau—e tae mai nā roto ana’e i te mana fa’aora, te mana tāmā, ’e te mana pūai nō te tāra’ehara a Iesu Mesia. Te ’evanelia a Iesu Mesia, e ’evanelia ïa nō te fa’ataui ia tātou ! » (« Te mau fa’aotira’a nō te maita’i ē a muri noa atu », Ensign ’aore rā Liahona, Nov. 2013, 108).

’Ia tai’o ’oe nō ni’a i te tauira’a i tupu i ni’a i te mau ta’ata o te ari’i Beniamina, ’a feruri nāhea te « tauira’a rahi » e tae ai i te fa’afāriura’a mau i tupu—’aore rā e nehenehe e tupu—i roto i tō ’oe orara’a. E mau taime « rahi » ānei tei arata’i i te tauira’a o tō ’oe ’ā’au, ’aore rā ’ua tupu marū noa mai tō ’oe fa’afāriura’a ?

Hi’o ato’a Ezekiela 36:26–27 ; Alama 5:14 ; David A. Bednar, « Fa’afāriuhia i te Fatu », Ensign ’aore rā Liahona, Nov. 2012, 106–9.

E ti’a i te Fa’aora ’ia taui i tō tātou ’ā’au ’e i tō tātou orara’a. Mau rima fa’aora, nā Adam Abram

Mosia 5:5–15

Tē rave nei au i ni’a iā’u i te i’oa o te Mesia ’ia rave ana’e au i te mau fafaura’a.

Hō’ē tumu te ari’i Beniamina i hina’aro ai e paraparau i tōna mau ta’ata, nō te « ma’iri [ïa] i teie nei feiā i te hō’ē i’oa ». Tē vai ra i roto ia rātou te mau ’āti Nephi ’e te mau hua’ai o Muleka, e ’ere rā te reira te i’oa tāna i mana’o. ’Ua ani ’oia i te ta’ata ’ia rave i ni’a ia rātou i te « te i’oa o te Mesia » ’ei tuha’a nō tā rātou fafaura’a nō ha’apa’o i te parau a te Atua (Mosia 1:11 ; 5:10). E aha tā ’oe i ha’api’i mai i roto i te Mosia 5:7–9 nō ni’a i te aura’a nō te ravera’a i ni’a ia ’oe i te i’oa o te Mesia ?

’Ua ha’api’i Elder D. Todd Christofferson : « Te tumu [o te mana vārua ’e mōrare ra,] ’o te Atua ïa. Tō tātou ’ē’a e tae atu i taua mana ra, e mea nā roto ïa i tā tātou mau fafaura’a ’e ’ōna » (« Te mana o te mau fafaura’a », Ensign ’aore rā Liahona, Mē 2009, 20). ’Ia tai’o ’oe i te Mosia 5:5–15, ’a fa’ati’a i te hō’ē tāpura nō te mau ha’amaita’ira’a e tae mai i roto i tō ’oe orara’a ’ia ha’apa’o ’oe i te mau fafaura’a tā ’oe i rave ’e te Atua. E mea nāhea te ha’apa’ora’a i tā ’oe mau fafaura’a i tauturu ia ’oe ’ia vai noa « te tauira’a rahi » i tupu i roto ia ’oe nā roto ia Iesu Mesia ’e tāna tāra’ehara ?

Hōho’a

tāpa’o tuatāpapara’a a te ’utuāfare

Mau mana’o nō tā te ’utuāfare tuatāpapara’a pāpa’ira’a mo’a ’e nō te pō ’utuāfare

’Ia tai’o ’outou i te mau pāpa’ira’a mo’a ’e te ’utuāfare, e nehenehe te Vārua e tauturu ia ’outou ’ia ’ite e aha te mau parau tumu e ha’afaufa’a ’e e ’āparau nō te pāhono i te mau hina’aro o te ’utuāfare. Teie te tahi mau mana’o.

Mosia 4:9–12

Nāhea tō ’outou ’utuāfare e nehenehe ai e « fa’aro’o [hope atu ā] i te Atua » (Mosia 4:9) ’e ’ia « tāpe’a tāmau ho’i i te mana’ora’a i te rahi o te Atua ra » ? (Mosia 4:11). Penei a’e e nehenehe te mau melo o te ’utuāfare ’ia tai’o i te Mosia 4:9–12 ma te hi’o mai i te mau parau e tauturu i te patu i te fa’aro’o i te Atua. ’Ei reira, e nehenehe tā rātou e pāpa’i i teie mau parau ’e e tu’u haere nā roto i te fare ’ei mau fa’aha’amana’ora’a. Nāhea te ha’amana’o-noa-ra’a i te reira mau mea e tauturu ia tātou ’ia « ’oa’oa e’ita e fa’aea » ’e ’ia « vai mātara noa tā [tātou] mau hara » ? (Mosia 4:12).

Mosia 4:14–15

E aha tā tātou i ha’api’i mai i roto i teie mau ’īrava nō ni’a i te tāputora’a ’e te mārōra’a ?

Mosia 4:16–26

Nāhea tātou pā’āto’a e riro ai ’ei ta’ata tāparu ? ’Ia au i teie mau ’īrava, e aha tei tītauhia ia tātou ’ia rave nō te mau tamari’i ato’a a te Atua ? (Mosia 4:26). ’O vai tē hina’aro nei i tā tātou tauturu ?

Mosia 4:27

Tē horo ra ānei tō ’outou ’utuāfare i te ’oi’oi e au ’ore i tōna pūai ? E ti’a paha ’ia ani i te mau melo o te ’utuāfare ’ia hi’opo’a i tā rātou mau ’ohipa nō te ha’apāpū ē, e mea itoito rātou, e mea pa’ari ato’a rā.

Mosia 5:5–15

E aha te mana’o e tae mai ’ia hi’ohia te ravera’a i te i’oa o te Mesia i ni’a ia tātou ’e tō tātou aura’a ’e ōna ? E tauturu mai paha te paraparaura’a i te tumu te ta’ata e pāpa’i ai i te tahi taime i tō rātou i’oa i ni’a i tā rātou mau tauiha’a. Nāhea tātou nō te fa’a’ite ē « nō » te Fa’aora tātou ?

Nō te tahi atu ā mau mana’o nō te ha’api’ira’a i te mau tamari’i, hi’o i te arata’i ha’api’ira’a nō teie hepetoma i roto i te Mai, pe’e mai—nō te Paraimere.

Ha’amaita’i i tā tātou ha’api’ira’a

Aupuru i te vāhi au nō te here Te huru te mau melo o te ’utuāfare i ni’a i te tahi ’e te tahi, e nehenehe te reira e tauturu roa ’ino i te vārua i tō ’outou fare. ’A tauturu i te mau melo ato’a o te ’utuāfare ’ia rave i tā rātou tuha’a nō te ha’amau i te hō’ē fare nō te here ’e nō te fa’atura, ’ia vai te mana’o au nō te fa’a’ite i te ’ohipa i tupu ia rātou, nō te ui i te mau uira’a ’e nō te fa’a’ite i te mau ’itera’a pāpū. (Hi’o Ha’api’ira’a mai tā te Fa’aora, 15.)