« 18–24 nō Mē. Mosia 25–28 : ’Ua parauhia rātou i te feiā o te Atua ra’ », Mai, pe’e mai—nō te ta’ata hō’ē ’e te ’utuāfare : Buka a Moromona 2020 (2020)
« 18–24 nō Mē. Mosia 25–28 », Mai, pe’e mai—nō te ta’ata hō’ē ’e te ’utuāfare : 2020
Fa’afāriura’a o Alama tamaiti,nā Gary L. Kapp
18–24 nō Mē
Mosia 25–28
« ’Ua parauhia rātou i te feiā o te Atua ra »
I te « [taera’a] mai te reo o te Fatu [ia Alama] », ’ua pāpa’i ’oia i te mau mea tā te Fatu i parau iāna « ’ia tāmau ’oia i te reira » (Mosia 26:13, 33). Nāhea ’outou i te pe’e i te hi’ora’a o Alama ?
Pāpa’i i tō ’outou mau mana’o
Fātata e toru u’i te ta’a-’ē-ra’a te mau ’āti Nephi, ’ua tāhō’ē fa’ahou ā rātou ’ei hō’ē nūna’a. I teienei, te mau ta’ata o Limehi, te mau ta’ata o Alama ’e te mau ta’ata o Mosia—’e tae noa atu i te mau ta’ata o Zarahemala, e ’ere i te hua’ai nō Nephi—’ua « ’āmui-ato’a-hia… i te ’āti Nephi » (Mosia 25:13). E rave rahi ato’a o rātou tei hina’aro e riro ’ei melo nō te ’Ēkālesia tā Alama i fa’ati’a. Nō reira ’o rātou ato’a « tei hina’aro i te rave mai i ni’a iho ia rātou i te i’oa o te Mesia ra », ’ua bāpetizohia ïa, ’e « ’ua parauhia rātou i te feiā o te Atua ra » (Mosia 25:23–24). I muri mai e rave rahi matahiti tama’ira’a ’e te tītīra’a, e au ē, ’ua vai atura te mau ’āti Nephi i roto i te hau.
’Aita rā i maoro roa, tē ha’amata ra te feiā fa’aro’o ’ore i te hāmani ’ino i te feiā mo’a. Te mea ’oto rā, e rave rahi o te feiā fa’aro’o ’ore, ’o te mau tamari’i iho ra o te feiā fa’aro’o—te « [u’i] ’āpī » (Mosia 26:1), ’e tae noa atu i nau tamaiti a Mosia ’e hō’ē tāmaiti a Alama. ’Ua tupu rā te hō’ē temeio, ’e ’ua fa’atupu te fa’ati’ara’a o te reira temeio i te tīa’ira’a i roto i te mau metua hepohepo nō e rave rahi u’i. E ’ere rā te ’ā’amu nō te fa’afāriura’a o Alama nō te mau metua noa e tamari’i tā rātou tei hahi ’ē. Te temeio nō te fa’afāriura’a mau, e ti’a te reira ’ia tupu i roto ia tātou pā’āto’a, ta’a ’ē noa atu te rāve’a.
Mau mana’o nō tā ’oe iho tuatāpapara’a pāpa’ira’a mo’a
Nā’u te hōpoi’a nō tō’u iho fa’aro’o ’e tō’u ’itera’a pāpū.
’Ua tupu te fa’afāriura’a fa’ahiahia i ni’a i te ta’ata tei fa’aro’o i te a’ora’a a te ari’i Beniamina (hi’o Mosia 5:1–7), terā rā, ’o te ta’ata tōna iho fa’afāriura’a, e’ita e nehenehe e hōro’a mai te hō’ē faufa’a ’āi’a i te mau tamari’i. Tītauhia ia tātou pā’āto’a ’ia noa’a i tō tātou iho fa’afāriura’a i te ’evanelia a Iesu Mesia. ’Ia tai’o ’oe i te Mosia 26:1–6 nō ni’a i te « [u’i] ’āpī » feiā fa’aro’o ’ore o te mau ’āti Nephi, ’a pāpa’i i te mau fa’ahope’ara’a nō tō rātou fa’aro’o ’ore. E nehenehe ato’a tā ’oe e feruri i te mau ta’ata tā ’oe e hina’aro e ’āfa’i atu i te Mesia ra. Noa atu ē e’ita tā ’oe e nehenehe e hōro’a ia rātou i tō ’oe fa’afāriura’a, e ti’a i te Vārua ’ia muhumuhu i te mau mea e nehenehe e rave nō te tauturu ia rātou ’ia ’ite mai i te fa’aro’o. ’Ia tai’o ’oe i te Mosia 25–28 nō ni’a e nāhea Alama ’e te tahi atu mau melo o te ’Ēkālesia i te tauturura’a i te u’i ’āpī, e tae mai paha te tahi fa’ahou mau mana’o ia ’oe.
