« 11–17 nō Mē. Mosia 18-24 : ‘I fa’aau tātou i te hō’ē faufa’a iāna ra’ », Mai, pe’e mai—nō te Paraimere : Buka a Moromona 2020 (2020)
« 11–17 nō Mē. Mosia 18–24 », Mai, pe’e mai—nō te Paraimere : 2020
Minerva K. Teichert (1888-1976), Tē horo ’ē nei te ari’i Limehi ’e tōna mau ta’ata, 1949-1951, oil on masonite, 35 7/8 x 48 inches. Brigham Young University Museum of Art, 1969.
11–17 nō Mē
Mosia 18–24
I fa’aau tātou i te hō’ē faufa’a iāna ra
’A tai’o ai ’outou i te Mosia 18–24, e feruri i te mau tamari’i tā ’outou e ha’api’i ra. E nehenehe te Vārua Maita’i e tauturu ia ’outou ’ia ’imi i te mau parau mau e tano nō rātou.
Pāpa’i i te mau mana’o e tae mai
Tītau i te mana’o
E fa’a’ite i te hō’ē hōho’a nō te hō’ē ta’ata e bāpetizohia ra, ’e e ani i te mau tamari’i ’ia fa’a’ite mai i te hō’ē mea tā rātou i ’ite nō ni’a i te bāpetizora’a. E fa’a’ite mai rātou i te hō’ē mea tā rātou i ha’api’i mai ’a tai’o ai rātou i te Mosia 18–24 ’e tō rātou ’utuāfare, ’a haere ai rātou i te hō’ē bāpetizora’a, ’e ’aore rā, i roto i te tahi atu fa’anahora’a.
Ha’api’i i te ha’api’ira’a tumu : Mau tamari’i ’āpī
’Ia bāpetizo-ana’e-hia vau, e rave au i te hō’ē fafaura’a ’e te Atua.
Hō’ē o te mau rāve’a faufa’a roa nō te tauturu i te mau tamari’i ’ia fa’aineine nō te bāpetizora’a ’o te ha’api’ira’a ïa ia rātou nō ni’a i te fafaura’a tā rātou e rave ’ia bāpetizo-ana’e-hia rātou.
Mau ’ohipa e nehenehe e rave
-
Hi’o fa’ahou i te ’ā’amu o Alama ’e tōna mau ta’ata i te mau pape nō Moromona ma te fa’a’ohipa i te Mosia 18:7–16 ’e ’aore rā te « Pene 15 : Tē ha’api’i nei Alama ’e tē bāpetizo nei » (te mau ’ā’amu o te Buka a Moromona, 43–44, ’e ’aore rā te video tano i ni’a ChurchofJesusChrist.org). Fa’a’ite i te hōhoʼa i roto i te arata’i ha’api’ira’a o teie hepetoma i roto i te Mai, pe’e mai—nō te ta’ata hō’ē ’e te ’utuāfare ’e e vaiiho i te mau tamari’i ’ia parau mai ia ’outou i te mea tā rātou i ’ite nō ni’a i te ’ā’amu.
-
Ma te fa’a’ohipa i te Mosia 18:8–10 ’ei arata’i, e ha’api’i i te mau tamari’i nā roto i tā ’outou iho mau parau, i te tahi mau mea tā rātou e fafau e rave ’ia bāpetizo-ana’e-hia rātou. ’Ei hi’ora’a, e fafau rātou ’ia pe’e i te Metua i te Ao ra ’e ia Iesu nā roto i te tāmāhanahanara’a i te ta’ata tei ’oto. E fa’a’ite atu i te hō’ē ’ā’amu e mea nāhea tō ’outou ’e ’aore rā, te hō’ē ta’ata tā ’outou i matau i te ha’apa’ora’a i teie mau fafaura’a. (Hi’o ato’a PH&PF 20:77, 79; Carole M. Stephens, « E tumu rahi tō tātou ’ia ’oa’oa », Ensign ’e ’aore rā Liahona, Nov. 2013, 115–17.)
