Minerva K. Teichert (1888-1976), Amona i mua i te ari’i Limehi, 1949-1951, oil on masonite, 35 15/16 x 48 inches. Brigham Young University Museum of Art, 1969.

27 nō ’Ēperēra–3 nō Mē.

Mosia 7–10

« Ma te pūai o te Fatu »

’Ia tai’o ’oe, e nehenehe te Vārua e fa’aharu i tō ’oe mata i ni’a i te tahi mau parau ’aore rā te tahi mau pereoda. ’A pāpa’i i tō ’outou mana’o nō ni’a i te tanora’a te reira i ni’a ia ’outou.

Pāpa’i i te mau mana’o e tae mai

’A ’oa’oa noa ai te mau ta’ata o te ari’i Mosia i te « hau » i Zarahemela (Mosia 7:1), ’ua fāriu tō rātou mau mana’o i ni’a i te tahi atu pupu ’āti Nephi, tei haere e rave rahi matahiti nā mua atu e noho i te fenua ra Lehi-Nephi. Tau u’i tei he’e atu, ’e ’aita e parau ’āpī i tae mai nō rātou. Nō reira ’ua ani Mosia ia Amona ’ia arata’i i te tahi pupu ta’ata nō te ’imi i terā mau ’āti Nephi i haere ’ē atu. ’Ua ’itehia mai e teie pupu ta’ata ē, « nō te ’ino rahi » i roto i teie mau ’āti Nephi (Mosia 7:24), ’ua fa’atītīhia rātou e te mau ’āti Lamana. I te taera’a mai Amona ’e tōna mau taea’e, ’ua tupu ihora te tīa’i nō te fa’aorara’a.

I te tahi mau taime, mai teie nei mau tītī ’āti Nephi tātou i te māuiuira’a i tā tātou mau hara, i te ferurira’a nāhea pa’i e noa’a ai te hau. I te tahi taime, mai ia Amona tātou, i te fa’aurura’ahia ’ia toro i te rima ia vetahi ’ē ’e i te pae hope’a e ’ite mai tātou ē, ’ua fa’auru tā tātou mau tauto’ora’a ia rātou ’ia « fa’ateitei [i tō rātou] upo’o ma te ’oa’oa, [’e ’ia] ti’aturi i te Atua » (Mosia 7:19). Ta’a ’ē noa atu tō tātou vaira’a, tītauhia ia tātou pā’āto’a ’ia tātarahapa ’e ’ia « fāriu… i te Fatu ma te ’ā’au ato’a », ma te fa’aro’o ē, « e fa’aora… ’oia ia [tātou] » (Mosia 7:33).

Mau mana’o nō tā ’oe iho tuatāpapara’a pāpa’ira’a mo’a

Mosia 7:14–33

Mai te mea e fāriu vau i te Fatu, e ti’aturi iāna ’e e tāvini iāna, e fa’aora mai ’oia iā’u.

Nā roto i te fārereira’a ia Amona, e ’āti Nephi ho’i nō Zarahemela, ’ua noa’a i te ari’i Limehi i te tahi ma’a tīa’ira’a, ’e ’ua hina’aro a’era ’oia ’ia noa’a ato’a te reira i tōna mau ta’ata. ’Ia tai’o ’oe i te Mosia 7:14–33, ’a hi’o maita’i i tā Limehi i parau i tōna mau ta’ata ’ei fa’aitoitora’a ia rātou, ’ei ha’apūaira’a i tō rātou fa’aro’o ’e ’ei hōro’ara’a ia rātou i te tīa’ira’a ē, e tauturu mai te Atua ia rātou. Noa atu ā pa’i ’aita paha ’oe i rave i te hara mai tā te mau ta’ata o Limehi, nāhea tāna mau parau e nehenehe ai e tauturu ia ’oe ’ia fāriu i te Fatu ? E ’ite ’oe ē, ’ei hi’ora’a, ’ua fa’aha’amana’o Limehi i tōna mau ta’ata i te mau fa’ati’ara’a tahito nō te fa’aorara’a a te Atua (hi’o mau ’īrava 18–20). Nāhea teie mau fa’ati’ara’a, mai te tahi ato’a mau fa’ati’ara’a o te mau pāpa’ira’a mo’a ’aore rā te mau ’ohipa i tupu nō ’oe, e tauturu ia ’oe ’ia ti’aturi i te Atua ?

Mosia 8:5–12

E aha terā nā 24 ’api i ’itehia mai e te mau ta’ata o Limehi ?

