« 4–10 nō Mē. Mosia 11–17 : ‘E māramarama… e ’ore roa e mohimohi’ », Mai, pe’e mai—nō te ta’ata hō’ē ’e te ’utuāfare : Buka a Moromona 2020 (2020)
« 4–10 nō Mē. Mosia 11–17 », Mai, pe’e mai—nō te ta’ata hō’ē ’e te ’utuāfare : 2020
Abinadi i mua i ta ari’i Noa, nā Andrew Bosley
4–10 nō Mē
Mosia 11–17
« E māramarama… e ’ore roa e mohimohi »
’Ua fa’atupu te mau parau a Abinadi i te hō’ē tauira’a rahi i ni’a i te hō’ē melo o te aora’i o te ari’i Noa (hi’o Mosia 17:2–4). Tai’o i te Mosia 11–17 ma te pure i roto i tō ’oe ’ā’au ē, e tae mai ’ia ’oe te mau mana’o nō ni’a i te huru e ti’a ia ’oe ’ia taui.
Pāpa’i i te mau mana’o e tae mai
E ti’a i te hō’ē noa pura e fa’a’ama i te hō’ē auahi rahi. ’O Abinadi to’otahi noa tei ti’a atu i mua i te aora’i o te ari’i nō te fa’a’ite pāpū i tō rātou ’ino. ’Ua vahavahahia te rahira’a o tāna mau parau ’e ’ua fa’ahapahia ’oia i te utu’a pohe. ’Āre’a rā, ’o tōna ’itera’a pāpū nō Iesu Mesia, te « māramarama… e ’ore roa e mohimohi » (Mosia 16:9), tei tū’ama i te tahi mea i roto i te tahu’a ’āpī ra ia Alama. ’E ’ua tupu marū noa te reira pura fa’afāriu ’a fa’ahaere ato’a mai ai Alama i te ta’ata i te tātarahapara’a ’e i te fa’aro’o ia Iesu Mesia. ’Ua pohe atu te auahi tei ha’apohe ia Abinadi, te auahi fa’aro’o rā tā tāna mau parau i ha’apura, e vai maoro noa ïa i ni’a i te mau ’āti Nephi—’e i ni’a ia rātou e tai’o i tāna parau i teie mahana. E’ita roa te rahira’a o tātou e fa’aruru i tā Abinadi i fa’aruru nō tōna ’itera’a pāpū, tē vai nei rā tā tātou pā’āto’a nei mau taime ’ua riro te pe’era’a ia Iesu Mesia ’ei tāmatara’a i tō tātou itoito ’e i tō tātou fa’aro’o. Penei a’e e tāhirihiri atu te tuatāpapara’a o te ’itera’a pāpū o Abinadi i te ’ama o te ’itera’a pāpū ’e o te itoito i roto i tō ’outou ’ā’au.
Mau mana’o nō tā ’oe iho tuatāpapara’a pāpa’ira’a mo’a
E ti’a iā’u ’ia ti’a nō te parau mau, noa atu ā e ti’a to’otahi atu vau.
’A feruri na i te mana’o paruparu i tae mai ia Abinadi i te pi’ira’a i te ta’ata ’ia tātarahapa ’e ’aita roa rātou i mana’ona’o noa a’e e taui i tā rātou mau peu ’ī’ino. ’Ua vahavahahia tāna poro’i, fa’ahou ’e fa’ahou ā. ’Aita rā Abinadi i fa’aru’e.
E aha te taime ’ua mana’o ’oe ē, tē ti’a to’otahi ra ’oe nō te pāruru i te parau mau ? ’Ia tai’o ’oe i te Mosia 11–13 ’e te 17, e aha tā ’oe i ha’api’i mai ’o tē nehenehe e tauturu ia ’oe ’ia vai ineine nō te taime e hina’aro te Fatu ia ’oe ’ia ti’a atu nō tāna ’evanelia ? E aha te tahi atu mau parau tumu tā ’oe i ’apo mai i roto i te hi’ora’a o Abinadi ?
Tītauhia ’ia tu’u vau i tō’u ’ā’au nō te māramarama i te parau a te Atua.
’Ua mātau te mau tahu’a a te ari’i Noa i te parau a te Atua—e nehenehe tā rātou e fa’ahiti i te mau tuha’a o te mau pāpa’ira’a mo’a ma te parau ē, tē ha’api’i ra rātou i te mau fa’auera’a. ’Aita rā te reira mau fa’auera’a i « pāpa’ihia i roto i tō [rātou] ’ā’au », ’e « ’aore ’outou i onoono i te pa’ari, i ’ore ai… i rave ma te ’ite » (hi’o Mosia 13:11 ; 12:27). Nō reira, ’ua vai noa tō rātou orara’a ’aita e tauira’a.