-
E fa’ata’a ē, ’ia bāpetizo-ana’e-hia tātou, e rave ato’a te Metua i te Ao ra i te mau fafaura’a ia tātou. Fa’a’ite i te mau fafaura’a, mai tei fa’ata’ahia i roto i te Mosia 18:9–10.
’Ia bāpetizo-ana’e-hia vau, e riro mai au ’ei melo nō te ’Ēkālesia a Iesu Mesia.
Tauturu i te mau tamari’i ’ia hāro’aro’a e aha te aura’a ’ia riro ’ei melo nō te ’Ēkālesia nā roto i te bāpetizora’a ’e te ha’amaura’a.
Mau ’ohipa e nehenehe e rave
-
Ani i te hō’ē ta’ata tei bāpetizohia ’aita i maoro a’enei ’ia fa’a’ite mai i te ’ohipa i tupu nōna. Tai’o i te Mosia 18:17, ’e e fa’ata’a ē, ’ia bāpetizo-ana’e-hia tātou e riro mai tātou ’ei melo nō te ’Ēkālesia a Iesu Mesia i te Feiā Mo’a i te mau Mahana Hōpe’a Nei ’e e fafau tātou ’ia pe’e ia Iesu.
-
Fa’a’ite i te mau tamari’i i te mau hōho’a e fa’ahōho’a ra i te mau mea i fa’ata’ahia i roto i te Mosia 18:17–28. ’Ei hi’ora’a, e nehenehe te hōho’a Fa’atōro’ara’a i te autahu’ara’a (Vaira’a hōho’a ’evanelia, no. 106) e fa’ahōho’a i te ’īrava 18, ’e e nehenehe te hōho’a Aufaura’a i te tuha’a ’ahuru (Vaira’a hōho’a ’evanelia, no. 113) e fa’ahōho’a i te mau ’īrava 27–28. Vaiiho i te mau tamari’i ’ia fa’ata’a mai e aha tā rātou e ’ite ra i roto i te mau hōho’a, ’e ’ia fa’a’ohipa i te mau hōho’a ’e te mau ’īrava nō te tauturu ia rātou ’ia ’ite e aha te aura’a ’ia riro ’ei melo nō te ’Ēkālesia.
E rave tātou i te hō’ē fafaura’a ’e te Atua ’ia bāpetizo-ana’e-hia tātou.
E nehenehe te Atua e ha’amāmā i tā’u hōpoi’a
E aha te taime tō te Atua ha’amāmāra’a i tā ’outou mau hōpoi’a ? E feruri i te mau mea ta ’outou e nehenehe e fa’a’ite i tō ’outou mau ’itera’a ’e tō ’outou ’itera’a pāpū i te mau tamari’i.
Mau ’ohipa e nehenehe e rave
-
Tauturu i te mau tamari’i ’ia feruri i te mau ’ohipa ’ōhie e nehenehe tā rātou e rave ’a fa’ati’a ai ’outou i te mau mea tei tupu i ni’a i te mau ta’ata o Alama i roto i te Mosia 24:8–17. E ha’apāpū ē, nō tō Alama mā’itira’a e pe’e i te mau ha’api’ira’a a Abinadi nō ni’a ia Iesu, ’ua hāmani-’ino-hia ’oia ’e tōna mau ta’ata, ’aita rā rātou i fa’aea i te ti’aturi ia Iesu.
-
Tai’o i te Mosia 24:14–15 i te mau tamari’i. Fa’a’ī i te hō’ē pūtē i te tauiha’a teiaha (nō te fa’ahōho’a i te hōpoi’a), ’e e ani i te hō’ē tamari’i ’ia tāpe’a i te pūtē. E fa’ata’a ē, ’ia ’oto ana’e tātou, ’ia ma’ihia, ’e ’aore rā, ’ia fāri’i ana’e i te tahi atu mau fifi, e au ra ē, tē amo ra tātou i te hō’ē ’ohipa teiaha. Ani i te mau tamari’i ’ia tauturu te tahi i muri mai i te tahi i te amora’a i te pūtē ’ia māmā a’e te reira. E fa’ata’a ē, e nehenehe te Metua i te Ao ra e ha’amāmā i tā tātou hōpoi’a, ’ia ’imi ana’e tātou i tāna tauturu nā roto i te pure, te tāvinira’a ia vetahi ’ē, ’e tē vai atu ra.
