« 11–17 nō Mē. Mosia 18–24 : ‘I fa’aau tātou i te hō’ē faufa’a iāna ra’ », Mai, pe’e mai—nō te ta’ata ihp ’e te ’utuāfare : Buka a Moromona 2020 (2020)

« 11–17 nō Mē. Mosia 18–24 », Mai, pe’e mai—nō te ta’ata hō’ē ’e te ’utuāfare : 2020

Hōho’a

te horo-’ē-ra’a te mau ta’ata o Limehi

Minerva K. Teichert (1888-1976), Tē horo ’ē ra te ari’i Limehi ’e tōna nuna’a, 1949-1951, oil on masonite, 35 7/8 x 48 inches. Brigham Young University Museum of Art, 1969.

11–17 nō Mē

Mosia 18–24

I fa’aau tātou i te hō’ē faufa’a iāna ra

’Ua ha’api’i te peresideni Thomas S. Monson : « ’Ia tai’o ana’e tātou ’e ’ia feruri hōhonu ana’e tātou i te mau pāpa’ira’a mo’a, e ’ite tātou i te muhumuhu marū a te Vārua i tō tātou vārua » (« Aita roa tātou e haere ’o tātou ana’e iho », Ensign ’aore rā Liahona, Nov. 2013, 122).

Pāpa’i i tō ’outou mau mana’o

Tē fa’a’ite nei te fa’ati’ara’a nō ni’a ia Alama ’e tōna mau ta’ata i roto i te Mosia 18 ; 23–24 i te aura’a nō te parau e « ō i te ’āua o te Atua » (Mosia 18:8). I te bāpetizora’ahia rātou, ’ua rave rātou i te hō’ē fafaura’a ’e te Atua « ’ia [tāvini] atu ’outou iāna, ’e ’ia ha’apa’o i tāna ra mau fa’aue » (Mosia 18:10). Ta’a ’ē noa atu ē e fafaura’a pūai nā te ta’ata hō’ē, ’ua riro ato’a rā te reira i te huru rātou i hāmani maita’i te tahi i te tahi. ’Oia mau, e tere nā te ta’ata hō’ē te tere ho’ira’a i te Metua i te Ao ra, ’e ’aita e ta’ata e nehenehe e ha’apa’o i tā tātou mau fafaura’a nō tātou, e ’ere rā te reira i te aura’a ē ’o tātou ana’e iho. Tītauhia te tahi ’e te tahi. Tātou te mau melo o te ’Ēkālesia, tē fafau nei tātou ’ia tāvini i te Atua nā roto i te tauturura’a ’e te tāvinira’a te tahi i te tahi i ni’a i te ’ē’a, « ’ia tauturu te tahi i te tahi i te hōpoi i tā ’outou mau hōpoi’a » (Mosia 18:8–10). Pāpū maita’i e mau hōpoi’a tā te mau ta’ata o Alama e amo, mai ia tātou pā’āto’a nei ho’i. ’E te hō’ē rāve’a e tauturu mai te Fatu ia tātou « ’ia fa’a’oroma’i i te mau [hōpoi’a] ma te paruparu ’ore » (Mosia 24:15), ’o te hōro’ara’a ïa ia tātou i te hō’ē ’āmuira’a feiā mo’a tei parau ē e ’oto rātou ’e ’o tātou ’e e ha’amāhanahana rātou ia tātou, mai tā tātou i parau atu e nā reira ato’a tātou nō rātou.

Hōho’a

ītona tuatāpapara’a a te ta’ata iho

Mau mana’o nō te tuatāpapara’a pāpa’ira’a mo’a ’a te ta’ata iho

Mosia 18:1–17

Tei roto i te bāpetizora’a te fafaura’a ’ia tāvini i te Atua ’e ’ia ti’a ’ei ’ite nōna.

Tei roto i te Mosia 18:8–10 te mau ha’api’ira’a a Alama nō ni’a i te fafaura’a nō te bāpetizora’a, ’oia ho’i te fafaura’a tā tātou e parau fafau i te Atua i te bāpetizora’a. ’Ia tai’o ’oe i teie mau ’īrava, ’a feruri i te mau uira’a i muri nei :

E aha tā ’oe i ha’api’i mai nā roto mai i teie mau ’īrava nō ni’a i te fafaura’a tā ’oe i parau fafau i te taime nō te bāpetizora’a ? E aha tā te Atua i parau fafau mai ia ’oe ?
E aha te tū’atira’a i roto i te fafaura’a e tāvini i te Atua (hi’o ’īrava 10) e tā tātou mau tauto’ora’a ’ia aupuru te tahi i te tahi ? (hi’o te mau ’īrava 8–9).
E aha tā ’oe e rave nei nō te ha’apa’o i tā ’oe i parau fafau ?
Nāhea te ha’apa’ora’a i tā ’oe fafaura’a nō te bāpetizora’a e tauturu ia ’oe ’ia « ’ī ho’i i te Vārua » ? (Mosia 18:14). E mea nāhea te Vārua i te tauturu ia ’oe ’ia ha’apa’o i tā ’oe fafaura’a ?