Hi’o ato’a Te Parau Ha’api’ira’a ’e te mau Parau Fafau 68:25–29.
E ’imi te mau tāvini ha’apa’o maita’i a te Atua ’ia rave i tōna hina’aro.
I te tahi taime e mana’o tātou ē, ’ua ’ite noa te hō’ē ti’a fa’atere o te ’Ēkālesia, mai ia Alama, e aha te ’ohipa tano e rave. I roto i te Mosia 26 tē tai’o nei tātou nō ni’a i te hō’ē fifi i roto i te ’Ēkālesia tā Alama i ’ore i fa’aruru a’enei ’e ’ua « mata’u ho’i ’oia ’o te hapa ’oia i te aro o te Atua » (Mosia 26:13). E aha tā Alama i rave nō terā huru fifi ? (hi’o Mosia 26:13–14, 33–34, 38–39). Nō te ’ohipa i tupu nō Alama, e aha te mana’o e tae mai nō ni’a i te huru e hi’o i te mau fifi rahi i roto i tō ’oe ’utuāfare ’aore rā i roto i tā ’oe tāvinira’a i roto i te ’Ēkālesia ?
E mea au ato’a paha ’ia tāpura i te mau parau tā te Atua i heheu ia Alama, i roto i te Mosia 26:15–32. E hi’o maita’i ē, ’aita te tahi o teie mau parau mau i pāhono ’āfaro i te uira’a a Alama. E aha ïa te mana’o e tāpe’a mai nō ni’a i te pure ’e te fāri’ira’a i te heheura’a nō tātou iho ?
’Ia fānau-fa’ahou-hia te tā’āto’ara’a o te mau tāne ’e te mau vahine e ti’a ai.
E mea pāpū maita’i, tītauhia te hō’ē fānau-fa’ahou-ra’a pae vārua nō Alama tamaiti, nō te mea e « mau ta’ata hara faufau roa ho’i » ’oia ’e te mau tamaiti a Mosia, tei haere ra « i te ha’apaura’a i te ’ēkālesia a te Atua » (Mosia 28:4 ; 27:10). I muri a’era i tōna fa’afāriura’a, ’ua fa’a’ite pāpū Alama tē vai nei te fa’afāriura’a—’e e mea tītauhia ho’i—nō te tā’āto’ara’a, ’ua nā ’ō ’oia : « ’eiaha e māere i te mea ’ia fānau fa’ahou te ta’ata ato’a e ti’a ai » (Mosia 27:25 ; pāpa’ira’a fa’a’opa tei tu’uhia). Nō ’oe ato’a.
’Ia tai’o ’oe i te ’ohipa i tupu nō Alama i roto i te Mosia 27:8–37, e nehenehe tā ’oe e tu’u ia ’oe iho i tōna vaira’a. ’Aita ’oe e tāmata nei i te ha’apau i te ’Ēkālesia, e nehenehe mau rā ’oe e feruri i te mau mea nō ni’a ia ’oe tei tītauhia ’ia taui. ’O vai, mai ia Alama metua, e turu nei ia ’oe ’e e pure nei nō ’oe « ma te fa’aro’o rahi » ? E aha te mau ’ohipa i tupu tei tauturu « ’ia fa’a’ite atu ia ’oe na i te mana ’e te pūai o te Atua » ? (Mosia 27:14). E aha « te mau mea rarahi » tā te Fatu i rave nō ’oe ’aore rā nō tō ’oe ’utuāfare e tītauhia ia ’oe ’ia « ha’amana’o » ? (Mosia 27:16). E aha tā ’oe i ha’api’i mai nā roto mai i te mau parau ’e te mau ’ohipa a Alama tamaiti nō ni’a i te aura’a o te fānau-fa’ahou-ra’a ? E ti’a i te mau uira’a mai teie nei i te tauturu ia ’oe ’ia hi’opo’a i tō ’oe nu’ura’a i roto i te fānau-fa’ahou-ra’a.
Hi’o ato’a Mosia 5:6–9Alama 36.