Ha’api’i i te ha’api’ira’a tumu : Mau tamari’i pa’ari
’Ia bāpetizo-ana’e-hia vau, e rave au i te hō’ē fafaura’a ’e te Atua.
Nāhea e ti’a ai ia ’outou ’ia tauturu i te mau tamari’i tā ’outou e ha’api’i ra ’ia hāro’aro’a i te fafaura’a tā tātou e rave i te bāpetizora’a ?
Mau ’ohipa e nehenehe e rave
-
Hōro’a i te tamari’i tāta’itahi i te hō’ē tuha’a ’api parau. Tai’o ’āmui i te Mosia 18:8–10, ’e e ani i te mau tamari’i ’ia pāpa’i ’e ’aore rā, e pāpa’i hōho’a, i ni’a i te hō’ē pae o tā rātou ’api parau, te mau fafaura’a tā tātou e rave i te bāpetizora’a ’e, i te tahi atu pae, te mau ha’amaita’ira’a tā te Metua i te Ao ra e fafau mai ia tātou. Vaiiho ia rātou ʼia faʼaʼite mai i te piha ha’api’ira’a e aha tā rātou i ’ite mai. ’A fa’a’ite mai ai rātou i te reira, e ui i te mau uira’a mai teie te huru : Nāhea tātou ’ia « ’oto ’a ’oto ai te feiā ’oto ra » ? E aha te aura’a ’ia riro ’ei ’ite nō te Atua « i roto i te mau vāhi ato’a » ? E aha tā tātou e rave nō te ha’apa’o i tā tātou mau fafaura’a ?
-
Ani e rave rahi tamari’i tei bāpetizohia ’ia fa’a’ite mai e aha tā rātou e ha’amana’o ra nō ni’a i te ’ohipa tei tupu i ni’a iho ia rātou. E aha te mea i fa’ariro i taua mahana ra ’ei mahana ta’a ’ē ? E aha tō rātou mana’o ? Fa’ata’a ē, i te sābati tāta’itahi e fa’a’āpī rātou i tā rātou fafaura’a nō te bāpetizora’a ’a rave ai rātou i te ’ōro’a mo’a. Tauturu i te mau tamari’i ’ia fa’aau i te fafaura’a nō te bāpetizora’a tei fa’ata’ahia i roto i te Mosia 18:8–10 ’e te mau pure nō te ’ōro’a mo’a (hi’o PH&PF 20:77, 79 Nāhea tātou ’ia fa’ariro i te ’ōro’a mo’a ’ei taime ta’a ’ē, ’ei taime tura, mai te taime o tō tātou bāpetizora’a ?
-
Ani i te hō’ē ta’ata i fa’afāriu-’āpī-hia ’aita i maoro a’enei ’ia fa’a’ite mai e mea nāhea tōna ha’api’ira’a mai nō ni’a i te ’Ēkālesia ’e e aha tōna mana’o nō ni’a i tōna bāpetizora’a. Vaiiho i te mau tamari’i ’ia ui i te mau uira’a mai teie : e aha tei tauturu i teie ta’ata ’ia hina’aro e rave i te mau fafaura’a i roto i te Mosia 18:7–16.
E melo vau nō te ’Ēkālesia a Iesu Mesia i te Feiā Mo’a i te mau Mahana Hōpe’a Nei.
Nāhea ’outou ’ia fa’auru i te mau tamari’i ’ia fa’a’ite i te ’ā’au mēhara nō te mau ha’amaita’ira’a nō te rirora’a ’ei melo nō te ’Ēkālesia ?