’Ia rave au i te mau fafaura’a ’e te Atua, e fāri’i au i tāna mau ha’amaita’ira’a.

Tē fa’a’ite ato’a mai nei teie fa’ati’ara’a i te huru tano e rave i te bāpetizora’a. E aha tā ’oe i ha’api’i mai i roto i te mau ’īrava 14–17 nō ni’a i te huru e rave i te bāpetizora’a ? E aha atu ā tā ’oe i ha’api’i mai nō ni’a i te bāpetizora’a i roto i te Mataio 3:16 ; Roma 6:3–5 ; 3 Nephi 11:21–28 ; ’e Te Parau Ha’api’ira’a ’e te mau Parau Fafau 20:72–74?

Hi’o ato’a Te Parau Ha’api’ira’a ’e te mau Parau Fafau 20:37, 77, 79.

Mosia 18:17–30

’Ia vai hō’ē te mau ta’ata o te Atua e ti’a ai.

Mai tā Alama ’e tōna mau ta’ata i ’ite mai, i te tahi taime, te aura’a e pe’e ia Iesu Mesia, ’oia ho’i e fa’aru’e ïa i te tahi orara’a mātauhia e te ’utuāfare nō te hō’ē mea ’āpī ’e te ta’a ’ē. ’Ua noa’a rā i te mau ta’ata o Alama te pūai mai roto mai i te tahi ’e te tahi, ’ei tuha’a ho’i nō « te ’ēkālesia a te Mesia » (Mosia 18:17). E aha te fa’aurura’a e noa’a mai i roto i te mau ha’api’ira’a i roto i te Mosia 18:17–30 nō te riro mai ’ei melo maita’i a’e o te ’Ēkālesia ? E aha tā ’oe e nehenehe e rave ’ei tauturura’a i tā ’oe pāroita ’aore rā tā ’oe ’āma’a ’ia « au-tahi-māite-hia i te au māite ’e te aroha » ? (Mosia 18:21).

Hi’o ato’a Henry B. Eyring, « Ia ’āmui-tahi-hia tō ’outou ’ā’au ’ei hō’ē », Ensign ’aore rā Liahona, Nov. 2008, 68–71.

Mosia 19–20

E tupu te mau parau a te mau peropheta.

’Ua hōro’a Abinadi i te tahi mau parau tohu ta’a ’ē nō ni’a i te ’ohipa e tupu nō te ari’i Noa ’e tōna mau ta’ata mai te mea e pāto’i rātou ’ia tātarahapa. Terā rā, nō vetahi, e au ra ē, e’ita te reira e nehenehe e tupu (hi’o Mosia 12:1–8, 14–15), i te mea ho’i ē ’ua manuia noa te mau ’āti Nephi i te pāruru ia rātou i mua i te mau ’āti Lamana nō e 50 matahiti te maoro (hi’o Mosia 9:16–18 ; 11:19). E tupu ihoa rā te tā’āto’ara’a o te mau parau a te mau peropheta—i tō tātou nei ’anotau mai i te tau o Abinadi.

E aha tā ’oe e ’ite ra i roto i te Mosia 19–20 i ti’a ai ia Gideona ’ia fa’ahiti ē, ’ua tupu te mau parau tohu a Abinadi ? (hi’o Mosia 20:21). Nāhea te reira fa’ati’ara’a e ha’apūai ai i tō ’oe fa’aro’o i te mau fa’aarara’a ’e te mau parau a’o a te mau peropheta a te Atua, nā reira ato’a tā ’oe iho fafaura’a e pe’e i tā rātou mau parau ? I te hea taime ’oe i te ’itera’a i te mau parau a te hō’ē peropheta i te tupura’a i tō tātou nei ’anotau ?

Mosia 21–24

E ti’a i te Atua ’ia ha’amāmā i tā’u hōpoi’a.

’Ua topa te mau ta’ata o Limehi ’e o Alama i roto i te tītīra’a, noa atu ā nō te mau tumu ta’a ’ē ’e te ravera’a ta’a ’ē. E aha tā ’oe e nehenehe e ha’api’i mai nā roto i te fa’aaura’a i te mau fa’ati’ara’a nō ni’a i te mau ta’ata o Limehi i roto i te Mosia 19–22 ’e te mau ta’ata o Alama i roto i te Mosia 18 ; 23–24 ? E nehenehe tā ’oe e pāpa’i i tā teie nā pupu i rave i roto i te tītīra’a ’aore rā i te huru rātou i te fa’aora-ra’a-hia i te hope’a. ’A nā reira ai ’oe, ’a hi’o i te mau poro’i e tano i tō ’oe orara’a. ’Ei hi’ora’a, e aha tā ’oe e ha’api’i nei i roto i teie mau fa’ati’ara’a ’o te tauturu ia ’oe ’ia amo i tā ’oe mau hōpoi’a ?