’Ua ’oa’oa tōna metua tāne, nā Walter Rane
Tē fa’aro’o nei te Atua i tā’u mau pure ’e e pāhono mai ’oia mai te au i tōna hina’aro.
Penei a’e e metua tā ’oe i mātau tei roto i te vaira’a o Alama metua, ’o te rave ra tāna tamaiti ’aore rā tāna tamāhine i te mau mā’itira’a ’ino mau. Penei a’e ’o ’oe iho terā metua. E aha tā ’oe e ’ite ra i roto i te Mosia 27:14, 19–24 ’o tē hōro’a mai i te tīa’ira’a ? E mea nāhea teie mau ’īrava e ha’amaita’i ai i tā ’oe mau pure nō vetahi ’ē ?
Mau mana’o nō tā te ’utuāfare tuatāpapara’a pāpa’ira’a mo’a ’e nō te pō ’utuāfare
’Ia tai’o ’outou i te mau pāpa’ira’a mo’a ’e te ’utuāfare, e nehenehe te Vārua e tauturu ia ’outou ’ia ’ite e aha te mau parau tumu e ha’afaufa’a ’e e ’āparau nō te pāhono i te mau hina’aro o te ’utuāfare. Teie te tahi mau mana’o.
Mosia 25:5–11
E aha tā te mau ta’ata o Mosia i mana’o i muri iho i tōna tai’ora’a ia rātou i te mau pāpa’a parau o te mau ta’ata o Zenifa ’e o te mau ta’ata o Alama ? E mau pāpa’a parau ānei tei tāpe’ahia e te ’utuāfare ’o te nehenehe e tai’o atu ? Penei a’e e nehenehe tā ’outou e ’āmui i te reira i tā ’outou iho mau pāpa’a parau ’aore rā e ha’amata i te pāpa’i i tā ’outou iho. E aha tā ’outou e tu’u i roto e riro i te tauturu atu i tō ’outou ’utuāfare (’e tae noa atu i te mau u’i nō ananahi) ’ia « ’ī roa ihora rātou i te ’oa’oa rahi » ’e ’ia ha’api’i nō ni’a i te « maita’i [i reira] o te Atua » ? (Mosia 25:8, 10).
Mosia 25:16
Nō te aha e mea faufa’a nō te mau ta’ata o Limehi ’ia ha’amana’o ē, ’ua fa’aora te Fatu ia rātou i te tītīra’a ? E aha tā te Faʼaora i rave nō tātou e tītauhia ’ia ha’amana’o ?
Mosia 26:29–31 ; 27:35
’Ia au i teie mau ʼīrava, e aha tei tītauhia i te hō’ē ta’ata ’ia rave nō te fāri’i i te fa’a’orera’a hara ?
Mosia 27:21–24
’Ia tai’o ’outou i teie mau ’īrava, ’a feruri i te hō’ē ta’ata tā te ’utuāfare e nehenehe e pure nōna ’e e ha’apae i te mā’a nōna.
Mosia 27–28
’Ei tauturura’a i te mau melo o te ’utuāfare ’ia hi’o mana’o i te mau fa’ati’ara’a i roto i teie mau pene, e nehenehe e ani ia rātou ’ia pāpa’i hōho’a nō te mau ta’ata i fa’ahitihia ’e e fa’a’ohipa i te reira mau hōho’a nō te fa’ati’a fa’ahou i te ’ā’amu. ’Aita ana’e, e au mai paha rātou ’ia ha’uti ta’ata ora i te ’ā’amu ; nāhea rātou i te fa’a’ite i te tauira’a i tupu nō Alama ’e te mau tamaiti a Mosia.
Nō te mau mana’o hau atu nō te ha’api’ira’a i te mau tamari’i, hi’o te arata’i ha’api’ira’a o teie hepetomai roto Mai, pe’e mai—nō te Paraimere
Ha’amaita’ira’a i tā tātou ha’api’ira’a
Fa’a’ohipa i te anoihi. « Tei roto i te Vaira’a hōho’a ’evanelia ’e te LDS Media Library i ni’a i te ChurchofJesusChrist.org e rave rahi mau hōho’a ’e mau video ’o te nehenehe e tauturu i [tō ’outou ’utuāfare] ’ia hi’o mata atu i te mau mana’o ’aore rā i te mau ’ohipa tei tupu » (Ha’api’ira’a mai tā te Fa’aora, 22).
Fa’ahōho’ara’a nō te hō’ē melahi tei fā ia Alama tamaiti nā Kevin Keele