Minerva K. Teichert (1888-1976), Ammon i mua i te ari’i Limehi, 1949-1951, oil on masonite, 35 15/16 x 48 inches. Brigham Young University Museum of Art, 1969.

27 nō ’Ēperēra–3 nō Mē.

Mosia 7–10

« Ma te pūai o te Fatu »

Tai’o ma te ’ā’au pure i te Mosia 7–10, ma te feruri i te mau mana’o tā ’outou e fāri’i. Nāhea te mau parau mau i roto i teie mau pene i te tauturu i te pāhonora’a i te mau hina’aro o te mau tamari’i tā ’outou e ha’api’i ra.

Pāpa’i i te mau mana’o e tae mai

Tītau i te mana’o

Fa’aitoito i te mau tamari’i ’ia fa’a’ite mai i te hō’ē mea tā rātou i ’ite nō ni’a i teie mau ’ohipa i tupu i roto i teie mau pene. E nehenehe e ’itehia ia ’outou te tauturu i roto i te « Pene 13 : Zenifa » (Te mau ’ā’amu o te Buka a Moromona, 36–37, ’e ’aore rā te video tano i ni’a ChurchofJesusChrist.org).

Ha’api’i i te ha’api’ira’a tumu : Mau tamari’i ’āpī

Mosia 7:18–20, 33

’Ua tauturu te Atua i te mau ta’ata i roto i te mau pāpa’ira’a mo’a, ’e e nehenehe ’oia e tauturu iā’u.

Nō te nūna’a o Limehi tei roto i te fa’atītīra’a a te ’ati Lamana, ’ua tītauhia te fa’aro’o ē e tauturu mai te Atua ia rātou, nō reira, ’ua fa’aha’amana’o Limehi ia rātou i te mau taime ’a tauturu ai te Atua i tōna mau ta’ata.

Mau ’ohipa e nehenehe e rave

• Ani i te mau tamari’i ’ia fa’a’ite mai i te hō’ē taime ’a hina’aro ai rātou i te tauturu. Fa’ata’a ē, tei roto te mau ta’ata o te ari’i Limehi i te pe’ape’a, nō reira ’ua fa’a’ite ’oia i te hō’ē ’ā’amu nō te tauturu ia rātou ’ia roa’a te fa’aro’o. Tai’o i te Mosia 7:19 i te mau tamari’i, ’e e fa’a’ite i te hō’ē hōho’a o te mau tamari’i a ’Īserā’ela i te terera’a nā roto i te Miti ’Ute’ute (hi’o Mose i te vāhira’a i te Miti ’Ute’ute , ChurchofJesusChrist.org). Hi’o fa’ahou i teie ’ā’amu ’e i te ’ā’amu o te māna, ’e e tauturu i te mau tamari’i ’ia ha’uti i te mau ’ā’amu, (hi’o pene 17 ’e  18 i roto i Te mau ’ā’amu nō te Faufa’a Tahito, ’e ’aore rā te video tano, i ni’a ChurchofJesusChrist.org). Nāhea tō te Fatu tauturura’a i te nuna’a ? Fa’a’ite pāpū ē, e nehenehe ato’a te Fatu e tauturu ia tātou.

• Tai’o i te Mosia 7:33 i te mau tamari’i, ’e e tauturu ia rātou ’ia hāro’aro’a e aha tā te ’īrava e ha’api’i nei ia tātou ’ia rave nō te fāri’i i te tauturu nō ’ō mai i te Fatu ra. Tauturu i te mau tamari’i ’ia feruri i te mau ’ohipa nō te fa’ahōho’a i teie mau mea, ’e e fa’ahiti fa’ahou i te ’īrava ’a rave noa ai rātou i te mau ’ohipa. E aha te tahi mau mea e hina’aro ai tātou i te tauturu ? Nāhea tātou i te fa’a’ite ē, tē ti’aturi nei tātou i te Fatu ? Fa’a’ite i te hō’ē taime ’a ti’aturi ai ’outou i te Fatu ’e ’a tauturu ai ’oia ia ’outou.