’Ia tai’o ’oe i te Mosia 12:19–30, ’a feruri i te aura’a o te parau ’aore ’outou i onoono i te pa’ari i te parau a te Atua. Tē fa’auru ra ānei te reira ia ’oe ’ia rave i te tahi mau tauira’a i roto i te huru ’oe e ha’api’i mai i te ’evanelia ?
E turu te Fatu i tāna mau tāvini i roto i tāna ’ohipa.
I te hō’ē pae, tē hōro’a nei te ’ohipa i tupu nō Abinadi e rave rahi hi’ora’a nāhea te Fatu i te turu i tāna mau tāvini—e ’ite ’oe i te reira mau hi’ora’a i roto i te Mosia 13:1–9. I te tahi atu pae, ’ua fa’ati’a ato’a te Fatu ’ia hāmani-’ino-hia Abinadi, ’ia mau ’oia i te fare ’auri ’e ’ia maratirihia ’oia nō tōna ’itera’a pāpū. E aha tā ’oe e ’ite ra i roto i teie mau ’īrava e fa’a’ite nei ē, ’ua tu’u Abinadi i tōna ti’aturi i ni’a i te Fatu ? E aha tā te hi’ora’a o Abinadi e fa’atupu i ni’a i te huru ’oe e hi’o nei i tō ’oe mau pi’ira’a ’e mau hōpoi’a ?
’Ua mamae Iesu Mesia nō’u nei.
’Ua ti’aturi te ari’i Noa ’e tōna mau tahu’a ē, e tae mai te fa’aorara’a nā roto i te ture a Mose. ʼUa hinaʼaro Abinadi ’ia ’ite rātou ē, e tae mai te fa’aorara’a nā roto i te Mesia a te ’āti Iuda, ’o Iesu Mesia. I roto i te Mosia 14–15, ’a hi’o maita’i i te mau ta’o ’e te mau parau e fa’ahiti nei i te parau nō te Fa’aora ’e te mea tāna i mamae nō ’oe. E aha te mau ’īrava e tauturu nei i te fa’ahōhonu i tō ’oe here ’e tō ’oe māuruuru nōna ?
E mea nāhea ’o Iesu Mesia i riro ai te Metua ’e te Tamaiti ?
I te tahi taime, e mea huru fa’atapitapi mana’o te reira mau ’īrava nō te mea mai te huru ra ē, tē ha’api’i ra Abinadi ē, hō’ē ā ta’ata ’o te Metua i te Ao ra ’e ’o Iesu Mesia, ’ua ’ite rā ho’i tātou e nā ta’ata tāa ’ē. E aha te aura’a o te parau a Abinadi ? ’Ua ha’api’i ’oia ē, e riro mai te Atua te Tamaiti—’o Iehova—i te Tāra’ehara (hi’o Mosia 15:1), i te nohora’a i roto i te tino ’i’o nei, i te rirora’a ’ei ta’ata i te hō’ē pae ’e ’ei Atua i te tahi atu pae (mau ’īrava 2–3). ’Ua auraro hope ’oia i te hina’aro o te Atua te Metua (mau ’īrava 5–9). Nō reira, ’o Iesu Mesia te Tamaiti a te Atua ’e te ti’a maita’i roa i ni’a i te fenua nei nō te Atua te Metua (hi’o Ioane 14:6–10).
’Ua fa’ata’a fa’ahou ā Abinadi ē, e Metua ato’a ’o Iesu Mesia, inaha ’ia fāri’i tātou i tāna tāra’ehara, tē riro nei tātou i « tōna hua’ai » (Mosia 15:11–12). E nehenehe e parau ē, tē fānau-fa’ahou-hia nei tātou i te pae vārua nā roto iāna (hi’o Mosia 5:7).
Hi’o ato’a Ioane 5:25–27 ; 8:28–29 ; 17:20–23 ; « The Father and the Son », Ensign, ’Ēperēra 2002, 12–18.
Mau mana’o nō tā te ’utuāfare tuatāpapara’a pāpa’ira’a mo’a ’e nō te pō ’utuāfare
’Ia tai’o ’outou i te mau pāpa’ira’a mo’a ’e te ’utuāfare, e nehenehe te Vārua e tauturu ia ’outou ’ia ’ite e aha te mau parau tumu e ha’afaufa’a ’e e ’āparau nō te pāhono i te mau hina’aro o te ’utuāfare. Teie te tahi mau mana’o.