Mau ’ohipa e nehenehe e rave
-
Ani i te mau tamari’i ’ia tai’o i te Mosia 18:17–28, ma te ’imi i te mau ha’api’ira’a a te ’Ēkālesia a te Mesia i te ’anotau o Alama e tū’ati i tō tātou nei ’anotau. Pāpa’i i tā rātou mau pāhonora’a i ni’a i te mau ’āta’a ’e ’aore rā, mau ’āu’a, ’e e vaiiho i te mau tamari’i ’ia fa’a’ohipa i te reira nō te patu i te hō’ē mea e fa’ahōho’a i te ’Ēkālesia a Iesu Mesia.
-
Hīmene ’e te mau tamari’i ’e ’aore rā, e tai’o i te mau parau o « L’Eglise de Jésus-Christ » (Chants pour les enfants, 48–49), ’e e ani ia rātou ’ia fa’aro’o i te mau mea tā tātou e fafau e rave ’ei melo nō te ’Ēkālesia. Tauturu ia rātou ’ia feruri i te mau rāve’a e nehenehe rātou e ha’apa’o i teie mau fafaura’a.
Mosia 21:1–5, 13–16 ; 22:1–11 ; 24:8–22
E nehenehe te Atua e ha’amāmā i tā’u mau hōpoi’a.
E nehenehe te ’ā’amu o te mau ta’ata o Alama e fa’a’ite i te mau tamari’i ē, i te tahi taime, e tauturu te Atua nā roto i te ha’apūaira’a ia tātou ’ia tāpe’a tāmau māite i tō tātou mau tāmatara’a, e’ita rā ’oia e ’īriti ’ē i te reira. Nāhea ’outou i te tauturu ia rātou ’ia ha’api’i mai nā roto mai i teie ’ā’amu ?
Mau ’ohipa e nehenehe e rave
-
Tauturu i te mau tamari’i ’ia fa’ata’a i te mau ’ohipa rarahi i tupu nā roto mai i te mau ’ā’amu o te nūna’a o Limehi i roto i te Mosia 21:1–5, 13–16 ; ’e te 22:1–11 ’e te mau ta’ata o Alama i roto i te Mosia 24:8–22. I muri iho e ani i te tamari’i tāta’itahi ’ia pāpa’i hōho’a hō’ē o teie mau ’ohipa i tupu. Ani i te mau tamari’i ’ia ’āna’i ti’a i tā rātou mau hōho’a pāpa’i mai te au i te fa’ati’ara’a o te ’ā’amu. ’A nā reira ai rātou, e ha’apāpū ē, ’ua tauturu te Atua i te mau ta’ata ’ia amo i tā rātou mau hōpoi’a.
-
Ani i te mau tamari’i ’ia tai’o i te Mosia 21:14–15 ’e te 24:13–14. Nāhea tō te Fatu pāhonora’a i te mau pure a te mau ta’ata o Limehi ’e a te mau ta’ata o Alama ? Ani i te mau tamari’i ’ia fa’a’ite mai i te mau taime ’a pure ai rātou nō te ani i te tauturu i roto i te hō’ē tāmatara’a ’e ’ua tauturu mai te Metua i te Ao ra ia rātou, ’e ’aore rā, e fa’a’ite atu i te ’ohipa i tupu nō ’outou iho.
Fa’aitoito i te ha’api’ira’a mai i te fare
Ani i te mau tamari’i ’ia fa’ata’a i te tahi atu ta’ata e aha tā rātou i fafau e rave ’e ’aore rā, e aha tā rātou e fafau e rave, ’ei tuha’a nō tā rātou fafaura’a nō te bāpetizora’a.
Ha’amaita’ira’a i tā tātou ha’api’ira’a
Ha’apa’o maita’i i te mau tamari’i. Mai te mea ē, e ’ere rātou i te mea ’ana’anatae roa, e taime paha ïa nō te tāmata i te tahi ’ē atu ’ohipa ’e ’aore rā, nō te haere e ori-haere-ri’i ma te hau. I te tahi atu pae, mai te mea ē, ’ua ’ana’anatae rātou ’e tē ’apo nei rātou i te ha’api’ira’a, ’eiaha e mana’o ē, tītauhia ’ia ’outou ’ia haere noa ā i mua nō te rave fa’aoti i te mau tuha’a o te ha’api’ira’a.