• Mā’iti i te tahi mau ’īrava o te « Dans le Livre de Mormon » ’e ’aore rā « Le courage de Nephi » (Chants pour les enfants, 62–63, 64–65) nō te hīmene ’e te mau tamari’i. Tauturu ia rātou ’ia ’ite nāhea te Fatu i te tauturura’a i te mau ta’ata i roto i te Buka a Moromona. Fa’a’ite i te tahi atu mau ’ā’amu o te pāpa’ira’a mo’a tā ’outou e mana’o ra ē, e tauturu te reira i te mau tamari’i ’ia ha’api’i mai ’ia ti’aturi i te Fatu.

Mosia 8:16–17

’Ua hōro’a mai te Atua ia tātou i te mau peropheta, te mau hi’o ’e te mau heheu parau.

Nāhea ’outou ’ia fa’a’ohipa i te Mosia 8:16–17 nō te ha’api’i i te mau tamari’i nō ni’a i te ’ohipa a te hō’ē peropheta ’ei hi’o ?

Mau ’ohipa e nehenehe e rave

• Fa’a’ite i te mau tamari’i nāhea ’ia tāpe’a i tō rātou mau rima i ni’a i tō rātou mata mai te huru ra ē, tē hi’o ra rātou nā roto i te tīti’a mata ’e ’aore rā, te hi’o fenua. Tai’o i te Mosia 8:17, ’e e ani i te mau tamari’i ’ia tāmau i tō rātou « tīti’a mata » i te mau taime ato’a e fa’aro’o rātou i te ta’o « hi’o ». E fa’ata’a ē, ’ua hōro’a mai te Atua ia tātou i te mau peropheta ’e te hō’ē o te mau ’ohipa a te hō’ē peropheta ’o te rirora’a ïa ’ei « hi’o » nō te mea e nehenehe tāna e « hi’o » i te mau mea e tae mai. Fa’a’ite i te tahi mau hi’ora’a o te mau mea tā te mau peropheta i ’ite ’e i heheu mai ia tātou (mai te mau pāpa’ira’a mo’a), ’e ’aore rā e fa’a’ite i te hō’ē hi’ora’a nō te hō’ē taime ’a riro ai te peropheta ’ei hi’o (mai te 1 Nephi 11:20–21).

• Hāmani i te mau ta’ahira’a ’āvae pāpie, ’e e pāpa’i i ni’a iho i te hōho’a i te mau mea tā te mau peropheta i a’o mai ia tātou ’ia rave. Tu’u i teie mau ta’ahira’a ’āvae i ni’a i te hō’ē ’ē’a hā’ati i te piha, ’e e fa’ata’a mai i te parau o te mau hōho’a. E vaiiho i te mau tamari’i, te tahi i muri mai i te tahi, ’ia ha’uti mai te hō’ē peropheta ’o tē arata’i ra i te tahi atu mau tamari’i nā ni’a i teie mau ta’ahira’a ’āvae.

• Pia i te hōhoʼa i roto i te arata’i ha’api’ira’a o teie hepetoma i roto i te Mai, pe’e mai—nō te ta’ata hō’ē ’e te ’utuāfare ’e e ani i te mau tamari’i ’ia faʼaʼite mai e aha tā rātou e ’ite ra. E fa’ata’a ē, ’ua riro te peropheta Iosepha Semita ’ei hi’o. ’Ua hōro’a te Fatu iāna te mau mauiha’a tei parauhia te Urima ’e te Tumima ’e te hō’ē ’ōfa’i hi’o nō te fa’a’ohipa i roto i te ’īritira’a i te Buka a Moromona.

• Fa’a’ite i te hō’ē hōho’a poto nō te hō’ē parau poro’i nō te ’āmuira’a rahi ’aita i maoro a’enei nō roto mai i te Peresideni o te ’Ēkālesia (’e ’aore rā, e fa’a’ite i te hō’ē hōho’a nōna ’e e tai’o i te tahi mea tāna i ha’api’i). Fa’a’ite i tō ’outou ’itera’a pāpū ē, e peropheta ’oia, e hi’o, ’e e heheu parau.