Mosia 11–13 ; 17
E mau hi’ora’a fa’auru mau ’o Abinadi ’e ’o Alama nō te huna-’ore-ra’a i te parau mau, noa atu ā e ’ere i te ’ohipa au-roa-hia e te ta’ata. Penei a’e tē fa’aruru nei te mau melo o te ’utuāfare i te tūra’ira’a a te ta’ata ’ia ha’apa’o ’ore i te mau fa’aturera’a nō rātou. E aha tā rātou e nehenehe e ha’api’i mai nā roto mai ia Abinadi ’e ia Alama nō ni’a i tō rāua ti’ara’a atu nō te parau mau ? E nehenehe te hōho’a i ’āpitihia i teie arata’i ha’api’ira’a e tauturu i tō ’outou ’utuāfare ’ia hi’o mana’o i teie fa’ati’ara’a. ’Ia oti te tuatāpapara’a o teie mau pene, e nehenehe e ha’uti ta’ata ora i te mau ’ohipa e tupu nei i roto i te orara’a, ’ia ti’a i te mau melo o te ’utuāfare ’ia ha’api’ipi’i nāhea i te pāhono atu i te mau tūra’ira’a ’ia ha’apa’o ’ore i te mau fa’aturera’a nō rātou. ’Aore rā e nehenehe tā ’outou e fa’a’ite te tahi i te tahi i te mau ’ohipa i tupu nō ’outou i te ti’ara’a atu ’outou nō te parau mau.
Mosia 12:33–37 ; 13:11–24
E aha te aura’a o te parau, « pāpa’ihia i roto i tō [tātou] ’ā’au » te mau fa’auera’a a te Atua ? (Mosia 13:11). Penei a’e e nehenehe ’outou e pāpa’i i te tahi mau mana’o (’aore rā e pāpa’i hōho’a o tō ’outou mau mana’o) i ni’a i te hō’ē pāpie rahi tei tāpūpūhia i te hōho’a o te hō’ē māfatu. Nō te aha e mea faufa’a te mau fa’auera’a nō tātou ? Nāhea e ti’a ai ia tātou ’ia pāpa’i i te reira i roto i tō tātou ’ā’au ?
E ti’a i te tuatāpapara’a pāpa’ira’a mo’a ’ia tauturu ia tātou ’ia pāpa’i i te mau fa’auera’a i roto i tō tātou ’ā’au.
Mosia 14
I roto i teie pene, e ’ite mai ’outou e rave rahi mau ta’o ’e mau parau e fa’ahiti i te parau nō Iesu Mesia. Penei a’e e nehenehe tō ’outou ’utuāfare e tāpura i te reira, ’ia ’itehia mai te reira ’ia ’outou., E aha te mana’o te mau melo o te ’utuāfare nō ni’a i te Fa’aora ’a tuatāpapa ai tātou i teie mau ta’o ’e mau pereota ?
Mosia 15:26–27 ; 16:1–13
Tē fa’a’ite nei teie mau ’īrava i te mea e tupu i ni’a i te mau tamari’i a te Atua ’āhiri « ’aita [Iesu] i tae mai i te ao nei » (Mosia 16:6) ’aore rā mai te peu ’aita rātou i pe’e iāna. E aha te mau ’ohipa maita’i i tupu maoti tōna taera’a mai ’e tāna tara’ehara nō tātou ?
Nō te tahi atu ā mau mana’o nō te ha’api’ira’a i te mau tamari’i, hi’o i te arata’i ha’api’ira’a nō teie hepetoma i roto i te Mai, pe’e mai—nō te Paraimere.
Ha’amaita’ira’a i tā tātou ha’api’ira’a
Fa’a’ohipa i te mau ’ā’amu ’e te mau hi’ora’a nō te ha’api’i i te mau parau tumu nō te ’evanelia. Pinepine te Fa’aora i te ha’api’i i te mau parau tumu nō te ’evanelia nā roto i te mau ’ā’amu ’e te mau parabole. ’A feruri i te mau hi’ora’a ’e te mau ’ā’amu nō roto mai i tō ’outou iho orara’a e nehenehe e fa’aoraora i te hō’ē parau tumu nō te ’evanelia nō tō ’outou ’utuāfare (hi’o Ha’api’ira’a mai tā te Fa’aora, 22
’Ana’ana ihora tōna mata i te ’ana’ana rahi roa, nā Jeremy Winborg