I te ’imira’a te tahi pupu iti o te mau ta’ata o Limehi i te fenua ra o Zarahemela, ’aita i ’itehia mai ia rātou, ’ua ’ite mai rā rātou e 24 ’api ’auro ma te tahi pāpa’ira’a ’aita rātou i mātau. Tē fa’ati’a ra teie mau ’api, tei ’īritihia i muri iho e te ari’i Mosia, nō ni’a i te hō’ē nūna’a tei parauhia te mau ’āti Iareda, tei haere mai i te fenua i parauhia, mai te fenua ra o te patu o Babela ’e ’ua ha’amouhia rātou i te pae hope’a (hi’o Mosia 28:11–19). I muri mai, ’ua hāmani Moroni i te hō’ē ha’apotora’a nō teie mau ’api (hi’o Ether 1:1–2), tei riro mai i te buka nō Etera. ’A hi’o maita’i i roto i te Mosia 28:18, te ’ohipa o teie mau pāpa’a parau i fa’atupu i ni’a i te mau ta’ata o Mosia.

Mosia 8:12–19

’Ua hōro’a mai te Fatu i te mau peropheta, te mau hi’o ’e te mau heheu parau nō te maita’i o te ta’ata nei.

I te fa’aro’ora’a Limehi i te ’itera’a pāpū o Amona nō ni’a i te fa’ati’ara’a te Fatu i te hō’ē hi’o, ’ua « ’oa’oa roa a’era… ’e ’ua ha’amaita’i atura ’oia i te Atua » (Mosia 8:19). I tō ’oe mana’o, nō te aha ’oia i ’oa’oa ai mai te reira ? E aha tā ’oe e ha’api’i nei nō ni’a i te mau hi’o i roto i te mau parau a Amona i roto i te Mosia 8:13–19 ? I tō tātou nei tau, « E pāturuhia te Peresidenira’a Mātāmua ’e te ’āpo’ora’a nō te Tino ’Ahuru Ma Piti » ’ei mau peropheta, ’ei mau hi’o ’e ’ei mau heheu parau » (Bible Dictionary, « Seer »). Afea ra te taime hope’a ’oe i feruri i te ha’amaita’ira’a ē tē vai ra te mau peropheta, te mau hi’o ’e te mau heheu parau i ni’a i te fenua nei ? Penei a’e e nehenehe tā ’oe e pāpa’i nāhea te mau peropheta, te mau hi’o ’e te mau heheu parau i riro ai ’ei mea « faufa’a rahi » nō ’oe (Mosia 8:18).

’O te peropheta Iosepha Semita te hi’o rahi e ti’a nei i te upo’o o tō tātou nei tau tu’ura’a (hi’o PH&PF 21:1124:125Iosepha Semita—’Ā’amu 1:62 I roto i tāna tau tāvinira’a, e aha te tanora’a e ’itehia i roto i tōna hi’ora’a ’e te fa’ahitira’a a Amona nō te hō’ē hi’o ?

Mosia 9–10

E ti’a iā’u ’ia fa’aruru i tō’u mau tāmatara’a « nā roto i te pūai o te Fatu ».

’Ua fā’i Zenifa ē, ’ua hape ’oia. ’Ua rahi roa tōna hia’ai i te tahi taime, ’e ’ua tu’u ’oia i tōna mau ta’ata—te mau tupuna o te mau ta’ata o Limehi—i roto i te vaira’a ataata nā roto i te fāri’ira’a i te tahi fa’aaura’a pa’ari ’ore ’e te ari’i Lamana. I muri a’e rā, i te taime ’a ’aro ai ’oia i te mau ’āti Lamana, ’ua tauturu ’oia i tōna mau ta’ata ’ia fa’aruru i tō rātou mau tāmatara’a ma te fa’aro’o. ’Ia tai’o ’oe i te Mosia 9–10, ’a hi’o i tā te mau ta’ata o Zenifa i rave ’ei fa’a’itera’a i tō rātou fa’aro’o. Nāhea te Atua i te ha’apūaira’a ia rātou ? E aha te aura’a nō ’oe ’ia haere « nā roto i te pūai o te Fatu » ? (Mosiah 9:17 ; 10:10–11).

Mosia 10:11–17

E fa’ahope’ara’a tō ta’u mau mā’itira’a i ni’a i te mau u’i.