Ha’api’i i te ha’api’ira’a tumu : Mau tamari’i pa’ari

Mosia 7:18–20, 33 ; 9:14–19 ; 10:6–10, 19–21

’Ua tauturu te Atua i te mau ta’ata i roto i te mau pāpa’ira’a mo’a, ’e e nehenehe ’oia e tauturu iā’u.

’O Zenifa ’e tōna mau ta’ata, ’o tei haere e noho i te fenua o te ’āti Lamana, ’o tei haruhia e te ’āti Lamana ’e ’ua hina’aro i te tauturu a te Atua. E aha tā te mau tamari’i i ’apo mai nā roto mai i teie ’ā’amu nō ni’a i tō te Atua tauturura’a i tāna mau tamari’i ?

Mau ’ohipa e nehenehe e rave

• Vāhi i te mau tamari’i nā roto e toru pupu, ’e e ani i te pupu tāta’itahi ’ia tuatāpapa i te hō’ē o te mau ’ā’amu o te pāpa’ira’a mo’a i muri nei : te ’āti ’Īserā’ela i te rāterera’a nā roto i te Miti ’Ute’ute (hi’o Exodo 14:10–14, 21–31), Lehi ’e tōna ’utuāfare te rāterera’a nā roto i te medebara (hi’o 1 Nephi 16:9–16 ; 17:1–6), ’e te mau ta’ata o Zenifa tei fa’aorahia i te rima o te ’āti Lamana (hi’o Mosia 9:14–19 ; 10:6–10, 19–21). Nāhea te mau ta’ata i roto i teie mau ’ā’amu i te fa’a’itera’a ē, ’ua ti’aturi rātou i te Atua ? Nāhea te Atua i te tauturura’a ia rātou ? Nāhea ’oia i te tauturu ia tātou ’ia ti’aturi ana’e tātou iāna ?

• E ani e toru tamari’i ’ia pāpa’i i ni’a i te tāpura ’ere’ere i te hō’ē tāmatara’a ’e ’aore rā, i te hō’ē fifi tā rātou i fa’aruru. Ani i te hō’ē tamari’i ’ia tai’o i te Mosia 7:33, ’e e fa’aitoito i te tahi atu mau tamari’i ’ia tūmā i te hō’ē o te mau tāmatara’a ’e ’aore rā, fifi, i te mau taime ato’a e fa’aro’o rātou i te hō’ē mea e nehenehe tā rātou e rave nō te fāri’i i te tauturu a te Fatu. Nāhea te ti’aturira’a i te Fatu e tauturu ia tātou ’ia upo’oti’a i ni’a i tō tātou mau fifi ?

Mosia 8:12–19

Tē hōro’a mai nei te Atua i te mau peropheta, te mau hi’o ’e te mau heheu parau ’ei maita’i nō te ta’ata nei.

Te pāturu nei tātou i te Peresidenira’a Mātāmua ’e te Tino ’Ahuru ma Piti ’āpōsetolo ’ei peropheta, ’ei hi‘o ’e ’ei heheu parau. Nāhea ’outou ’ia haʼapiʼi i te mau tamariʼi nō ni’a i te faufa’a o te mau peropheta ?

Mau ’ohipa e nehenehe e rave

• Mā’iti e rave rahi mau ta’o faufa’a nā roto mai i te Mosia 8:12–19, ’e e pāpa’i i te reira i ni’a i te tāpura ’ere’ere. Ani i te hō’ē tamari’i ’ia tai’o i teie mau ’īrava, ’e e ani i te tahi atu mau tamari’i ’ia ’āfa’i i tō rātou rima i ni’a ’ia fa’aro’o ana’e rātou i te ta’o tāta’itahi i ni’a i te tāpura ’ere’ere. Fa’aea i te tai’ora’a ’e e ’āparau i te ta’o tāta’itahi ’e te piha tā’āto’a.