Mosia 23:21–24 ; 24:8–17

E ti’a iā’u ’ia tu’u i tō’u ti’aturi i te Fatu.

Noa atu ā ’ua tātarahapa rātou i tā rātou mau hara, ’ua topa Alama ’e tōna mau ta’ata i roto i te tītīra’a. Tē fa’a’ite nei te ’ohipa i tupu nō rātou ē, e’ita te tu’ura’a i te ti’aturi i te Fatu ’e te orara’a i tā tātou mau fafaura’a e fa’aātea noa i te mau fifi, e tauturu mai rā ’ia upo’oti’a i ni’a i te reira. ’Ia tai’o ’oe i te Mosia 23:21–24 ’e te 24:8–17, ’a pāpa’i mai i te mau ta’o ’e te mau pereota e nehenehe e tauturu ia ’oe ’ia ha’api’i mai ’ia tu’u i te ti’aturi i te Atua, noa atu ā te huru o tō ’oe orara’a.

Hi’o ato’a Thomas S. Monson, « E ’ore roa ho’i au e tāhemo atu ia ’oe, e ’ore ho’i e fa’aru’e ia ’oe », Ensign ’aore rā Liahona, Nov. 2013, 85–87.

Hōho’a

ītona tuatāpapara’a a te ’utuāfare

Mau mana’o nō tā te ’utuāfare tuatāpapara’a pāpa’ira’a mo’a ’e nō te pō ’utuāfare

’Ia tai’o ’outou i te mau pāpa’ira’a mo’a ’e te ’utuāfare, e nehenehe te Vārua e tauturu ia ’outou ’ia ’ite e aha te mau parau tumu e ha’afaufa’a ’e e ’āparau nō te pāhono i te mau hina’aro o te ’utuāfare. Teie te tahi mau mana’o.

Mosia 18:1–4

E parau tē nā ’ō ra ē, e ti’a ’ia tai’o i te mau huero i roto i te hō’ē ’āpara, e’ita rā e nehenehe e tai’o i te mau ’āpara e noa’a mai i te hō’ē huero. Hō’ē noa ta’ata i fāri’i i te ’itera’a pāpū o Abinadi, nā terā hō’ē ta’ata—’o Alama—i ha’amaita’i e rave rahi u’i ’āti Nephi. Penei a’e e nehenehe e fa’a’ohipa i te hō’ē hotu e ma’a huero i roto nō te fa’a’ite i teie parau tumu. E aha te fa’a’ohipara’a o teie poro’i nō tō tātou ’utuāfare ? E aha tā tātou e nehenehe e rave nō te fa’a’ite i tō tātou ’itera’a pāpū ia vetahi ’ē ?

Mosia 18:8–10

E aha tā tātou i ’apo mai nō ni’a i te fafaura’a o te bāpetizora’a i roto i teie mau ’īrava ? (hi’o ato’a PH&PF 20:73, 77–79). E aha tā tātou e rave nei nō te fa’aineine ia tātou ’ia fāri’i ’aore rā ’ia ha’apa’o i tā tātou fafaura’a nō te bāpetizora’a ?

Mosia 18:30

E aha te mau vāhi e aura’a ta’a ’ē nō tātou nō te mau ’ohipa pae vārua i tupu i reira ?

Mosia 21:11–16 ; 24:10–15

E aha tā tātou i ha’api’i mai nā roto i te fa’aaura’a i te tītīra’a o te mau ta’ata o Alama ’e o te mau ta’ata o Limehi ?

Mosia 21:15 ; 24:11–15

E aha tā teie mau ’īrava e ha’api’i nei ia tātou nō ni’a i te huru te Fatu e pāhono nei i tā tātou mau pure ?

Nō te mau mana’o hau atu nō te ha’api’ira’a i te mau tamari’i, hi’o te arata’i ha’api’ira’a o teie hepetomai roto Mai, pe’e mai—nō te Paraimere

Ha’amaita’ira’a i te tuatāpapara’a pāpa’ira’a mo’a a te ta’ata iho

’Ite mai i te taime maita’i nō ’outou. E mea ’ōhie a’e ’ia ha’api’i mai ’a tuatāpapa ai ’oe i te mau pāpa’ira’a mo’a ma te ha’afifi-’ore-hia. E ’imi i te hō’ē taime maita’i nō ’outou ’e e rave i tō ’outou maita’i roa a’e nō te tuatāpapa tāmau i terā taime i te mahana tāta’itahi.