’Ia au i te Mosia 10:11–17, nāhea te mau ’ohipa ’e te huru o te mau tupuna o te mau ’āti Lamana i fa’a’ere ia rātou i te ’itera’a i te parau mau ? E aha tā te mau mā’itira’a a te mau tupuna ’āti Lamana i fa’atupu i ni’a i te mau u’i nō muri mai ? ’A feruri i te mau ta’ata e nehenehe e ’umehia e tō ’oe mau ti’aturira’a ’e tā ’oe mau mā’itira’a ; e aha tā ’oe e rave nei ’ei tauturura’a ia rātou ’ia noa’a hope fa’ahou atu ā te fa’aro’o i te Mesia ?

Mau mana’o nō tā te ’utuāfare tuatāpapara’a pāpa’ira’a mo’a ’e nō te pō ’utuāfare

’Ia tai’o ’outou i te mau pāpa’ira’a mo’a ’e te ’utuāfare, e nehenehe te Vārua e tauturu ia ’outou ’ia ’ite e aha te mau parau tumu e ha’afaufa’a ’e e ’āparau nō te pāhono i te mau hina’aro o te ’utuāfare. Teie te tahi mau mana’o.

Mosia 7:19–20

’A hi’o na i te mau hi’ora’a tā Limehi i fa’ahiti nō te fa’aitoito i tōna mau ta’ata ’ia fa’atupu i te fa’aro’o. E aha te mau hi’ora’a i roto i te mau pāpa’ira’a mo’a e fa’auru nei ia tātou ’ia « ti’aturi i te Atua » ? E aha te aura’a e tu’u i tō tātou ti’aturira’a i te Atua ? (hi’o ato’a Mosia 9:17; 10:19). E aha te mau ’ā’amu o tō tātou orara’a ’aore rā o te orara’a o tō tātou mau tupuna e nehenehe tā tātou e fa’a’ite ’ei fa’aurura’a i te ti’aturi rahi a’e i te Atua ?

Mosia 7:26–27

E aha tā tātou i ’apo mai nō ni’a i te Fa’aora nā roto mai i teie mau ’īrava ? (hi’o ato’a PH&PF 130:22). Nō te aha tātou e māuruuru ai i te ’itera’a i teie mau mea ?

Mosia 8:13–18

’Ei tauturura’a i te mau melo o te ’utuāfare ’ia māramarama e aha te hō’ē hi’o, e nehenehe tā ’outou e fa’a’ite ia rātou i te hōho’a o te mau mauiha’a e tauturu nei ia tātou ’ia hi’o mai te tīti’a mata, te hi’o paraneta ’aore rā te hi’o manumanu. Nāhea teie mau mauiha’a e riro ai mai te hō’ē hi’o ? (hi’o Mose 6:35–36). E aha te mea e ’ite te hi’o ’eiaha rā tātou ? E aha te fa’a’itera’a nā tātou ē, e hi’o ’o Iosepha Semita ?

E nehenehe e fa’a’ite i te hōho’a o tō tātou mau peropheta ora, mau hi’o ’e mau heheu parau ’a ui atu ai i te ’utuāfare i tā rātou i ’ite nō ni’a ia rātou. Nāhea tātou e pe’e ai ia rātou ?

Mosia 9:14–18 ; 10:1–10

I te ’arora’a mai te mau ’āti Lamana, ’ua ineine roa te mau ta’ata o Zenifa i te pae tino ’e i te pae vārua. E aha tā tātou e nehenehe e ha’api’i mai nā roto mai ia Zenifa ’e tōna mau ta’ata nō ni’a i te fa’aineinera’a nō te mau fifi ?

Nō te mau mana’o hau atu nō te ha’api’ira’a i te mau tamari’i, hi’o te arata’i ha’api’ira’a o teie hepetomai roto Mai, pe’e mai—nō te Paraimere

Ha’amaita’ira’a i te tuatāpapara’a pāpa’ira’a mo’a a te ta’ata iho

’Imi i te mea tā ’outou iho e nehenehe e ’apo mai i te pae vārua. Tē hōro’a nei teie arata’i ha’api’ira’a i te tahi mau tuha’a ’e mau parau tumu e hi’o atu, ’eiaha rā te reira ’ia tā’ōti’a i tā ’outou tuatāpapara’a. Penei a’e e putapū ’outou i te tahi atu mau ’īrava ’aore rā e ’ite mai ’outou i te tahi mau parau tumu ’aita i fa’ahitihia i’ō nei. Vaiiho i te Vārua e arata’i ia ’outou.

Te ’ōrama a Iosepha Semita, nā Clark Kelley Price