• Ani i te mau tamari’i ’ia hi’o fa’ahou i te Mosia 8:16–18 nō te ha’api’i mai, e aha te hō’ē hi’o. Pāpa’i i teie pereota i ni’a i te tāpura ’ere’ere : E au te hō’ē hi’o mai te . Tauturu i te mau tamari’i ’ia feruri i te mau rāve’a nō te fa’a’ī i te pereota nō te fa’ata’a ē, nō te aha e ha’amaita’ira’a te hō’ē hi’o nō tātou—’ei hi’ora’a, e au te hō’ē hi’o mai te hō’ē ta’ata tīa’i, ’o tē fa’aara mai ia tātou i te fifi.

• Rave i te hō’ē pereota i roto i te Mosia 8:16–17, ’e e pāpa’i i te reira i ni’a i te tāpura ’ere’ere, ma te mono i te ta’o tāta’itahi i te hō’ē tāpa’o. Hōro’a i te mau tamari’i i te hō’ē tāpura nō te mau tāpa’o ’e te mau ta’o tā rātou e fa’ahōho’a ra, ’e e fa’aue ia rātou ’ia fa’ata’a ’e ’aore rā, ’ia « ’īriti mai » i te pereota mai tā te mau hi’o e rave. E aha te tahi atu mau rāve’a e riro ai te mau peropheta, te mau hi’o ’e te mau heheu parau ’ei « maita’i rahi » nō tātou? (Mosia 8:18).

Mosia 9:14–18 ; 10:10–11

’Ia paruparu vau, e nehenehe te Fatu e ha’apūai iā’u.

’Ia fa’aruru ana’e te mau tamari’i i te mau fifi, i te tahi taime e tae mai te mana’o paruparu ’e te tauturu ’ore. Fa’a’ohipa i te ’ā’amu o te mau ta’ata o Zenifa nō te ha’api’i i te mau tamari’i ē, e nehenehe rātou e fāri’i i te pūai nō ’ō mai i te Fatu ra.

Mau ’ohipa e nehenehe e rave

• Ani i te mau tamariʼi ʼia faʼaʼite mai i te mau rāveʼa e nehenehe ai rātou ʼia pūai i te pae tino. E aha te aura’a o te parau ra ’ia roa’a « te pūai o te ta’ata nei » ? (hi’o Mosia 10:11). E aha te aura’a o te parau ’ia roa’a « te pūai o te Fatu » ? (hi’o Mosia 9:17–18; 10:10). Nāhea tātou ’ia fāri’i i te pūai o te Fatu ?

• Ani i te mau tamari’i ’ia pāpa’i hōho’a i te hō’ē ta’ata tā rātou e mana’o ra e pūai o te Fatu tōna ’e ’ia fa’a’ite mai, nō te aha rātou i pāpa’i hōho’a ai i terā ta’ata.

Fa’aitoito i te ha’api’ira’a mai i te fare

Ani i te mau tamari’i ’ia fa’a’ite i tō rātou ’utuāfare i te hō’ē ’ā’amu nō roto mai i te mau pāpa’ira’a mo’a ’o tei fa’auru ia rātou ’ia « tu’u i tō [rātou] ti’aturi i te Atua » (Mosia 7:19).

Ha’amaita’iraʼa i tā tātou ha’api’ira’a

Ani i te mau uira’a fa’auruhia. Ui i te mau uira’a ’o tē ani i te mau tamari’i ’ia fa’a’ite mai i tō rātou ’itera’a pāpū nō te mau parau mau o te ’evanelia. ’Ei hi’ora’a, mai te mea ē, tē ’āparau ra ’outou nō te mau peropheta, e nehenehe ’outou e ani i te mau tamari’i ’ia fa’a’ite mai, e mea nāhea te mau peropheta i te ha’amaita’ira’a ia rātou.